Study
- Anukramaṇī
- Source
5 vāmadevo gautamaḥ| śyenaḥ, 5 indro vā| triṣṭup, 5 śakvarī|
garbhe̱ nu sannanve̍ṣāmavedama̱haṃ de̱vānā̱ṃ jani̍māni̱ viśvā̍ |
śa̱taṃ mā̱ pura̱ āya̍sīrarakṣa̱nnadha̍ śye̱no ja̱vasā̱ nira̍dīyam
||1||गर्भे॒ नु सन्नन्वे॑षामवेदम॒हं दे॒वानां॒ जनि॑मानि॒ विश्वा॑ ।
श॒तं मा॒ पुर॒ आय॑सीररक्ष॒न्नध॑ श्ये॒नो ज॒वसा॒ निर॑दीयम्
na ghā̱ sa māmapa̱ joṣa̍ṃ jabhārā̱'bhīmā̍sa̱ tvakṣa̍sā vī̱rye̍ṇa |
ī̱rmā pura̍ṃdhirajahā̱darā̍tīru̱ta vātā̍m̐ atara̱cchūśu̍vānaḥ
||2||न घा॒ स मामप॒ जोषं॑ जभारा॒ऽभीमा॑स॒ त्वक्ष॑सा वी॒र्ये॑ण ।
ई॒र्मा पुरं॑धिरजहा॒दरा॑तीरु॒त वाताँ॑ अतर॒च्छूशु॑वानः
ava̱ yacchye̱no asva̍nī̱dadha̱ dyorvi yad yadi̱ vāta̍ ū̱huḥ pura̍ṃdhim |
sṛ̱jad yada̍smā̱ ava̍ ha kṣi̱pajjyāṃ kṛ̱śānu̱rastā̱ mana̍sā bhura̱ṇyan
||3||अव॒ यच्छ्ये॒नो अस्व॑नी॒दध॒ द्योर्वि यद् यदि॒ वात॑ ऊ॒हुः पुरं॑धिम् ।
सृ॒जद् यद॑स्मा॒ अव॑ ह क्षि॒पज्ज्यां कृ॒शानु॒रस्ता॒ मन॑सा भुर॒ण्यन्
ṛ̱ji̱pya ī̱mindrā̍vato̱ na bhu̱jyuṃ śye̱no ja̍bhāra bṛha̱to adhi̱ ṣṇoḥ |
a̱ntaḥ pa̍tat pata̱trya̍sya pa̱rṇamadha̱ yāma̍ni̱ prasi̍tasya̱ tad veḥ
||4||ऋ॒जि॒प्य ई॒मिन्द्रा॑वतो॒ न भु॒ज्युं श्ये॒नो ज॑भार बृह॒तो अधि॒ ष्णोः ।
अ॒न्तः प॑तत् पत॒त्र्य॑स्य प॒र्णमध॒ याम॑नि॒ प्रसि॑तस्य॒ तद् वेः
adha̍ śve̱taṃ ka̱laśa̱ṃ gobhi̍ra̱ktamā̍pipyā̱naṃ ma̱ghavā̍ śu̱kramandha̍: |
a̱dhva̱ryubhi̱: praya̍ta̱ṃ madhvo̱ agra̱mindro̱ madā̍ya̱ prati̍ dha̱t piba̍dhyai̱ śūro̱ madā̍ya̱ prati̍ dha̱t piba̍dhyai
||5||अध॑ श्वे॒तं क॒लशं॒ गोभि॑र॒क्तमा॑पिप्या॒नं म॒घवा॑ शु॒क्रमन्ध॑: ।
अ॒ध्व॒र्युभि॒: प्रय॑तं॒ मध्वो॒ अग्र॒मिन्द्रो॒ मदा॑य॒ प्रति॑ ध॒त् पिब॑ध्यै॒ शूरो॒ मदा॑य॒ प्रति॑ ध॒त् पिब॑ध्यै