अध्ययनम्
- अनुक्रमणिका
- मूलम्
८ वामदेवो गौतमः। अग्निः।गायत्री।
अग्ने॑ मृ॒ळ म॒हाँ अ॑सि॒ य ई॒मा दे॑व॒युं जन॑म् । इ॒येथ॑ ब॒र्हिरा॒सद॑म्
॥१॥agne̍ mṛ̱l̤a ma̱hām̐ a̍si̱ ya ī̱mā de̍va̱yuṃ jana̍m | i̱yetha̍ ba̱rhirā̱sada̍m
स मानु॑षीषु दू॒ळभो॑ वि॒क्षु प्रा॒वीरम॑र्त्यः । दू॒तो विश्वे॑षां भुवत्
॥२॥sa mānu̍ṣīṣu dū̱l̤abho̍ vi̱kṣu prā̱vīrama̍rtyaḥ | dū̱to viśve̍ṣāṃ bhuvat
स सद्म॒ परि॑ णीयते॒ होता॑ म॒न्द्रो दिवि॑ष्टिषु । उ॒त पोता॒ नि षी॑दति
॥३॥sa sadma̱ pari̍ ṇīyate̱ hotā̍ ma̱ndro divi̍ṣṭiṣu | u̱ta potā̱ ni ṣī̍dati
उ॒त ग्ना अ॒ग्निर॑ध्व॒र उ॒तो गृ॒हप॑ति॒र्दमे॑ । उ॒त ब्र॒ह्मा नि षी॑दति
॥४॥u̱ta gnā a̱gnira̍dhva̱ra u̱to gṛ̱hapa̍ti̱rdame̍ | u̱ta bra̱hmā ni ṣī̍dati
वेषि॒ ह्य॑ध्वरीय॒तामु॑पव॒क्ता जना॑नाम् । ह॒व्या च॒ मानु॑षाणाम्
॥५॥veṣi̱ hya̍dhvarīya̱tāmu̍pava̱ktā janā̍nām | ha̱vyā ca̱ mānu̍ṣāṇām
वेषीद्व॑स्य दू॒त्यं१ यस्य॒ जुजो॑षो अध्व॒रम् । ह॒व्यं मर्त॑स्य॒ वोळह॑वे
॥६॥veṣīdva̍sya dū̱tyaṃ1 yasya̱ jujo̍ṣo adhva̱ram | ha̱vyaṃ marta̍sya̱ vol̤aha̍ve
अ॒स्माकं॑ जोष्यध्व॒रम॒स्माकं॑ य॒ज्ञम॑ङ्गिरः । अ॒स्माकं॑ शृणुधी॒ हव॑म्
॥७॥a̱smāka̍ṃ joṣyadhva̱rama̱smāka̍ṃ ya̱jñama̍ṅgiraḥ | a̱smāka̍ṃ śṛṇudhī̱ hava̍m
परि॑ ते दू॒ळभो॒ रथो॒ऽस्माँ अ॑श्नोतु वि॒श्वत॑: । येन॒ रक्ष॑सि दा॒शुष॑:
॥८॥pari̍ te dū̱l̤abho̱ ratho̱'smām̐ a̍śnotu vi̱śvata̍: | yena̱ rakṣa̍si dā̱śuṣa̍: