Study
- Anukramaṇī
- Source
7 vāmadevo gautamaḥ| uṣāḥ| gāyatrī|
prati̱ ṣyā sū̱narī̱ janī̍ vyu̱cchantī̱ pari̱ svasu̍: | di̱vo a̍darśi duhi̱tā
||1||प्रति॒ ष्या सू॒नरी॒ जनी॑ व्यु॒च्छन्ती॒ परि॒ स्वसु॑: । दि॒वो अ॑दर्शि दुहि॒ता
aśve̍va ci̱trāru̍ṣī mā̱tā gavā̍mṛ̱tāva̍rī | sakhā̍bhūda̱śvino̍ru̱ṣāḥ
||2||अश्वे॑व चि॒त्रारु॑षी मा॒ता गवा॑मृ॒ताव॑री । सखा॑भूद॒श्विनो॑रु॒षाः
u̱ta sakhā̍sya̱śvino̍ru̱ta mā̱tā gavā̍masi | u̱toṣo̱ vasva̍ īśiṣe
||3||उ॒त सखा॑स्य॒श्विनो॑रु॒त मा॒ता गवा॑मसि । उ॒तोषो॒ वस्व॑ ईशिषे
yā̱va̱yaddve̍ṣasaṃ tvā ciki̱tvit sū̍nṛtāvari | prati̱ stomai̍rabhutsmahi
||4||या॒व॒यद्द्वे॑षसं त्वा चिकि॒त्वित् सू॑नृतावरि । प्रति॒ स्तोमै॑रभुत्स्महि
prati̍ bha̱drā a̍dṛkṣata̱ gavā̱ṃ sargā̱ na ra̱śmaya̍: | oṣā a̍prā u̱ru jraya̍:
||5||प्रति॑ भ॒द्रा अ॑दृक्षत॒ गवां॒ सर्गा॒ न र॒श्मय॑: । ओषा अ॑प्रा उ॒रु ज्रय॑:
ā̱pa̱pruṣī̍ vibhāvari̱ vyā̍va̱rjyoti̍ṣā̱ tama̍: | uṣo̱ anu̍ sva̱dhāma̍va
||6||आ॒प॒प्रुषी॑ विभावरि॒ व्या॑व॒र्ज्योति॑षा॒ तम॑: । उषो॒ अनु॑ स्व॒धाम॑व
ā dyāṃ ta̍noṣi ra̱śmibhi̱rāntari̍kṣamu̱ru pri̱yam | uṣa̍: śu̱kreṇa̍ śo̱ciṣā̍
||7||आ द्यां त॑नोषि र॒श्मिभि॒रान्तरि॑क्षमु॒रु प्रि॒यम् । उष॑: शु॒क्रेण॑ शो॒चिषा॑