atha dvitīyo'dhyāyaḥ |
kṛṣṇo̍syākhare̱ṣṭho̱'gnaye̍ tvā̱ juṣṭa̱ṃ prokṣā̍mi̱ vedi̍rasi ba̱rhiṣe̍ tvā̱ juṣṭā̱ṃ prokṣā̍mi |
ba̱rhira̍si sru̱gbhyastvā̱ juṣṭa̱ṃ prokṣā̍mi
||2.1||कृष्णो॑स्याखरे॒ष्ठो॒ऽग्नये॑ त्वा॒ जुष्टं॒ प्रोक्षा॑मि॒ वेदि॑रसि ब॒र्हिषे॑ त्वा॒ जुष्टां॒ प्रोक्षा॑मि ।
ब॒र्हिर॑सि स्रु॒ग्भ्यस्त्वा॒ जुष्टं॒ प्रोक्षा॑मि
adi̍tyai̱ vyunda̍namasi̱ viṣṇo̍ stu̱po̍'si | ūrṇa̍ṃ mradasaṃ tvā stṛṇāmi svāsa̱sthāṃ de̱vebhya̍ḥ
||2.2||अदि॑त्यै॒ व्युन्द॑नमसि॒ विष्णो॑ स्तु॒पो॑ऽसि । ऊर्णं॑ म्रदसं त्वा स्तृणामि स्वास॒स्थां दे॒वेभ्यः॑
||
bhuva̍pataye̱ svāhā̱ bhuva̍napataye̱ svāhā̍ | bhū̱tānā̱ṃ pata̍ye̱ svāhā̍|
ga̱ndha̱rvastvā̍ vi̱śvāva̍su̱ḥ pari̍dadhātu̱ viśva̱syāri̍ṣṭyai
||2.3||॥
भुव॑पतये॒ स्वाहा॒ भुव॑नपतये॒ स्वाहा॑ । भू॒तानां॒ पत॑ये॒ स्वाहा॑।
ग॒न्ध॒र्वस्त्वा॑ वि॒श्वाव॑सुः॒ परि॑दधातु॒ विश्व॒स्यारि॑ष्ट्यै
||
yaja̍mānasya pari̱dhira̍sya̱gniri̱l̤a ī̍l̤i̱taḥ | indra̍sya bā̱hura̍si̱ dakṣi̍ṇo̱ viśva̱syāri̍ṣṭyai|
yaja̍mānasya pari̱dhira̍sya̱gniri̱l̤a ī̍l̤i̱taḥ | mi̱trāvaru̍ṇau tvottara̱taḥ pari̍dhattāṃ dhru̱veṇa̱ dharma̍ṇā̱ viśva̱syāri̍ṣṭyai|
yaja̍mānasya pari̱dhira̍sya̱gniri̱l̤a ī̍l̤i̱taḥ
||2.4||॥
यज॑मानस्य परि॒धिर॑स्य॒ग्निरि॒ळ ई॑ळि॒तः । इन्द्र॑स्य बा॒हुर॑सि॒ दक्षि॑णो॒ विश्व॒स्यारि॑ष्ट्यै।
यज॑मानस्य परि॒धिर॑स्य॒ग्निरि॒ळ ई॑ळि॒तः । मि॒त्रावरु॑णौ त्वोत्तर॒तः परि॑धत्तां ध्रु॒वेण॒ धर्म॑णा॒ विश्व॒स्यारि॑ष्ट्यै।
यज॑मानस्य परि॒धिर॑स्य॒ग्निरि॒ळ ई॑ळि॒तः
vī̱tiho̍traṃ tvā kave dyu̱manta̱ sami̍dhīmahi | agne̍ bṛ̱hanta̍madhva̱re
||2.5||वी॒तिहो॑त्रं त्वा कवे द्यु॒मन्त॒ समि॑धीमहि । अग्ने॑ बृ॒हन्त॑मध्व॒रे
sa̱mida̍si | sūrya̍stvā pu̱rastā̍t pātu̱ kasyā̍ścida̱bhiśa̍styai | sa̱vi̱turbā̱hū stha̍ḥ
||2.6||स॒मिद॑सि । सूर्य॑स्त्वा पु॒रस्ता॑त् पातु॒ कस्या॑श्चिद॒भिश॑स्त्यै । स॒वि॒तुर्बा॒हू स्थः॑
ūrṇa̍ṃ mradasaṃ tvā stṛṇāmi svāsa̱sthaṃ de̱vebhya̍ḥ | ā tvā̱ vasa̍vo ru̱drā ā̍di̱tyāḥ sa̍dantu
||2.7||ऊर्णं॑ म्रदसं त्वा स्तृणामि स्वास॒स्थं दे॒वेभ्यः॑ । आ त्वा॒ वस॑वो रु॒द्रा आ॑दि॒त्याः स॑दन्तु
ghṛ̱tācya̍si ju̱hūrnāma̱ sedaṃ pri̱yeṇa̱ dhāmnā̍ pri̱ye sada̍si sīda | ghṛ̱tācya̍syupa̱bhṛnnāma̱ sedaṃ pri̱yeṇa̱ dhāmnā̍ pri̱ye sada̍si sī̍da |
