Study
- Anukramaṇī
- Source
7 purumīl̤ahājamīl̤ahau sauhotrau| aśvinau| triṣṭup|
taṃ vā̱ṃ ratha̍ṃ va̱yama̱dyā hu̍vema pṛthu̱jraya̍maśvinā̱ saṃga̍ti̱ṃ goḥ |
yaḥ sū̱ryāṃ vaha̍ti vandhurā̱yurgirvā̍hasaṃ puru̱tama̍ṃ vasū̱yum
||1||तं वां॒ रथं॑ व॒यम॒द्या हु॑वेम पृथु॒ज्रय॑मश्विना॒ संग॑तिं॒ गोः ।
यः सू॒र्यां वह॑ति वन्धुरा॒युर्गिर्वा॑हसं पुरु॒तमं॑ वसू॒युम्
yu̱vaṃ śriya̍maśvinā de̱vatā̱ tāṃ divo̍ napātā vanatha̱: śacī̍bhiḥ |
yu̱vorvapu̍ra̱bhi pṛkṣa̍: sacante̱ vaha̍nti̱ yat ka̍ku̱hāso̱ rathe̍ vām
||2||यु॒वं श्रिय॑मश्विना दे॒वता॒ तां दिवो॑ नपाता वनथ॒: शची॑भिः ।
यु॒वोर्वपु॑र॒भि पृक्ष॑: सचन्ते॒ वह॑न्ति॒ यत् क॑कु॒हासो॒ रथे॑ वाम्
ko vā̍ma̱dyā ka̍rate rā̱taha̍vya ū̱taye̍ vā suta̱peyā̍ya vā̱rkaiḥ |
ṛ̱tasya̍ vā va̱nuṣe̍ pū̱rvyāya̱ namo̍ yemā̱no a̍śvi̱nā va̍vartat
||3||को वा॑म॒द्या क॑रते रा॒तह॑व्य ऊ॒तये॑ वा सुत॒पेया॑य वा॒र्कैः ।
ऋ॒तस्य॑ वा व॒नुषे॑ पू॒र्व्याय॒ नमो॑ येमा॒नो अ॑श्वि॒ना व॑वर्तत्
hi̱ra̱ṇyaye̍na purubhū̱ rathe̍ne̱maṃ ya̱jñaṃ nā̍sa̱tyopa̍ yātam |
pibā̍tha̱ inmadhu̍naḥ so̱myasya̱ dadha̍tho̱ ratna̍ṃ vidha̱te janā̍ya
||4||हि॒र॒ण्यये॑न पुरुभू॒ रथे॑ने॒मं य॒ज्ञं ना॑स॒त्योप॑ यातम् ।
पिबा॑थ॒ इन्मधु॑नः सो॒म्यस्य॒ दध॑थो॒ रत्नं॑ विध॒ते जना॑य
ā no̍ yātaṃ di̱vo acchā̍ pṛthi̱vyā hi̍ra̱ṇyaye̍na su̱vṛtā̱ rathe̍na |
mā vā̍ma̱nye ni ya̍man deva̱yanta̱: saṃ yad da̱de nābhi̍: pū̱rvyā vā̍m
||5||आ नो॑ यातं दि॒वो अच्छा॑ पृथि॒व्या हि॑र॒ण्यये॑न सु॒वृता॒ रथे॑न ।
मा वा॑म॒न्ये नि य॑मन् देव॒यन्त॒: सं यद् द॒दे नाभि॑: पू॒र्व्या वा॑म्
nū no̍ ra̱yiṃ pu̍ru̱vīra̍ṃ bṛ̱hanta̱ṃ dasrā̱ mimā̍thāmu̱bhaye̍ṣva̱sme |
naro̱ yad vā̍maśvinā̱ stoma̱māva̍n tsa̱dhastu̍timājamī̱l̤ahāso̍ agman
||6||नू नो॑ र॒यिं पु॑रु॒वीरं॑ बृ॒हन्तं॒ दस्रा॒ मिमा॑थामु॒भये॑ष्व॒स्मे ।
नरो॒ यद् वा॑मश्विना॒ स्तोम॒माव॑न् त्स॒धस्तु॑तिमाजमी॒ळहासो॑ अग्मन्
i̱heha̱ yad vā̍ṃ sama̱nā pa̍pṛ̱kṣe seyama̱sme su̍ma̱tirvā̍jaratnā |
u̱ru̱ṣyata̍ṃ jari̱tāra̍ṃ yu̱vaṃ ha̍ śri̱taḥ kāmo̍ nāsatyā yuva̱drik
||7||इ॒हेह॒ यद् वां॑ सम॒ना प॑पृ॒क्षे सेयम॒स्मे सु॑म॒तिर्वा॑जरत्ना ।
उ॒रु॒ष्यतं॑ जरि॒तारं॑ यु॒वं ह॑ श्रि॒तः कामो॑ नासत्या युव॒द्रिक्