अध्ययनम्
- अनुक्रमणिका
- मूलम्
११ वामदेवो गौतमः। इन्द्रः। त्रिष्टुप्।
आ न॒ इन्द्रो॑ दू॒रादा न॑ आ॒साद॑भिष्टि॒कृदव॑से यासदु॒ग्रः ।
ओजि॑ष्ठेभिर्नृ॒पति॒र्वज्र॑बाहुः सं॒गे स॒मत्सु॑ तु॒र्वणि॑: पृत॒न्यून्
॥१॥ā na̱ indro̍ dū̱rādā na̍ ā̱sāda̍bhiṣṭi̱kṛdava̍se yāsadu̱graḥ |
oji̍ṣṭhebhirnṛ̱pati̱rvajra̍bāhuḥ sa̱ṃge sa̱matsu̍ tu̱rvaṇi̍: pṛta̱nyūn
आ न॒ इन्द्रो॒ हरि॑भिर्या॒त्वच्छा॑ऽर्वाची॒नोऽव॑से॒ राध॑से च ।
तिष्ठा॑ति व॒ज्री म॒घवा॑ विर॒प्शीमं य॒ज्ञमनु॑ नो॒ वाज॑सातौ
॥२॥ā na̱ indro̱ hari̍bhiryā̱tvacchā̍'rvācī̱no'va̍se̱ rādha̍se ca |
tiṣṭhā̍ti va̱jrī ma̱ghavā̍ vira̱pśīmaṃ ya̱jñamanu̍ no̱ vāja̍sātau
इ॒मं य॒ज्ञं त्वम॒स्माक॑मिन्द्र पु॒रो दध॑त् सनिष्यसि॒ क्रतुं॑ नः ।
श्व॒घ्नीव॑ वज्रिन् त्स॒नये॒ धना॑नां॒ त्वया॑ व॒यम॒र्य आ॒जिं ज॑येम
॥३॥i̱maṃ ya̱jñaṃ tvama̱smāka̍mindra pu̱ro dadha̍t saniṣyasi̱ kratu̍ṃ naḥ |
śva̱ghnīva̍ vajrin tsa̱naye̱ dhanā̍nā̱ṃ tvayā̍ va̱yama̱rya ā̱jiṃ ja̍yema
उ॒शन्नु॒ षु ण॑: सु॒मना॑ उपा॒के सोम॑स्य॒ नु सुषु॑तस्य स्वधावः ।
पा इ॑न्द्र॒ प्रति॑भृतस्य॒ मध्व॒: समन्ध॑सा ममदः पृ॒ष्ठ्ये॑न
॥४॥u̱śannu̱ ṣu ṇa̍: su̱manā̍ upā̱ke soma̍sya̱ nu suṣu̍tasya svadhāvaḥ |
pā i̍ndra̱ prati̍bhṛtasya̱ madhva̱: samandha̍sā mamadaḥ pṛ̱ṣṭhye̍na
वि यो र॑र॒प्श ऋषि॑भि॒र्नवे॑भिर्वृ॒क्षो न प॒क्वः सृण्यो॒ न जेता॑ ।
मर्यो॒ न योषा॑म॒भि मन्य॑मा॒नोऽच्छा॑ विवक्मि पुरुहू॒तमिन्द्र॑म्
॥५॥vi yo ra̍ra̱pśa ṛṣi̍bhi̱rnave̍bhirvṛ̱kṣo na pa̱kvaḥ sṛṇyo̱ na jetā̍ |
maryo̱ na yoṣā̍ma̱bhi manya̍mā̱no'cchā̍ vivakmi puruhū̱tamindra̍m
गि॒रिर्न यः स्वत॑वाँ ऋ॒ष्व इन्द्र॑: स॒नादे॒व सह॑से जा॒त उ॒ग्रः ।
आद॑र्ता॒ वज्रं॒ स्थवि॑रं॒ न भी॒म उ॒द्नेव॒ कोशं॒ वसु॑ना॒ न्यृ॑ष्टम्
॥६॥gi̱rirna yaḥ svata̍vām̐ ṛ̱ṣva indra̍: sa̱nāde̱va saha̍se jā̱ta u̱graḥ |
āda̍rtā̱ vajra̱ṃ sthavi̍ra̱ṃ na bhī̱ma u̱dneva̱ kośa̱ṃ vasu̍nā̱ nyṛ̍ṣṭam
न यस्य॑ व॒र्ता ज॒नुषा॒ न्वस्ति॒ न राध॑स आमरी॒ता म॒घस्य॑ ।
उ॒द्वा॒वृ॒षा॒णस्त॑विषीव उग्रा॒स्मभ्यं॑ दद्धि पुरुहूत रा॒यः
॥७॥na yasya̍ va̱rtā ja̱nuṣā̱ nvasti̱ na rādha̍sa āmarī̱tā ma̱ghasya̍ |
u̱dvā̱vṛ̱ṣā̱ṇasta̍viṣīva ugrā̱smabhya̍ṃ daddhi puruhūta rā̱yaḥ
ईक्षे॑ रा॒यः क्षय॑स्य चर्षणी॒नामु॒त व्र॒जम॑पव॒र्तासि॒ गोना॑म् ।
शि॒क्षा॒न॒रः स॑मि॒थेषु॑ प्र॒हावा॒न् वस्वो॑ रा॒शिम॑भिने॒तासि॒ भूरि॑म्
॥८॥īkṣe̍ rā̱yaḥ kṣaya̍sya carṣaṇī̱nāmu̱ta vra̱jama̍pava̱rtāsi̱ gonā̍m |
śi̱kṣā̱na̱raḥ sa̍mi̱theṣu̍ pra̱hāvā̱n vasvo̍ rā̱śima̍bhine̱tāsi̱ bhūri̍m
कया॒ तच्छृ॑ण्वे॒ शच्या॒ शचि॑ष्ठो॒ यया॑ कृ॒णोति॒ मुहु॒ का चि॑दृ॒ष्वः ।
पु॒रु दा॒शुषे॒ विच॑यिष्ठो॒ अंहोऽथा॑ दधाति॒ द्रवि॑णं जरि॒त्रे
॥९॥kayā̱ tacchṛ̍ṇve̱ śacyā̱ śaci̍ṣṭho̱ yayā̍ kṛ̱ṇoti̱ muhu̱ kā ci̍dṛ̱ṣvaḥ |
pu̱ru dā̱śuṣe̱ vica̍yiṣṭho̱ aṃho'thā̍ dadhāti̱ dravi̍ṇaṃ jari̱tre
मा नो॑ मर्धी॒रा भ॑रा द॒द्धि तन्न॒: प्र दा॒शुषे॒ दात॑वे॒ भूरि॒ यत्ते॑ ।
नव्ये॑ दे॒ष्णे श॒स्ते अ॒स्मिन् त॑ उ॒क्थे प्र ब्र॑वाम व॒यमि॑न्द्र स्तु॒वन्त॑:
॥१०॥mā no̍ mardhī̱rā bha̍rā da̱ddhi tanna̱: pra dā̱śuṣe̱ dāta̍ve̱ bhūri̱ yatte̍ |
navye̍ de̱ṣṇe śa̱ste a̱smin ta̍ u̱kthe pra bra̍vāma va̱yami̍ndra stu̱vanta̍:
नू ष्टु॒त इ॑न्द्र॒ नू गृ॑णा॒न इषं॑ जरि॒त्रे न॒द्यो॒३ न पी॑पेः ।
अका॑रि ते हरिवो॒ ब्रह्म॒ नव्यं॑ धि॒या स्या॑म र॒थ्य॑: सदा॒साः
॥११॥nū ṣṭu̱ta i̍ndra̱ nū gṛ̍ṇā̱na iṣa̍ṃ jari̱tre na̱dyo̱3 na pī̍peḥ |
akā̍ri te harivo̱ brahma̱ navya̍ṃ dhi̱yā syā̍ma ra̱thya̍: sadā̱sāḥ