Study
- Anukramaṇī
- Source
24 vāmadevo gautamaḥ| indraḥ, 9-11 indroṣaso| gāyatrī, 8-24 anuṣṭup|
naki̍rindra̱ tvadutta̍ro̱ na jyāyā̍m̐ asti vṛtrahan | naki̍re̱vā yathā̱ tvam
||1||नकि॑रिन्द्र॒ त्वदुत्त॑रो॒ न ज्यायाँ॑ अस्ति वृत्रहन् । नकि॑रे॒वा यथा॒ त्वम्
sa̱trā te̱ anu̍ kṛ̱ṣṭayo̱ viśvā̍ ca̱kreva̍ vāvṛtuḥ | sa̱trā ma̱hām̐ a̍si śru̱taḥ
||2||स॒त्रा ते॒ अनु॑ कृ॒ष्टयो॒ विश्वा॑ च॒क्रेव॑ वावृतुः । स॒त्रा म॒हाँ अ॑सि श्रु॒तः
viśve̍ ca̱neda̱nā tvā̍ de̱vāsa̍ indra yuyudhuḥ | yadahā̱ nakta̱māti̍raḥ
||3||विश्वे॑ च॒नेद॒ना त्वा॑ दे॒वास॑ इन्द्र युयुधुः । यदहा॒ नक्त॒माति॑रः
yatro̱ta bā̍dhi̱tebhya̍śca̱kraṃ kutsā̍ya̱ yudhya̍te | mu̱ṣā̱ya i̍ndra̱ sūrya̍m
||4||यत्रो॒त बा॑धि॒तेभ्य॑श्च॒क्रं कुत्सा॑य॒ युध्य॑ते । मु॒षा॒य इ॑न्द्र॒ सूर्य॑म्
yatra̍ de̱vām̐ ṛ̍ghāya̱to viśvā̱m̐ ayu̍dhya̱ eka̱ it | tvami̍ndra va̱nūm̐raha̍n
||5||यत्र॑ दे॒वाँ ऋ॑घाय॒तो विश्वाँ॒ अयु॑ध्य॒ एक॒ इत् । त्वमि॑न्द्र व॒नूँरह॑न्
yatro̱ta martyā̍ya̱ kamari̍ṇā indra̱ sūrya̍m | prāva̱: śacī̍bhi̱reta̍śam
||6||यत्रो॒त मर्त्या॑य॒ कमरि॑णा इन्द्र॒ सूर्य॑म् । प्राव॒: शची॑भि॒रेत॑शम्
kimādu̱tāsi̍ vṛtraha̱n magha̍van manyu̱matta̍maḥ | atrāha̱ dānu̱māti̍raḥ
||7||किमादु॒तासि॑ वृत्रह॒न् मघ॑वन् मन्यु॒मत्त॑मः । अत्राह॒ दानु॒माति॑रः
e̱tad ghedu̱ta vī̱rya1mindra̍ ca̱kartha̱ pauṃsya̍m | striya̱ṃ yad du̍rhaṇā̱yuva̱ṃ vadhī̍rduhi̱tara̍ṃ di̱vaḥ
||8||ए॒तद् घेदु॒त वी॒र्य१मिन्द्र॑ च॒कर्थ॒ पौंस्य॑म् । स्त्रियं॒ यद् दु॑र्हणा॒युवं॒ वधी॑र्दुहि॒तरं॑ दि॒वः
di̱vaści̍d ghā duhi̱tara̍ṃ ma̱hān ma̍hī̱yamā̍nām | u̱ṣāsa̍mindra̱ saṃ pi̍ṇak
||9||दि॒वश्चि॑द् घा दुहि॒तरं॑ म॒हान् म॑ही॒यमा॑नाम् । उ॒षास॑मिन्द्र॒ सं पि॑णक्
apo̱ṣā ana̍saḥ sara̱t sampi̍ṣṭā̱daha̍ bi̱bhyuṣī̍ | ni yatsī̍ṃ śi̱śnatha̱d vṛṣā̍
||10||अपो॒षा अन॑सः सर॒त् सम्पि॑ष्टा॒दह॑ बि॒भ्युषी॑ । नि यत्सीं॑ शि॒श्नथ॒द् वृषा॑
e̱tada̍syā̱ ana̍: śaye̱ susa̍mpiṣṭa̱ṃ vipā̱śyā | sa̱sāra̍ sīṃ parā̱vata̍:
||11||ए॒तद॑स्या॒ अन॑: शये॒ सुस॑म्पिष्टं॒ विपा॒श्या । स॒सार॑ सीं परा॒वत॑:
u̱ta sindhu̍ṃ vibā̱lya̍ṃ vitasthā̱nāmadhi̱ kṣami̍ | pari̍ ṣṭhā indra mā̱yayā̍
||12||उ॒त सिन्धुं॑ विबा॒ल्यं॑ वितस्था॒नामधि॒ क्षमि॑ । परि॑ ष्ठा इन्द्र मा॒यया॑
u̱ta śuṣṇa̍sya dhṛṣṇu̱yā pra mṛ̍kṣo a̱bhi veda̍nam | puro̱ yada̍sya sampi̱ṇak
||13||उ॒त शुष्ण॑स्य धृष्णु॒या प्र मृ॑क्षो अ॒भि वेद॑नम् । पुरो॒ यद॑स्य सम्पि॒णक्
u̱ta dā̱saṃ kau̍lita̱raṃ bṛ̍ha̱taḥ parva̍tā̱dadhi̍ | avā̍hannindra̱ śamba̍ram
||14||उ॒त दा॒सं कौ॑लित॒रं बृ॑ह॒तः पर्व॑ता॒दधि॑ । अवा॑हन्निन्द्र॒ शम्ब॑रम्
u̱ta dā̱sasya̍ va̱rcina̍: sa̱hasrā̍ṇi śa̱tāva̍dhīḥ | adhi̱ pañca̍ pra̱dhīm̐ri̍va
||15||उ॒त दा॒सस्य॑ व॒र्चिन॑: स॒हस्रा॑णि श॒ताव॑धीः । अधि॒ पञ्च॑ प्र॒धीँरि॑व
u̱ta tyaṃ pu̱trama̱gruva̱: parā̍vṛktaṃ śa̱takra̍tuḥ | u̱ktheṣvindra̱ ābha̍jat
||16||उ॒त त्यं पु॒त्रम॒ग्रुव॒: परा॑वृक्तं श॒तक्र॑तुः । उ॒क्थेष्विन्द्र॒ आभ॑जत्
u̱ta tyā tu̱rvaśā̱yadū̍ asnā̱tārā̱ śacī̱pati̍: | indro̍ vi̱dvām̐ a̍pārayat
||17||उ॒त त्या तु॒र्वशा॒यदू॑ अस्ना॒तारा॒ शची॒पति॑: । इन्द्रो॑ वि॒द्वाँ अ॑पारयत्
u̱ta tyā sa̱dya āryā̍ sa̱rayo̍rindra pā̱rata̍: | arṇā̍ci̱trara̍thāvadhīḥ
||18||उ॒त त्या स॒द्य आर्या॑ स॒रयो॑रिन्द्र पा॒रत॑: । अर्णा॑चि॒त्रर॑थावधीः
anu̱ dvā ja̍hi̱tā na̍yo̱'ndhaṃ śro̱ṇaṃ ca̍ vṛtrahan | na tat te̍ su̱mnamaṣṭa̍ve
||19||अनु॒ द्वा ज॑हि॒ता न॑यो॒ऽन्धं श्रो॒णं च॑ वृत्रहन् । न तत् ते॑ सु॒म्नमष्ट॑वे
śa̱tama̍śma̱nmayī̍nāṃ pu̱rāmindro̱ vyā̍syat | divo̍dāsāya dā̱śuṣe̍
||20||श॒तम॑श्म॒न्मयी॑नां पु॒रामिन्द्रो॒ व्या॑स्यत् । दिवो॑दासाय दा॒शुषे॑
asvā̍payad da̱bhīta̍ye sa̱hasrā̍ tri̱ṃśata̱ṃ hathai̍: | dā̱sānā̱mindro̍ mā̱yayā̍
||21||अस्वा॑पयद् द॒भीत॑ये स॒हस्रा॑ त्रिं॒शतं॒ हथै॑: । दा॒साना॒मिन्द्रो॑ मा॒यया॑
sa ghedu̱tāsi̍ vṛtrahan tsamā̱na i̍ndra̱ gopa̍tiḥ | yastā viśvā̍ni cicyu̱ṣe
||22||स घेदु॒तासि॑ वृत्रहन् त्समा॒न इ॑न्द्र॒ गोप॑तिः । यस्ता विश्वा॑नि चिच्यु॒षे
u̱ta nū̱naṃ yadi̍ndri̱yaṃ ka̍ri̱ṣyā i̍ndra̱ pauṃsya̍m | a̱dyā naki̱ṣṭadā mi̍nat
||23||उ॒त नू॒नं यदि॑न्द्रि॒यं क॑रि॒ष्या इ॑न्द्र॒ पौंस्य॑म् । अ॒द्या नकि॒ष्टदा मि॑नत्
vā̱maṃvā̍maṃ ta ādure de̱vo da̍dātvarya̱mā | vā̱maṃ pū̱ṣā vā̱maṃ bhago̍ vā̱maṃ de̱vaḥ karū̍l̤atī
||24||वा॒मंवा॑मं त आदुरे दे॒वो द॑दात्वर्य॒मा । वा॒मं पू॒षा वा॒मं भगो॑ वा॒मं दे॒वः करू॑ळती