अध्ययनम्
- अनुक्रमणिका
- मूलम्
६ सुतंभर आत्रेयः। अग्निः । गायत्री।
अ॒ग्निं स्तोमे॑न बोधय समिधा॒नो अम॑र्त्यम् । ह॒व्या दे॒वेषु॑ नो दधत्
॥१॥a̱gniṃ stome̍na bodhaya samidhā̱no ama̍rtyam | ha̱vyā de̱veṣu̍ no dadhat
तम॑ध्व॒रेष्वी॑ळते दे॒वं मर्ता॒ अम॑र्त्यम् । यजि॑ष्ठं॒ मानु॑षे॒ जने॑
॥२॥tama̍dhva̱reṣvī̍l̤ate de̱vaṃ martā̱ ama̍rtyam | yaji̍ṣṭha̱ṃ mānu̍ṣe̱ jane̍
तं हि शश्व॑न्त॒ ईळ॑ते स्रु॒चा दे॒वं घृ॑त॒श्चुता॑ । अ॒ग्निं ह॒व्याय॒ वोळह॑वे
॥३॥taṃ hi śaśva̍nta̱ īl̤a̍te sru̱cā de̱vaṃ ghṛ̍ta̱ścutā̍ | a̱gniṃ ha̱vyāya̱ vol̤aha̍ve
अ॒ग्निर्जा॒तो अ॑रोचत॒ घ्नन् दस्यू॒ञ्ज्योति॑षा॒ तम॑: । अवि॑न्द॒द् गा अ॒पः स्व॑:
॥४॥a̱gnirjā̱to a̍rocata̱ ghnan dasyū̱ñjyoti̍ṣā̱ tama̍: | avi̍nda̱d gā a̱paḥ sva̍:
अ॒ग्निमी॒ळेन्यं॑ क॒विं घृ॒तपृ॑ष्ठं सपर्यत । वेतु॑ मे शृ॒णव॒द्धव॑म्
॥५॥a̱gnimī̱l̤enya̍ṃ ka̱viṃ ghṛ̱tapṛ̍ṣṭhaṃ saparyata | vetu̍ me śṛ̱ṇava̱ddhava̍m
अ॒ग्निं घृ॒तेन॑ वावृधु॒: स्तोमे॑भिर्वि॒श्वच॑र्षणिम् । स्वा॒धीभि॑र्वच॒स्युभि॑:
॥६॥a̱gniṃ ghṛ̱tena̍ vāvṛdhu̱: stome̍bhirvi̱śvaca̍rṣaṇim | svā̱dhībhi̍rvaca̱syubhi̍: