अध्ययनम्
- अनुक्रमणिका
- मूलम्
११ गाथिनो विश्वामित्रः। इन्द्रः।गायत्री, ११ त्रिष्टुप् ।
वार्त्र॑हत्याय॒ शव॑से पृतना॒षाह्या॑य च । इन्द्र॒ त्वा व॑र्तयामसि
॥१॥vārtra̍hatyāya̱ śava̍se pṛtanā̱ṣāhyā̍ya ca | indra̱ tvā va̍rtayāmasi
अ॒र्वा॒चीनं॒ सु ते॒ मन॑ उ॒त चक्षु॑: शतक्रतो । इन्द्र॑ कृ॒ण्वन्तु॑ वा॒घत॑:
॥२॥a̱rvā̱cīna̱ṃ su te̱ mana̍ u̱ta cakṣu̍: śatakrato | indra̍ kṛ̱ṇvantu̍ vā̱ghata̍:
नामा॑नि ते शतक्रतो॒ विश्वा॑भिर्गी॒र्भिरी॑महे । इन्द्रा॑भिमाति॒षाह्ये॑
॥३॥nāmā̍ni te śatakrato̱ viśvā̍bhirgī̱rbhirī̍mahe | indrā̍bhimāti̱ṣāhye̍
पु॒रु॒ष्टु॒तस्य॒ धाम॑भिः श॒तेन॑ महयामसि । इन्द्र॑स्य चर्षणी॒धृत॑:
॥४॥pu̱ru̱ṣṭu̱tasya̱ dhāma̍bhiḥ śa̱tena̍ mahayāmasi | indra̍sya carṣaṇī̱dhṛta̍:
इन्द्रं॑ वृ॒त्राय॒ हन्त॑वे पुरुहू॒तमुप॑ ब्रुवे । भरे॑षु॒ वाज॑सातये
॥५॥indra̍ṃ vṛ̱trāya̱ hanta̍ve puruhū̱tamupa̍ bruve | bhare̍ṣu̱ vāja̍sātaye
वाजे॑षु सास॒हिर्भ॑व॒ त्वामी॑महे शतक्रतो । इन्द्र॑ वृ॒त्राय॒ हन्त॑वे
॥६॥vāje̍ṣu sāsa̱hirbha̍va̱ tvāmī̍mahe śatakrato | indra̍ vṛ̱trāya̱ hanta̍ve
द्यु॒म्नेषु॑ पृत॒नाज्ये॑ पृत्सु॒तूर्षु॒ श्रव॑स्सु च । इन्द्र॒ साक्ष्वा॒भिमा॑तिषु
॥७॥dyu̱mneṣu̍ pṛta̱nājye̍ pṛtsu̱tūrṣu̱ śrava̍ssu ca | indra̱ sākṣvā̱bhimā̍tiṣu
शु॒ष्मिन्त॑मं न ऊ॒तये॑ द्यु॒म्निनं॑ पाहि॒ जागृ॑विम् । इन्द्र॒ सोमं॑ शतक्रतो
॥८॥śu̱ṣminta̍maṃ na ū̱taye̍ dyu̱mnina̍ṃ pāhi̱ jāgṛ̍vim | indra̱ soma̍ṃ śatakrato
इ॒न्द्रि॒याणि॑ शतक्रतो॒ या ते॒ जने॑षु प॒ञ्चसु॑ । इन्द्र॒ तानि॑ त॒ आ वृ॑णे
॥९॥i̱ndri̱yāṇi̍ śatakrato̱ yā te̱ jane̍ṣu pa̱ñcasu̍ | indra̱ tāni̍ ta̱ ā vṛ̍ṇe
अग॑न्निन्द्र॒ श्रवो॑ बृ॒हद् द्यु॒म्नं द॑धिष्व दु॒ष्टर॑म् । उत् ते॒ शुष्मं॑ तिरामसि
॥१०॥aga̍nnindra̱ śravo̍ bṛ̱had dyu̱mnaṃ da̍dhiṣva du̱ṣṭara̍m | ut te̱ śuṣma̍ṃ tirāmasi
अ॒र्वा॒वतो॑ न॒ आ ग॒ह्यथो॑ शक्र परा॒वत॑: ।
उ॒ लो॒को यस्ते॑ अद्रिव॒ इन्द्रे॒ह तत॒ आ ग॑हि
॥११॥a̱rvā̱vato̍ na̱ ā ga̱hyatho̍ śakra parā̱vata̍: |
u̱ lo̱ko yaste̍ adriva̱ indre̱ha tata̱ ā ga̍hi