athaikonacatvāriṃśo'dhyāyaḥ|
svāhā̍ prā̱ṇebhya̱ḥ sādhi̍patikebhyaḥ pṛthi̱vyai svāhā̱gnaye̱ svāhā̱ntari̍kṣāya̱ svāhā̍ vā̱yave̱ svāhā̍
di̱ve svāhā̱ sūryā̍ya̱ svāhā̍ | di̱gbhyaḥ svāhā̍ ca̱ndrāya̱ svāhā̱ nakṣa̍trebhya̱ḥ svāhā̱dbhyaḥ svāhā̱
varu̍ṇāya̱ svāhā̍ | nābhyai̱ svāhā̍ pū̱tāya̱ svāhā̍
||39.1||स्वाहा॑ प्रा॒णेभ्यः॒ साधि॑पतिकेभ्यः पृथि॒व्यै स्वाहा॒ग्नये॒ स्वाहा॒न्तरि॑क्षाय॒ स्वाहा॑ वा॒यवे॒ स्वाहा॑
दि॒वे स्वाहा॒ सूर्या॑य॒ स्वाहा॑ । दि॒ग्भ्यः स्वाहा॑ च॒न्द्राय॒ स्वाहा॒ नक्ष॑त्रेभ्यः॒ स्वाहा॒द्भ्यः स्वाहा॒
वरु॑णाय॒ स्वाहा॑ । नाभ्यै॒ स्वाहा॑ पू॒ताय॒ स्वाहा॑
vā̱ce svāhā̍ prā̱ṇāya̱ svāhā̍ prā̱ṇāya̱ svāhā̍ |
cakṣu̍ṣe̱ svāhā̱ cakṣu̍ṣe̱ svāhā̱ śrotrā̍ya̱ svāhā̱ śrotrā̍ya̱ svāhā̍
||39.2||वा॒चे स्वाहा॑ प्रा॒णाय॒ स्वाहा॑ प्रा॒णाय॒ स्वाहा॑ ।
चक्षु॑षे॒ स्वाहा॒ चक्षु॑षे॒ स्वाहा॒ श्रोत्रा॑य॒ स्वाहा॒ श्रोत्रा॑य॒ स्वाहा॑
mana̍sa̱ḥ kāma̱mākū̍tiṃ vā̱caḥ sa̱tyama̍śīya |
pa̱śū̱nā rū̱pamanna̍sya̱ raso̱ yaśa̱ḥ śrīḥ śra̍yatā̱ṃ mayi̱ svāhā̍
||39.3||मन॑सः॒ काम॒माकू॑तिं वा॒चः स॒त्यम॑शीय ।
प॒शू॒ना रू॒पमन्न॑स्य॒ रसो॒ यशः॒ श्रीः श्र॑यतां॒ मयि॒ स्वाहा॑
pra̱jāpa̍tiḥ saṃbhri̱yamā̍ṇaḥ sa̱mrāṭ saṃbhṛ̍to vaiśvade̱vaḥ sa̍ sa̱nno gha̱rmaḥ pravṛ̍kta̱steja̱ udya̍ta āśvi̱naḥ
paya̍syānī̱yamā̍ne pū̱ṣā vi̍ṣya̱ndamā̍ne māru̱taḥ kvatha̍n |
mai̱traḥ śara̍si saṃtā̱yyamā̍ne vāya̱vyo̍ hri̱yamā̍ṇa āgne̱yo hū̱yamā̍no̱ vāgghu̱taḥ
||39.4||प्र॒जाप॑तिः संभ्रि॒यमा॑णः स॒म्राट् संभृ॑तो वैश्वदे॒वः स॑ स॒न्नो घ॒र्मः प्रवृ॑क्त॒स्तेज॒ उद्य॑त आश्वि॒नः
पय॑स्यानी॒यमा॑ने पू॒षा वि॑ष्य॒न्दमा॑ने मारु॒तः क्वथ॑न् ।