ghṛ̱tācya̍si dhru̱vā nāma̱ sedaṃ pri̱yeṇa̱ dhāmnā̍ pri̱ye sada̍si sīda |
pri̱yeṇa̱ dhāmnā̍ pri̱ye sada̍si sīda
||2.8||घृ॒ताच्य॑सि जु॒हूर्नाम॒ सेदं प्रि॒येण॒ धाम्ना॑ प्रि॒ये सद॑सि सीद । घृ॒ताच्य॑स्युप॒भृन्नाम॒ सेदं प्रि॒येण॒ धाम्ना॑ प्रि॒ये सद॑सि सी॑द ।
घृ॒ताच्य॑सि ध्रु॒वा नाम॒ सेदं प्रि॒येण॒ धाम्ना॑ प्रि॒ये सद॑सि सीद ।
प्रि॒येण॒ धाम्ना॑ प्रि॒ये सद॑सि सीद
dhru̱vā a̍sadannṛ̱tasya̱ yonau̱ tā vi̍ṣṇo pāhi |
pā̱hi ya̱jñaṃ pā̱hi ya̱jñapa̍tiṃ pā̱hi māṃ ya̍jña̱nya̍m
||2.9||ध्रु॒वा अ॑सदन्नृ॒तस्य॒ योनौ॒ ता वि॑ष्णो पाहि ।
पा॒हि य॒ज्ञं पा॒हि य॒ज्ञप॑तिं पा॒हि मां य॑ज्ञ॒न्य॑म्
agne̍ vājaji̱dvāja̍ṃ tvā sari̱ṣyanta̍ṃ vāja̱jita̱ sammā̍rjmi |
namo̍ de̱vebhya̍ḥ sva̱dhā pi̱tṛbhya̍ḥ su̱yame̍ me bhūyāstam
||2.10||अग्ने॑ वाजजि॒द्वाजं॑ त्वा सरि॒ष्यन्तं॑ वाज॒जित॒ सम्मा॑र्ज्मि ।
नमो॑ दे॒वेभ्यः॑ स्व॒धा पि॒तृभ्यः॑ सु॒यमे॑ मे भूयास्तम्
aska̍nnama̱dyājya̍ṃ de̱vebhya̱ḥ saṃbhri̍yāsam | aṅghri̍ṇā viṣṇo̱ mā tvāva̍kramiṣam
||2.11||अस्क॑न्नम॒द्याज्यं॑ दे॒वेभ्यः॒ संभ्रि॑यासम् । अङ्घ्रि॑णा विष्णो॒ मा त्वाव॑क्रमिषम्
vasu̍matīmagne te chā̱yāmupa̍stheṣa̱ṃ viṣṇo̱ḥ sthāna̍masi | i̱ta indro̍ vī̱rya̍makṛṇodū̱rdhvo̍'dhva̱ra āsthā̍t
||2.12||वसु॑मतीमग्ने ते छा॒यामुप॑स्थेषं॒ विष्णोः॒ स्थान॑मसि । इ॒त इन्द्रो॑ वी॒र्य॑मकृणोदू॒र्ध्वो॑ऽध्व॒र आस्था॑त्
agne̱ verho̱traṃ verdū̱tya̍m | ava̍tāṃ tvā̱ṃ dyāvā̍pṛthi̱vī ava̱ tvaṃ dyāvā̍pṛthi̱vī
||2.13||अग्ने॒ वेर्हो॒त्रं वेर्दू॒त्य॑म् । अव॑तां त्वां॒ द्यावा॑पृथि॒वी अव॒ त्वं द्यावा॑पृथि॒वी
svi̱ṣṭa̱kṛdde̱vebhya̱ indra̱ ājye̍na ha̱viṣā̱ bhū̱t svāhā̍ | saṃ jyoti̍ṣā̱ jyoti̍ḥ
||2.14||स्वि॒ष्ट॒कृद्दे॒वेभ्य॒ इन्द्र॒ आज्ये॑न ह॒विषा॒ भू॒त् स्वाहा॑ । सं ज्योति॑षा॒ ज्योतिः॑
atra̍ pitaro mādayadhvaṃ yathābhā̱gamāvṛ̍ṣāyadhvam | amī̍ madanta pi̱taro̍ yathābhā̱gamāvṛ̍ṣāyiṣata
||2.15||अत्र॑ पितरो मादयध्वं यथाभा॒गमावृ॑षायध्वम् । अमी॑ मदन्त पि॒तरो॑ यथाभा॒गमावृ॑षायिषत
upa̍hūtā pṛthi̱vī mā̱topa̱ māṃ pṛ̍thi̱vī mā̱tā hva̍yatām | a̱gnirāgnī̍dhrā̱t svāhā̍
