अध्ययनम्
- अनुक्रमणिका
- मूलम्
५ भौमोऽत्रिः। अश्विनौ। त्रिष्टुप्।
आ भा॑त्य॒ग्निरु॒षसा॒मनी॑क॒मुद् विप्रा॑णां देव॒या वाचो॑ अस्थुः ।
अ॒र्वाञ्चा॑ नू॒नं र॑थ्ये॒ह या॑तं पीपि॒वांस॑मश्विना घ॒र्ममच्छ॑
॥१॥ā bhā̍tya̱gniru̱ṣasā̱manī̍ka̱mud viprā̍ṇāṃ deva̱yā vāco̍ asthuḥ |
a̱rvāñcā̍ nū̱naṃ ra̍thye̱ha yā̍taṃ pīpi̱vāṃsa̍maśvinā gha̱rmamaccha̍
न सं॑स्कृ॒तं प्र मि॑मीतो॒ गमि॒ष्ठा ऽन्ति॑ नू॒नम॒श्विनोप॑स्तुते॒ह ।
दिवा॑भिपि॒त्वेऽव॒साग॑मिष्ठा॒ प्रत्यव॑र्तिं दा॒शुषे॒ शम्भ॑विष्ठा
॥२॥na sa̍ṃskṛ̱taṃ pra mi̍mīto̱ gami̱ṣṭhā 'nti̍ nū̱nama̱śvinopa̍stute̱ha |
divā̍bhipi̱tve'va̱sāga̍miṣṭhā̱ pratyava̍rtiṃ dā̱śuṣe̱ śambha̍viṣṭhā
उ॒ता या॑तं संग॒वे प्रा॒तरह्नो॑ म॒ध्यंदि॑न॒ उदि॑ता॒ सूर्य॑स्य ।
दिवा॒ नक्त॒मव॑सा॒ शंत॑मेन॒ नेदानीं॑ पी॒तिर॒श्विना त॑तान
॥३॥u̱tā yā̍taṃ saṃga̱ve prā̱tarahno̍ ma̱dhyaṃdi̍na̱ udi̍tā̱ sūrya̍sya |
divā̱ nakta̱mava̍sā̱ śaṃta̍mena̱ nedānī̍ṃ pī̱tira̱śvinā ta̍tāna
इ॒दं हि वां॑ प्र॒दिवि॒ स्थान॒मोक॑ इ॒मे गृ॒हा अ॑श्विने॒दं दु॑रो॒णम् ।
आ नो॑ दि॒वो बृ॑ह॒तः पर्व॑ता॒दा ऽद्भ्यो या॑त॒मिष॒मूर्जं॒ वह॑न्ता
॥४॥i̱daṃ hi vā̍ṃ pra̱divi̱ sthāna̱moka̍ i̱me gṛ̱hā a̍śvine̱daṃ du̍ro̱ṇam |
ā no̍ di̱vo bṛ̍ha̱taḥ parva̍tā̱dā 'dbhyo yā̍ta̱miṣa̱mūrja̱ṃ vaha̍ntā
सम॒श्विनो॒रव॑सा॒ नूत॑नेन मयो॒भुवा॑ सु॒प्रणी॑ती गमेम ।
आ नो॑ र॒यिं व॑हत॒मोत वी॒राना विश्वा॑न्यमृता॒ सौभ॑गानि
॥५॥sama̱śvino̱rava̍sā̱ nūta̍nena mayo̱bhuvā̍ su̱praṇī̍tī gamema |
ā no̍ ra̱yiṃ va̍hata̱mota vī̱rānā viśvā̍nyamṛtā̱ saubha̍gāni