Study
- Anukramaṇī
- Source
11 vāmadevo gautamaḥ| indrāvaruṇau| triṣṭup|
indrā̱ ko vā̍ṃ varuṇā su̱mnamā̍pa̱ stomo̍ ha̱viṣmā̍m̐ a̱mṛto̱ na hotā̍ |
yo vā̍ṃ hṛ̱di kratu̍mām̐ a̱smadu̱ktaḥ pa̱sparśa̍dindrāvaruṇā̱ nama̍svān
||1||इन्द्रा॒ को वां॑ वरुणा सु॒म्नमा॑प॒ स्तोमो॑ ह॒विष्माँ॑ अ॒मृतो॒ न होता॑ ।
यो वां॑ हृ॒दि क्रतु॑माँ अ॒स्मदु॒क्तः प॒स्पर्श॑दिन्द्रावरुणा॒ नम॑स्वान्
indrā̍ ha̱ yo varu̍ṇā ca̱kra ā̱pī de̱vau marta̍: sa̱khyāya̱ praya̍svān |
sa ha̍nti vṛ̱trā sa̍mi̱theṣu̱ śatrū̱navo̍bhirvā ma̱hadbhi̱: sa pra śṛ̍ṇve
||2||इन्द्रा॑ ह॒ यो वरु॑णा च॒क्र आ॒पी दे॒वौ मर्त॑: स॒ख्याय॒ प्रय॑स्वान् ।
स ह॑न्ति वृ॒त्रा स॑मि॒थेषु॒ शत्रू॒नवो॑भिर्वा म॒हद्भि॒: स प्र शृ॑ण्वे
indrā̍ ha̱ ratna̱ṃ varu̍ṇā̱ dheṣṭhe̱tthā nṛbhya̍: śaśamā̱nebhya̱stā |
yadī̱ sakhā̍yā sa̱khyāya̱ somai̍: su̱tebhi̍: supra̱yasā̍ mā̱dayai̍te
||3||इन्द्रा॑ ह॒ रत्नं॒ वरु॑णा॒ धेष्ठे॒त्था नृभ्य॑: शशमा॒नेभ्य॒स्ता ।
यदी॒ सखा॑या स॒ख्याय॒ सोमै॑: सु॒तेभि॑: सुप्र॒यसा॑ मा॒दयै॑ते
indrā̍ yu̱vaṃ va̍ruṇā di̱dyuma̍smi̱nnoji̍ṣṭhamugrā̱ ni va̍dhiṣṭa̱ṃ vajra̍m |
yo no̍ du̱revo̍ vṛ̱kati̍rda̱bhīti̱stasmi̍n mimāthāma̱bhibhū̱tyoja̍:
||4||इन्द्रा॑ यु॒वं व॑रुणा दि॒द्युम॑स्मि॒न्नोजि॑ष्ठमुग्रा॒ नि व॑धिष्टं॒ वज्र॑म् ।
यो नो॑ दु॒रेवो॑ वृ॒कति॑र्द॒भीति॒स्तस्मि॑न् मिमाथाम॒भिभू॒त्योज॑:
indrā̍ yu̱vaṃ va̍ruṇā bhū̱tama̱syā dhi̱yaḥ pre̱tārā̍ vṛṣa̱bheva̍ dhe̱noḥ |
sā no̍ duhīya̱d yava̍seva ga̱tvī sa̱hasra̍dhārā̱ paya̍sā ma̱hī gauḥ
||5||इन्द्रा॑ यु॒वं व॑रुणा भू॒तम॒स्या धि॒यः प्रे॒तारा॑ वृष॒भेव॑ धे॒नोः ।
सा नो॑ दुहीय॒द् यव॑सेव ग॒त्वी स॒हस्र॑धारा॒ पय॑सा म॒ही गौः
to̱ke hi̱te tana̍ya u̱rvarā̍su̱ sūro̱ dṛśī̍ke̱ vṛṣa̍ṇaśca̱ pauṃsye̍ |
