अध्ययनम्
- अनुक्रमणिका
- मूलम्
५ गाथिनो विश्वामित्रः। इन्द्रः। त्रिष्टुप्।
स॒द्यो ह॑ जा॒तो वृ॑ष॒भः क॒नीन॒: प्रभ॑र्तुमाव॒दन्ध॑सः सु॒तस्य॑ ।
सा॒धोः पि॑ब प्रतिका॒मं यथा॑ ते॒ रसा॑शिरः प्रथ॒मं सो॒म्यस्य॑
॥१॥sa̱dyo ha̍ jā̱to vṛ̍ṣa̱bhaḥ ka̱nīna̱: prabha̍rtumāva̱dandha̍saḥ su̱tasya̍ |
sā̱dhoḥ pi̍ba pratikā̱maṃ yathā̍ te̱ rasā̍śiraḥ pratha̱maṃ so̱myasya̍
यज्जाय॑था॒स्तदह॑रस्य॒ कामें॒ऽशोः पी॒यूष॑मपिबो गिरि॒ष्ठाम् ।
तं ते॑ मा॒ता परि॒ योषा॒ जनि॑त्री म॒हः पि॒तुर्दम॒ आसि॑ञ्च॒दग्रे॑
॥२॥yajjāya̍thā̱stadaha̍rasya̱ kāme̱ṃ'śoḥ pī̱yūṣa̍mapibo giri̱ṣṭhām |
taṃ te̍ mā̱tā pari̱ yoṣā̱ jani̍trī ma̱haḥ pi̱turdama̱ āsi̍ñca̱dagre̍
उ॒प॒स्थाय॑ मा॒तर॒मन्न॑मैट्ट ति॒ग्मम॑पश्यद॒भि सोम॒मूध॑: ।
प्र॒या॒वय॑न्नचर॒द् गृत्सो॑ अ॒न्यान् म॒हानि॑ चक्रे पुरु॒धप्र॑तीकः
॥३॥u̱pa̱sthāya̍ mā̱tara̱manna̍maiṭṭa ti̱gmama̍paśyada̱bhi soma̱mūdha̍: |
pra̱yā̱vaya̍nnacara̱d gṛtso̍ a̱nyān ma̱hāni̍ cakre puru̱dhapra̍tīkaḥ
उ॒ग्रस्तु॑रा॒षाळ॒भिभू॑त्योजा यथाव॒शं त॒न्वं॑ चक्र ए॒षः ।
त्वष्टा॑र॒मिन्द्रो॑ ज॒नुषा॑भि॒भूया॒ऽऽमुष्या॒ सोम॑मपिबच्च॒मूषु॑
॥४॥u̱grastu̍rā̱ṣāl̤a̱bhibhū̍tyojā yathāva̱śaṃ ta̱nva̍ṃ cakra e̱ṣaḥ |
tvaṣṭā̍ra̱mindro̍ ja̱nuṣā̍bhi̱bhūyā̱''muṣyā̱ soma̍mapibacca̱mūṣu̍
शु॒नं हु॑वेम म॒घवा॑न॒मिन्द्र॑म॒स्मिन् भरे॒ नृत॑मं॒ वाज॑सातौ ।
शृ॒ण्वन्त॑मु॒ग्रमू॒तये॑ स॒मत्सु॒ घ्नन्तं॑ वृ॒त्राणि॑ सं॒जितं॒ धना॑नाम्
॥५॥śu̱naṃ hu̍vema ma̱ghavā̍na̱mindra̍ma̱smin bhare̱ nṛta̍ma̱ṃ vāja̍sātau |
śṛ̱ṇvanta̍mu̱gramū̱taye̍ sa̱matsu̱ ghnanta̍ṃ vṛ̱trāṇi̍ sa̱ṃjita̱ṃ dhanā̍nām