अध्ययनम्
- अनुक्रमणिका
- मूलम्
(१६) १-३अन्धीगु: श्यावाश्वि:,४-६ यायातिर्नाहुष:,७-९ नहुषो मानव:,१०-१२ मनु: सांवरण:, १३-१६ वैश्वामित्रो वाच्यो वा प्रजापति: । पवमान: सोम: । अनुष्टुप् , २-३ गायत्री ।
पु॒रोजि॑ती वो॒ अन्ध॑सः सु॒ताय॑ मादयि॒त्नवे॑ । अप॒ श्वानं॑ श्नथिष्टन॒ सखा॑यो दीर्घजि॒ह्व्य॑म्
॥१॥pu̱roji̍tī vo̱ andha̍saḥ su̱tāya̍ mādayi̱tnave̍ | apa̱ śvāna̍ṃ śnathiṣṭana̱ sakhā̍yo dīrghaji̱hvya̍m
यो धार॑या पाव॒कया॑ परिप्र॒स्यन्द॑ते सु॒तः । इन्दु॒रश्वो॒ न कृत्व्य॑:
॥२॥yo dhāra̍yā pāva̱kayā̍ paripra̱syanda̍te su̱taḥ | indu̱raśvo̱ na kṛtvya̍:
तं दु॒रोष॑म॒भी नर॒: सोमं॑ वि॒श्वाच्या॑ धि॒या । य॒ज्ञं हि॑न्व॒न्त्यद्रि॑भिः
॥३॥taṃ du̱roṣa̍ma̱bhī nara̱: soma̍ṃ vi̱śvācyā̍ dhi̱yā | ya̱jñaṃ hi̍nva̱ntyadri̍bhiḥ
सु॒तासो॒ मधु॑मत्तमा॒: सोमा॒ इन्द्रा॑य म॒न्दिन॑: । प॒वित्र॑वन्तो अक्षरन्दे॒वान्ग॑च्छन्तु वो॒ मदा॑:
॥४॥su̱tāso̱ madhu̍mattamā̱: somā̱ indrā̍ya ma̱ndina̍: | pa̱vitra̍vanto akṣarande̱vānga̍cchantu vo̱ madā̍:
इन्दु॒रिन्द्रा॑य पवत॒ इति॑ दे॒वासो॑ अब्रुवन् । वा॒चस्पति॑र्मखस्यते॒ विश्व॒स्येशा॑न॒ ओज॑सा
॥५॥indu̱rindrā̍ya pavata̱ iti̍ de̱vāso̍ abruvan | vā̱caspati̍rmakhasyate̱ viśva̱syeśā̍na̱ oja̍sā
स॒हस्र॑धारः पवते समु॒द्रो वा॑चमीङ्ख॒यः । सोम॒: पती॑ रयी॒णां सखेन्द्र॑स्य दि॒वेदि॑वे
॥६॥sa̱hasra̍dhāraḥ pavate samu̱dro vā̍camīṅkha̱yaḥ | soma̱: patī̍ rayī̱ṇāṃ sakhendra̍sya di̱vedi̍ve
अ॒यं पू॒षा र॒यिर्भग॒: सोम॑: पुना॒नो अ॑र्षति । पति॒र्विश्व॑स्य॒ भूम॑नो॒ व्य॑ख्य॒द्रोद॑सी उ॒भे
॥७॥a̱yaṃ pū̱ṣā ra̱yirbhaga̱: soma̍: punā̱no a̍rṣati | pati̱rviśva̍sya̱ bhūma̍no̱ vya̍khya̱droda̍sī u̱bhe
समु॑ प्रि॒या अ॑नूषत॒ गावो॒ मदा॑य॒ घृष्व॑यः । सोमा॑सः कृण्वते प॒थः पव॑मानास॒ इन्द॑वः
॥८॥samu̍ pri̱yā a̍nūṣata̱ gāvo̱ madā̍ya̱ ghṛṣva̍yaḥ | somā̍saḥ kṛṇvate pa̱thaḥ pava̍mānāsa̱ inda̍vaḥ
