अध्ययनम्
- अनुक्रमणिका
- मूलम्
४ प्रयस्वन्त आत्रेयाः। अग्निः। अनुष्टुप्, ४ पंक्तिः।
यम॑ग्ने वाजसातम॒ त्वं चि॒न् मन्य॑से र॒यिम् ।
तं नो॑ गी॒र्भिः श्र॒वाय्यं॑ देव॒त्रा प॑नया॒ युज॑म्
॥१॥yama̍gne vājasātama̱ tvaṃ ci̱n manya̍se ra̱yim |
taṃ no̍ gī̱rbhiḥ śra̱vāyya̍ṃ deva̱trā pa̍nayā̱ yuja̍m
ये अ॑ग्ने॒ नेरय॑न्ति ते वृ॒द्धा उ॒ग्रस्य॒ शव॑सः ।
अप॒ द्वेषो॒ अप॒ ह्वरो॒ऽन्यव्र॑तस्य सश्चिरे
॥२॥ye a̍gne̱ neraya̍nti te vṛ̱ddhā u̱grasya̱ śava̍saḥ |
apa̱ dveṣo̱ apa̱ hvaro̱'nyavra̍tasya saścire
होता॑रं त्वा वृणीम॒हेऽग्ने॒ दक्ष॑स्य॒ साध॑नम् ।
य॒ज्ञेषु॑ पू॒र्व्यं गि॒रा प्रय॑स्वन्तो हवामहे
॥३॥hotā̍raṃ tvā vṛṇīma̱he'gne̱ dakṣa̍sya̱ sādha̍nam |
ya̱jñeṣu̍ pū̱rvyaṃ gi̱rā praya̍svanto havāmahe
इ॒त्था यथा॑ त ऊ॒तये॒ सह॑सावन्दि॒वेदि॑वे ।
रा॒य ऋ॒ताय॑ सुक्रतो॒ गोभि॑: ष्याम सध॒मादो॑ वी॒रैः स्या॑म सध॒माद॑:
॥४॥i̱tthā yathā̍ ta ū̱taye̱ saha̍sāvandi̱vedi̍ve |
rā̱ya ṛ̱tāya̍ sukrato̱ gobhi̍: ṣyāma sadha̱mādo̍ vī̱raiḥ syā̍ma sadha̱māda̍: