atha ṣaṭtriṃśo'dhyāyaḥ|
ṛca̱ṃ vāca̱ṃ pra pa̍dye̱ mano̱ yaju̱ḥ pra pa̍dye̱ sāma̍ prā̱ṇaṃ pra pa̍dye̱ cakṣu̱ḥ śrotra̱ṃ pra pa̍dye |
vāgoja̍ḥ sa̱haujo̱ mayi̍ prāṇāpānau
||36.1||ऋचं॒ वाचं॒ प्र प॑द्ये॒ मनो॒ यजुः॒ प्र प॑द्ये॒ साम॑ प्रा॒णं प्र प॑द्ये॒ चक्षुः॒ श्रोत्रं॒ प्र प॑द्ये ।
वागोजः॑ स॒हौजो॒ मयि॑ प्राणापानौ
yanme̍ chi̱draṃ cakṣu̍ṣo̱ hṛda̍yasya̱ mana̍so̱ vāti̍tṛṇṇa̱ṃ bṛha̱spati̍rme̱ tadda̍dhātu |
śaṃ no̍ bhavatu̱ bhuva̍nasya̱ yaspati̍ḥ
||36.2||यन्मे॑ छि॒द्रं चक्षु॑षो॒ हृद॑यस्य॒ मन॑सो॒ वाति॑तृण्णं॒ बृह॒स्पति॑र्मे॒ तद्द॑धातु ।
शं नो॑ भवतु॒ भुव॑नस्य॒ यस्पतिः॑
bhūrbhuva̱ḥ sva̍ḥ | tatsa̍vi̱turvare̍ṇya̱ṃ bhargo̍ de̱vasya̍ dhīmahi | dhiyo̱ yo na̍ḥ praco̱dayā̍t
||36.3||भूर्भुवः॒ स्वः॑ । तत्स॑वि॒तुर्वरे॑ण्यं॒ भर्गो॑ दे॒वस्य॑ धीमहि । धियो॒ यो नः॑ प्रचो॒दया॑त्
kayā̍ naści̱tra ā bhu̍vadū̱tī sa̱dāvṛ̍dha̱ḥ sakhā̍ | kayā̱ śaci̍ṣṭhayā vṛ̱tā
||36.4||कया॑ नश्चि॒त्र आ भु॑वदू॒ती स॒दावृ॑धः॒ सखा॑ । कया॒ शचि॑ष्ठया वृ॒ता
kastvā̍ sa̱tyo madā̍nā̱ṃ ma hi̍ṣṭho matsa̱dandha̍saḥ | dṛ̱l̤ahā ci̍dā̱ruje̱ vasu̍
||36.5||कस्त्वा॑ स॒त्यो मदा॑नां॒ म हि॑ष्ठो मत्स॒दन्ध॑सः । दृ॒ळहा चि॑दा॒रुजे॒ वसु॑
a̱bhī ṣu ṇa̱ḥ sakhī̍nāmavi̱tā ja̍ritṝ̱ṇām | śa̱taṃ bha̍vāsyū̱tibhiḥ
||36.6||अ॒भी षु णः॒ सखी॑नामवि॒ता ज॑रितॄ॒णाम् । श॒तं भ॑वास्यू॒तिभिः
kayā̱ tvaṃ na̍ ū̱tyābhi pra ma̍ndase vṛṣan | ka̱yā sto̱tṛbhya̱ ā bha̍ra
||36.7||कया॒ त्वं न॑ ऊ॒त्याभि प्र म॑न्दसे वृषन् । क॒या स्तो॒तृभ्य॒ आ भ॑र
indro̱ viśva̍sya rājati | śaṃ no̍ astu dvi̱pade̱ śaṃ catu̍ṣpade
||36.8||इन्द्रो॒ विश्व॑स्य राजति । शं नो॑ अस्तु द्वि॒पदे॒ शं चतु॑ष्पदे
śaṃ no̍ mi̱traḥ śaṃ varu̍ṇa̱ḥ śaṃ no̍ bhavatvarya̱mā | śaṃ na̱ indro̱ bṛha̱spati̱ḥ śaṃ no̱ viṣṇu̍rurukra̱maḥ
||36.9||शं नो॑ मि॒त्रः शं वरु॑णः॒ शं नो॑ भवत्वर्य॒मा । शं न॒ इन्द्रो॒ बृह॒स्पतिः॒ शं नो॒ विष्णु॑रुरुक्र॒मः
śaṃ no̱ vāta̍ḥ pavatā̱ śaṃ na̍stapatu̱ sūrya̍ḥ | śaṃ na̱ḥ kani̍kradadde̱vaḥ pa̱rjanyo̍ a̱bhi va̍rṣatu
||36.10||शं नो॒ वातः॑ पवता॒ शं न॑स्तपतु॒ सूर्यः॑ । शं नः॒ कनि॑क्रदद्दे॒वः प॒र्जन्यो॑ अ॒भि व॑र्षतु
ahā̍ni̱ śaṃ bhava̍ntu na̱ḥ śa rātrī̱ḥ prati̍ dhīyatām |
śaṃ na̍ indrā̱gnī bha̍vatā̱mavo̍bhi̱ḥ śaṃ na̱ indrā̱varu̍ṇā rā̱taha̍vyā |
śaṃ na̍ indrāpū̱ṣaṇā̱ vāja̍sātau̱ śamindrā̱somā̍ suvi̱tāya̱ śaṃ yoḥ
||36.11||अहा॑नि॒ शं भव॑न्तु नः॒ श रात्रीः॒ प्रति॑ धीयताम् ।
शं न॑ इन्द्रा॒ग्नी भ॑वता॒मवो॑भिः॒ शं न॒ इन्द्रा॒वरु॑णा रा॒तह॑व्या ।
शं न॑ इन्द्रापू॒षणा॒ वाज॑सातौ॒ शमिन्द्रा॒सोमा॑ सुवि॒ताय॒ शं योः
śaṃ no̍ de̱vīra̱bhiṣṭa̍ya̱ āpo̍ bhavantu pī̱taye̍ | śaṃ yora̱bhi sra̍vantu naḥ
||36.12||शं नो॑ दे॒वीर॒भिष्ट॑य॒ आपो॑ भवन्तु पी॒तये॑ । शं योर॒भि स्र॑वन्तु नः
syo̱nā pṛ̍thivi no bhavānṛkṣa̱rā ni̱veśa̍nī | yacchā̍ na̱ḥ śarma̍ sa̱prathā̍ḥ
||36.13||स्यो॒ना पृ॑थिवि नो भवानृक्ष॒रा नि॒वेश॑नी । यच्छा॑ नः॒ शर्म॑ स॒प्रथाः॑
āpo̱ hi ṣṭhā ma̍yo̱bhuva̱stā na̍ ū̱rje da̍dhātana | ma̱he raṇā̍ya̱ cakṣa̍se
||36.14||आपो॒ हि ष्ठा म॑यो॒भुव॒स्ता न॑ ऊ॒र्जे द॑धातन । म॒हे रणा॑य॒ चक्ष॑से
yo va̍ḥ śi̱vata̍mo̱ rasa̱stasya̍ bhājayate̱ha na̍ḥ | u̱śa̱tīri̍va mā̱tara̍ḥ
||36.15||यो वः॑ शि॒वत॑मो॒ रस॒स्तस्य॑ भाजयते॒ह नः॑ । उ॒श॒तीरि॑व मा॒तरः॑
tasmā̱ ara̍ṃ gamāma vo̱ yasya̱ kṣayā̍ya̱ jinva̍tha | āpo̍ ja̱naya̍thā ca naḥ
||36.16||तस्मा॒ अरं॑ गमाम वो॒ यस्य॒ क्षया॑य॒ जिन्व॑थ । आपो॑ ज॒नय॑था च नः
dyau̱ḥ śānti̍ra̱ntari̍kṣa̱ śānti̍ḥ pṛthi̱vī śānti̱rāpa̱ḥ śānti̱roṣa̍dhaya̱ḥ śānti̍ḥ |
vana̱spata̍ya̱ḥ śānti̱ śānti̍re̱va śānti̍ḥ
||36.17||द्यौः॒ शान्ति॑र॒न्तरि॑क्ष॒ शान्तिः॑ पृथि॒वी शान्ति॒रापः॒ शान्ति॒रोष॑धयः॒ शान्तिः॑ ।
