Study
- Anukramaṇī
- Source
6 vāmadevo gautamaḥ| dadhikrāḥ| triṣṭup, 6 anuṣṭup|
ā̱śuṃ da̍dhi̱krāṃ tamu̱ nu ṣṭa̍vāma di̱vaspṛ̍thi̱vyā u̱ta ca̍rkirāma |
u̱cchantī̱rmāmu̱ṣasa̍: sūdaya̱ntvati̱ viśvā̍ni duri̱tāni̍ parṣan
||1||आ॒शुं द॑धि॒क्रां तमु॒ नु ष्ट॑वाम दि॒वस्पृ॑थि॒व्या उ॒त च॑र्किराम ।
उ॒च्छन्ती॒र्मामु॒षस॑: सूदय॒न्त्वति॒ विश्वा॑नि दुरि॒तानि॑ पर्षन्
ma̱haśca̍rka̱rmyarva̍taḥ kratu̱prā da̍dhi̱krāvṇa̍: puru̱vāra̍sya̱ vṛṣṇa̍: |
yaṃ pū̱rubhyo̍ dīdi̱vāṃsa̱ṃ nāgniṃ da̱dathu̍rmitrāvaruṇā̱ tatu̍rim
||2||म॒हश्च॑र्क॒र्म्यर्व॑तः क्रतु॒प्रा द॑धि॒क्राव्ण॑: पुरु॒वार॑स्य॒ वृष्ण॑: ।
यं पू॒रुभ्यो॑ दीदि॒वांसं॒ नाग्निं द॒दथु॑र्मित्रावरुणा॒ ततु॑रिम्
yo aśva̍sya dadhi̱krāvṇo̱ akā̍rī̱t sami̍ddhe a̱gnā u̱ṣaso̱ vyu̍ṣṭau |
anā̍gasa̱ṃ tamadi̍tiḥ kṛṇotu̱ sa mi̱treṇa̱ varu̍ṇenā sa̱joṣā̍:
||3||यो अश्व॑स्य दधि॒क्राव्णो॒ अका॑री॒त् समि॑द्धे अ॒ग्ना उ॒षसो॒ व्यु॑ष्टौ ।
अना॑गसं॒ तमदि॑तिः कृणोतु॒ स मि॒त्रेण॒ वरु॑णेना स॒जोषा॑:
da̱dhi̱krāvṇa̍ i̱ṣa ū̱rjo ma̱ho yadama̍nmahi ma̱rutā̱ṃ nāma̍ bha̱dram |
sva̱staye̱ varu̍ṇaṃ mi̱trama̱gniṃ havā̍maha̱ indra̱ṃ vajra̍bāhum
||4||द॒धि॒क्राव्ण॑ इ॒ष ऊ॒र्जो म॒हो यदम॑न्महि म॒रुतां॒ नाम॑ भ॒द्रम् ।
स्व॒स्तये॒ वरु॑णं मि॒त्रम॒ग्निं हवा॑मह॒ इन्द्रं॒ वज्र॑बाहुम्
indra̍mi̱vedu̱bhaye̱ vi hva̍yanta u̱dīrā̍ṇā ya̱jñamu̍papra̱yanta̍: |
da̱dhi̱krāmu̱ sūda̍na̱ṃ martyā̍ya da̱dathu̍rmitrāvaruṇā no̱ aśva̍m
||5||इन्द्र॑मि॒वेदु॒भये॒ वि ह्व॑यन्त उ॒दीरा॑णा य॒ज्ञमु॑पप्र॒यन्त॑: ।
द॒धि॒क्रामु॒ सूद॑नं॒ मर्त्या॑य द॒दथु॑र्मित्रावरुणा नो॒ अश्व॑म्
da̱dhi̱krāvṇo̍ akāriṣaṃ ji̱ṣṇoraśva̍sya vā̱jina̍: |
su̱ra̱bhi no̱ mukhā̍ kara̱t pra ṇa̱ āyū̍ṃṣi tāriṣat
||6||द॒धि॒क्राव्णो॑ अकारिषं जि॒ष्णोरश्व॑स्य वा॒जिन॑: ।
सु॒र॒भि नो॒ मुखा॑ कर॒त् प्र ण॒ आयूं॑षि तारिषत्