athāṣṭatriṃśo'dhyāyaḥ|
de̱vasya̍ tvā savi̱tuḥ pra̍sa̱ve̱'śvino̍rbā̱hubhyā̍ṃ pū̱ṣṇo hastā̍bhyām |
ā da̱de'di̍tyai̱ rāsnā̍si
||38.1||दे॒वस्य॑ त्वा सवि॒तुः प्र॑स॒वे॒ऽश्विनो॑र्बा॒हुभ्यां॑ पू॒ष्णो हस्ता॑भ्याम् ।
आ द॒देऽदि॑त्यै॒ रास्ना॑सि
il̤a̱ ehyadi̍ta̱ ehi̱ sara̍sva̱ttyehi̍ | asā̱vehyasā̱vehyasā̱vehi̍
||38.2||इळ॒ एह्यदि॑त॒ एहि॒ सर॑स्व॒त्त्येहि॑ । असा॒वेह्यसा॒वेह्यसा॒वेहि॑
adi̍tyai̱ rāsnā̍sīndrā̱ṇyā u̱ṣṇīṣa̍ḥ | pū̱ṣāsi̍ gha̱rmāya̍ dīṣva
||38.3||अदि॑त्यै॒ रास्ना॑सीन्द्रा॒ण्या उ॒ष्णीषः॑ । पू॒षासि॑ घ॒र्माय॑ दीष्व
a̱śvibhyā̍ṃ pinvasva̱ sara̍svatyai pinva̱svendrā̍ya pinvasva | svāhendra̍vatsvāhendra̍va̱tsvāhendra̍vat
||38.4||अ॒श्विभ्यां॑ पिन्वस्व॒ सर॑स्वत्यै पिन्व॒स्वेन्द्रा॑य पिन्वस्व । स्वाहेन्द्र॑वत्स्वाहेन्द्र॑व॒त्स्वाहेन्द्र॑वत्
yaste̱ stana̍ḥ śaśa̱yo yo ma̍yo̱bhūryo ra̍tna̱dhā va̍su̱vidyaḥ su̱datra̍ḥ |
yena̱ viśvā̱ puṣya̍si̱ vāryā̍ṇi̱ sara̍svati̱ tami̱ha dhāta̍ve'kaḥ | u̱rva̱ntari̍kṣa̱manve̍mi
||38.5||यस्ते॒ स्तनः॑ शश॒यो यो म॑यो॒भूर्यो र॑त्न॒धा व॑सु॒विद्यः सु॒दत्रः॑ ।
येन॒ विश्वा॒ पुष्य॑सि॒ वार्या॑णि॒ सर॑स्वति॒ तमि॒ह धात॑वेऽकः । उ॒र्व॒न्तरि॑क्ष॒मन्वे॑मि
gā̱ya̱traṃ chando̍'si̱ trai̍ṣṭubha̱ṃ chando̍'si dyāvā̍pṛthi̱vībhyā̍ṃ tvā̱ pari̍ gṛhṇāmya̱ntari̍kṣe̱ṇopa̍ yacchāmi |
indrā̍śvinā̱ madhu̍naḥ sāra̱ghasya̍ gha̱rmaṃ pā̍ta̱ vasa̍vo̱ yaja̍ta̱ vāṭ |
svāhā̱ sūrya̍sya ra̱śmaye̍ vṛṣṭi̱vana̍ye
||38.6||गा॒य॒त्रं छन्दो॑ऽसि॒ त्रै॑ष्टुभं॒ छन्दो॑ऽसि द्यावा॑पृथि॒वीभ्यां॑ त्वा॒ परि॑ गृह्णाम्य॒न्तरि॑क्षे॒णोप॑ यच्छामि ।
इन्द्रा॑श्विना॒ मधु॑नः सार॒घस्य॑ घ॒र्मं पा॑त॒ वस॑वो॒ यज॑त॒ वाट् ।
स्वाहा॒ सूर्य॑स्य र॒श्मये॑ वृष्टि॒वन॑ये
sa̱mu̱drāya̍ tvā̱ vātā̍ya̱ svāhā̍ sari̱rāya̍ tvā̱ vātā̍ya̱ svāhā̍ |
a̱nā̱dhṛ̱ṣyāya̍ tvā̱ vātā̍ya̱ svāhā̍pratidhṛ̱ṣyāya̍ tvā̱ vātā̍ya̱ svāhā̍ ||
a̱va̱syave̍ tvā̱ vātā̍ya̱ svāhā̍śimi̱dāya̍ tvā̱ vātā̍ya̱ svāhā̍
||38.7||स॒मु॒द्राय॑ त्वा॒ वाता॑य॒ स्वाहा॑ सरि॒राय॑ त्वा॒ वाता॑य॒ स्वाहा॑ ।
अ॒ना॒धृ॒ष्याय॑ त्वा॒ वाता॑य॒ स्वाहा॑प्रतिधृ॒ष्याय॑ त्वा॒ वाता॑य॒ स्वाहा॑ ॥
अ॒व॒स्यवे॑ त्वा॒ वाता॑य॒ स्वाहा॑शिमि॒दाय॑ त्वा॒ वाता॑य॒ स्वाहा॑
indrā̍ya tvā̱ vasu̍mate ru̱drava̍te̱ svāhendrā̍ya tvādi̱tyava̍te̱ svāhā̍ |
indrā̍ya tvābhimāti̱ghne svāhā̍ savi̱tre tva̍ ṛbhu̱mate̍ vibhu̱mate̱ vāja̍vate̱ svāhā̱ bṛha̱spata̍ye tvā vi̱śvade̍vyāvate̱ svāhā̍
||38.8||इन्द्रा॑य त्वा॒ वसु॑मते रु॒द्रव॑ते॒ स्वाहेन्द्रा॑य त्वादि॒त्यव॑ते॒ स्वाहा॑ ।
इन्द्रा॑य त्वाभिमाति॒घ्ने स्वाहा॑ सवि॒त्रे त्व॑ ऋभु॒मते॑ विभु॒मते॒ वाज॑वते॒ स्वाहा॒ बृह॒स्पत॑ये त्वा वि॒श्वदे॑व्यावते॒ स्वाहा॑
ya̱māya̱ tvāṅgi̍rasvate pitṛ̱mate̱ svāhā̍ | svāhā̍ gha̱rmāya̱ svāhā̍ gha̱rmaḥ pi̱tre
||38.9||य॒माय॒ त्वाङ्गि॑रस्वते पितृ॒मते॒ स्वाहा॑ । स्वाहा॑ घ॒र्माय॒ स्वाहा॑ घ॒र्मः पि॒त्रे
viśvā̱ āśā̍ dakṣiṇa̱satsarvā̍nde̱vāna̍yāl̤i̱ha |
svāhā̍kṛtasya gha̱rmasya̱ madho̍ḥ pibatamaśvinā
||38.10||विश्वा॒ आशा॑ दक्षिण॒सत्सर्वा॑न्दे॒वान॑याळि॒ह ।
स्वाहा॑कृतस्य घ॒र्मस्य॒ मधोः॑ पिबतमश्विना
di̱vi dhā̍ i̱maṃ ya̱jñami̱maṃ ya̱jñaṃ di̱vi dhā̍ḥ | svāhā̱gnaye̍ ya̱jñiyā̍ya̱ śaṃ yaju̍rbhyaḥ
||38.11||दि॒वि धा॑ इ॒मं य॒ज्ञमि॒मं य॒ज्ञं दि॒वि धाः॑ । स्वाहा॒ग्नये॑ य॒ज्ञिया॑य॒ शं यजु॑र्भ्यः
aśvi̍nā gha̱rmaṃ pā̍ta̱ hārdvā̍na̱maha̍rdi̱vābhi̍rū̱tibhi̍ḥ |
ta̱ntrā̱yiṇe̱ namo̱ dyāvā̍pṛthi̱vībhyā̍m
||38.12||अश्वि॑ना घ॒र्मं पा॑त॒ हार्द्वा॑न॒मह॑र्दि॒वाभि॑रू॒तिभिः॑ ।
त॒न्त्रा॒यिणे॒ नमो॒ द्यावा॑पृथि॒वीभ्या॑म्
apā̍tāma̱śvinā̍ gha̱rmamanu̱ dyāvā̍pṛthi̱vī a̍masātām | ihai̱va rā̱taya̍ḥ santu
