अध्ययनम्
- अनुक्रमणिका
- मूलम्
११ गाथिनो विश्वामित्रः। इन्द्रः। त्रिष्टुप्।
तिष्ठा॒ हरी॒ रथ॒ आ यु॒ज्यमा॑ना या॒हि वा॒युर्न नि॒युतो॑ नो॒ अच्छ॑ ।
पिबा॒स्यन्धो॑ अ॒भिसृ॑ष्टो अ॒स्मे इन्द्र॒ स्वाहा॑ ररि॒मा ते॒ मदा॑य
॥१॥tiṣṭhā̱ harī̱ ratha̱ ā yu̱jyamā̍nā yā̱hi vā̱yurna ni̱yuto̍ no̱ accha̍ |
pibā̱syandho̍ a̱bhisṛ̍ṣṭo a̱sme indra̱ svāhā̍ rari̱mā te̱ madā̍ya
उपा॑जि॒रा पु॑रुहू॒ताय॒ सप्ती॒ हरी॒ रथ॑स्य धू॒र्ष्वा यु॑नज्मि ।
द्र॒वद् यथा॒ सम्भृ॑तं वि॒श्वत॑श्चि॒दुपे॒मं य॒ज्ञमा व॑हात॒ इन्द्र॑म्
॥२॥upā̍ji̱rā pu̍ruhū̱tāya̱ saptī̱ harī̱ ratha̍sya dhū̱rṣvā yu̍najmi |
dra̱vad yathā̱ sambhṛ̍taṃ vi̱śvata̍ści̱dupe̱maṃ ya̱jñamā va̍hāta̱ indra̍m
उपो॑ नयस्व॒ वृष॑णा तपु॒ष्पोतेम॑व॒ त्वं वृ॑षभ स्वधावः ।
ग्रसे॑ता॒मश्वा॒ वि मु॑चे॒ह शोणा॑ दि॒वेदि॑वे स॒दृशी॑रद्धि धा॒नाः
॥३॥upo̍ nayasva̱ vṛṣa̍ṇā tapu̱ṣpotema̍va̱ tvaṃ vṛ̍ṣabha svadhāvaḥ |
grase̍tā̱maśvā̱ vi mu̍ce̱ha śoṇā̍ di̱vedi̍ve sa̱dṛśī̍raddhi dhā̱nāḥ
ब्रह्म॑णा ते ब्रह्म॒युजा॑ युनज्मि॒ हरी॒ सखा॑या सध॒माद॑ आ॒शू ।
स्थि॒रं रथं॑ सु॒खमि॑न्द्राधि॒तिष्ठ॑न् प्रजा॒नन् वि॒द्वाँ उप॑ याहि॒ सोम॑म्
॥४॥brahma̍ṇā te brahma̱yujā̍ yunajmi̱ harī̱ sakhā̍yā sadha̱māda̍ ā̱śū |
sthi̱raṃ ratha̍ṃ su̱khami̍ndrādhi̱tiṣṭha̍n prajā̱nan vi̱dvām̐ upa̍ yāhi̱ soma̍m
मा ते॒ हरी॒ वृष॑णा वी॒तपृ॑ष्ठा॒ नि री॑रम॒न्यज॑मानासो अ॒न्ये ।
अ॒त्याया॑हि॒ शश्व॑तो व॒यं तेऽरं॑ सु॒तेभि॑: कृणवाम॒ सोमै॑:
॥५॥mā te̱ harī̱ vṛṣa̍ṇā vī̱tapṛ̍ṣṭhā̱ ni rī̍rama̱nyaja̍mānāso a̱nye |
a̱tyāyā̍hi̱ śaśva̍to va̱yaṃ te'ra̍ṃ su̱tebhi̍: kṛṇavāma̱ somai̍:
तवा॒यं सोम॒स्त्वमेह्य॒र्वाङ् श॑श्वत्त॒मं सु॒मना॑ अ॒स्य पा॑हि ।
अ॒स्मिन् य॒ज्ञे ब॒र्हिष्या नि॒षद्या॑ दधि॒ष्वेमं ज॒ठर॒ इन्दु॑मिन्द्र
