अध्ययनम्
- अनुक्रमणिका
- मूलम्
९ गाथिनो विश्वामित्रः। अग्निः। गायत्री।
अ॒ग्निर्होता॑ पु॒रोहि॑तोऽध्व॒रस्य॒ विच॑र्षणिः । स वे॑द य॒ज्ञमा॑नु॒षक्
॥१॥a̱gnirhotā̍ pu̱rohi̍to'dhva̱rasya̱ vica̍rṣaṇiḥ | sa ve̍da ya̱jñamā̍nu̱ṣak
स ह॑व्य॒वाळम॑र्त्य उ॒शिग्दू॒तश्चनो॑हितः । अ॒ग्निर्धि॒या समृ॑ण्वति
॥२॥sa ha̍vya̱vāl̤ama̍rtya u̱śigdū̱taścano̍hitaḥ | a̱gnirdhi̱yā samṛ̍ṇvati
अ॒ग्निर्धि॒या स चे॑तति के॒तुर्य॒ज्ञस्य॑ पू॒र्व्यः । अर्थं॒ ह्य॑स्य त॒रणि॑
॥३॥a̱gnirdhi̱yā sa ce̍tati ke̱turya̱jñasya̍ pū̱rvyaḥ | artha̱ṃ hya̍sya ta̱raṇi̍
अ॒ग्निं सू॒नुं सन॑श्रुतं॒ सह॑सो जा॒तवे॑दसम् । वह्निं॑ दे॒वा अ॑कृण्वत
॥४॥a̱gniṃ sū̱nuṃ sana̍śruta̱ṃ saha̍so jā̱tave̍dasam | vahni̍ṃ de̱vā a̍kṛṇvata
अदा॑भ्यः पुरए॒ता वि॒शाम॒ग्निर्मानु॑षीणाम् । तूर्णी॒ रथ॒: सदा॒ नव॑:
॥५॥adā̍bhyaḥ purae̱tā vi̱śāma̱gnirmānu̍ṣīṇām | tūrṇī̱ ratha̱: sadā̱ nava̍:
सा॒ह्वान् विश्वा॑ अभि॒युज॒: क्रतु॑र्दे॒वाना॒ममृ॑क्तः । अ॒ग्निस्तु॒विश्र॑वस्तमः
॥६॥sā̱hvān viśvā̍ abhi̱yuja̱: kratu̍rde̱vānā̱mamṛ̍ktaḥ | a̱gnistu̱viśra̍vastamaḥ
अ॒भि प्रयां॑सि॒ वाह॑सा दा॒श्वाँ अ॑श्नोति॒ मर्त्य॑: । क्षयं॑ पाव॒कशो॑चिषः
॥७॥a̱bhi prayā̍ṃsi̱ vāha̍sā dā̱śvām̐ a̍śnoti̱ martya̍: | kṣaya̍ṃ pāva̱kaśo̍ciṣaḥ
परि॒ विश्वा॑नि॒ सुधि॑ता॒ ऽग्नेर॑श्याम॒ मन्म॑भिः । विप्रा॑सो जा॒तवे॑दसः
॥८॥pari̱ viśvā̍ni̱ sudhi̍tā̱ 'gnera̍śyāma̱ manma̍bhiḥ | viprā̍so jā̱tave̍dasaḥ
अग्ने॒ विश्वा॑नि॒ वार्या॒ वाजे॑षु सनिषामहे । त्वे दे॒वास॒ एरि॑रे
॥९॥agne̱ viśvā̍ni̱ vāryā̱ vāje̍ṣu saniṣāmahe | tve de̱vāsa̱ eri̍re