अध्ययनम्
- अनुक्रमणिका
- मूलम्
५ धरुण अङ्गिरसः। अग्निः । त्रिष्टुप्।
प्र वे॒धसे॑ क॒वये॒ वेद्या॑य॒ गिरं॑ भरे य॒शसे॑ पू॒र्व्याय॑ ।
घृ॒तप्र॑सत्तो॒ असु॑रः सु॒शेवो॑ रा॒यो ध॒र्ता ध॒रुणो॒ वस्वो॑ अ॒ग्निः
॥१॥pra ve̱dhase̍ ka̱vaye̱ vedyā̍ya̱ gira̍ṃ bhare ya̱śase̍ pū̱rvyāya̍ |
ghṛ̱tapra̍satto̱ asu̍raḥ su̱śevo̍ rā̱yo dha̱rtā dha̱ruṇo̱ vasvo̍ a̱gniḥ
ऋ॒तेन॑ ऋ॒तं ध॒रुणं॑ धारयन्त य॒ज्ञस्य॑ शा॒के प॑र॒मे व्यो॑मन् ।
दि॒वो धर्म॑न् ध॒रुणे॑ से॒दुषो॒ नॄञ्जा॒तैरजा॑ताँ अ॒भि ये न॑न॒क्षुः
॥२॥ṛ̱tena̍ ṛ̱taṃ dha̱ruṇa̍ṃ dhārayanta ya̱jñasya̍ śā̱ke pa̍ra̱me vyo̍man |
di̱vo dharma̍n dha̱ruṇe̍ se̱duṣo̱ nṝñjā̱tairajā̍tām̐ a̱bhi ye na̍na̱kṣuḥ
अं॒हो॒युव॑स्त॒न्व॑स्तन्वते॒ वि वयो॑ म॒हद् दु॒ष्टरं॑ पू॒र्व्याय॑ ।
स सं॒वतो॒ नव॑जातस्तुतुर्यात् सिं॒हं न क्रु॒द्धम॒भित॒: परि॑ ष्ठुः
॥३॥a̱ṃho̱yuva̍sta̱nva̍stanvate̱ vi vayo̍ ma̱had du̱ṣṭara̍ṃ pū̱rvyāya̍ |
sa sa̱ṃvato̱ nava̍jātastuturyāt si̱ṃhaṃ na kru̱ddhama̱bhita̱: pari̍ ṣṭhuḥ
मा॒तेव॒ यद् भर॑से पप्रथा॒नो जनं॑जनं॒ धाय॑से॒ चक्ष॑से च ।
वयो॑वयो जरसे॒ यद्दधा॑न॒: परि॒ त्मना॒ विषु॑रूपो जिगासि
॥४॥mā̱teva̱ yad bhara̍se paprathā̱no jana̍ṃjana̱ṃ dhāya̍se̱ cakṣa̍se ca |
vayo̍vayo jarase̱ yaddadhā̍na̱: pari̱ tmanā̱ viṣu̍rūpo jigāsi
वाजो॒ नु ते॒ शव॑सस्पा॒त्वन्त॑मु॒रुं दोघं॑ ध॒रुणं॑ देव रा॒यः ।
प॒दं न ता॒युर्गुहा॒ दधा॑नो म॒हो रा॒ये चि॒तय॒न्नत्रि॑मस्पः
॥५॥vājo̱ nu te̱ śava̍saspā̱tvanta̍mu̱ruṃ dogha̍ṃ dha̱ruṇa̍ṃ deva rā̱yaḥ |
pa̱daṃ na tā̱yurguhā̱ dadhā̍no ma̱ho rā̱ye ci̱taya̱nnatri̍maspaḥ