अध्ययनम्
- अनुक्रमणिका
- मूलम्
८ वामदेवो गौतमः। अग्निः।गायत्री।
दू॒तं वो॑ वि॒श्ववे॑दसं हव्य॒वाह॒मम॑र्त्यम् । यजि॑ष्ठमृञ्जसे गि॒रा
॥१॥dū̱taṃ vo̍ vi̱śvave̍dasaṃ havya̱vāha̱mama̍rtyam | yaji̍ṣṭhamṛñjase gi̱rā
स हि वेदा॒ वसु॑धितिं म॒हाँ आ॒रोध॑नं दि॒वः । स दे॒वाँ एह व॑क्षति
॥२॥sa hi vedā̱ vasu̍dhitiṃ ma̱hām̐ ā̱rodha̍naṃ di̱vaḥ | sa de̱vām̐ eha va̍kṣati
स वे॑द दे॒व आ॒नमं॑ दे॒वाँ ऋ॑ताय॒ते दमे॑ । दाति॑ प्रि॒याणि॑ चि॒द् वसु॑
॥३॥sa ve̍da de̱va ā̱nama̍ṃ de̱vām̐ ṛ̍tāya̱te dame̍ | dāti̍ pri̱yāṇi̍ ci̱d vasu̍
स होता॒ सेदु॑ दू॒त्यं॑ चिकि॒त्वाँ अ॒न्तरी॑यते । वि॒द्वाँ आ॒रोध॑नं दि॒वः
॥४॥sa hotā̱ sedu̍ dū̱tya̍ṃ ciki̱tvām̐ a̱ntarī̍yate | vi̱dvām̐ ā̱rodha̍naṃ di̱vaḥ
ते स्या॑म॒ ये अ॒ग्नये॑ ददा॒शुर्ह॒व्यदा॑तिभिः । य ईं॒ पुष्य॑न्त इन्ध॒ते
॥५॥te syā̍ma̱ ye a̱gnaye̍ dadā̱śurha̱vyadā̍tibhiḥ | ya ī̱ṃ puṣya̍nta indha̱te
ते रा॒या ते सु॒वीर्यै॑: सस॒वांसो॒ वि शृ॑ण्विरे । ये अ॒ग्ना द॑धि॒रे दुव॑:
॥६॥te rā̱yā te su̱vīryai̍: sasa̱vāṃso̱ vi śṛ̍ṇvire | ye a̱gnā da̍dhi̱re duva̍:
अ॒स्मे रायो॑ दि॒वेदि॑वे॒ सं च॑रन्तु पुरु॒स्पृह॑: । अ॒स्मे वाजा॑स ईरताम्
॥७॥a̱sme rāyo̍ di̱vedi̍ve̱ saṃ ca̍rantu puru̱spṛha̍: | a̱sme vājā̍sa īratām
स विप्र॑श्चर्षणी॒नां शव॑सा॒ मानु॑षाणाम् । अति॑ क्षि॒प्रेव॑ विध्यति
॥८॥sa vipra̍ścarṣaṇī̱nāṃ śava̍sā̱ mānu̍ṣāṇām | ati̍ kṣi̱preva̍ vidhyati