अध्ययनम्
- अनुक्रमणिका
- मूलम्
९ श्यावाश्व आत्रेयः। मरुतः। बृहती, ३, ७ सतोबृहती ।
अग्ने॒ शर्ध॑न्त॒मा ग॒णं पि॒ष्टं रु॒क्मेभि॑र॒ञ्जिभि॑: ।
विशो॑ अ॒द्य म॒रुता॒मव॑ ह्वये दि॒वश्चि॑द् रोच॒नादधि॑
॥१॥agne̱ śardha̍nta̱mā ga̱ṇaṃ pi̱ṣṭaṃ ru̱kmebhi̍ra̱ñjibhi̍: |
viśo̍ a̱dya ma̱rutā̱mava̍ hvaye di̱vaści̍d roca̱nādadhi̍
यथा॑ चि॒न्मन्य॑से हृ॒दा तदिन्मे॑ जग्मुरा॒शस॑: ।
ये ते॒ नेदि॑ष्ठं॒ हव॑नान्या॒गम॒न् तान् व॑र्ध भी॒मसं॑दृशः
॥२॥yathā̍ ci̱nmanya̍se hṛ̱dā tadinme̍ jagmurā̱śasa̍: |
ye te̱ nedi̍ṣṭha̱ṃ hava̍nānyā̱gama̱n tān va̍rdha bhī̱masa̍ṃdṛśaḥ
मी॒ळहुष्म॑तीव पृथि॒वी परा॑हता॒ मद॑न्त्येत्य॒स्मदा ।
ऋक्षो॒ न वो॑ मरुत॒: शिमी॑वाँ॒ अमो॑ दु॒ध्रो गौरि॑व भीम॒युः
॥३॥mī̱l̤ahuṣma̍tīva pṛthi̱vī parā̍hatā̱ mada̍ntyetya̱smadā |
ṛkṣo̱ na vo̍ maruta̱: śimī̍vā̱m̐ amo̍ du̱dhro gauri̍va bhīma̱yuḥ
नि ये रि॒णन्त्योज॑सा॒ वृथा॒ गावो॒ न दु॒र्धुर॑: ।
अश्मा॑नं चित् स्वर्यं१ पर्व॑तं गि॒रिं प्र च्या॑वयन्ति॒ याम॑भिः
॥४॥ni ye ri̱ṇantyoja̍sā̱ vṛthā̱ gāvo̱ na du̱rdhura̍: |
aśmā̍naṃ cit svaryaṃ1 parva̍taṃ gi̱riṃ pra cyā̍vayanti̱ yāma̍bhiḥ
उत् ति॑ष्ठ नू॒नमे॑षां॒ स्तोमै॒: समु॑क्षितानाम् ।
म॒रुतां॑ पुरु॒तम॒मपू॑र्व्यं॒ गवां॒ सर्ग॑मिव ह्वये
॥५॥ut ti̍ṣṭha nū̱name̍ṣā̱ṃ stomai̱: samu̍kṣitānām |
ma̱rutā̍ṃ puru̱tama̱mapū̍rvya̱ṃ gavā̱ṃ sarga̍miva hvaye
यु॒ङ्ग्ध्वं ह्यरु॑षी॒ रथे॑ यु॒ङ्ग्ध्वं रथे॑षु रो॒हित॑: ।
यु॒ङ्ग्ध्वं हरी॑ अजि॒रा धु॒रि वोळह॑वे॒ वहि॑ष्ठा धु॒रि वोळह॑वे
॥६॥yu̱ṅgdhvaṃ hyaru̍ṣī̱ rathe̍ yu̱ṅgdhvaṃ rathe̍ṣu ro̱hita̍: |
yu̱ṅgdhvaṃ harī̍ aji̱rā dhu̱ri vol̤aha̍ve̱ vahi̍ṣṭhā dhu̱ri vol̤aha̍ve
उ॒त स्य वा॒ज्य॑रु॒षस्तु॑वि॒ष्वणि॑रि॒ह स्म॑ धायि दर्श॒तः ।
मा वो॒ यामे॑षु मरुतश्चि॒रं क॑र॒त् प्र तं रथे॑षु चोदत
॥७॥u̱ta sya vā̱jya̍ru̱ṣastu̍vi̱ṣvaṇi̍ri̱ha sma̍ dhāyi darśa̱taḥ |
mā vo̱ yāme̍ṣu marutaści̱raṃ ka̍ra̱t pra taṃ rathe̍ṣu codata
रथं॒ नु मारु॑तं व॒यं श्र॑व॒स्युमा हु॑वामहे ।
आ यस्मि॑न् त॒स्थौ सु॒रणा॑नि॒ बिभ्र॑ती॒ सचा॑ म॒रुत्सु॑ रोद॒सी
॥८॥ratha̱ṃ nu māru̍taṃ va̱yaṃ śra̍va̱syumā hu̍vāmahe |
ā yasmi̍n ta̱sthau su̱raṇā̍ni̱ bibhra̍tī̱ sacā̍ ma̱rutsu̍ roda̱sī
तं व॒: शर्धं॑ रथे॒शुभं॑ त्वे॒षं प॑न॒स्युमा हु॑वे ।
यस्मि॒न् त्सुजा॑ता सु॒भगा॑ मही॒यते॒ सचा॑ म॒रुत्सु॑ मीळहु॒षी
॥९॥taṃ va̱: śardha̍ṃ rathe̱śubha̍ṃ tve̱ṣaṃ pa̍na̱syumā hu̍ve |
yasmi̱n tsujā̍tā su̱bhagā̍ mahī̱yate̱ sacā̍ ma̱rutsu̍ mīl̤ahu̱ṣī