य ओजि॑ष्ठ॒स्तमा भ॑र॒ पव॑मान श्र॒वाय्य॑म् । यः पञ्च॑ चर्ष॒णीर॒भि र॒यिं येन॒ वना॑महै
॥९॥ya oji̍ṣṭha̱stamā bha̍ra̱ pava̍māna śra̱vāyya̍m | yaḥ pañca̍ carṣa̱ṇīra̱bhi ra̱yiṃ yena̱ vanā̍mahai
सोमा॑: पवन्त॒ इन्द॑वो॒ऽस्मभ्यं॑ गातु॒वित्त॑माः । मि॒त्राः सु॑वा॒ना अ॑रे॒पस॑: स्वा॒ध्य॑: स्व॒र्विद॑:
॥१०॥somā̍: pavanta̱ inda̍vo̱'smabhya̍ṃ gātu̱vitta̍māḥ | mi̱trāḥ su̍vā̱nā a̍re̱pasa̍: svā̱dhya̍: sva̱rvida̍:
सु॒ष्वा॒णासो॒ व्यद्रि॑भि॒श्चिता॑ना॒ गोरधि॑ त्व॒चि । इष॑म॒स्मभ्य॑म॒भित॒: सम॑स्वरन्वसु॒विद॑:
॥११॥su̱ṣvā̱ṇāso̱ vyadri̍bhi̱ścitā̍nā̱ goradhi̍ tva̱ci | iṣa̍ma̱smabhya̍ma̱bhita̱: sama̍svaranvasu̱vida̍:
ए॒ते पू॒ता वि॑प॒श्चित॒: सोमा॑सो॒ दध्या॑शिरः । सूर्या॑सो॒ न द॑र्श॒तासो॑ जिग॒त्नवो॑ ध्रु॒वा घृ॒ते
॥१२॥e̱te pū̱tā vi̍pa̱ścita̱: somā̍so̱ dadhyā̍śiraḥ | sūryā̍so̱ na da̍rśa̱tāso̍ jiga̱tnavo̍ dhru̱vā ghṛ̱te
प्र सु॑न्वा॒नस्यान्ध॑सो॒ मर्तो॒ न वृ॑त॒ तद्वच॑: । अप॒ श्वान॑मरा॒धसं॑ ह॒ता म॒खं न भृग॑वः
॥१३॥pra su̍nvā̱nasyāndha̍so̱ marto̱ na vṛ̍ta̱ tadvaca̍: | apa̱ śvāna̍marā̱dhasa̍ṃ ha̱tā ma̱khaṃ na bhṛga̍vaḥ
आ जा॒मिरत्के॑ अव्यत भु॒जे न पु॒त्र ओ॒ण्यो॑: । सर॑ज्जा॒रो न योष॑णां व॒रो न योनि॑मा॒सद॑म्
॥१४॥ā jā̱miratke̍ avyata bhu̱je na pu̱tra o̱ṇyo̍: | sara̍jjā̱ro na yoṣa̍ṇāṃ va̱ro na yoni̍mā̱sada̍m
स वी॒रो द॑क्ष॒साध॑नो॒ वि यस्त॒स्तम्भ॒ रोद॑सी । हरि॑: प॒वित्रे॑ अव्यत वे॒धा न योनि॑मा॒सद॑म्
॥१५॥sa vī̱ro da̍kṣa̱sādha̍no̱ vi yasta̱stambha̱ roda̍sī | hari̍: pa̱vitre̍ avyata ve̱dhā na yoni̍mā̱sada̍m
अव्यो॒ वारे॑भिः पवते॒ सोमो॒ गव्ये॒ अधि॑ त्व॒चि । कनि॑क्रद॒द्वृषा॒ हरि॒रिन्द्र॑स्या॒भ्ये॑ति निष्कृ॒तम्
॥१६॥avyo̱ vāre̍bhiḥ pavate̱ somo̱ gavye̱ adhi̍ tva̱ci | kani̍krada̱dvṛṣā̱ hari̱rindra̍syā̱bhye̍ti niṣkṛ̱tam