Study
- Anukramaṇī
- Source
6 vāmadevo gautamaḥ| agniḥ|triṣṭup|
bha̱draṃ te̍ agne sahasi̱nnanī̍kamupā̱ka ā ro̍cate̱ sūrya̍sya |
ruśa̍d dṛ̱śe da̍dṛśe nakta̱yā ci̱darū̍kṣitaṃ dṛ̱śa ā rū̱pe anna̍m
||1||भ॒द्रं ते॑ अग्ने सहसि॒न्ननी॑कमुपा॒क आ रो॑चते॒ सूर्य॑स्य ।
रुश॑द् दृ॒शे द॑दृशे नक्त॒या चि॒दरू॑क्षितं दृ॒श आ रू॒पे अन्न॑म्
vi ṣā̍hyagne gṛṇa̱te ma̍nī̱ṣāṃ khaṃ vepa̍sā tuvijāta̱ stavā̍naḥ |
viśve̍bhi̱ryad vā̱vana̍: śukra de̱vaistanno̍ rāsva sumaho̱ bhūri̱ manma̍
||2||वि षा॑ह्यग्ने गृण॒ते म॑नी॒षां खं वेप॑सा तुविजात॒ स्तवा॑नः ।
विश्वे॑भि॒र्यद् वा॒वन॑: शुक्र दे॒वैस्तन्नो॑ रास्व सुमहो॒ भूरि॒ मन्म॑
tvada̍gne̱ kāvyā̱ tvanma̍nī̱ṣāstvadu̱kthā jā̍yante̱ rādhyā̍ni |
tvade̍ti̱ dravi̍ṇaṃ vī̱rape̍śā i̱tthādhi̍ye dā̱śuṣe̱ martyā̍ya
||3||त्वद॑ग्ने॒ काव्या॒ त्वन्म॑नी॒षास्त्वदु॒क्था जा॑यन्ते॒ राध्या॑नि ।
त्वदे॑ति॒ द्रवि॑णं वी॒रपे॑शा इ॒त्थाधि॑ये दा॒शुषे॒ मर्त्या॑य
tvad vā̱jī vā̍jambha̱ro vihā̍yā abhiṣṭi̱kṛjjā̍yate sa̱tyaśu̍ṣmaḥ |
tvad ra̱yirde̱vajū̍to mayo̱bhustvadā̱śurjū̍ju̱vām̐ a̍gne̱ arvā̍
||4||त्वद् वा॒जी वा॑जम्भ॒रो विहा॑या अभिष्टि॒कृज्जा॑यते स॒त्यशु॑ष्मः ।
त्वद् र॒यिर्दे॒वजू॑तो मयो॒भुस्त्वदा॒शुर्जू॑जु॒वाँ अ॑ग्ने॒ अर्वा॑
tvāma̍gne pratha̱maṃ de̍va̱yanto̍ de̱vaṃ martā̍ amṛta ma̱ndraji̍hvam |
dve̱ṣo̱yuta̱mā vi̍vāsanti dhī̱bhirdamū̍nasaṃ gṛ̱hapa̍ti̱mamū̍ram
||5||त्वाम॑ग्ने प्रथ॒मं दे॑व॒यन्तो॑ दे॒वं मर्ता॑ अमृत म॒न्द्रजि॑ह्वम् ।
द्वे॒षो॒युत॒मा वि॑वासन्ति धी॒भिर्दमू॑नसं गृ॒हप॑ति॒ममू॑रम्
ā̱re a̱smadama̍timā̱re aṃha̍ ā̱re viśvā̍ṃ durma̱tiṃ yanni̱pāsi̍ |
do̱ṣā śi̱vaḥ sa̍hasaḥ sūno agne̱ yaṃ de̱va ā ci̱t saca̍se sva̱sti
||6||आ॒रे अ॒स्मदम॑तिमा॒रे अंह॑ आ॒रे विश्वां॑ दुर्म॒तिं यन्नि॒पासि॑ ।
दो॒षा शि॒वः स॑हसः सूनो अग्ने॒ यं दे॒व आ चि॒त् सच॑से स्व॒स्ति