Study
- Anukramaṇī
- Source
5 vāmadevo gautamaḥ| agniḥ(liṅgoktadevatā iti eke)|triṣṭup|
pratya̱gniru̱ṣaso̍ jā̱tave̍dā̱ akhya̍d de̱vo roca̍mānā̱ maho̍bhiḥ |
ā nā̍satyorugā̱yā rathe̍ne̱maṃ ya̱jñamupa̍ no yāta̱maccha̍
||1||प्रत्य॒ग्निरु॒षसो॑ जा॒तवे॑दा॒ अख्य॑द् दे॒वो रोच॑माना॒ महो॑भिः ।
आ ना॑सत्योरुगा॒या रथे॑ने॒मं य॒ज्ञमुप॑ नो यात॒मच्छ॑
ū̱rdhvaṃ ke̱tuṃ sa̍vi̱tā de̱vo a̍śre̱jjyoti̱rviśva̍smai̱ bhuva̍nāya kṛ̱ṇvan |
āprā̱ dyāvā̍pṛthi̱vī a̱ntari̍kṣa̱ṃ vi sūryo̍ ra̱śmibhi̱śceki̍tānaḥ
||2||ऊ॒र्ध्वं के॒तुं स॑वि॒ता दे॒वो अ॑श्रे॒ज्ज्योति॒र्विश्व॑स्मै॒ भुव॑नाय कृ॒ण्वन् ।
आप्रा॒ द्यावा॑पृथि॒वी अ॒न्तरि॑क्षं॒ वि सूर्यो॑ र॒श्मिभि॒श्चेकि॑तानः
ā̱vaha̍ntyaru̱ṇīrjyoti̱ṣāgā̍nma̱hī ci̱trā ra̱śmibhi̱śceki̍tānā |
pra̱bo̱dhaya̍ntī suvi̱tāya̍ de̱vyu1ṣā ī̍yate su̱yujā̱ rathe̍na
||3||आ॒वह॑न्त्यरु॒णीर्ज्योति॒षागा॑न्म॒ही चि॒त्रा र॒श्मिभि॒श्चेकि॑ताना ।
प्र॒बो॒धय॑न्ती सुवि॒ताय॑ दे॒व्यु१षा ई॑यते सु॒युजा॒ रथे॑न
ā vā̱ṃ vahi̍ṣṭhā i̱ha te va̍hantu̱ rathā̱ aśvā̍sa u̱ṣaso̱ vyu̍ṣṭau |
i̱me hi vā̍ṃ madhu̱peyā̍ya̱ somā̍ a̱smin ya̱jñe vṛ̍ṣaṇā mādayethām
||4||आ वां॒ वहि॑ष्ठा इ॒ह ते व॑हन्तु॒ रथा॒ अश्वा॑स उ॒षसो॒ व्यु॑ष्टौ ।
इ॒मे हि वां॑ मधु॒पेया॑य॒ सोमा॑ अ॒स्मिन् य॒ज्ञे वृ॑षणा मादयेथाम्
anā̍yato̱ ani̍baddhaḥ ka̱thāyaṃ nya̍ṅṅuttā̱no'va̍ padyate̱ na |
kayā̍ yāti sva̱dhayā̱ ko da̍darśa di̱vaḥ ska̱mbhaḥ samṛ̍taḥ pāti̱ nāka̍m
||5||अना॑यतो॒ अनि॑बद्धः क॒थायं न्य॑ङ्ङुत्ता॒नोऽव॑ पद्यते॒ न ।
कया॑ याति स्व॒धया॒ को द॑दर्श दि॒वः स्क॒म्भः समृ॑तः पाति॒ नाक॑म्