||2.16||उप॑हूता पृथि॒वी मा॒तोप॒ मां पृ॑थि॒वी मा॒ता ह्व॑यताम् । अ॒ग्निराग्नी॑ध्रा॒त् स्वाहा॑
upa̍hūto̱ dyauṣpi̱topa̱ māṃ dyau̍ṣpi̱tā hva̍yatām | a̱gnirāgnī̍dhrā̱t svā̍hā
||2.17||उप॑हूतो॒ द्यौष्पि॒तोप॒ मां द्यौ॑ष्पि॒ता ह्व॑यताम् । अ॒ग्निराग्नी॑ध्रा॒त् स्वा॑हा
mayī̱damindra̍ indri̱yaṃ da̍dhātva̱smān rāyo̍ ma̱ghavā̍naḥ sacantām |
a̱smāka̍ santvā̱śiṣa̍ḥ sa̱tyā na̍ḥ santvā̱śiṣa̍ḥ |
agne̍ vājaji̱dvāja̍ṃ tvā sasṛ̱vāsa̍ṃ vāja̱jita̱ sammārjmi
||2.18||मयी॒दमिन्द्र॑ इन्द्रि॒यं द॑धात्व॒स्मान् रायो॑ म॒घवा॑नः सचन्ताम् ।
अ॒स्माक॑ सन्त्वा॒शिषः॑ स॒त्या नः॑ सन्त्वा॒शिषः॑ ।
अग्ने॑ वाजजि॒द्वाजं॑ त्वा ससृ॒वासं॑ वाज॒जित॒ सम्मार्ज्मि
deva̍ savitare̱taṃ tvā̍ vṛṇate̱ bṛha̱spati̍ṃ bra̱hmāṇa̍m| tada̱haṃ mana̍se̱ prabra̍vīmi
||2.19||देव॑ सवितरे॒तं त्वा॑ वृणते॒ बृह॒स्पतिं॑ ब्र॒ह्माण॑म्। तद॒हं मन॑से॒ प्रब्र॑वीमि
mano̍ gā̱yatryai gā̍ya̱trī tri̱ṣṭubhe̍ tri̱ṣṭubjaga̍tyai̱ jaga̍tyanu̱ṣṭu̱bhe̍|
a̱nu̱ṣṭappra̱jāpa̍taye pra̱jāpa̍ti̱rviśve̍bhyo de̱vebhya̍ḥ
||2.20||मनो॑ गा॒यत्र्यै गा॑य॒त्री त्रि॒ष्टुभे॑ त्रि॒ष्टुब्जग॑त्यै॒ जग॑त्यनु॒ष्टु॒भे॑।
अ॒नु॒ष्टप्प्र॒जाप॑तये प्र॒जाप॑ति॒र्विश्वे॑भ्यो दे॒वेभ्यः॑
braha̱spati̍rde̱vānā̍ṃ bra̱hmāhaṃ ma̍nu̱ṣyā̍ṇām | bhūrbhuva̱ḥ sva̱rnira̍staḥ pā̱pmedama̱haṃ bṛha̱spate̱ḥ sada̍si sīdāmi
||2.21||ब्रह॒स्पति॑र्दे॒वानां॑ ब्र॒ह्माहं म॑नु॒ष्या॑णाम् । भूर्भुवः॒ स्व॒र्निर॑स्तः पा॒प्मेदम॒हं बृह॒स्पतेः॒ सद॑सि सीदामि
mi̱trasya̍ tvā̱ cakṣu̍ṣā̱ pratī̍kṣe | de̱vasya̍ tvā savi̱tuḥ pra̍sa̱ve̱'śvino̍rbā̱hubhyā̍ṃ pū̱ṣṇo hastā̍bhyām |
prati̍gṛhṇāmi pṛthi̱vyāstvā̱ nābhau̍ sādayā̱myadi̍tyā u̱pasthe̍|
de̱vasya̍ tvā savi̱tuḥ pra̍sa̱ve̱'śvino̍rbā̱hubhyā̍ṃ pū̱ṣṇo hastā̍bhyām
||2.22||मि॒त्रस्य॑ त्वा॒ चक्षु॑षा॒ प्रती॑क्षे । दे॒वस्य॑ त्वा सवि॒तुः प्र॑स॒वे॒ऽश्विनो॑र्बा॒हुभ्यां॑ पू॒ष्णो हस्ता॑भ्याम् ।
प्रति॑गृह्णामि पृथि॒व्यास्त्वा॒ नाभौ॑ सादया॒म्यदि॑त्या उ॒पस्थे॑।
दे॒वस्य॑ त्वा सवि॒तुः प्र॑स॒वे॒ऽश्विनो॑र्बा॒हुभ्यां॑ पू॒ष्णो हस्ता॑भ्याम्
āda̍de̱'gneṣṭvā̱sye̍na̱ prāśnā̍mi̱ bṛha̱spate̱rmukhe̍na | yā a̱psva̱ntarde̱vatā̱stā i̱da śa̍mayantu
