अध्ययनम्
- अनुक्रमणिका
- मूलम्
७ प्रतिरथ आत्रेयः। विश्वे देवाः। त्रिष्टुप्।
प्र॒यु॒ञ्ज॒ती दि॒व ए॑ति ब्रुवा॒णा म॒ही मा॒ता दु॑हि॒तुर्बो॒धय॑न्ती ।
आ॒विवा॑सन्ती युव॒तिर्म॑नी॒षा पि॒तृभ्य॒ आ सद॑ने॒ जोहु॑वाना
॥१॥pra̱yu̱ñja̱tī di̱va e̍ti bruvā̱ṇā ma̱hī mā̱tā du̍hi̱turbo̱dhaya̍ntī |
ā̱vivā̍santī yuva̱tirma̍nī̱ṣā pi̱tṛbhya̱ ā sada̍ne̱ johu̍vānā
अ॒जि॒रास॒स्तद॑प॒ ईय॑माना आतस्थि॒वांसो॑ अ॒मृत॑स्य॒ नाभि॑म् ।
अ॒न॒न्तास॑ उ॒रवो॑ वि॒श्वत॑: सीं॒ परि॒ द्यावा॑पृथि॒वी य॑न्ति॒ पन्था॑:
॥२॥a̱ji̱rāsa̱stada̍pa̱ īya̍mānā ātasthi̱vāṃso̍ a̱mṛta̍sya̱ nābhi̍m |
a̱na̱ntāsa̍ u̱ravo̍ vi̱śvata̍: sī̱ṃ pari̱ dyāvā̍pṛthi̱vī ya̍nti̱ panthā̍:
उ॒क्षा स॑मु॒द्रो अ॑रु॒षः सु॑प॒र्णः पूर्व॑स्य॒ योनिं॑ पि॒तुरा वि॑वेश ।
मध्ये॑ दि॒वो निहि॑त॒: पृश्नि॒रश्मा॒ वि च॑क्रमे॒ रज॑सस्पा॒त्यन्तौ॑
॥३॥u̱kṣā sa̍mu̱dro a̍ru̱ṣaḥ su̍pa̱rṇaḥ pūrva̍sya̱ yoni̍ṃ pi̱turā vi̍veśa |
madhye̍ di̱vo nihi̍ta̱: pṛśni̱raśmā̱ vi ca̍krame̱ raja̍saspā̱tyantau̍
च॒त्वार॑ ईं बिभ्रति क्षेम॒यन्तो॒ दश॒ गर्भं॑ च॒रसे॑ धापयन्ते ।
त्रि॒धात॑वः पर॒मा अ॑स्य॒ गावो॑ दि॒वश्च॑रन्ति॒ परि॑ स॒द्यो अन्ता॑न्
॥४॥ca̱tvāra̍ īṃ bibhrati kṣema̱yanto̱ daśa̱ garbha̍ṃ ca̱rase̍ dhāpayante |
tri̱dhāta̍vaḥ para̱mā a̍sya̱ gāvo̍ di̱vaśca̍ranti̱ pari̍ sa̱dyo antā̍n
इ॒दं वपु॑र्नि॒वच॑नं जनास॒श्चर॑न्ति॒ यन्न॒द्य॑स्त॒स्थुराप॑: ।
द्वे यदीं॑ बिभृ॒तो मा॒तुर॒न्ये इ॒हेह॑ जा॒ते य॒म्या॒३ सब॑न्धू
॥५॥i̱daṃ vapu̍rni̱vaca̍naṃ janāsa̱ścara̍nti̱ yanna̱dya̍sta̱sthurāpa̍: |
dve yadī̍ṃ bibhṛ̱to mā̱tura̱nye i̱heha̍ jā̱te ya̱myā̱3 saba̍ndhū
वि त॑न्वते॒ धियो॑ अस्मा॒ अपां॑सि॒ वस्त्रा॑ पु॒त्राय॑ मा॒तरो॑ वयन्ति ।
उ॒प॒प्र॒क्षे वृष॑णो॒ मोद॑माना दि॒वस्प॒था व॒ध्वो॑ य॒न्त्यच्छ॑
॥६॥vi ta̍nvate̱ dhiyo̍ asmā̱ apā̍ṃsi̱ vastrā̍ pu̱trāya̍ mā̱taro̍ vayanti |
u̱pa̱pra̱kṣe vṛṣa̍ṇo̱ moda̍mānā di̱vaspa̱thā va̱dhvo̍ ya̱ntyaccha̍
तद॑स्तु मित्रावरुणा॒ तद॑ग्ने॒ शं योर॒स्मभ्य॑मि॒दम॑स्तु श॒स्तम् ।
अ॒शी॒महि॑ गा॒धमु॒त प्र॑ति॒ष्ठां नमो॑ दि॒वे बृ॑ह॒ते साद॑नाय
॥७॥tada̍stu mitrāvaruṇā̱ tada̍gne̱ śaṃ yora̱smabhya̍mi̱dama̍stu śa̱stam |
a̱śī̱mahi̍ gā̱dhamu̱ta pra̍ti̱ṣṭhāṃ namo̍ di̱ve bṛ̍ha̱te sāda̍nāya