Study
- Anukramaṇī
- Source
11 vāmadevo gautamaḥ| indraḥ| triṣṭup|
ā yā̱tvindro'va̍sa̱ upa̍ na i̱ha stu̱taḥ sa̍dha̱māda̍stu̱ śūra̍: |
vā̱vṛ̱dhā̱nastavi̍ṣī̱ryasya̍ pū̱rvīrdyaurna kṣa̱trama̱bhibhū̍ti̱ puṣyā̍t
||1||आ या॒त्विन्द्रोऽव॑स॒ उप॑ न इ॒ह स्तु॒तः स॑ध॒माद॑स्तु॒ शूर॑: ।
वा॒वृ॒धा॒नस्तवि॑षी॒र्यस्य॑ पू॒र्वीर्द्यौर्न क्ष॒त्रम॒भिभू॑ति॒ पुष्या॑त्
tasyedi̱ha sta̍vatha̱ vṛṣṇyā̍ni tuvidyu̱mnasya̍ tuvi̱rādha̍so̱ nṝn |
yasya̱ kratu̍rvida̱thyo̱3 na sa̱mrāṭ sā̱hvāntaru̍tro a̱bhyasti̍ kṛ̱ṣṭīḥ
||2||तस्येदि॒ह स्त॑वथ॒ वृष्ण्या॑नि तुविद्यु॒म्नस्य॑ तुवि॒राध॑सो॒ नॄन् ।
यस्य॒ क्रतु॑र्विद॒थ्यो॒३ न स॒म्राट् सा॒ह्वान्तरु॑त्रो अ॒भ्यस्ति॑ कृ॒ष्टीः
ā yā̱tvindro̍ di̱va ā pṛ̍thi̱vyā ma̱kṣū sa̍mu̱drādu̱ta vā̱ purī̍ṣāt |
sva̍rṇarā̱dava̍se no ma̱rutvā̍n parā̱vato̍ vā̱ sada̍nādṛ̱tasya̍
||3||आ या॒त्विन्द्रो॑ दि॒व आ पृ॑थि॒व्या म॒क्षू स॑मु॒द्रादु॒त वा॒ पुरी॑षात् ।
स्व॑र्णरा॒दव॑से नो म॒रुत्वा॑न् परा॒वतो॑ वा॒ सद॑नादृ॒तस्य॑
sthū̱rasya̍ rā̱yo bṛ̍ha̱to ya īśe̱ tamu̍ ṣṭavāma vi̱dathe̱ṣvindra̍m |
yo vā̱yunā̱ jaya̍ti̱ goma̍tīṣu̱ pra dhṛ̍ṣṇu̱yā naya̍ti̱ vasyo̱ accha̍
||4||स्थू॒रस्य॑ रा॒यो बृ॑ह॒तो य ईशे॒ तमु॑ ष्टवाम वि॒दथे॒ष्विन्द्र॑म् ।
यो वा॒युना॒ जय॑ति॒ गोम॑तीषु॒ प्र धृ॑ष्णु॒या नय॑ति॒ वस्यो॒ अच्छ॑
upa̱ yo namo̱ nama̍si stabhā̱yanniya̍rti̱ vāca̍ṃ ja̱naya̱n yaja̍dhyai |
ṛ̱ñja̱sā̱naḥ pu̍ru̱vāra̍ u̱kthairendra̍ṃ kṛṇvīta̱ sada̍neṣu̱ hotā̍
||5||उप॒ यो नमो॒ नम॑सि स्तभा॒यन्निय॑र्ति॒ वाचं॑ ज॒नय॒न् यज॑ध्यै ।
ऋ॒ञ्ज॒सा॒नः पु॑रु॒वार॑ उ॒क्थैरेन्द्रं॑ कृण्वीत॒ सद॑नेषु॒ होता॑
dhi̱ṣā yadi̍ dhiṣa̱ṇyanta̍: sara̱ṇyān tsada̍nto̱ adri̍mauśi̱jasya̱ gohe̍ |