||2.23||आद॑दे॒ऽग्नेष्ट्वा॒स्ये॑न॒ प्राश्ना॑मि॒ बृह॒स्पते॒र्मुखे॑न । या अ॒प्स्व॒न्तर्दे॒वता॒स्ता इ॒द श॑मयन्तु
svāhā̍kṛtaṃ ja̱ṭharā̱mindra̍sya gacha| gha̱sinā̍ me̱ mā saṃpṛ̍kthā ū̱rdhva me̱ nābhe̍ḥ sīda
||2.24||स्वाहा॑कृतं ज॒ठरा॒मिन्द्र॑स्य गछ। घ॒सिना॑ मे॒ मा संपृ॑क्था ऊ॒र्ध्व मे॒ नाभेः॑ सीद
indra̍sya tvā ja̱ṭhare̍ sādayāmi| pra̱jāpa̍terbhā̱go̱syūrja̍svā̱n paya̍svān
||2.25||इन्द्र॑स्य त्वा ज॒ठरे॑ सादयामि। प्र॒जाप॑तेर्भा॒गो॒स्यूर्ज॑स्वा॒न् पय॑स्वान्
prā̱ṇā̱pā̱nau me̍ pāhi samānavyā̱nau me̍ pāhyudānavyā̱nau me̍ pāhi|
ūrga̱syūrja̱ṃ mayi̍ dhe̱hyakṣi̍tirasi̱ mā me̍ kṣeṣṭhā a̱mutrā̱muṣmi̍ṃllo̱ka i̱ha ca̍
||2.26||प्रा॒णा॒पा॒नौ मे॑ पाहि समानव्या॒नौ मे॑ पाह्युदानव्या॒नौ मे॑ पाहि।
ऊर्ग॒स्यूर्जं॒ मयि॑ धे॒ह्यक्षि॑तिरसि॒ मा मे॑ क्षेष्ठा अ॒मुत्रा॒मुष्मिं॑ल्लो॒क इ॒ह च॑
e̱ṣā te̍ agne sa̱mittayā̱ vardha̍sva̱ cā ca̍ pyāyasva | va̱rdhi̱ṣī̱mahi̍ ca va̱yamā ca̍ pyāsiṣīmahi
||2.27||ए॒षा ते॑ अग्ने स॒मित्तया॒ वर्ध॑स्व॒ चा च॑ प्यायस्व । व॒र्धि॒षी॒महि॑ च व॒यमा च॑ प्यासिषीमहि
e̱tat te̍ deva savitarya̱jñaṃ prāhu̱rbṛha̱spata̍ye bra̱hmaṇe̍ | tena̍ ya̱jñama̍va̱ tena̍ ya̱jñapa̍ti̱ṃ tena̱ māma̍va
||2.28||ए॒तत् ते॑ देव सवितर्य॒ज्ञं प्राहु॒र्बृह॒स्पत॑ये ब्र॒ह्मणे॑ । तेन॑ य॒ज्ञम॑व॒ तेन॑ य॒ज्ञप॑तिं॒ तेन॒ माम॑व
mano̱jyoti̍rjuṣatā̱mājya̍sya̱ bṛha̱spati̍rya̱jñami̱maṃ ta̍notu |
ari̍ṣṭaṃ ya̱jña sami̱maṃ da̍dhātu̱ viśve̍ de̱vāsa̍ i̱ha mā̍dayantā̱moṃ prati̍ṣṭha
||2.29||मनो॒ज्योति॑र्जुषता॒माज्य॑स्य॒ बृह॒स्पति॑र्य॒ज्ञमि॒मं त॑नोतु ।
अरि॑ष्टं य॒ज्ञ समि॒मं द॑धातु॒ विश्वे॑ दे॒वास॑ इ॒ह मा॑दयन्ता॒मों प्रति॑ष्ठ
a̱gnīṣoma̍yo̱rujji̍ti̱manūjje̍ṣa̱ṃ vāja̍sya mā prasa̱vena̱ prohā̍mi |
a̱gnīṣomau̱ tamapa̍nudatā̱ṃ yo̱'smān dveṣṭi̱ yaṃ ca̍ va̱yaṃ dvi̱ṣmo vāja̍syainaṃ prasa̱venāpo̍hāmi |
i̱ndrā̱gnyorujji̍ti̱manūjje̍ṣa̱ṃ vāja̍sya mā prasa̱vena̱ prohā̍mi |
i̱ndrā̱gnī tamapa̍nudatā̱ṃ yo̱'smān dveṣṭi̱ yaṃ ca̍ va̱yaṃ dvi̱ṣmo vāja̍syainaṃ prasa̱venāpo̍hāmi
||2.30||अ॒ग्नीषोम॑यो॒रुज्जि॑ति॒मनूज्जे॑षं॒ वाज॑स्य मा प्रस॒वेन॒ प्रोहा॑मि ।
अ॒ग्नीषोमौ॒ तमप॑नुदतां॒ यो॒ऽस्मान् द्वेष्टि॒ यं च॑ व॒यं द्वि॒ष्मो वाज॑स्यैनं प्रस॒वेनापो॑हामि ।
