अध्ययनम्
- अनुक्रमणिका
- मूलम्
५ प्रतिप्रभ आत्रेयः, (५ तृणपाणिः)। विश्वे देवाः। त्रिष्टुप्।
दे॒वं वो॑ अ॒द्य स॑वि॒तार॒मेषे॒ भगं॑ च॒ रत्नं॑ वि॒भज॑न्तमा॒योः ।
आ वां॑ नरा पुरुभुजा ववृत्यां दि॒वेदि॑वे चिदश्विना सखी॒यन्
॥१॥de̱vaṃ vo̍ a̱dya sa̍vi̱tāra̱meṣe̱ bhaga̍ṃ ca̱ ratna̍ṃ vi̱bhaja̍ntamā̱yoḥ |
ā vā̍ṃ narā purubhujā vavṛtyāṃ di̱vedi̍ve cidaśvinā sakhī̱yan
प्रति॑ प्र॒याण॒मसु॑रस्य वि॒द्वान् त्सू॒क्तैर्दे॒वं स॑वि॒तारं॑ दुवस्य ।
उप॑ ब्रुवीत॒ नम॑सा विजा॒नञ्ज्येष्ठं॑ च॒ रत्नं॑ वि॒भज॑न्तमा॒योः
॥२॥prati̍ pra̱yāṇa̱masu̍rasya vi̱dvān tsū̱ktairde̱vaṃ sa̍vi̱tāra̍ṃ duvasya |
upa̍ bruvīta̱ nama̍sā vijā̱nañjyeṣṭha̍ṃ ca̱ ratna̍ṃ vi̱bhaja̍ntamā̱yoḥ
अ॒द॒त्र॒या द॑यते॒ वार्या॑णि पू॒षा भगो॒ अदि॑ति॒र्वस्त॑ उ॒स्रः ।
इन्द्रो॒ विष्णु॒र्वरु॑णो मि॒त्रो अ॒ग्निरहा॑नि भ॒द्रा ज॑नयन्त द॒स्माः
॥३॥a̱da̱tra̱yā da̍yate̱ vāryā̍ṇi pū̱ṣā bhago̱ adi̍ti̱rvasta̍ u̱sraḥ |
indro̱ viṣṇu̱rvaru̍ṇo mi̱tro a̱gnirahā̍ni bha̱drā ja̍nayanta da̱smāḥ
तन्नो॑ अन॒र्वा स॑वि॒ता वरू॑थं॒ तत् सिन्ध॑व इ॒षय॑न्तो॒ अनु॑ ग्मन् ।
उप॒ यद् वोचे॑ अध्व॒रस्य॒ होता॑ रा॒यः स्या॑म॒ पत॑यो॒ वाज॑रत्नाः
॥४॥tanno̍ ana̱rvā sa̍vi̱tā varū̍tha̱ṃ tat sindha̍va i̱ṣaya̍nto̱ anu̍ gman |
upa̱ yad voce̍ adhva̱rasya̱ hotā̍ rā̱yaḥ syā̍ma̱ pata̍yo̱ vāja̍ratnāḥ
प्र ये वसु॑भ्य॒ ईव॒दा नमो॒ दुर्ये मि॒त्रे वरु॑णे सू॒क्तवा॑चः ।
अवै॒त्वभ्वं॑ कृणु॒ता वरी॑यो दि॒वस्पृ॑थि॒व्योरव॑सा मदेम
॥५॥pra ye vasu̍bhya̱ īva̱dā namo̱ durye mi̱tre varu̍ṇe sū̱ktavā̍caḥ |
avai̱tvabhva̍ṃ kṛṇu̱tā varī̍yo di̱vaspṛ̍thi̱vyorava̍sā madema