अध्ययनम्
- अनुक्रमणिका
- मूलम्
१० त्रसदस्युः पौरुकुत्स्यः। त्रसदस्युः, ७-१० इन्द्रावरुणौ। त्रिष्टुप्।
मम॑ द्वि॒ता रा॒ष्ट्रं क्ष॒त्रिय॑स्य वि॒श्वायो॒र्विश्वे॑ अ॒मृता॒ यथा॑ नः ।
क्रतुं॑ सचन्ते॒ वरु॑णस्य दे॒वा राजा॑मि कृ॒ष्टेरु॑प॒मस्य॑ व॒व्रेः
॥१॥mama̍ dvi̱tā rā̱ṣṭraṃ kṣa̱triya̍sya vi̱śvāyo̱rviśve̍ a̱mṛtā̱ yathā̍ naḥ |
kratu̍ṃ sacante̱ varu̍ṇasya de̱vā rājā̍mi kṛ̱ṣṭeru̍pa̱masya̍ va̱vreḥ
अ॒हं राजा॒ वरु॑णो॒ मह्यं॒ तान्य॑सु॒र्या॑णि प्रथ॒मा धा॑रयन्त ।
क्रतुं॑ सचन्ते॒ वरु॑णस्य दे॒वा राजा॑मि कृ॒ष्टेरु॑प॒मस्य॑ व॒व्रेः
॥२॥a̱haṃ rājā̱ varu̍ṇo̱ mahya̱ṃ tānya̍su̱ryā̍ṇi pratha̱mā dhā̍rayanta |
kratu̍ṃ sacante̱ varu̍ṇasya de̱vā rājā̍mi kṛ̱ṣṭeru̍pa̱masya̍ va̱vreḥ
अ॒हमिन्द्रो॒ वरु॑ण॒स्ते म॑हि॒त्वोर्वी ग॑भी॒रे रज॑सी सु॒मेके॑ ।
त्वष्टे॑व॒ विश्वा॒ भुव॑नानि वि॒द्वान् त्समै॑रयं॒ रोद॑सी धा॒रयं॑ च
॥३॥a̱hamindro̱ varu̍ṇa̱ste ma̍hi̱tvorvī ga̍bhī̱re raja̍sī su̱meke̍ |
tvaṣṭe̍va̱ viśvā̱ bhuva̍nāni vi̱dvān tsamai̍raya̱ṃ roda̍sī dhā̱raya̍ṃ ca
अ॒हम॒पो अ॑पिन्वमु॒क्षमा॑णा धा॒रयं॒ दिवं॒ सद॑न ऋ॒तस्य॑ ।
ऋ॒तेन॑ पु॒त्रो अदि॑तेर्ऋ॒तावो॒त त्रि॒धातु॑ प्रथय॒द्वि भूम॑
॥४॥a̱hama̱po a̍pinvamu̱kṣamā̍ṇā dhā̱raya̱ṃ diva̱ṃ sada̍na ṛ̱tasya̍ |
ṛ̱tena̍ pu̱tro adi̍terṛ̱tāvo̱ta tri̱dhātu̍ prathaya̱dvi bhūma̍
मां नर॒: स्वश्वा॑ वा॒जय॑न्तो॒ मां वृ॒ताः स॒मर॑णे हवन्ते ।
कृ॒णोम्या॒जिं म॒घवा॒हमिन्द्र॒ इय॑र्मि रे॒णुम॒भिभू॑त्योजाः
॥५॥māṃ nara̱: svaśvā̍ vā̱jaya̍nto̱ māṃ vṛ̱tāḥ sa̱mara̍ṇe havante |
kṛ̱ṇomyā̱jiṃ ma̱ghavā̱hamindra̱ iya̍rmi re̱ṇuma̱bhibhū̍tyojāḥ
अ॒हं ता विश्वा॑ चकरं॒ नकि॑र्मा॒ दैव्यं॒ सहो॑ वरते॒ अप्र॑तीतम् ।
यन्मा॒ सोमा॑सो म॒मद॒न्यदु॒क्थोभे भ॑येते॒ रज॑सी अपा॒रे
॥६॥a̱haṃ tā viśvā̍ cakara̱ṃ naki̍rmā̱ daivya̱ṃ saho̍ varate̱ apra̍tītam |
yanmā̱ somā̍so ma̱mada̱nyadu̱kthobhe bha̍yete̱ raja̍sī apā̱re
वि॒दुष्टे॒ विश्वा॒ भुव॑नानि॒ तस्य॒ ता प्र ब्र॑वीषि॒ वरु॑णाय वेधः ।
त्वं वृ॒त्राणि॑ शृण्विषे जघ॒न्वान् त्वं वृ॒ताँ अ॑रिणा इन्द्र॒ सिन्धू॑न्
॥७॥vi̱duṣṭe̱ viśvā̱ bhuva̍nāni̱ tasya̱ tā pra bra̍vīṣi̱ varu̍ṇāya vedhaḥ |
tvaṃ vṛ̱trāṇi̍ śṛṇviṣe jagha̱nvān tvaṃ vṛ̱tām̐ a̍riṇā indra̱ sindhū̍n
अ॒स्माक॒मत्र॑ पि॒तर॒स्त आ॑सन् त्स॒प्त ऋष॑यो दौर्ग॒हे ब॒ध्यमा॑ने ।
त आय॑जन्त त्र॒सद॑स्युमस्या॒ इन्द्रं॒ न वृ॑त्र॒तुर॑मर्धदे॒वम्
॥८॥a̱smāka̱matra̍ pi̱tara̱sta ā̍san tsa̱pta ṛṣa̍yo daurga̱he ba̱dhyamā̍ne |
ta āya̍janta tra̱sada̍syumasyā̱ indra̱ṃ na vṛ̍tra̱tura̍mardhade̱vam
पु॒रु॒कुत्सा॑नी॒ हि वा॒मदा॑शद्ध॒व्येभि॑रिन्द्रावरुणा॒ नमो॑भिः ।
अथा॒ राजा॑नं त्र॒सद॑स्युमस्या वृत्र॒हणं॑ ददथुरर्धदे॒वम्
॥९॥pu̱ru̱kutsā̍nī̱ hi vā̱madā̍śaddha̱vyebhi̍rindrāvaruṇā̱ namo̍bhiḥ |
athā̱ rājā̍naṃ tra̱sada̍syumasyā vṛtra̱haṇa̍ṃ dadathurardhade̱vam
रा॒या व॒यं स॑स॒वांसो॑ मदेम ह॒व्येन॑ दे॒वा यव॑सेन॒ गाव॑: ।
तां धे॒नुमि॑न्द्रावरुणा यु॒वं नो॑ वि॒श्वाहा॑ धत्त॒मन॑पस्फुरन्तीम्
॥१०॥rā̱yā va̱yaṃ sa̍sa̱vāṃso̍ madema ha̱vyena̍ de̱vā yava̍sena̱ gāva̍: |
tāṃ dhe̱numi̍ndrāvaruṇā yu̱vaṃ no̍ vi̱śvāhā̍ dhatta̱mana̍pasphurantīm