||38.13||अपा॑ताम॒श्विना॑ घ॒र्ममनु॒ द्यावा॑पृथि॒वी अ॑मसाताम् । इहै॒व रा॒तयः॑ सन्तु
i̱ṣe pi̍nvasvo̱rje pi̍nvasva̱ brahma̍ṇe pinvasva kṣa̱trāya̍ pinvasva̱ dyāvā̍pṛthi̱vībhyā̍ṃ pinvasva |
dharmā̍si su̱dharmāme̍nya̱sme nṛ̱mṇāni̍ dhāraya̱ brahma̍ dhāraya kṣa̱traṃ dhāraya̱ viśa̍ṃ dhāraya
||38.14||इ॒षे पि॑न्वस्वो॒र्जे पि॑न्वस्व॒ ब्रह्म॑णे पिन्वस्व क्ष॒त्राय॑ पिन्वस्व॒ द्यावा॑पृथि॒वीभ्यां॑ पिन्वस्व ।
धर्मा॑सि सु॒धर्मामे॑न्य॒स्मे नृ॒म्णानि॑ धारय॒ ब्रह्म॑ धारय क्ष॒त्रं धारय॒ विशं॑ धारय
svāhā̍ pū̱ṣṇe śara̍se̱ svāhā̱ grāva̍bhyaḥ svāhā̍ pratira̱vebhya̍ḥ |
svāhā̍ pi̱tṛbhya̍ ū̱rdhvaba̍rhirbhyo gharma̱pāva̍bhyaḥ svāhā̱ dyāvā̍pṛthi̱vībhyā̱ svāhā̱ viśve̍bhyo de̱vebhya̍ḥ
||38.15||स्वाहा॑ पू॒ष्णे शर॑से॒ स्वाहा॒ ग्राव॑भ्यः स्वाहा॑ प्रतिर॒वेभ्यः॑ ।
स्वाहा॑ पि॒तृभ्य॑ ऊ॒र्ध्वब॑र्हिर्भ्यो घर्म॒पाव॑भ्यः स्वाहा॒ द्यावा॑पृथि॒वीभ्या॒ स्वाहा॒ विश्वे॑भ्यो दे॒वेभ्यः॑
svāhā̍ ru̱drāya̍ ru̱drahū̍taye̱ svāhā̱ saṃ jyoti̍ṣā̱ jyoti̍ḥ |
aha̍ḥ ke̱tunā̍ juṣatā su̱jyoti̱rjyoti̍ṣā̱ svāhā̱ rātri̍ḥ ke̱tunā̍ juṣatā su̱jyoti̱rjyoti̍ṣā̱ svāhā̍ |
madhu̍ hu̱tamindra̍tame a̱gnā a̱śyāma̍ te deva gharma̱ nama̍ste astu̱ mā mā̍ hi sīḥ
||38.16||स्वाहा॑ रु॒द्राय॑ रु॒द्रहू॑तये॒ स्वाहा॒ सं ज्योति॑षा॒ ज्योतिः॑ ।
अहः॑ के॒तुना॑ जुषता सु॒ज्योति॒र्ज्योति॑षा॒ स्वाहा॒ रात्रिः॑ के॒तुना॑ जुषता सु॒ज्योति॒र्ज्योति॑षा॒ स्वाहा॑ ।
मधु॑ हु॒तमिन्द्र॑तमे अ॒ग्ना अ॒श्याम॑ ते देव घर्म॒ नम॑स्ते अस्तु॒ मा मा॑ हि सीः
a̱bhī̱maṃ ma̍hi̱mā diva̱ṃ vipro̍ babhūva sa̱prathā̍ḥ |
u̱ta śrava̍sā pṛthi̱vī sa sī̍dasva ma̱hām̐2 a̍si̱ roca̍sva deva̱vīta̍maḥ |
vi dhū̱mama̍gne aru̱ṣaṃ mi̍yedhya sṛ̱ja pra̍śasta darśa̱tam
||38.17||अ॒भी॒मं म॑हि॒मा दिवं॒ विप्रो॑ बभूव स॒प्रथाः॑ ।
उ॒त श्रव॑सा पृथि॒वी स सी॑दस्व म॒हाँ२ अ॑सि॒ रोच॑स्व देव॒वीत॑मः ।
वि धू॒मम॑ग्ने अरु॒षं मि॑येध्य सृ॒ज प्र॑शस्त दर्श॒तम्
yā te̍ gharma di̱vyā śugyā gā̍ya̱tryā ha̍vi̱rdhāne̍ | sā ta̱ ā pyā̍yatā̱ṃ niṣṭyā̍yatā̱ṃ tasyai̍ te̱ svāhā̍ |
yā te̍ gharmā̱ntari̍kṣe̱ śugyā tri̱ṣṭubhyāgnī̍dhre | sā ta̱ ā pyā̍yatā̱ṃ niṣṭyā̍yatā̱ṃ tasyai̍ te̱ svāhā̍ |
yā te̍ gharma pṛthi̱vyā śugyā jaga̍tyā sada̱syā̍ |
sā ta̱ ā pyā̍yatā̱ṃ niṣṭyā̍yatā̱ṃ tasyai̍ te̱ svāhā̍
||38.18||या ते॑ घर्म दि॒व्या शुग्या गा॑य॒त्र्या ह॑वि॒र्धाने॑ । सा त॒ आ प्या॑यतां॒ निष्ट्या॑यतां॒ तस्यै॑ ते॒ स्वाहा॑ ।
या ते॑ घर्मा॒न्तरि॑क्षे॒ शुग्या त्रि॒ष्टुभ्याग्नी॑ध्रे । सा त॒ आ प्या॑यतां॒ निष्ट्या॑यतां॒ तस्यै॑ ते॒ स्वाहा॑ ।
या ते॑ घर्म पृथि॒व्या शुग्या जग॑त्या सद॒स्या॑ ।
सा त॒ आ प्या॑यतां॒ निष्ट्या॑यतां॒ तस्यै॑ ते॒ स्वाहा॑
kṣa̱trasya̍ tvā pa̱raspāya̱ brahma̍ṇasta̱nva̍ṃ pāhi |
viśa̍stvā̱ dharma̍ṇā va̱yamanu̍ krāmāma suvi̱tāya̱ navya̍se
||38.19||क्ष॒त्रस्य॑ त्वा प॒रस्पाय॒ ब्रह्म॑णस्त॒न्वं॑ पाहि ।
विश॑स्त्वा॒ धर्म॑णा व॒यमनु॑ क्रामाम सुवि॒ताय॒ नव्य॑से
catu̍ḥsrakti̱rnābhi̍rṛ̱tasya̍ sa̱prathā̱ḥ sa no̍ vi̱śvāyu̍ḥ sa̱prathā̱ḥ sa na̍ḥ sa̱rvāyu̍ḥ sa̱prathā̍ḥ |
apa̱ dveṣo̱ apa̱ hvaro̱nyavra̍tasya saścima
||38.20||चतुः॑स्रक्ति॒र्नाभि॑रृ॒तस्य॑ स॒प्रथाः॒ स नो॑ वि॒श्वायुः॑ स॒प्रथाः॒ स नः॑ स॒र्वायुः॑ स॒प्रथाः॑ ।
अप॒ द्वेषो॒ अप॒ ह्वरो॒न्यव्र॑तस्य सश्चिम
gharmai̱tatte̱ purī̍ṣa̱ṃ tena̱ vardha̍sva̱ cā ca̍ pyāyasva |
va̱rdhi̱ṣī̱mahi̍ ca va̱yamā ca̍ pyāsiṣīmahi
||38.21||घर्मै॒तत्ते॒ पुरी॑षं॒ तेन॒ वर्ध॑स्व॒ चा च॑ प्यायस्व ।
व॒र्धि॒षी॒महि॑ च व॒यमा च॑ प्यासिषीमहि
aci̍krada̱dvṛṣā̱ hari̍rma̱hānmi̱tro na da̍rśa̱taḥ | sa sūrye̍ṇa didyutaduda̱dhirni̱dhiḥ
