अध्ययनम्
- अनुक्रमणिका
- मूलम्
१२ मैत्रावरुणिर्वसिष्ठ:। इन्द्र: ।गायत्री, १०-१२ विराट् ।
प्र व॒ इन्द्रा॑य॒ माद॑नं॒ हर्य॑श्वाय गायत । सखा॑यः सोम॒पाव्ने॑
॥१॥pra va̱ indrā̍ya̱ māda̍na̱ṃ harya̍śvāya gāyata | sakhā̍yaḥ soma̱pāvne̍
शंसेदु॒क्थं सु॒दान॑व उ॒त द्यु॒क्षं यथा॒ नर॑: । च॒कृ॒मा स॒त्यरा॑धसे
॥२॥śaṃsedu̱kthaṃ su̱dāna̍va u̱ta dyu̱kṣaṃ yathā̱ nara̍: | ca̱kṛ̱mā sa̱tyarā̍dhase
त्वं न॑ इन्द्र वाज॒युस्त्वं ग॒व्युः श॑तक्रतो । त्वं हि॑रण्य॒युर्व॑सो
॥३॥tvaṃ na̍ indra vāja̱yustvaṃ ga̱vyuḥ śa̍takrato | tvaṃ hi̍raṇya̱yurva̍so
व॒यमि॑न्द्र त्वा॒यवो॒ऽभि प्र णो॑नुमो वृषन् । वि॒द्धी त्व१स्य नो॑ वसो
॥४॥va̱yami̍ndra tvā̱yavo̱'bhi pra ṇo̍numo vṛṣan | vi̱ddhī tva1sya no̍ vaso
मा नो॑ नि॒दे च॒ वक्त॑वे॒ऽर्यो र॑न्धी॒ररा॑व्णे । त्वे अपि॒ क्रतु॒र्मम॑
॥५॥mā no̍ ni̱de ca̱ vakta̍ve̱'ryo ra̍ndhī̱rarā̍vṇe | tve api̱ kratu̱rmama̍
त्वं वर्मा॑सि स॒प्रथ॑: पुरोयो॒धश्च॑ वृत्रहन् । त्वया॒ प्रति॑ ब्रुवे यु॒जा
॥६॥tvaṃ varmā̍si sa̱pratha̍: puroyo̱dhaśca̍ vṛtrahan | tvayā̱ prati̍ bruve yu̱jā
म॒हाँ उ॒तासि॒ यस्य॒ तेऽनु॑ स्व॒धाव॑री॒ सह॑: । म॒म्नाते॑ इन्द्र॒ रोद॑सी
॥७॥ma̱hām̐ u̱tāsi̱ yasya̱ te'nu̍ sva̱dhāva̍rī̱ saha̍: | ma̱mnāte̍ indra̱ roda̍sī
तं त्वा॑ म॒रुत्व॑ती॒ परि॒ भुव॒द्वाणी॑ स॒याव॑री । नक्ष॑माणा स॒ह द्युभि॑:
॥८॥taṃ tvā̍ ma̱rutva̍tī̱ pari̱ bhuva̱dvāṇī̍ sa̱yāva̍rī | nakṣa̍māṇā sa̱ha dyubhi̍:
ऊ॒र्ध्वास॒स्त्वान्विन्द॑वो॒ भुव॑न्द॒स्ममुप॒ द्यवि॑ । सं ते॑ नमन्त कृ॒ष्टय॑:
॥९॥ū̱rdhvāsa̱stvānvinda̍vo̱ bhuva̍nda̱smamupa̱ dyavi̍ | saṃ te̍ namanta kṛ̱ṣṭaya̍:
प्र वो॑ म॒हे म॑हि॒वृधे॑ भरध्वं॒ प्रचे॑तसे॒ प्र सु॑म॒तिं कृ॑णुध्वम् । विश॑: पू॒र्वीः प्र च॑रा चर्षणि॒प्राः
॥१०॥pra vo̍ ma̱he ma̍hi̱vṛdhe̍ bharadhva̱ṃ prace̍tase̱ pra su̍ma̱tiṃ kṛ̍ṇudhvam | viśa̍: pū̱rvīḥ pra ca̍rā carṣaṇi̱prāḥ
उ॒रु॒व्यच॑से म॒हिने॑ सुवृ॒क्तिमिन्द्रा॑य॒ ब्रह्म॑ जनयन्त॒ विप्रा॑: । तस्य॑ व्र॒तानि॒ न मि॑नन्ति॒ धीरा॑:
॥११॥u̱ru̱vyaca̍se ma̱hine̍ suvṛ̱ktimindrā̍ya̱ brahma̍ janayanta̱ viprā̍: | tasya̍ vra̱tāni̱ na mi̍nanti̱ dhīrā̍:
इन्द्रं॒ वाणी॒रनु॑त्तमन्युमे॒व स॒त्रा राजा॑नं दधिरे॒ सह॑ध्यै । हर्य॑श्वाय बर्हया॒ समा॒पीन्
॥१२॥indra̱ṃ vāṇī̱ranu̍ttamanyume̱va sa̱trā rājā̍naṃ dadhire̱ saha̍dhyai | harya̍śvāya barhayā̱ samā̱pīn