अध्ययनम्
- अनुक्रमणिका
- मूलम्
४ उरुचक्रिरात्रेयः। मित्रावरुणौ। त्रिष्टुप्।
त्री रो॑च॒ना व॑रुण॒ त्रीँरु॒त द्यून् त्रीणि॑ मित्र धारयथो॒ रजां॑सि ।
वा॒वृ॒धा॒नाव॒मतिं॑ क्ष॒त्रिय॒स्याऽनु॑ व्र॒तं रक्ष॑माणावजु॒र्यम्
॥१॥trī ro̍ca̱nā va̍ruṇa̱ trīm̐ru̱ta dyūn trīṇi̍ mitra dhārayatho̱ rajā̍ṃsi |
vā̱vṛ̱dhā̱nāva̱mati̍ṃ kṣa̱triya̱syā'nu̍ vra̱taṃ rakṣa̍māṇāvaju̱ryam
इरा॑वतीर्वरुण धे॒नवो॑ वां॒ मधु॑मद् वां॒ सिन्ध॑वो मित्र दुह्रे ।
त्रय॑स्तस्थुर्वृष॒भास॑स्तिसृ॒णां धि॒षणा॑नां रेतो॒धा वि द्यु॒मन्त॑:
॥२॥irā̍vatīrvaruṇa dhe̱navo̍ vā̱ṃ madhu̍mad vā̱ṃ sindha̍vo mitra duhre |
traya̍stasthurvṛṣa̱bhāsa̍stisṛ̱ṇāṃ dhi̱ṣaṇā̍nāṃ reto̱dhā vi dyu̱manta̍:
प्रा॒तर्दे॒वीमदि॑तिं जोहवीमि म॒ध्यंदि॑न॒ उदि॑ता॒ सूर्य॑स्य ।
रा॒ये मि॑त्रावरुणा स॒र्वता॒तेळे॑ तो॒काय॒ तन॑याय॒ शं योः
॥३॥prā̱tarde̱vīmadi̍tiṃ johavīmi ma̱dhyaṃdi̍na̱ udi̍tā̱ sūrya̍sya |
rā̱ye mi̍trāvaruṇā sa̱rvatā̱tel̤e̍ to̱kāya̱ tana̍yāya̱ śaṃ yoḥ
या ध॒र्तारा॒ रज॑सो रोच॒नस्यो॒तादि॒त्या दि॒व्या पार्थि॑वस्य ।
न वां॑ दे॒वा अ॒मृता॒ आ मि॑नन्ति व्र॒तानि॑ मित्रावरुणा ध्रु॒वाणि॑
॥४॥yā dha̱rtārā̱ raja̍so roca̱nasyo̱tādi̱tyā di̱vyā pārthi̍vasya |
na vā̍ṃ de̱vā a̱mṛtā̱ ā mi̍nanti vra̱tāni̍ mitrāvaruṇā dhru̱vāṇi̍