Sūktam 36 — anaśvo (9 mantras) — Śākala Saṃhitā (Ṛgveda)

Study

a̱na̱śvo jā̱to a̍nabhī̱śuru̱kthyo̱3 ratha̍strica̱kraḥ pari̍ vartate̱ raja̍: |

ma̱hat tadvo̍ de̱vya̍sya pra̱vāca̍na̱ṃ dyāmṛ̍bhavaḥ pṛthi̱vīṃ yacca̱ puṣya̍tha

||1||

अ॒न॒श्वो जा॒तो अ॑नभी॒शुरु॒क्थ्यो॒३ रथ॑स्त्रिच॒क्रः परि॑ वर्तते॒ रज॑: ।

म॒हत् तद्वो॑ दे॒व्य॑स्य प्र॒वाच॑नं॒ द्यामृ॑भवः पृथि॒वीं यच्च॒ पुष्य॑थ

ratha̱ṃ ye ca̱kruḥ su̱vṛta̍ṃ su̱ceta̱so'vi̍hvaranta̱ṃ mana̍sa̱spari̱ dhyayā̍ |

tām̐ ū̱ nva1sya sava̍nasya pī̱taya̱ ā vo̍ vājā ṛbhavo vedayāmasi

||2||

रथं॒ ये च॒क्रुः सु॒वृतं॑ सु॒चेत॒सोऽवि॑ह्वरन्तं॒ मन॑स॒स्परि॒ ध्यया॑ ।

ताँ ऊ॒ न्व१स्य सव॑नस्य पी॒तय॒ आ वो॑ वाजा ऋभवो वेदयामसि

tad vo̍ vājā ṛbhavaḥ supravāca̱naṃ de̱veṣu̍ vibhvo abhavanmahitva̱nam |

jivrī̱ yat santā̍ pi̱tarā̍ sanā̱jurā̱ puna̱ryuvā̍nā ca̱rathā̍ya̱ takṣa̍tha

||3||

तद् वो॑ वाजा ऋभवः सुप्रवाच॒नं दे॒वेषु॑ विभ्वो अभवन्महित्व॒नम् ।

जिव्री॒ यत् सन्ता॑ पि॒तरा॑ सना॒जुरा॒ पुन॒र्युवा॑ना च॒रथा॑य॒ तक्ष॑थ

eka̱ṃ vi ca̍kra cama̱saṃ catu̍rvaya̱ṃ niścarma̍ṇo̱ gāma̍riṇīta dhī̱tibhi̍: |

athā̍ de̱veṣva̍mṛta̱tvamā̍naśa śru̱ṣṭī vā̍jā ṛbhava̱stad va̍ u̱kthya̍m

||4||

एकं॒ वि च॑क्र चम॒सं चतु॑र्वयं॒ निश्चर्म॑णो॒ गाम॑रिणीत धी॒तिभि॑: ।

अथा॑ दे॒वेष्व॑मृत॒त्वमा॑नश श्रु॒ष्टी वा॑जा ऋभव॒स्तद् व॑ उ॒क्थ्य॑म्

ṛ̱bhu̱to ra̱yiḥ pra̍tha̱maśra̍vastamo̱ vāja̍śrutāso̱ yamajī̍jana̱n nara̍: |

vi̱bhva̱ta̱ṣṭo vi̱dathe̍ṣu pra̱vācyo̱ yaṃ de̍vā̱so'va̍thā̱ sa vica̍rṣaṇiḥ

||5||

ऋ॒भु॒तो र॒यिः प्र॑थ॒मश्र॑वस्तमो॒ वाज॑श्रुतासो॒ यमजी॑जन॒न् नर॑: ।

वि॒भ्व॒त॒ष्टो वि॒दथे॑षु प्र॒वाच्यो॒ यं दे॑वा॒सोऽव॑था॒ स विच॑र्षणिः

sa vā̱jyarvā̱ sa ṛṣi̍rvaca̱syayā̱ sa śūro̱ astā̱ pṛta̍nāsu du̱ṣṭara̍: |

sa rā̱yaspoṣa̱ṃ sa su̱vīrya̍ṃ dadhe̱ yaṃ vājo̱ vibhvā̍m̐ ṛ̱bhavo̱ yamāvi̍ṣuḥ

||6||

स वा॒ज्यर्वा॒ स ऋषि॑र्वच॒स्यया॒ स शूरो॒ अस्ता॒ पृत॑नासु दु॒ष्टर॑: ।

स रा॒यस्पोषं॒ स सु॒वीर्यं॑ दधे॒ यं वाजो॒ विभ्वाँ॑ ऋ॒भवो॒ यमावि॑षुः

śreṣṭha̍ṃ va̱: peśo̱ adhi̍ dhāyi darśa̱taṃ stomo̍ vājā ṛbhava̱staṃ ju̍juṣṭana |

dhīrā̍so̱ hi ṣṭhā ka̱vayo̍ vipa̱ścita̱stān va̍ e̱nā brahma̱ṇā ve̍dayāmasi

||7||

श्रेष्ठं॑ व॒: पेशो॒ अधि॑ धायि दर्श॒तं स्तोमो॑ वाजा ऋभव॒स्तं जु॑जुष्टन ।

धीरा॑सो॒ हि ष्ठा क॒वयो॑ विप॒श्चित॒स्तान् व॑ ए॒ना ब्रह्म॒णा वे॑दयामसि

yū̱yama̱smabhya̍ṃ dhi̱ṣaṇā̍bhya̱spari̍ vi̱dvāṃso̱ viśvā̱ naryā̍ṇi̱ bhoja̍nā |

dyu̱manta̱ṃ vāja̱ṃ vṛṣa̍śuṣmamutta̱mamā no̍ ra̱yimṛ̍bhavastakṣa̱tā vaya̍:

||8||

यू॒यम॒स्मभ्यं॑ धि॒षणा॑भ्य॒स्परि॑ वि॒द्वांसो॒ विश्वा॒ नर्या॑णि॒ भोज॑ना ।

द्यु॒मन्तं॒ वाजं॒ वृष॑शुष्ममुत्त॒ममा नो॑ र॒यिमृ॑भवस्तक्ष॒ता वय॑:

i̱ha pra̱jāmi̱ha ra̱yiṃ rarā̍ṇā i̱ha śravo̍ vī̱rava̍t takṣatā naḥ |

yena̍ va̱yaṃ ci̱taye̱mātya̱nyān taṃ vāja̍ṃ ci̱tramṛ̍bhavo dadā naḥ

||9||

इ॒ह प्र॒जामि॒ह र॒यिं ररा॑णा इ॒ह श्रवो॑ वी॒रव॑त् तक्षता नः ।

येन॑ व॒यं चि॒तये॒मात्य॒न्यान् तं वाजं॑ चि॒त्रमृ॑भवो ददा नः