मै॒त्रः शर॑सि संता॒य्यमा॑ने वाय॒व्यो॑ ह्रि॒यमा॑ण आग्ने॒यो हू॒यमा॑नो॒ वाग्घु॒तः
sa̱vi̱tā pra̍tha̱me'ha̍nna̱gnirdvi̱tīye̍ vā̱yustṛ̱tīya̍ ādi̱tyaśca̍tu̱rthe
ca̱ndramā̍ḥ pañca̱ma ṛ̱tuḥ ṣa̱ṣṭhe ma̱ruta̍ḥ sapta̱me bṛ̍ha̱spati̍raṣṭa̱me |
mi̱tro na̍va̱me varu̍ṇo daśa̱ma indra̍ ekāda̱śe viśve̍ de̱vā dvā̍da̱śe
||39.5||स॒वि॒ता प्र॑थ॒मेऽह॑न्न॒ग्निर्द्वि॒तीये॑ वा॒युस्तृ॒तीय॑ आदि॒त्यश्च॑तु॒र्थे
च॒न्द्रमाः॑ पञ्च॒म ऋ॒तुः ष॒ष्ठे म॒रुतः॑ सप्त॒मे बृ॑ह॒स्पति॑रष्ट॒मे ।
मि॒त्रो न॑व॒मे वरु॑णो दश॒म इन्द्र॑ एकाद॒शे विश्वे॑ दे॒वा द्वा॑द॒शे
u̱graśca̍ bhī̱maśca̱ dhvānta̍śca̱ dhuni̍śca | sā̱sa̱hvā ścā̍bhiyu̱gvā ca̍ vi̱kṣipa̱ḥ svāhā̍
||39.6||उ॒ग्रश्च॑ भी॒मश्च॒ ध्वान्त॑श्च॒ धुनि॑श्च । सा॒स॒ह्वा श्चा॑भियु॒ग्वा च॑ वि॒क्षिपः॒ स्वाहा॑
a̱gni hṛda̍yenā̱śani̍ hṛdayā̱greṇa̍ paśu̱pati̍ṃ kṛtsna̱hṛda̍yena bha̱vaṃ ya̱knā |
śa̱rvaṃ mata̍snābhyā̱mīśā̍naṃ ma̱nyunā̍ mahāde̱vama̍ntaḥparśa̱vyeno̱graṃ
de̱vaṃ va̍ni̱ṣṭhunā̍ vasiṣṭha̱hanu̱ḥ śiṅgī̍ni ko̱śyābhyā̍m
||39.7||अ॒ग्नि हृद॑येना॒शनि॑ हृदया॒ग्रेण॑ पशु॒पतिं॑ कृत्स्न॒हृद॑येन भ॒वं य॒क्ना ।
श॒र्वं मत॑स्नाभ्या॒मीशा॑नं म॒न्युना॑ महादे॒वम॑न्तःपर्श॒व्येनो॒ग्रं
दे॒वं व॑नि॒ष्ठुना॑ वसिष्ठ॒हनुः॒ शिङ्गी॑नि को॒श्याभ्या॑म्
u̱gram̐ lohi̍tena mi̱tra sau̍vratyena ru̱draṃ daurvra̍tye̱nendra̍ṃ prakrī̱l̤ena̍ ma̱ruto̱ bale̍na sā̱dhyānpra̱mudā̍ |
bha̱vasya̱ kaṇṭhya̍ ru̱drasyā̍ntaḥpā̱rśvyaṃ ma̍hāde̱vasya̱ yakṛ̍ccha̱rvasya̍ vani̱ṣṭhuḥ pa̍śu̱pate̍ḥ purī̱tat
||39.8||उ॒ग्रँ लोहि॑तेन मि॒त्र सौ॑व्रत्येन रु॒द्रं दौर्व्र॑त्ये॒नेन्द्रं॑ प्रक्री॒ळेन॑ म॒रुतो॒ बले॑न सा॒ध्यान्प्र॒मुदा॑ ।
भ॒वस्य॒ कण्ठ्य॑ रु॒द्रस्या॑न्तःपा॒र्श्व्यं म॑हादे॒वस्य॒ यकृ॑च्छ॒र्वस्य॑ वनि॒ष्ठुः प॑शु॒पतेः॑ पुरी॒तत्
