Study
- Anukramaṇī
- Source
24 vāmadevo gautamaḥ| indraḥ, 23-24 indrāśvau| gāyatrī|
ā tū na̍ indra vṛtrahanna̱smāka̍ma̱rdhamā ga̍hi | ma̱hānma̱hībhi̍rū̱tibhi̍:
||1||आ तू न॑ इन्द्र वृत्रहन्न॒स्माक॑म॒र्धमा ग॑हि । म॒हान्म॒हीभि॑रू॒तिभि॑:
bhṛmi̍ścid ghāsi̱ tūtu̍ji̱rā ci̍tra ci̱triṇī̱ṣvā | ci̱traṃ kṛ̍ṇoṣyū̱taye̍
||2||भृमि॑श्चिद् घासि॒ तूतु॑जि॒रा चि॑त्र चि॒त्रिणी॒ष्वा । चि॒त्रं कृ॑णोष्यू॒तये॑
da̱bhrebhi̍ści̱cchaśī̍yāṃsa̱ṃ haṃsi̱ vrādha̍nta̱moja̍sā | sakhi̍bhi̱rye tve sacā̍
||3||द॒भ्रेभि॑श्चि॒च्छशी॑यांसं॒ हंसि॒ व्राध॑न्त॒मोज॑सा । सखि॑भि॒र्ये त्वे सचा॑
va̱yami̍ndra̱ tve sacā̍ va̱yaṃ tvā̱bhi no̍numaḥ | a̱smām̐a̍smā̱m̐ iduda̍va
||4||व॒यमि॑न्द्र॒ त्वे सचा॑ व॒यं त्वा॒भि नो॑नुमः । अ॒स्माँअ॑स्माँ॒ इदुद॑व
sa na̍ści̱trābhi̍radrivo'nava̱dyābhi̍rū̱tibhi̍: | anā̍dhṛṣṭābhi̱rā ga̍hi
||5||स न॑श्चि॒त्राभि॑रद्रिवोऽनव॒द्याभि॑रू॒तिभि॑: । अना॑धृष्टाभि॒रा ग॑हि
bhū̱yāmo̱ ṣu tvāva̍ta̱: sakhā̍ya indra̱ goma̍taḥ | yujo̱ vājā̍ya̱ ghṛṣva̍ye
||6||भू॒यामो॒ षु त्वाव॑त॒: सखा॑य इन्द्र॒ गोम॑तः । युजो॒ वाजा॑य॒ घृष्व॑ये
tvaṃ hyeka̱ īśi̍ṣa̱ indra̱ vāja̍sya̱ goma̍taḥ | sa no̍ yandhi ma̱hīmiṣa̍m
||7||त्वं ह्येक॒ ईशि॑ष॒ इन्द्र॒ वाज॑स्य॒ गोम॑तः । स नो॑ यन्धि म॒हीमिष॑म्
na tvā̍ varante a̱nyathā̱ yad ditsa̍si stu̱to ma̱gham | sto̱tṛbhya̍ indra girvaṇaḥ
||8||न त्वा॑ वरन्ते अ॒न्यथा॒ यद् दित्स॑सि स्तु॒तो म॒घम् । स्तो॒तृभ्य॑ इन्द्र गिर्वणः
a̱bhi tvā̱ gota̍mā gi̱rānū̍ṣata̱ pra dā̱vane̍ | indra̱ vājā̍ya̱ ghṛṣva̍ye
||9||अ॒भि त्वा॒ गोत॑मा गि॒रानू॑षत॒ प्र दा॒वने॑ । इन्द्र॒ वाजा॑य॒ घृष्व॑ये
pra te̍ vocāma vī̱ryā̱3 yā ma̍ndasā̱na āru̍jaḥ | puro̱ dāsī̍ra̱bhītya̍
||10||प्र ते॑ वोचाम वी॒र्या॒३ या म॑न्दसा॒न आरु॑जः । पुरो॒ दासी॑र॒भीत्य॑
tā te̍ gṛṇanti ve̱dhaso̱ yāni̍ ca̱kartha̱ pauṃsyā̍ | su̱teṣvi̍ndra girvaṇaḥ
||11||ता ते॑ गृणन्ति वे॒धसो॒ यानि॑ च॒कर्थ॒ पौंस्या॑ । सु॒तेष्वि॑न्द्र गिर्वणः
avī̍vṛdhanta̱ gota̍mā̱ indra̱ tve stoma̍vāhasaḥ | aiṣu̍ dhā vī̱rava̱d yaśa̍:
||12||अवी॑वृधन्त॒ गोत॑मा॒ इन्द्र॒ त्वे स्तोम॑वाहसः । ऐषु॑ धा वी॒रव॒द् यश॑:
yacci̱ddhi śaśva̍tā̱masīndra̱ sādhā̍raṇa̱stvam | taṃ tvā̍ va̱yaṃ ha̍vāmahe
||13||यच्चि॒द्धि शश्व॑ता॒मसीन्द्र॒ साधा॑रण॒स्त्वम् । तं त्वा॑ व॒यं ह॑वामहे
a̱rvā̱cī̱no va̍so bhavā̱'sme su ma̱tsvāndha̍saḥ | somā̍nāmindra somapāḥ
||14||अ॒र्वा॒ची॒नो व॑सो भवा॒ऽस्मे सु म॒त्स्वान्ध॑सः । सोमा॑नामिन्द्र सोमपाः
a̱smāka̍ṃ tvā matī̱nāmā stoma̍ indra yacchatu | a̱rvāgā va̍rtayā̱ harī̍
||15||अ॒स्माकं॑ त्वा मती॒नामा स्तोम॑ इन्द्र यच्छतु । अ॒र्वागा व॑र्तया॒ हरी॑
pu̱ro̱l̤āśa̍ṃ ca no̱ ghaso̍ jo̱ṣayā̍se̱ gira̍śca naḥ | va̱dhū̱yuri̍va̱ yoṣa̍ṇām
||16||पु॒रो॒ळाशं॑ च नो॒ घसो॑ जो॒षया॑से॒ गिर॑श्च नः । व॒धू॒युरि॑व॒ योष॑णाम्
sa̱hasra̱ṃ vyatī̍nāṃ yu̱ktānā̱mindra̍mīmahe | śa̱taṃ soma̍sya khā̱rya̍:
||17||स॒हस्रं॒ व्यती॑नां यु॒क्ताना॒मिन्द्र॑मीमहे । श॒तं सोम॑स्य खा॒र्य॑:
sa̱hasrā̍ te śa̱tā va̱yaṃ gavā̱mā cyā̍vayāmasi | a̱sma̱trā rādha̍ etu te
||18||स॒हस्रा॑ ते श॒ता व॒यं गवा॒मा च्या॑वयामसि । अ॒स्म॒त्रा राध॑ एतु ते
daśa̍ te ka̱laśā̍nā̱ṃ hira̍ṇyānāmadhīmahi | bhū̱ri̱dā a̍si vṛtrahan
||19||दश॑ ते क॒लशा॑नां॒ हिर॑ण्यानामधीमहि । भू॒रि॒दा अ॑सि वृत्रहन्
bhūri̍dā̱ bhūri̍ dehi no̱ mā da̱bhraṃ bhūryā bha̍ra | bhūri̱ ghedi̍ndra ditsasi
||20||भूरि॑दा॒ भूरि॑ देहि नो॒ मा द॒भ्रं भूर्या भ॑र । भूरि॒ घेदि॑न्द्र दित्ससि
bhū̱ri̱dā hyasi̍ śru̱taḥ pu̍ru̱trā śū̍ra vṛtrahan | ā no̍ bhajasva̱ rādha̍si
||21||भू॒रि॒दा ह्यसि॑ श्रु॒तः पु॑रु॒त्रा शू॑र वृत्रहन् । आ नो॑ भजस्व॒ राध॑सि
pra te̍ ba̱bhrū vi̍cakṣaṇa̱ śaṃsā̍mi goṣaṇo napāt | mābhyā̱ṃ gā anu̍ śiśrathaḥ
||22||प्र ते॑ ब॒भ्रू वि॑चक्षण॒ शंसा॑मि गोषणो नपात् । माभ्यां॒ गा अनु॑ शिश्रथः
ka̱nī̱na̱keva̍ vidra̱dhe nave̍ drupa̱de a̍rbha̱ke | ba̱bhrū yāme̍ṣu śobhete
||23||क॒नी॒न॒केव॑ विद्र॒धे नवे॑ द्रुप॒दे अ॑र्भ॒के । ब॒भ्रू यामे॑षु शोभेते
ara̍ṃ ma u̱srayā̱mṇe'ra̱manu̍srayāmṇe | ba̱bhrū yāme̍ṣva̱sridhā̍
||24||अरं॑ म उ॒स्रया॒म्णेऽर॒मनु॑स्रयाम्णे । ब॒भ्रू यामे॑ष्व॒स्रिधा॑