इ॒न्द्रा॒ग्न्योरुज्जि॑ति॒मनूज्जे॑षं॒ वाज॑स्य मा प्रस॒वेन॒ प्रोहा॑मि ।
इ॒न्द्रा॒ग्नी तमप॑नुदतां॒ यो॒ऽस्मान् द्वेष्टि॒ यं च॑ व॒यं द्वि॒ष्मो वाज॑स्यैनं प्रस॒वेनापो॑हामि
vasu̍bhyastvā ru̱drebhya̍stvādi̱tyebhya̍stvā | saṃjā̍nāthāṃ dyāvāpṛthivī mi̱trāvaru̍ṇau tvā̱ vṛṣṭyā̍vatām
||2.31||वसु॑भ्यस्त्वा रु॒द्रेभ्य॑स्त्वादि॒त्येभ्य॑स्त्वा । संजा॑नाथां द्यावापृथिवी मि॒त्रावरु॑णौ त्वा॒ वृष्ट्या॑वताम्
vyantu̱ vayo̍ri̱pto rihā̍ṇā ma̱rutā̱ṃ pṛṣa̍tīṃ gacha| va̱śā pṛśni̍rbhū̱tvā diva̍ṃ gacha̱ tato̍ no̱ vṛṣṭi̱māva̍ha
||2.32||व्यन्तु॒ वयो॑रि॒प्तो रिहा॑णा म॒रुतां॒ पृष॑तीं गछ। व॒शा पृश्नि॑र्भू॒त्वा दिवं॑ गछ॒ ततो॑ नो॒ वृष्टि॒माव॑ह
ca̱kṣu̱ṣpā a̍si̱ cakṣu̍rme pāhi |yaṃ pa̍ri̱dhiṃ pa̱ryadha̍tthā̱ agne̍ deva pa̱ṇibhi̍rgu̱hyamā̍naḥ
||2.33||च॒क्षु॒ष्पा अ॑सि॒ चक्षु॑र्मे पाहि ।यं प॑रि॒धिं प॒र्यध॑त्था॒ अग्ने॑ देव प॒णिभि॑र्गु॒ह्यमा॑नः
taṃ ta̍ e̱tamanu̱ joṣa̍ṃ bharāmye̱ṣa nettvada̍pace̱tayā̍tai | a̱gneḥ pri̱yaṃ pātho'pī̍tam
||2.34||तं त॑ ए॒तमनु॒ जोषं॑ भराम्ये॒ष नेत्त्वद॑पचे॒तया॑तै । अ॒ग्नेः प्रि॒यं पाथोऽपी॑तम्
sa̱ sra̱vabhā̍gā sthe̱ṣā bṛ̱hanta̍ḥ prastare̱ṣṭhāḥ pa̍ri̱dhaya̍śca de̱vāḥ |
i̱māṃ vāca̍ma̱bhi viśve̍ gṛ̱ṇanta̍ ā̱sadyā̱smin ba̱rhiṣi̍ mādayadhva̱ svāhā̱ vāṭ |
ghṛ̱tācī̍ stho̱ dhuryau̍ pāta su̱mne stha̍ḥ su̱mne mā̍ṃ dhattam
||2.35||स॒ स्र॒वभा॑गा स्थे॒षा बृ॒हन्तः॑ प्रस्तरे॒ष्ठाः प॑रि॒धय॑श्च दे॒वाः ।
इ॒मां वाच॑म॒भि विश्वे॑ गृ॒णन्त॑ आ॒सद्या॒स्मिन् ब॒र्हिषि॑ मादयध्व॒ स्वाहा॒ वाट् ।
घृ॒ताची॑ स्थो॒ धुर्यौ॑ पात सु॒म्ने स्थः॑ सु॒म्ने मां॑ धत्तम्
agne̍'dabdhāyo'śītama pā̱hi mā̍ di̱dyoḥ pā̱hi prasi̍tyai pā̱hi duri̍ṣṭyai pā̱hi du̍radma̱nyai |
a̱vi̱ṣaṃ na̍ḥ pi̱tuṃ kṛ̍ṇu su̱ṣadā̱ yonau̱ svāhā̱ vāṭ
||2.36||अग्ने॑ऽदब्धायोऽशीतम पा॒हि मा॑ दि॒द्योः पा॒हि प्रसि॑त्यै पा॒हि दुरि॑ष्ट्यै पा॒हि दु॑रद्म॒न्यै ।
अ॒वि॒षं नः॑ पि॒तुं कृ॑णु सु॒षदा॒ योनौ॒ स्वाहा॒ वाट्
a̱gnaye̍ saṃve̱śapa̍taye̱ svāhā̱ sara̍svatyai yaśobha̱ginyai̱ svāhā̍ |
u̱lūkha̍le̱ musa̍le̱ yacca̱ śūrpa̍ āśi̱śleṣa̍ dṛ̱ṣadi̱ yat ka̱pāle̍
||2.37||अ॒ग्नये॑ संवे॒शप॑तये॒ स्वाहा॒ सर॑स्वत्यै यशोभ॒गिन्यै॒ स्वाहा॑ ।