loma̍bhya̱ḥ svāhā̱ loma̍bhya̱ḥ svāhā̍ tva̱ce svāhā̍ tva̱ce svāhā̱ lohi̍tāya̱ svāhā̱ lohi̍tāya̱ svāhā̱ meda̍se̱ svāhā̱ meda̍se̱ svāhā̍ |
mā̱sebhya̱ḥ svāhā̍ mā̱sebhya̱ḥ svāhā̱ snāva̍bhya̱ḥ svāhā̱ snāva̍bhya̱ḥ svāhā̱sthabhya̱ḥ svāhā̱sthabhya̱ḥ svāhā̍ ma̱jjabhya̱ḥ svāhā̍ ma̱jjabhya̱ḥ svāhā̍ |
reta̍se̱ svāhā̍ pā̱yave̱ svāhā̍
||39.9||लोम॑भ्यः॒ स्वाहा॒ लोम॑भ्यः॒ स्वाहा॑ त्व॒चे स्वाहा॑ त्व॒चे स्वाहा॒ लोहि॑ताय॒ स्वाहा॒ लोहि॑ताय॒ स्वाहा॒ मेद॑से॒ स्वाहा॒ मेद॑से॒ स्वाहा॑ ।
मा॒सेभ्यः॒ स्वाहा॑ मा॒सेभ्यः॒ स्वाहा॒ स्नाव॑भ्यः॒ स्वाहा॒ स्नाव॑भ्यः॒ स्वाहा॒स्थभ्यः॒ स्वाहा॒स्थभ्यः॒ स्वाहा॑ म॒ज्जभ्यः॒ स्वाहा॑ म॒ज्जभ्यः॒ स्वाहा॑ ।
रेत॑से॒ स्वाहा॑ पा॒यवे॒ स्वाहा॑
ā̱yā̱sāya̱ svāhā̍ prāyā̱sāya̱ svāhā̍ saṃyā̱sāya̱ svāhā̍ viyā̱sāya̱ svāho̍dyā̱sāya̱ svāhā̍ |
śu̱ce svāhā̱ śoca̍te̱ svāhā̱ śokā̍ya̱ svāhā̍
||39.10||आ॒या॒साय॒ स्वाहा॑ प्राया॒साय॒ स्वाहा॑ संया॒साय॒ स्वाहा॑ विया॒साय॒ स्वाहो॑द्या॒साय॒ स्वाहा॑ ।
शु॒चे स्वाहा॒ शोच॑ते॒ स्वाहा॒ शोका॑य॒ स्वाहा॑
tapa̍se̱ svāhā̱ tapya̍mānāya̱ svāhā̍ ta̱ptāya̱ svāhā̍ |
niṣkṛ̍tyai̱ svāhā̱ prāya̍ścittyai̱ svāhā̍ bheṣa̱jāya̱ svāhā̍
||39.11||तप॑से॒ स्वाहा॒ तप्य॑मानाय॒ स्वाहा॑ त॒प्ताय॒ स्वाहा॑ ।
निष्कृ॑त्यै॒ स्वाहा॒ प्राय॑श्चित्त्यै॒ स्वाहा॑ भेष॒जाय॒ स्वाहा॑
ya̱māya̱ svāhānta̍kāya̱ svāhā̍ mṛ̱tyave̱ svāhā̱ |
bra̱hma̱ha̱tyāyai̱ svāhā̱ viśve̍bhyo de̱vebhya̱ḥ svāhā̱ dyāvā̍pṛthi̱vībhyā̱ svāhā̍
||39.12||य॒माय॒ स्वाहान्त॑काय॒ स्वाहा॑ मृ॒त्यवे॒ स्वाहा॒ ।
ब्र॒ह्म॒ह॒त्यायै॒ स्वाहा॒ विश्वे॑भ्यो दे॒वेभ्यः॒ स्वाहा॒ द्यावा॑पृथि॒वीभ्या॒ स्वाहा॑