ā du̱roṣā̍: pā̱styasya̱ hotā̱ yo no̍ ma̱hān tsa̱ṃvara̍ṇeṣu̱ vahni̍:
||6||धि॒षा यदि॑ धिष॒ण्यन्त॑: सर॒ण्यान् त्सद॑न्तो॒ अद्रि॑मौशि॒जस्य॒ गोहे॑ ।
आ दु॒रोषा॑: पा॒स्त्यस्य॒ होता॒ यो नो॑ म॒हान् त्सं॒वर॑णेषु॒ वह्नि॑:
sa̱trā yadī̍ṃ bhārva̱rasya̱ vṛṣṇa̱: siṣa̍kti̱ śuṣma̍: stuva̱te bharā̍ya |
guhā̱ yadī̍mauśi̱jasya̱ gohe̱ pra yad dhi̱ye prāya̍se̱ madā̍ya
||7||स॒त्रा यदीं॑ भार्व॒रस्य॒ वृष्ण॒: सिष॑क्ति॒ शुष्म॑: स्तुव॒ते भरा॑य ।
गुहा॒ यदी॑मौशि॒जस्य॒ गोहे॒ प्र यद् धि॒ये प्राय॑से॒ मदा॑य
vi yad varā̍ṃsi̱ parva̍tasya vṛ̱ṇve payo̍bhirji̱nve a̱pāṃ javā̍ṃsi |
vi̱dad gau̱rasya̍ gava̱yasya̱ gohe̱ yadī̱ vājā̍ya su̱dhyo̱3 vaha̍nti
||8||वि यद् वरां॑सि॒ पर्व॑तस्य वृ॒ण्वे पयो॑भिर्जि॒न्वे अ॒पां जवां॑सि ।
वि॒दद् गौ॒रस्य॑ गव॒यस्य॒ गोहे॒ यदी॒ वाजा॑य सु॒ध्यो॒३ वह॑न्ति
bha̱drā te̱ hastā̱ sukṛ̍to̱ta pā̱ṇī pra̍ya̱ntārā̍ stuva̱te rādha̍ indra |
kā te̱ niṣa̍tti̱: kimu̱ no ma̍matsi̱ kiṃ nodu̍du harṣase̱ dāta̱vā u̍
||9||भ॒द्रा ते॒ हस्ता॒ सुकृ॑तो॒त पा॒णी प्र॑य॒न्तारा॑ स्तुव॒ते राध॑ इन्द्र ।
का ते॒ निष॑त्ति॒: किमु॒ नो म॑मत्सि॒ किं नोदु॑दु हर्षसे॒ दात॒वा उ॑
e̱vā vasva̱ indra̍: sa̱tyaḥ sa̱mrāḍḍhantā̍ vṛ̱traṃ vari̍vaḥ pū̱rave̍ kaḥ |
puru̍ṣṭuta̱ kratvā̍ naḥ śagdhi rā̱yo bha̍kṣī̱ya te'va̍so̱ daivya̍sya
||10||ए॒वा वस्व॒ इन्द्र॑: स॒त्यः स॒म्राड्ढन्ता॑ वृ॒त्रं वरि॑वः पू॒रवे॑ कः ।
पुरु॑ष्टुत॒ क्रत्वा॑ नः शग्धि रा॒यो भ॑क्षी॒य तेऽव॑सो॒ दैव्य॑स्य
nū ṣṭu̱ta i̍ndra̱ nū gṛ̍ṇā̱na iṣa̍ṃ jari̱tre na̱dyo̱3 na pī̍peḥ |
akā̍ri te harivo̱ brahma̱ navya̍ṃ dhi̱yā syā̍ma ra̱thya̍: sadā̱sāḥ
||11||नू ष्टु॒त इ॑न्द्र॒ नू गृ॑णा॒न इषं॑ जरि॒त्रे न॒द्यो॒३ न पी॑पेः ।
अका॑रि ते हरिवो॒ ब्रह्म॒ नव्यं॑ धि॒या स्या॑म र॒थ्य॑: सदा॒साः