उ॒लूख॑ले॒ मुस॑ले॒ यच्च॒ शूर्प॑ आशि॒श्लेष॑ दृ॒षदि॒ यत् क॒पाले॑
utpruṣo̍ vi̱pruṣa̱ḥ saṃ ju̍homi sa̱tyāḥ sa̍ntu̱ yaja̍mānasya̱ kāmā̱ḥ svāhā|
āpyā̍yatāṃ dhru̱vā ha̱viṣā̍ ghṛ̱tena̍ ya̱jñaṃ ya̍jña̱ṃ prati̍ deva̱yadbhaya̍ḥ||
sū̱ryāyā̱ ūdho̱ adi̍tyā u̱pastha̍ u̱rudhā̍rā pṛthi̱vī ya̱jñe a̱smin
||2.38||उत्प्रुषो॑ वि॒प्रुषः॒ सं जु॑होमि स॒त्याः स॑न्तु॒ यज॑मानस्य॒ कामाः॒ स्वाहा।
आप्या॑यतां ध्रु॒वा ह॒विषा॑ घृ॒तेन॑ य॒ज्ञं य॑ज्ञं॒ प्रति॑ देव॒यद्भयः॑॥
सू॒र्याया॒ ऊधो॒ अदि॑त्या उ॒पस्थ॑ उ॒रुधा॑रा पृथि॒वी य॒ज्ञे अ॒स्मिन्
devā̍ gātuvido gā̱tumi̱ttvā gā̱tumi̍ta | mana̍saspata i̱maṃ de̍va ya̱jña svāhā̱ vāte̍ dhāḥ
||2.39||देवा॑ गातुविदो गा॒तुमि॒त्त्वा गा॒तुमि॑त । मन॑सस्पत इ॒मं दे॑व य॒ज्ञ स्वाहा॒ वाते॑ धाः
saṃba̱rhira̍ṅktā ha̱viṣā̍ ghṛ̱tena̱ samā̍dityai̱rvasu̍bhi̱ḥ saṃ ma̱rudbhi̍ḥ |
samindro̍ vi̱śvade̍vebhiraṅktāṃ di̱vyaṃ nabho̍ gacchatu̱ yat svāhā̍
||2.40||संब॒र्हिर॑ङ्क्ता ह॒विषा॑ घृ॒तेन॒ समा॑दित्यै॒र्वसु॑भिः॒ सं म॒रुद्भिः॑ ।
समिन्द्रो॑ वि॒श्वदे॑वेभिरङ्क्तां दि॒व्यं नभो॑ गच्छतु॒ यत् स्वाहा॑
kastvā̱ vimu̍ñcati̱ sa tvā̱ vimu̍ñcati̱ kasmai̍ tvā̱ vimu̍ñcati̱ tasmai tvā̱ vimu̍ñcati |
poṣā̍ya̱ rakṣa̍sāṃ bhā̱go̍'si
||2.41||कस्त्वा॒ विमु॑ञ्चति॒ स त्वा॒ विमु॑ञ्चति॒ कस्मै॑ त्वा॒ विमु॑ञ्चति॒ तस्मै त्वा॒ विमु॑ञ्चति ।
पोषा॑य॒ रक्ष॑सां भा॒गो॑ऽसि
ve̱ṣo̍'syupave̱ṣo dvi̍ṣa̱to grī̱vā upa̍veviḍhḍhi | veśā̍ṃ agne subhaga dhāraye̱ha
||2.42||वे॒षो॑ऽस्युपवे॒षो द्वि॑ष॒तो ग्री॒वा उप॑वेविढ्ढि । वेशां॑ अग्ने सुभग धारये॒ह
ṛ̱ddhāḥ ka̍rma̱ṇyā̱ ana̍pāyino̱ yathāsa̍n||
ju̱homi̍ tvā subhaga̱ saubha̍gāya purū̱tama̍ṃ puruhūta śrava̱syan
||2.43||ऋ॒द्धाः क॑र्म॒ण्या॒ अन॑पायिनो॒ यथास॑न्॥
जु॒होमि॑ त्वा सुभग॒ सौभ॑गाय पुरू॒तमं॑ पुरुहूत श्रव॒स्यन्
saṃ varca̍sā̱ paya̍sā̱ saṃ ta̱nūbhi̱raga̍nmahi̱ mana̍sā̱ sa śi̱vena̍ |
tvaṣṭā̍ su̱datro̱ vida̍dhātu̱ rāyonu̍mārṣṭu ta̱nvo̱ yadvili̍ṣṭam
||2.44||सं वर्च॑सा॒ पय॑सा॒ सं त॒नूभि॒रग॑न्महि॒ मन॑सा॒ स शि॒वेन॑ ।
त्वष्टा॑ सु॒दत्रो॒ विद॑धातु॒ रायोनु॑मार्ष्टु त॒न्वो॒ यद्विलि॑ष्टम्
yajña̱ śaṃ ca̍ ta̱ upa̍ ca | śi̱ve me̱ saṃti̍ṣṭha̱svāri̍ṣṭe me̱ saṃti̍ṣṭhasva̱ svi̍ṣṭe me̱ saṃti̍ṣṭhasva
