अध्ययनम्
- अनुक्रमणिका
- मूलम्
१० प्राजापत्यः संवरणः। इन्द्रः। त्रिष्टुप्।
महि॑ म॒हे त॒वसे॑ दीध्ये॒ नॄनिन्द्रा॑ये॒त्था त॒वसे॒ अत॑व्यान् ।
यो अ॑स्मै सुम॒तिं वाज॑सातौ स्तु॒तो जने॑ सम॒र्य॑श्चि॒केत॑
॥१॥mahi̍ ma̱he ta̱vase̍ dīdhye̱ nṝnindrā̍ye̱tthā ta̱vase̱ ata̍vyān |
yo a̍smai suma̱tiṃ vāja̍sātau stu̱to jane̍ sama̱rya̍ści̱keta̍
स त्वं न॑ इन्द्र धियसा॒नो अ॒र्कैर्हरी॑णां वृष॒न् योक्त्र॑मश्रेः ।
या इ॒त्था म॑घव॒न्ननु॒ जोषं॒ वक्षो॑ अ॒भि प्रार्यः स॑क्षि॒ जना॑न्
॥२॥sa tvaṃ na̍ indra dhiyasā̱no a̱rkairharī̍ṇāṃ vṛṣa̱n yoktra̍maśreḥ |
yā i̱tthā ma̍ghava̱nnanu̱ joṣa̱ṃ vakṣo̍ a̱bhi prāryaḥ sa̍kṣi̱ janā̍n
न ते त॑ इन्द्रा॒भ्य१स्मदृ॒ष्वाऽयु॑क्तासो अब्र॒ह्मता॒ यदस॑न् ।
तिष्ठा॒ रथ॒मधि॒ तं व॑ज्रह॒स्ताऽऽ र॒श्मिं दे॑व यमसे॒ स्वश्व॑:
॥३॥na te ta̍ indrā̱bhya1smadṛ̱ṣvā'yu̍ktāso abra̱hmatā̱ yadasa̍n |
tiṣṭhā̱ ratha̱madhi̱ taṃ va̍jraha̱stā'' ra̱śmiṃ de̍va yamase̱ svaśva̍:
पु॒रू यत् त॑ इन्द्र॒ सन्त्यु॒क्था गवे॑ च॒कर्थो॒र्वरा॑सु॒ युध्य॑न् ।
त॒त॒क्षे सूर्या॑य चि॒दोक॑सि॒ स्वे वृषा॑ स॒मत्सु॑ दा॒सस्य॒ नाम॑ चित्
॥४॥pu̱rū yat ta̍ indra̱ santyu̱kthā gave̍ ca̱kartho̱rvarā̍su̱ yudhya̍n |
ta̱ta̱kṣe sūryā̍ya ci̱doka̍si̱ sve vṛṣā̍ sa̱matsu̍ dā̱sasya̱ nāma̍ cit
व॒यं ते त॑ इन्द्र॒ ये च॒ नर॒: शर्धो॑ जज्ञा॒ना या॒ताश्च॒ रथा॑: ।
आस्माञ्ज॑गम्यादहिशुष्म॒ सत्वा॒ भगो॒ न हव्य॑: प्रभृ॒थेषु॒ चारु॑:
॥५॥va̱yaṃ te ta̍ indra̱ ye ca̱ nara̱: śardho̍ jajñā̱nā yā̱tāśca̱ rathā̍: |
āsmāñja̍gamyādahiśuṣma̱ satvā̱ bhago̱ na havya̍: prabhṛ̱theṣu̱ cāru̍:
प॒पृ॒क्षेण्य॑मिन्द्र॒ त्वे ह्योजो॑ नृ॒म्णानि॑ च नृ॒तमा॑नो॒ अम॑र्तः ।
स न॒ एनीं॑ वसवानो र॒यिं दा॒: प्रार्यः स्तु॑षे तुविम॒घस्य॒ दान॑म्
॥६॥pa̱pṛ̱kṣeṇya̍mindra̱ tve hyojo̍ nṛ̱mṇāni̍ ca nṛ̱tamā̍no̱ ama̍rtaḥ |
sa na̱ enī̍ṃ vasavāno ra̱yiṃ dā̱: prāryaḥ stu̍ṣe tuvima̱ghasya̱ dāna̍m
ए॒वा न॑ इन्द्रो॒तिभि॑रव पा॒हि गृ॑ण॒तः शू॑र का॒रून् ।
उ॒त त्वचं॒ दद॑तो॒ वाज॑सातौ पिप्री॒हि मध्व॒: सुषु॑तस्य॒ चारो॑:
॥७॥e̱vā na̍ indro̱tibhi̍rava pā̱hi gṛ̍ṇa̱taḥ śū̍ra kā̱rūn |
u̱ta tvaca̱ṃ dada̍to̱ vāja̍sātau piprī̱hi madhva̱: suṣu̍tasya̱ cāro̍:
उ॒त त्ये मा॑ पौरुकु॒त्स्यस्य॑ सू॒रेस्त्र॒सद॑स्योर्हिर॒णिनो॒ ररा॑णाः ।
वह॑न्तु मा॒ दश॒ श्येता॑सो अस्य गैरिक्षि॒तस्य॒ क्रतु॑भि॒र्नु स॑श्चे
॥८॥u̱ta tye mā̍ pauruku̱tsyasya̍ sū̱restra̱sada̍syorhira̱ṇino̱ rarā̍ṇāḥ |
vaha̍ntu mā̱ daśa̱ śyetā̍so asya gairikṣi̱tasya̱ kratu̍bhi̱rnu sa̍śce
उ॒त त्ये मा॑ मारु॒ताश्व॑स्य॒ शोणा॒: क्रत्वा॑मघासो वि॒दथ॑स्य रा॒तौ ।
स॒हस्रा॑ मे॒ च्यव॑तानो॒ ददा॑न आनू॒कम॒र्यो वपु॑षे॒ नार्च॑त्
॥९॥u̱ta tye mā̍ māru̱tāśva̍sya̱ śoṇā̱: kratvā̍maghāso vi̱datha̍sya rā̱tau |
sa̱hasrā̍ me̱ cyava̍tāno̱ dadā̍na ānū̱kama̱ryo vapu̍ṣe̱ nārca̍t
उ॒त त्ये मा॑ ध्व॒न्य॑स्य॒ जुष्टा॑ लक्ष्म॒ण्य॑स्य सु॒रुचो॒ यता॑नाः ।
म॒ह्ना रा॒यः सं॒वर॑णस्य॒ ऋषे॑र्व्र॒जं न गाव॒: प्रय॑ता॒ अपि॑ ग्मन्
॥१०॥u̱ta tye mā̍ dhva̱nya̍sya̱ juṣṭā̍ lakṣma̱ṇya̍sya su̱ruco̱ yatā̍nāḥ |
ma̱hnā rā̱yaḥ sa̱ṃvara̍ṇasya̱ ṛṣe̍rvra̱jaṃ na gāva̱: praya̍tā̱ api̍ gman