indrā̍ no̱ atra̱ varu̍ṇā syātā̱mavo̍bhirda̱smā pari̍takmyāyām
||6||तो॒के हि॒ते तन॑य उ॒र्वरा॑सु॒ सूरो॒ दृशी॑के॒ वृष॑णश्च॒ पौंस्ये॑ ।
इन्द्रा॑ नो॒ अत्र॒ वरु॑णा स्याता॒मवो॑भिर्द॒स्मा परि॑तक्म्यायाम्
yu̱vāmiddhyava̍se pū̱rvyāya̱ pari̱ prabhū̍tī ga̱viṣa̍: svāpī |
vṛ̱ṇī̱mahe̍ sa̱khyāya̍ pri̱yāya̱ śūrā̱ maṃhi̍ṣṭhā pi̱tare̍va śa̱mbhū
||7||यु॒वामिद्ध्यव॑से पू॒र्व्याय॒ परि॒ प्रभू॑ती ग॒विष॑: स्वापी ।
वृ॒णी॒महे॑ स॒ख्याय॑ प्रि॒याय॒ शूरा॒ मंहि॑ष्ठा पि॒तरे॑व श॒म्भू
tā vā̱ṃ dhiyo'va̍se vāja̱yantī̍rā̱jiṃ na ja̍gmuryuva̱yūḥ su̍dānū |
śri̱ye na gāva̱ upa̱ soma̍masthu̱rindra̱ṃ giro̱ varu̍ṇaṃ me manī̱ṣāḥ
||8||ता वां॒ धियोऽव॑से वाज॒यन्ती॑रा॒जिं न ज॑ग्मुर्युव॒यूः सु॑दानू ।
श्रि॒ये न गाव॒ उप॒ सोम॑मस्थु॒रिन्द्रं॒ गिरो॒ वरु॑णं मे मनी॒षाः
i̱mā indra̱ṃ varu̍ṇaṃ me manī̱ṣā agma̱nnupa̱ dravi̍ṇami̱cchamā̍nāḥ |
upe̍masthurjo̱ṣṭāra̍ iva̱ vasvo̍ ra̱ghvīri̍va̱ śrava̍so̱ bhikṣa̍māṇāḥ
||9||इ॒मा इन्द्रं॒ वरु॑णं मे मनी॒षा अग्म॒न्नुप॒ द्रवि॑णमि॒च्छमा॑नाः ।
उपे॑मस्थुर्जो॒ष्टार॑ इव॒ वस्वो॑ र॒घ्वीरि॑व॒ श्रव॑सो॒ भिक्ष॑माणाः
aśvya̍sya̱ tmanā̱ rathya̍sya pu̱ṣṭernitya̍sya rā̱yaḥ pata̍yaḥ syāma |
tā ca̍krā̱ṇā ū̱tibhi̱rnavya̍sībhirasma̱trā rāyo̍ ni̱yuta̍: sacantām
||10||अश्व्य॑स्य॒ त्मना॒ रथ्य॑स्य पु॒ष्टेर्नित्य॑स्य रा॒यः पत॑यः स्याम ।
ता च॑क्रा॒णा ऊ॒तिभि॒र्नव्य॑सीभिरस्म॒त्रा रायो॑ नि॒युत॑: सचन्ताम्
ā no̍ bṛhantā bṛha̱tībhi̍rū̱tī indra̍ yā̱taṃ va̍ruṇa̱ vāja̍sātau |
yad di̱dyava̱: pṛta̍nāsu pra̱krīl̤ā̱n tasya̍ vāṃ syāma sani̱tāra̍ ā̱jeḥ
||11||आ नो॑ बृहन्ता बृह॒तीभि॑रू॒ती इन्द्र॑ या॒तं व॑रुण॒ वाज॑सातौ ।
यद् दि॒द्यव॒: पृत॑नासु प्र॒क्रीळा॒न् तस्य॑ वां स्याम सनि॒तार॑ आ॒जेः