||2.45||यज्ञ॒ शं च॑ त॒ उप॑ च । शि॒वे मे॒ संति॑ष्ठ॒स्वारि॑ष्टे मे॒ संति॑ष्ठस्व॒ स्वि॑ष्टे मे॒ संति॑ष्ठस्व
di̱vi viṣṇu̱rvya̍krasta̱ jāga̍tena̱ chanda̍sā̱ tato̱ nirbha̍ktaḥ| yo̱'smān dveṣṭi̱ yaṃ ca̍ va̱yaṃ dvi̱ṣmaḥ |
a̱ntari̍kṣe̱ viṣṇu̱rvya̍krasta̱ traiṣṭu̍bhena̱ chanda̍sā̱ tato̱ nirbha̍ktaḥ | yo̱'smān dveṣṭi̱ yaṃ ca̍ va̱yaṃ dvi̱ṣmaḥ |
pṛ̱thi̱vyāṃ viṣṇu̱rvya̍krasta gāya̱treṇa̱ chanda̍sā̱ tato̱ nirbha̍ktaḥ | yo̱'smān dveṣṭi̱ yaṃ ca̍ va̱yaṃ dvi̱ṣmaḥ
||2.46||दि॒वि विष्णु॒र्व्य॑क्रस्त॒ जाग॑तेन॒ छन्द॑सा॒ ततो॒ निर्भ॑क्तः। यो॒ऽस्मान् द्वेष्टि॒ यं च॑ व॒यं द्वि॒ष्मः ।
अ॒न्तरि॑क्षे॒ विष्णु॒र्व्य॑क्रस्त॒ त्रैष्टु॑भेन॒ छन्द॑सा॒ ततो॒ निर्भ॑क्तः । यो॒ऽस्मान् द्वेष्टि॒ यं च॑ व॒यं द्वि॒ष्मः ।
पृ॒थि॒व्यां विष्णु॒र्व्य॑क्रस्त गाय॒त्रेण॒ छन्द॑सा॒ ततो॒ निर्भ॑क्तः । यो॒ऽस्मान् द्वेष्टि॒ यं च॑ व॒यं द्वि॒ष्मः
a̱smādannā̍da̱syai pra̍ti̱ṣṭhāyā̱ aga̍nma̱ sva̍ḥ | saṃ jyoti̍ṣābhūma
||2.47||अ॒स्मादन्ना॑द॒स्यै प्र॑ति॒ष्ठाया॒ अग॑न्म॒ स्वः॑ । सं ज्योति॑षाभूम
sva̱ya̱ṃbhūra̍si̱ śreṣṭho̍ ra̱śmirva̍rco̱dā a̍si̱ varco̍ me dehi | sūrya̍syā̱vṛta̱manvāva̍rte
||2.48||स्व॒यं॒भूर॑सि॒ श्रेष्ठो॑ र॒श्मिर्व॑र्चो॒दा अ॑सि॒ वर्चो॑ मे देहि । सूर्य॑स्या॒वृत॒मन्वाव॑र्ते
agne̍ gṛhapate sugṛhapa̱tira̱haṃ tvayā̍ gṛ̱hapa̍tyā bhūyāsam|
su̱gṛ̱ha̱pa̱tistvaṃ mayā̍ gṛ̱hapa̍tyā bhūyāḥ
||2.49||अग्ने॑ गृहपते सुगृहप॒तिर॒हं त्वया॑ गृ॒हप॑त्या भूयासम्।
सु॒गृ॒ह॒प॒तिस्त्वं मया॑ गृ॒हप॑त्या भूयाः
a̱sthū̱ri ṇo̱ gārha̍patyāni santu śa̱ta himā̍ḥ |
ti̱gmena̍ na̱steja̍sā̱ saśi̍śādhi̱ sūrya̍syā̱vṛta̱manvāva̍rte
||2.50||अ॒स्थू॒रि णो॒ गार्ह॑पत्यानि सन्तु श॒त हिमाः॑ ।
ति॒ग्मेन॑ न॒स्तेज॑सा॒ सशि॑शाधि॒ सूर्य॑स्या॒वृत॒मन्वाव॑र्ते
u̱ruvi̍ṣṇo̱ vikra̍masvo̱rukṣayā̍ya naskṛdhi | ghṛ̱taṃ ghṛ̍tayone piba̱ pra-pra̍ ya̱jñapa̍tiṃ tira
||2.51||उ॒रुवि॑ष्णो॒ विक्र॑मस्वो॒रुक्षया॑य नस्कृधि । घृ॒तं घृ॑तयोने पिब॒ प्र-प्र॑ य॒ज्ञप॑तिं तिर
tato̍'si̱ taṃtu̍ra̱syanu̍ mā tanuhi | a̱sminya̱jñe̱syā sā̍dhu kṛ̱tyāyā̍ma̱sminnanne̱'smim̐llo̱ke