वन॒स्पत॑यः॒ शान्ति॒ शान्ति॑रे॒व शान्तिः॑
dṛte̱ dṛ ha̍ mā mi̱trasya̍ mā̱ cakṣu̍ṣā̱ sarvā̍ṇi bhū̱tāni̱ samī̍kṣantām |
mi̱trasyā̱haṃ cakṣu̍ṣā̱ sarvā̍ṇi bhū̱tāni̱ samī̍kṣe | mi̱trasya̱ cakṣu̍ṣā̱ samī̍kṣāmahe
||36.18||दृते॒ दृ ह॑ मा मि॒त्रस्य॑ मा॒ चक्षु॑षा॒ सर्वा॑णि भू॒तानि॒ समी॑क्षन्ताम् ।
मि॒त्रस्या॒हं चक्षु॑षा॒ सर्वा॑णि भू॒तानि॒ समी॑क्षे । मि॒त्रस्य॒ चक्षु॑षा॒ समी॑क्षामहे
dṛte̱ dṛ ha̍ mā | jyokte̍ sa̱ṃdṛśi̍ jīvyāsa̱ṃ jyokte̍ sa̱ṃdṛśi̍ jīvyāsam
||36.19||दृते॒ दृ ह॑ मा । ज्योक्ते॑ सं॒दृशि॑ जीव्यासं॒ ज्योक्ते॑ सं॒दृशि॑ जीव्यासम्
nama̍ste̱ hara̍se śo̱ciṣe̱ nama̍ste astva̱rciṣe̍ |
a̱nyāste̍ a̱smatta̍pantu he̱taya̍ḥ pāva̱ko a̱smabhya̍ śi̱vo bha̍va
||36.20||नम॑स्ते॒ हर॑से शो॒चिषे॒ नम॑स्ते अस्त्व॒र्चिषे॑ ।
अ॒न्यास्ते॑ अ॒स्मत्त॑पन्तु हे॒तयः॑ पाव॒को अ॒स्मभ्य॑ शि॒वो भ॑व
nama̍ste astu vi̱dyute̱ nama̍ste stanayi̱tnave̍ |
nama̍ste bhagavannastu̱ yata̱ḥ sva̍ḥ sa̱mīha̍se
||36.21||नम॑स्ते अस्तु वि॒द्युते॒ नम॑स्ते स्तनयि॒त्नवे॑ ।
नम॑स्ते भगवन्नस्तु॒ यतः॒ स्वः॑ स॒मीह॑से
yato̍yataḥ sa̱mīha̍se̱ tato̍ no̱ abha̍yaṃ kuru |
śaṃ na̍ḥ kuru pra̱jābhyo'bha̍yaṃ naḥ pa̱śubhya̍ḥ
||36.22||यतो॑यतः स॒मीह॑से॒ ततो॑ नो॒ अभ॑यं कुरु ।
शं नः॑ कुरु प्र॒जाभ्योऽभ॑यं नः प॒शुभ्यः॑
su̱mi̱tri̱yā na̱ āpa̱ oṣa̍dhayaḥ santu durmitri̱yāstasmai̍ santu̱ |
yo̱'smāndve̍ṣṭi̱ yaṃ ca̍ va̱yaṃ dvi̱ṣmaḥ
||36.23||सु॒मि॒त्रि॒या न॒ आप॒ ओष॑धयः सन्तु दुर्मित्रि॒यास्तस्मै॑ सन्तु॒ ।
यो॒ऽस्मान्द्वे॑ष्टि॒ यं च॑ व॒यं द्वि॒ष्मः
taccakṣu̍rde̱vahi̍taṃ pu̱rastā̍cchu̱kramu̱ccara̍t |
paśye̍ma śa̱rada̍ḥ śa̱taṃ jīve̍ma śa̱rada̍ḥ śa̱ta śṛṇu̍yāma śa̱rada̍ḥ śa̱tam
||36.24||तच्चक्षु॑र्दे॒वहि॑तं पु॒रस्ता॑च्छु॒क्रमु॒च्चर॑त् ।
पश्ये॑म श॒रदः॑ श॒तं जीवे॑म श॒रदः॑ श॒त शृणु॑याम श॒रदः॑ श॒तम्