Study
- Anukramaṇī
- Source
11 vāmadevo gautamaḥ| indraḥ| triṣṭup, 10 anuṣṭup |
kā su̍ṣṭu̱tiḥ śava̍saḥ sū̱numindra̍marvācī̱naṃ rādha̍sa̱ ā va̍vartat |
da̱dirhi vī̱ro gṛ̍ṇa̱te vasū̍ni̱ sa gopa̍tirni̱ṣṣidhā̍ṃ no janāsaḥ
||1||का सु॑ष्टु॒तिः शव॑सः सू॒नुमिन्द्र॑मर्वाची॒नं राध॑स॒ आ व॑वर्तत् ।
द॒दिर्हि वी॒रो गृ॑ण॒ते वसू॑नि॒ स गोप॑तिर्नि॒ष्षिधां॑ नो जनासः
sa vṛ̍tra̱hatye̱ havya̱: sa īḍya̱: sa suṣṭu̍ta̱ indra̍: sa̱tyarā̍dhāḥ |
sa yāma̱nnā ma̱ghavā̱ martyā̍ya brahmaṇya̱te suṣva̍ye̱ vari̍vo dhāt
||2||स वृ॑त्र॒हत्ये॒ हव्य॒: स ईड्य॒: स सुष्टु॑त॒ इन्द्र॑: स॒त्यरा॑धाः ।
स याम॒न्ना म॒घवा॒ मर्त्या॑य ब्रह्मण्य॒ते सुष्व॑ये॒ वरि॑वो धात्
taminnaro̱ vi hva̍yante samī̱ke ri̍ri̱kvāṃsa̍sta̱nva̍: kṛṇvata̱ trām |
mi̱tho yat tyā̱gamu̱bhayā̍so̱ agma̱n nara̍sto̱kasya̱ tana̍yasya sā̱tau
||3||तमिन्नरो॒ वि ह्व॑यन्ते समी॒के रि॑रि॒क्वांस॑स्त॒न्व॑: कृण्वत॒ त्राम् ।
मि॒थो यत् त्या॒गमु॒भया॑सो॒ अग्म॒न् नर॑स्तो॒कस्य॒ तन॑यस्य सा॒तौ
kra̱tū̱yanti̍ kṣi̱tayo̱ yoga̍ ugrā''śuṣā̱ṇāso̍ mi̱tho arṇa̍sātau |
saṃ yad viśo'va̍vṛtranta yu̱dhmā ādinnema̍ indrayante a̱bhīke̍
||4||क्र॒तू॒यन्ति॑ क्षि॒तयो॒ योग॑ उग्राऽऽशुषा॒णासो॑ मि॒थो अर्ण॑सातौ ।
सं यद् विशोऽव॑वृत्रन्त यु॒ध्मा आदिन्नेम॑ इन्द्रयन्ते अ॒भीके॑
ādiddha̱ nema̍ indri̱yaṃ ya̍janta̱ ādit pa̱ktiḥ pu̍ro̱l̤āśa̍ṃ riricyāt |
ādit somo̱ vi pa̍pṛcyā̱dasu̍ṣvī̱nādijju̍joṣa vṛṣa̱bhaṃ yaja̍dhyai
||5||आदिद्ध॒ नेम॑ इन्द्रि॒यं य॑जन्त॒ आदित् प॒क्तिः पु॑रो॒ळाशं॑ रिरिच्यात् ।
आदित् सोमो॒ वि प॑पृच्या॒दसु॑ष्वी॒नादिज्जु॑जोष वृष॒भं यज॑ध्यै
kṛ̱ṇotya̍smai̱ vari̍vo̱ ya i̱tthendrā̍ya̱ soma̍muśa̱te su̱noti̍ |
sa̱dhrī̱cīne̍na̱ mana̱sāvi̍vena̱n tamit sakhā̍yaṃ kṛṇute sa̱matsu̍
||6||कृ॒णोत्य॑स्मै॒ वरि॑वो॒ य इ॒त्थेन्द्रा॑य॒ सोम॑मुश॒ते सु॒नोति॑ ।
स॒ध्री॒चीने॑न॒ मन॒सावि॑वेन॒न् तमित् सखा॑यं कृणुते स॒मत्सु॑
ya indrā̍ya su̱nava̱t soma̍ma̱dya pacā̍t pa̱ktīru̱ta bhṛ̱jjāti̍ dhā̱nāḥ |
prati̍ manā̱yoru̱cathā̍ni̱ harya̱n tasmi̍n dadha̱d vṛṣa̍ṇa̱ṃ śuṣma̱mindra̍:
||7||य इन्द्रा॑य सु॒नव॒त् सोम॑म॒द्य पचा॑त् प॒क्तीरु॒त भृ॒ज्जाति॑ धा॒नाः ।
प्रति॑ मना॒योरु॒चथा॑नि॒ हर्य॒न् तस्मि॑न् दध॒द् वृष॑णं॒ शुष्म॒मिन्द्र॑:
ya̱dā sa̍ma̱ryaṃ vyace̱dṛghā̍vā dī̱rghaṃ yadā̱jima̱bhyakhya̍da̱ryaḥ |
aci̍krada̱d vṛṣa̍ṇa̱ṃ patnyacchā̍ duro̱ṇa ā niśi̍taṃ soma̱sudbhi̍:
||8||य॒दा स॑म॒र्यं व्यचे॒दृघा॑वा दी॒र्घं यदा॒जिम॒भ्यख्य॑द॒र्यः ।
अचि॑क्रद॒द् वृष॑णं॒ पत्न्यच्छा॑ दुरो॒ण आ निशि॑तं सोम॒सुद्भि॑:
bhūya̍sā va̱snama̍cara̱t kanī̱yo'vi̍krīto akāniṣa̱ṃ puna̱ryan |
sa bhūya̍sā̱ kanī̍yo̱ nāri̍recīd dī̱nā dakṣā̱ vi du̍hanti̱ pra vā̱ṇam
||9||भूय॑सा व॒स्नम॑चर॒त् कनी॒योऽवि॑क्रीतो अकानिषं॒ पुन॒र्यन् ।
स भूय॑सा॒ कनी॑यो॒ नारि॑रेचीद् दी॒ना दक्षा॒ वि दु॑हन्ति॒ प्र वा॒णम्
ka i̱maṃ da̱śabhi̱rmamendra̍ṃ krīṇāti dhe̱nubhi̍: |
ya̱dā vṛ̱trāṇi̱ jaṅgha̍na̱dathai̍naṃ me̱ puna̍rdadat
||10||क इ॒मं द॒शभि॒र्ममेन्द्रं॑ क्रीणाति धे॒नुभि॑: ।
य॒दा वृ॒त्राणि॒ जङ्घ॑न॒दथै॑नं मे॒ पुन॑र्ददत्
nū ṣṭu̱ta i̍ndra̱ nū gṛ̍ṇā̱na iṣa̍ṃ jari̱tre na̱dyo̱3 na pī̍peḥ |
akā̍ri te harivo̱ brahma̱ navya̍ṃ dhi̱yā syā̍ma ra̱thya̍: sadā̱sāḥ
||11||नू ष्टु॒त इ॑न्द्र॒ नू गृ॑णा॒न इषं॑ जरि॒त्रे न॒द्यो॒३ न पी॑पेः ।
अका॑रि ते हरिवो॒ ब्रह्म॒ नव्यं॑ धि॒या स्या॑म र॒थ्य॑: सदा॒साः