||2.52||ततो॑ऽसि॒ तंतु॑र॒स्यनु॑ मा तनुहि । अ॒स्मिन्य॒ज्ञे॒स्या सा॑धु कृ॒त्याया॑म॒स्मिन्नन्ने॒ऽस्मिँल्लो॒के
i̱daṃ me̱ karme̱daṃ vī̱rya̍ṃ pu̱tro̍'nu̱ saṃta̍notu| agne̍ vratapate vra̱tama̍cāriṣa̱ṃ tada̍śaka̱ṃ tanme̍'rādhi |
i̱dama̱haṃ ya e̱vāsmi̱ sa e̱vāsmi̍
||2.53||इ॒दं मे॒ कर्मे॒दं वी॒र्यं॑ पु॒त्रो॑ऽनु॒ संत॑नोतु। अग्ने॑ व्रतपते व्र॒तम॑चारिषं॒ तद॑शकं॒ तन्मे॑ऽराधि ।
इ॒दम॒हं य ए॒वास्मि॒ स ए॒वास्मि॑
a̱gnaye̍ kavya̱vāha̍nāya̱ svāhā̱ somā̍ya pitṛ̱mate̱ svāhā̍ | apa̍hatā̱ asu̍rā̱ rakṣā̍ si vedi̱ṣada̍ḥ
||2.54||अ॒ग्नये॑ कव्य॒वाह॑नाय॒ स्वाहा॒ सोमा॑य पितृ॒मते॒ स्वाहा॑ । अप॑हता॒ असु॑रा॒ रक्षा॑ सि वेदि॒षदः॑
ye rū̱pāṇi̍ pratimu̱ñcamā̍nā̱ asu̍rā̱ḥ santa̍ḥ sva̱dhayā̱ cara̍nti |
pa̱rā̱puro̍ ni̱puro̱ ye bhara̍ntya̱gniṣṭām̐llo̱kāt praṇu̍dātya̱smāt
||2.55||ये रू॒पाणि॑ प्रतिमु॒ञ्चमा॑ना॒ असु॑राः॒ सन्तः॑ स्व॒धया॒ चर॑न्ति ।
प॒रा॒पुरो॑ नि॒पुरो॒ ये भर॑न्त्य॒ग्निष्टाँल्लो॒कात् प्रणु॑दात्य॒स्मात्
atra̍ pitaro mādayadhvaṃ yathābhā̱gamāvṛ̍ṣāyadhvam |
amī̍madanta pi̱taro̍ yathābhā̱gamāvṛ̍ṣāyiṣata
||2.56||अत्र॑ पितरो मादयध्वं यथाभा॒गमावृ॑षायध्वम् ।
अमी॑मदन्त पि॒तरो॑ यथाभा॒गमावृ॑षायिषत
namo̍ vaḥ pitara̱ḥ śuṣmā̍ya̱ namo̍ vaḥ pitara̱stapa̍se|
namo̍ vaḥ pitaro̱ yajjī̱vaṃ tasmai̱ namo̍ vaḥ pitaro̱ rasāya̍|
namo̍ vaḥ pitaro gho̱rāya̍ ma̱nyave̍ sva̱dhāyai̍ vaḥ pitaro̱ nama̍ḥ|
e̱tadva̍ḥ pitaro̱ vāso̍ gṛ̱hānna̍ḥ pitaro datta
||2.57||नमो॑ वः पितरः॒ शुष्मा॑य॒ नमो॑ वः पितर॒स्तप॑से।
नमो॑ वः पितरो॒ यज्जी॒वं तस्मै॒ नमो॑ वः पितरो॒ रसाय॑।
नमो॑ वः पितरो घो॒राय॑ म॒न्यवे॑ स्व॒धायै॑ वः पितरो॒ नमः॑।
ए॒तद्वः॑ पितरो॒ वासो॑ गृ॒हान्नः॑ पितरो दत्त
udāyu̍ṣā svā̱yuṣotparjanya̍sya̱ dhāma̍bhiḥ| uda̍sthāma̱mṛtā̱m̐ anu
||2.58||उदायु॑षा स्वा॒युषोत्पर्जन्य॑स्य॒ धाम॑भिः। उद॑स्थाम॒मृताँ॒ अनु
ādha̍tta pitaro̱ garbha̍ṃ kumā̱raṃ puṣka̍rasrajam | yathe̱ha puru̱ṣo'sa̍t
||2.59||आध॑त्त पितरो॒ गर्भं॑ कुमा॒रं पुष्क॑रस्रजम् । यथे॒ह पुरु॒षोऽस॑त्
ūrja̱ṃ vaha̍ntīra̱mṛta̍ṃ ghṛ̱taṃ paya̍ḥ kī̱lāla̍ṃ pari̱sruta̍m |
sva̱dhā stha̍ ta̱rpaya̍ta me pi̱tṝn
||2.60||ऊर्जं॒ वह॑न्तीर॒मृतं॑ घृ॒तं पयः॑ की॒लालं॑ परि॒स्रुत॑म् ।
स्व॒धा स्थ॑ त॒र्पय॑त मे पि॒तॄन्