||38.22||अचि॑क्रद॒द्वृषा॒ हरि॑र्म॒हान्मि॒त्रो न द॑र्श॒तः । स सूर्ये॑ण दिद्युतदुद॒धिर्नि॒धिः
su̱mi̱tri̱yā na̱ āpa̱ oṣa̍dhayaḥ santu durmitri̱yāstasmai̍ santu̱ |
yo̱'smāndve̍ṣṭi̱ yaṃ ca̍ va̱yaṃ dvi̱ṣmaḥ
||38.23||सु॒मि॒त्रि॒या न॒ आप॒ ओष॑धयः सन्तु दुर्मित्रि॒यास्तस्मै॑ सन्तु॒ ।
यो॒ऽस्मान्द्वे॑ष्टि॒ यं च॑ व॒यं द्वि॒ष्मः
udva̱yaṃ tama̍sa̱spari̱ sva̱ḥ paśya̍nta̱ utta̍ram | de̱vaṃ de̍va̱trā sūrya̱maga̍nma̱ jyoti̍rutta̱mam |
edho̍'syedhiṣī̱mahi̍ sa̱mida̍si̱ tejo̍'si̱ tejo̱ mayi̍ dhehi
||38.24||उद्व॒यं तम॑स॒स्परि॒ स्वः॒ पश्य॑न्त॒ उत्त॑रम् । दे॒वं दे॑व॒त्रा सूर्य॒मग॑न्म॒ ज्योति॑रुत्त॒मम् ।
एधो॑ऽस्येधिषी॒महि॑ स॒मिद॑सि॒ तेजो॑ऽसि॒ तेजो॒ मयि॑ धेहि
yāva̍tī̱ dyāvā̍pṛthi̱vī yāva̍cca sa̱pta sindha̍vo vitasthi̱re |
tava̍ntamindra te̱ graha̍mū̱rjā gṛ̍hṇā̱myakṣi̍ta̱ṃ mayi̍ gṛhṇā̱myakṣi̍tam
||38.25||याव॑ती॒ द्यावा॑पृथि॒वी याव॑च्च स॒प्त सिन्ध॑वो वितस्थि॒रे ।
तव॑न्तमिन्द्र ते॒ ग्रह॑मू॒र्जा गृ॑ह्णा॒म्यक्षि॑तं॒ मयि॑ गृह्णा॒म्यक्षि॑तम्
mayi̱ tyadi̍ndri̱yaṃ bṛ̱hanmayi̱ dakṣo̱ mayi̱ kratu̍ḥ |
gha̱rmastri̱śugvi rā̍jati vi̱rājā̱ jyoti̍ṣā sa̱ha brahma̍ṇā̱ teja̍sā sa̱ha ||
paya̍so̱ reta̱ ābhṛ̍ta̱ṃ tasya̱ doha̍maśīma̱hyutta̍rāmuttarā̱ samā̍m
||38.26||मयि॒ त्यदि॑न्द्रि॒यं बृ॒हन्मयि॒ दक्षो॒ मयि॒ क्रतुः॑ ।
घ॒र्मस्त्रि॒शुग्वि रा॑जति वि॒राजा॒ ज्योति॑षा स॒ह ब्रह्म॑णा॒ तेज॑सा स॒ह ॥
पय॑सो॒ रेत॒ आभृ॑तं॒ तस्य॒ दोह॑मशीम॒ह्युत्त॑रामुत्तरा॒ समा॑म्
tviṣa̍ḥ sa̱ṃvṛk kratve̱ dakṣa̍sya te suṣu̱mṇasya̍ te suṣumṇāgnihu̱taḥ |
indra̍pītasya pra̱jāpa̍tibhakṣitasya̱ madhu̍mata̱ upa̍hūta̱ upa̍hūtasya bhakṣayāmi
||38.27||त्विषः॑ सं॒वृक् क्रत्वे॒ दक्ष॑स्य ते सुषु॒म्णस्य॑ ते सुषुम्णाग्निहु॒तः ।
इन्द्र॑पीतस्य प्र॒जाप॑तिभक्षितस्य॒ मधु॑मत॒ उप॑हूत॒ उप॑हूतस्य भक्षयामि