Study
- Anukramaṇī
- Source
11 vāmadevo gautamaḥ| uṣāḥ| gāyatrī|
i̱damu̱ tyat pu̍ru̱tama̍ṃ pu̱rastā̱jjyoti̱stama̍so va̱yunā̍vadasthāt |
nū̱naṃ di̱vo du̍hi̱taro̍ vibhā̱tīrgā̱tuṃ kṛ̍ṇavannu̱ṣaso̱ janā̍ya
||1||इ॒दमु॒ त्यत् पु॑रु॒तमं॑ पु॒रस्ता॒ज्ज्योति॒स्तम॑सो व॒युना॑वदस्थात् ।
नू॒नं दि॒वो दु॑हि॒तरो॑ विभा॒तीर्गा॒तुं कृ॑णवन्नु॒षसो॒ जना॑य
asthu̍ru ci̱trā u̱ṣasa̍: pu̱rastā̍nmi̱tā i̍va̱ svara̍vo'dhva̱reṣu̍ |
vyū̍ vra̱jasya̱ tama̍so̱ dvāro̱cchantī̍ravra̱ñchuca̍yaḥ pāva̱kāḥ
||2||अस्थु॑रु चि॒त्रा उ॒षस॑: पु॒रस्ता॑न्मि॒ता इ॑व॒ स्वर॑वोऽध्व॒रेषु॑ ।
व्यू॑ व्र॒जस्य॒ तम॑सो॒ द्वारो॒च्छन्ती॑रव्र॒ञ्छुच॑यः पाव॒काः
u̱cchantī̍ra̱dya ci̍tayanta bho̱jān rā̍dho̱deyā̍yo̱ṣaso̍ ma̱ghonī̍: |
a̱ci̱tre a̱ntaḥ pa̱ṇaya̍: sasa̱ntvabu̍dhyamānā̱stama̍so̱ vima̍dhye
||3||उ॒च्छन्ती॑र॒द्य चि॑तयन्त भो॒जान् रा॑धो॒देया॑यो॒षसो॑ म॒घोनी॑: ।
अ॒चि॒त्रे अ॒न्तः प॒णय॑: सस॒न्त्वबु॑ध्यमाना॒स्तम॑सो॒ विम॑ध्ये
ku̱vit sa de̍vīḥ sa̱nayo̱ navo̍ vā̱ yāmo̍ babhū̱yādu̍ṣaso vo a̱dya |
yenā̱ nava̍gve̱ aṅgi̍re̱ daśa̍gve sa̱ptāsye̍ revatī re̱vadū̱ṣa
||4||कु॒वित् स दे॑वीः स॒नयो॒ नवो॑ वा॒ यामो॑ बभू॒यादु॑षसो वो अ॒द्य ।
येना॒ नव॑ग्वे॒ अङ्गि॑रे॒ दश॑ग्वे स॒प्तास्ये॑ रेवती रे॒वदू॒ष
yū̱yaṃ hi de̍vīrṛta̱yugbhi̱raśvai̍: pariprayā̱tha bhuva̍nāni sa̱dyaḥ |
pra̱bo̱dhaya̍ntīruṣasaḥ sa̱santa̍ṃ dvi̱pāccatu̍ṣpācca̱rathā̍ya jī̱vam
||5||यू॒यं हि दे॑वीर्ऋत॒युग्भि॒रश्वै॑: परिप्रया॒थ भुव॑नानि स॒द्यः ।
प्र॒बो॒धय॑न्तीरुषसः स॒सन्तं॑ द्वि॒पाच्चतु॑ष्पाच्च॒रथा॑य जी॒वम्
kva̍ svidāsāṃ kata̱mā pu̍rā̱ṇī yayā̍ vi̱dhānā̍ vida̱dhurṛ̍bhū̱ṇām |
śubha̱ṃ yacchu̱bhrā u̱ṣasa̱ścara̍nti̱ na vi jñā̍yante sa̱dṛśī̍raju̱ryāḥ
||6||क्व॑ स्विदासां कत॒मा पु॑रा॒णी यया॑ वि॒धाना॑ विद॒धुर्ऋ॑भू॒णाम् ।
शुभं॒ यच्छु॒भ्रा उ॒षस॒श्चर॑न्ति॒ न वि ज्ञा॑यन्ते स॒दृशी॑रजु॒र्याः
tā ghā̱ tā bha̱drā u̱ṣasa̍: pu̱rāsu̍rabhi̱ṣṭidyu̍mnā ṛ̱tajā̍tasatyāḥ |
yāsvī̍jā̱naḥ śa̍śamā̱na u̱kthaiḥ stu̱vañchaṃsa̱n dravi̍ṇaṃ sa̱dya āpa̍
||7||ता घा॒ ता भ॒द्रा उ॒षस॑: पु॒रासु॑रभि॒ष्टिद्यु॑म्ना ऋ॒तजा॑तसत्याः ।
यास्वी॑जा॒नः श॑शमा॒न उ॒क्थैः स्तु॒वञ्छंस॒न् द्रवि॑णं स॒द्य आप॑
tā ā ca̍ranti sama̱nā pu̱rastā̍t samā̱nata̍: sama̱nā pa̍prathā̱nāḥ |
ṛ̱tasya̍ de̱vīḥ sada̍so budhā̱nā gavā̱ṃ na sargā̍ u̱ṣaso̍ jarante
||8||ता आ च॑रन्ति सम॒ना पु॒रस्ता॑त् समा॒नत॑: सम॒ना प॑प्रथा॒नाः ।
ऋ॒तस्य॑ दे॒वीः सद॑सो बुधा॒ना गवां॒ न सर्गा॑ उ॒षसो॑ जरन्ते
tā innve̱3va sa̍ma̱nā sa̍mā̱nīramī̍tavarṇā u̱ṣasa̍ścaranti |
gūha̍ntī̱rabhva̱masi̍ta̱ṃ ruśa̍dbhiḥ śu̱krāsta̱nūbhi̱: śuca̍yo rucā̱nāḥ
||9||ता इन्न्वे॒३व स॑म॒ना स॑मा॒नीरमी॑तवर्णा उ॒षस॑श्चरन्ति ।
गूह॑न्ती॒रभ्व॒मसि॑तं॒ रुश॑द्भिः शु॒क्रास्त॒नूभि॒: शुच॑यो रुचा॒नाः
ra̱yiṃ di̍vo duhitaro vibhā̱tīḥ pra̱jāva̍ntaṃ yacchatā̱smāsu̍ devīḥ |
syo̱nādā va̍: prati̱budhya̍mānāḥ su̱vīrya̍sya̱ pata̍yaḥ syāma
||10||र॒यिं दि॑वो दुहितरो विभा॒तीः प्र॒जाव॑न्तं यच्छता॒स्मासु॑ देवीः ।
स्यो॒नादा व॑: प्रति॒बुध्य॑मानाः सु॒वीर्य॑स्य॒ पत॑यः स्याम
tad vo̍ divo duhitaro vibhā̱tīrupa̍ bruva uṣaso ya̱jñake̍tuḥ |
va̱yaṃ syā̍ma ya̱śaso̱ jane̍ṣu̱ tad dyauśca̍ dha̱ttāṃ pṛ̍thi̱vī ca̍ de̱vī
||11||तद् वो॑ दिवो दुहितरो विभा॒तीरुप॑ ब्रुव उषसो य॒ज्ञके॑तुः ।
व॒यं स्या॑म य॒शसो॒ जने॑षु॒ तद् द्यौश्च॑ ध॒त्तां पृ॑थि॒वी च॑ दे॒वी