॥६॥tavā̱yaṃ soma̱stvamehya̱rvāṅ śa̍śvatta̱maṃ su̱manā̍ a̱sya pā̍hi |
a̱smin ya̱jñe ba̱rhiṣyā ni̱ṣadyā̍ dadhi̱ṣvemaṃ ja̱ṭhara̱ indu̍mindra
स्ती॒र्णं ते॑ ब॒र्हिः सु॒त इ॑न्द्र॒ सोम॑: कृ॒ता धा॒ना अत्त॑वे ते॒ हरि॑भ्याम् ।
तदो॑कसे पुरु॒शाका॑य॒ वृष्णे॑ म॒रुत्व॑ते॒ तुभ्यं॑ रा॒ता ह॒वींषि॑
॥७॥stī̱rṇaṃ te̍ ba̱rhiḥ su̱ta i̍ndra̱ soma̍: kṛ̱tā dhā̱nā atta̍ve te̱ hari̍bhyām |
tado̍kase puru̱śākā̍ya̱ vṛṣṇe̍ ma̱rutva̍te̱ tubhya̍ṃ rā̱tā ha̱vīṃṣi̍
इ॒मं नर॒: पर्व॑ता॒स्तुभ्य॒माप॒: समि॑न्द्र॒ गोभि॒र्मधु॑मन्तमक्रन् ।
तस्या॒गत्या॑ सु॒मना॑ ऋष्व पाहि प्रजा॒नन् वि॒द्वान्प॒थ्या॒३ अनु॒ स्वाः
॥८॥i̱maṃ nara̱: parva̍tā̱stubhya̱māpa̱: sami̍ndra̱ gobhi̱rmadhu̍mantamakran |
tasyā̱gatyā̍ su̱manā̍ ṛṣva pāhi prajā̱nan vi̱dvānpa̱thyā̱3 anu̱ svāḥ
याँ आभ॑जो म॒रुत॑ इन्द्र॒ सोमे॒ ये त्वामव॑र्ध॒न्नभ॑वन् ग॒णस्ते॑ ।
तेभि॑रे॒तं स॒जोषा॑ वावशा॒नो॒३ऽग्नेः पि॑ब जि॒ह्वया॒ सोम॑मिन्द्र
॥९॥yām̐ ābha̍jo ma̱ruta̍ indra̱ some̱ ye tvāmava̍rdha̱nnabha̍van ga̱ṇaste̍ |
tebhi̍re̱taṃ sa̱joṣā̍ vāvaśā̱no̱3'gneḥ pi̍ba ji̱hvayā̱ soma̍mindra
इन्द्र॒ पिब॑ स्व॒धया॑ चित् सु॒तस्या॒ऽग्नेर्वा॑ पाहि जि॒ह्वया॑ यजत्र ।
अ॒ध्व॒र्योर्वा॒ प्रय॑तं शक्र॒ हस्ता॒द्धोतु॑र्वा य॒ज्ञं ह॒विषो॑ जुषस्व
॥१०॥indra̱ piba̍ sva̱dhayā̍ cit su̱tasyā̱'gnervā̍ pāhi ji̱hvayā̍ yajatra |
a̱dhva̱ryorvā̱ praya̍taṃ śakra̱ hastā̱ddhotu̍rvā ya̱jñaṃ ha̱viṣo̍ juṣasva
शु॒नं हु॑वेम म॒घवा॑न॒मिन्द्र॑म॒स्मिन् भरे॒ नृत॑मं॒ वाज॑सातौ ।
शृ॒ण्वन्त॑मु॒ग्रमू॒तये॑ स॒मत्सु॒ घ्नन्तं॑ वृ॒त्राणि॑ सं॒जितं॒ धना॑नाम्
॥११॥śu̱naṃ hu̍vema ma̱ghavā̍na̱mindra̍ma̱smin bhare̱ nṛta̍ma̱ṃ vāja̍sātau |
śṛ̱ṇvanta̍mu̱gramū̱taye̍ sa̱matsu̱ ghnanta̍ṃ vṛ̱trāṇi̍ sa̱ṃjita̱ṃ dhanā̍nām