tato gacchenmahādevi hiraṇyāyāśca uttare
īśvara uvāca
tato gacchenmahādevi hiraṇyāyāśca uttare ||
siddhisthānāni divyāni yatra siddhā maharṣayaḥ
||1||ततो गच्छेन्महादेवि हिरण्यायाश्च उत्तरे ॥
सिद्धिस्थानानि दिव्यानि यत्र सिद्धा महर्षयः
tatra liṃgānyanekāni śakyaṃte kathituṃ na hi ||
sāgraṃ śataṃ punastatra liṃgānāṃ pravaraṃ smṛtam
||2||तत्र लिंगान्यनेकानि शक्यंते कथितुं न हि ॥
साग्रं शतं पुनस्तत्र लिंगानां प्रवरं स्मृतम्
vajriṇyāstu taṭe devi liṃgānyekonaviṃśatiḥ ||
nyaṃkumatyāstaṭe devi sahasraṃ dviśatādhikam
||3||वज्रिण्यास्तु तटे देवि लिंगान्येकोनविंशतिः ॥
न्यंकुमत्यास्तटे देवि सहस्रं द्विशताधिकम्
prādhānyena varārohe pūrve svāyaṃbhuveṃ'tare ||
kapilāyāstaṭedevi liṃgānāṃ ṣaṣṭiruttamā
||4||प्राधान्येन वरारोहे पूर्वे स्वायंभुवेंऽतरे ॥
कपिलायास्तटेदेवि लिंगानां षष्टिरुत्तमा
sarasvatyāṃ punastatra liṃgasaṃkhyā na vidyate ||
evaṃ paṃcamukhā devi liṃgamālā vibhūṣitā
||5||सरस्वत्यां पुनस्तत्र लिंगसंख्या न विद्यते ॥
एवं पंचमुखा देवि लिंगमाला विभूषिता
prabhāse kathitā devi paṃcasrotāḥ sarasvatī ||
yasyāḥ pravāhaiḥ saṃbhinnaṃ kṣetraṃ dvādaśayojanam
||6||प्रभासे कथिता देवि पंचस्रोताः सरस्वती ॥
यस्याः प्रवाहैः संभिन्नं क्षेत्रं द्वादशयोजनम्
tatra vāpīṣu kūpeṣu yatra tatrodbhavaṃ jalam ||
sārasvataṃ tu tajjñeyaṃ te dhanyā ye pibaṃti tat
||7||तत्र वापीषु कूपेषु यत्र तत्रोद्भवं जलम् ॥
सारस्वतं तु तज्ज्ञेयं ते धन्या ये पिबंति तत्
yatratatra naraḥ snātvā samyakchraddhāsamanvitaḥ ||
sārasvatasnānaphalaṃ labhate nātra saṃśayaḥ
||8||यत्रतत्र नरः स्नात्वा सम्यक्छ्रद्धासमन्वितः ॥
सारस्वतस्नानफलं लभते नात्र संशयः
yatproktaṃ sparśaliṃgaṃ tu śrīsomeśeti viśrutam ||
prabhāsakṣetraliṃgānāṃ kalā tasyaiva śāṃkarī
||9||यत्प्रोक्तं स्पर्शलिंगं तु श्रीसोमेशेति विश्रुतम् ॥
प्रभासक्षेत्रलिंगानां कला तस्यैव शांकरी
yadvā tadvā pūjayitvā liṃgaṃ kṣetrasya madhyagam ||
śrīsomeśamiti jñātvā someśaḥ pūjito bhavet
||10||यद्वा तद्वा पूजयित्वा लिंगं क्षेत्रस्य मध्यगम् ॥
श्रीसोमेशमिति ज्ञात्वा सोमेशः पूजितो भवेत्
iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye prakīrṇasthānaliṃgamāhātmyavarṇanaṃnāma paṃcaṣaṣṭyuttaratriśatatamo'dhyāyaḥ || 365 ||
iti śrīskānde mahāpurāṇe saptame prabhāsakhaṇḍe prathamaṃ prabhāsakṣetra māhātmyaṃ sampūrṇam || ( 7-1)