Study
- Anukramaṇī
- Source
13 vāmadevo gautamaḥ, 1 indraḥ,4 (uttarārdharcasya), 7 aditiḥ| 1 vāmadevaḥ, 2-4 (pūrvārdharcasya), 8-13 indraḥ,(uttarārdharcasya), 7 vāmadevaḥ| triṣṭup|
a̱yaṃ panthā̱ anu̍vittaḥ purā̱ṇo yato̍ de̱vā u̱dajā̍yanta̱ viśve̍ |
ata̍ści̱dā ja̍niṣīṣṭa̱ pravṛ̍ddho̱ mā mā̱tara̍mamu̱yā patta̍ve kaḥ
||1||अ॒यं पन्था॒ अनु॑वित्तः पुरा॒णो यतो॑ दे॒वा उ॒दजा॑यन्त॒ विश्वे॑ ।
अत॑श्चि॒दा ज॑निषीष्ट॒ प्रवृ॑द्धो॒ मा मा॒तर॑ममु॒या पत्त॑वे कः
nāhamato̱ nira̍yā du̱rgahai̱tat ti̍ra̱ścatā̍ pā̱rśvānnirga̍māṇi |
ba̱hūni̍ me̱ akṛ̍tā̱ kartvā̍ni̱ yudhyai̍ tvena̱ saṃ tve̍na pṛcchai
||2||नाहमतो॒ निर॑या दु॒र्गहै॒तत् ति॑र॒श्चता॑ पा॒र्श्वान्निर्ग॑माणि ।
ब॒हूनि॑ मे॒ अकृ॑ता॒ कर्त्वा॑नि॒ युध्यै॑ त्वेन॒ सं त्वे॑न पृच्छै
pa̱rā̱ya̱tīṃ mā̱tara̱manva̍caṣṭa̱ na nānu̍ gā̱nyanu̱ nū ga̍māni |
tvaṣṭu̍rgṛ̱he a̍piba̱t soma̱mindra̍: śatadha̱nya̍ṃ ca̱mvo̍: su̱tasya̍
||3||प॒रा॒य॒तीं मा॒तर॒मन्व॑चष्ट॒ न नानु॑ गा॒न्यनु॒ नू ग॑मानि ।
त्वष्टु॑र्गृ॒हे अ॑पिब॒त् सोम॒मिन्द्र॑: शतध॒न्यं॑ च॒म्वो॑: सु॒तस्य॑
kiṃ sa ṛdha̍k kṛṇava̱d yaṃ sa̱hasra̍ṃ mā̱so ja̱bhāra̍ śa̱rada̍śca pū̱rvīḥ |
na̱hī nva̍sya prati̱māna̱mastya̱ntarjā̱teṣū̱ta ye jani̍tvāḥ
||4||किं स ऋध॑क् कृणव॒द् यं स॒हस्रं॑ मा॒सो ज॒भार॑ श॒रद॑श्च पू॒र्वीः ।
न॒ही न्व॑स्य प्रति॒मान॒मस्त्य॒न्तर्जा॒तेषू॒त ये जनि॑त्वाः
a̱va̱dyami̍va̱ manya̍mānā̱ guhā̍ka̱rindra̍ṃ mā̱tā vī̱rye̍ṇā̱ nyṛ̍ṣṭam |
athoda̍sthāt sva̱yamatka̱ṃ vasā̍na̱ ā roda̍sī apṛṇā̱jjāya̍mānaḥ
||5||अ॒व॒द्यमि॑व॒ मन्य॑माना॒ गुहा॑क॒रिन्द्रं॑ मा॒ता वी॒र्ये॑णा॒ न्यृ॑ष्टम् ।
अथोद॑स्थात् स्व॒यमत्कं॒ वसा॑न॒ आ रोद॑सी अपृणा॒ज्जाय॑मानः
e̱tā a̍rṣantyalalā̱bhava̍ntīrṛtāva̍rīriva sa̱ṃkrośa̍mānāḥ |
e̱tā vi pṛ̍ccha̱ kimi̱daṃ bha̍nanti̱ kamāpo̱ adri̍ṃ pari̱dhiṃ ru̍janti
||6||ए॒ता अ॑र्षन्त्यलला॒भव॑न्तीर्ऋताव॑रीरिव सं॒क्रोश॑मानाः ।
ए॒ता वि पृ॑च्छ॒ किमि॒दं भ॑नन्ति॒ कमापो॒ अद्रिं॑ परि॒धिं रु॑जन्ति
kimu̍ ṣvidasmai ni̱vido̍ bhana̱ntendra̍syāva̱dyaṃ di̍dhiṣanta̱ āpa̍: |
mamai̱tān pu̱tro ma̍ha̱tā va̱dhena̍ vṛ̱traṃ ja̍gha̱nvām̐ a̍sṛja̱d vi sindhū̍n
||7||किमु॑ ष्विदस्मै नि॒विदो॑ भन॒न्तेन्द्र॑स्याव॒द्यं दि॑धिषन्त॒ आप॑: ।
ममै॒तान् पु॒त्रो म॑ह॒ता व॒धेन॑ वृ॒त्रं ज॑घ॒न्वाँ अ॑सृज॒द् वि सिन्धू॑न्
mama̍cca̱na tvā̍ yuva̱tiḥ pa̱rāsa̱ mama̍cca̱na tvā̍ ku̱ṣavā̍ ja̱gāra̍ |
mama̍cci̱dāpa̱: śiśa̍ve mamṛḍyu̱rmama̍cci̱dindra̱: saha̱soda̍tiṣṭhat
||8||मम॑च्च॒न त्वा॑ युव॒तिः प॒रास॒ मम॑च्च॒न त्वा॑ कु॒षवा॑ ज॒गार॑ ।
मम॑च्चि॒दाप॒: शिश॑वे ममृड्यु॒र्मम॑च्चि॒दिन्द्र॒: सह॒सोद॑तिष्ठत्
mama̍cca̱na te̍ maghava̱n vya̍ṃso nivivi̱dhvām̐ apa̱ hanū̍ ja̱ghāna̍ |
adhā̱ nivi̍ddha̱ utta̍ro babhū̱vāñchiro̍ dā̱sasya̱ saṃ pi̍ṇagva̱dhena̍
||9||मम॑च्च॒न ते॑ मघव॒न् व्यं॑सो निविवि॒ध्वाँ अप॒ हनू॑ ज॒घान॑ ।
अधा॒ निवि॑द्ध॒ उत्त॑रो बभू॒वाञ्छिरो॑ दा॒सस्य॒ सं पि॑णग्व॒धेन॑
gṛ̱ṣṭiḥ sa̍sūva̱ sthavi̍raṃ tavā̱gāma̍nādhṛ̱ṣyaṃ vṛ̍ṣa̱bhaṃ tumra̱mindra̍m |
arī̍l̤ahaṃ va̱tsaṃ ca̱rathā̍ya mā̱tā sva̱yaṃ gā̱tuṃ ta̱nva̍ i̱cchamā̍nam
||10||गृ॒ष्टिः स॑सूव॒ स्थवि॑रं तवा॒गाम॑नाधृ॒ष्यं वृ॑ष॒भं तुम्र॒मिन्द्र॑म् ।
अरी॑ळहं व॒त्सं च॒रथा॑य मा॒ता स्व॒यं गा॒तुं त॒न्व॑ इ॒च्छमा॑नम्
u̱ta mā̱tā ma̍hi̱ṣamanva̍venada̱mī tvā̍ jahati putra de̱vāḥ |
athā̍bravīd vṛ̱tramindro̍ hani̱ṣyan tsakhe̍ viṣṇo vita̱raṃ vi kra̍masva
||11||उ॒त मा॒ता म॑हि॒षमन्व॑वेनद॒मी त्वा॑ जहति पुत्र दे॒वाः ।
अथा॑ब्रवीद् वृ॒त्रमिन्द्रो॑ हनि॒ष्यन् त्सखे॑ विष्णो वित॒रं वि क्र॑मस्व
kaste̍ mā̱tara̍ṃ vi̱dhavā̍macakraccha̱yuṃ kastvāma̍jighāṃsa̱ccara̍ntam |
kaste̍ de̱vo adhi̍ mārḍī̱ka ā̍sī̱d yat prākṣi̍ṇāḥ pi̱tara̍ṃ pāda̱gṛhya̍
||12||कस्ते॑ मा॒तरं॑ वि॒धवा॑मचक्रच्छ॒युं कस्त्वाम॑जिघांस॒च्चर॑न्तम् ।
कस्ते॑ दे॒वो अधि॑ मार्डी॒क आ॑सी॒द् यत् प्राक्षि॑णाः पि॒तरं॑ पाद॒गृह्य॑
ava̍rtyā̱ śuna̍ ā̱ntrāṇi̍ pece̱ na de̱veṣu̍ vivide marḍi̱tāra̍m |
apa̍śyaṃ jā̱yāmama̍hīyamānā̱madhā̍ me śye̱no madhvā ja̍bhāra
||13||अव॑र्त्या॒ शुन॑ आ॒न्त्राणि॑ पेचे॒ न दे॒वेषु॑ विविदे मर्डि॒तार॑म् ।
अप॑श्यं जा॒यामम॑हीयमाना॒मधा॑ मे श्ये॒नो मध्वा ज॑भार