jānakīśvaramāhātmyavarṇanam
īśvara uvāca
tato gacchenmahādevi jānakīśvaramuttamam ||
rāmeśānnaiṛte bhāge dhanustriṃśakasaṃsthitam
||1||ततो गच्छेन्महादेवि जानकीश्वरमुत्तमम् ॥
रामेशान्नैऋते भागे धनुस्त्रिंशकसंस्थितम्
pāpaghnaṃ sarvajaṃtūnāṃ jānakyā''rādhitaṃ purā ||
pratiṣṭhitaṃ viśeṣeṇa samyagārādhyaśaṃkaram
||2||पापघ्नं सर्वजंतूनां जानक्याऽऽराधितं पुरा ॥
प्रतिष्ठितं विशेषेण सम्यगाराध्यशंकरम्
pūrvaṃ tasyaiva liṃgasya vasiṣṭheśeti nāma vai ||
tatpaścājjānakīśeti tretāyāṃ prathitaṃ kṣitau
||3||पूर्वं तस्यैव लिंगस्य वसिष्ठेशेति नाम वै ॥
तत्पश्चाज्जानकीशेति त्रेतायां प्रथितं क्षितौ
tataḥ ṣaṣṭisahasrāṇi vālakhilyā maharṣayaḥ ||
tatra siddhimanuprāptāstena siddheśvareti ca
||4||ततः षष्टिसहस्राणि वालखिल्या महर्षयः ॥
तत्र सिद्धिमनुप्राप्तास्तेन सिद्धेश्वरेति च
khyātaṃ kalau mahādevi yugaliṃgaṃ mahāprabham ||
taddṛṣṭvā mucyate pāpairduḥkhadaurbhāgyasaṃbhavaiḥ
||5||ख्यातं कलौ महादेवि युगलिंगं महाप्रभम् ॥
तद्दृष्ट्वा मुच्यते पापैर्दुःखदौर्भाग्यसंभवैः
yastaṃ pūjayate bhaktyā nārī vā puruṣo'pi vā ||
saṃsnāpya vidhivadbhaktyā sa muktaḥ pātakairbhavet
||6||यस्तं पूजयते भक्त्या नारी वा पुरुषोऽपि वा ॥
संस्नाप्य विधिवद्भक्त्या स मुक्तः पातकैर्भवेत्
snātvā ca puṣkare tīrthe yastalligaṃ prapūjayet ||
niyato niyatāhāro māsamekaṃ nirantaram
||7||स्नात्वा च पुष्करे तीर्थे यस्तल्लिगं प्रपूजयेत् ॥
नियतो नियताहारो मासमेकं निरन्तरम्
dinedine bhavettasya vājimedhādhikaṃ phalam ||
māghe māsi tṛtīyāyāṃ yā nārī taṃ prapūjayet ||
tadanvaye'pi daurbhāgyaṃ duḥkhaṃ śokaśca no bhavet
||8||दिनेदिने भवेत्तस्य वाजिमेधाधिकं फलम् ॥
माघे मासि तृतीयायां या नारी तं प्रपूजयेत् ॥
तदन्वयेऽपि दौर्भाग्यं दुःखं शोकश्च नो भवेत्
iti te kathitaṃ devi māhātmyaṃ pāpanāśanam ||
śrutaṃ harati pāpāni saubhāgyaṃ saṃprayacchati
||9||इति ते कथितं देवि माहात्म्यं पापनाशनम् ॥
श्रुतं हरति पापानि सौभाग्यं संप्रयच्छति
iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye jānakīśvaramāhātmyavarṇanaṃnāma trayodaśottaraśatatamo'dhyāyaḥ || 113 ||