atha tṛtīyo'dhyāyaḥ|
sa̱midhā̱gniṃ du̍vasyata ghṛ̱tairbo̍dhaya̱tāti̍thim | āsmi̍n ha̱vyā ju̍hotana
||3.1||स॒मिधा॒ग्निं दु॑वस्यत घृ॒तैर्बो॑धय॒ताति॑थिम् । आस्मि॑न् ह॒व्या जु॑होतन
susa̍middhāya śo̱ciṣe̍ ghṛ̱taṃ tī̱vraṃ ju̍hotana | a̱gnaye̍ jā̱tave̍dase
||3.2||सुस॑मिद्धाय शो॒चिषे॑ घृ॒तं ती॒व्रं जु॑होतन । अ॒ग्नये॑ जा॒तवे॑दसे
taṃ tvā̍ sa̱midbhi̍raṅgiro ghṛ̱tena̍ vardhayāmasi | bṛ̱hacho̍cā yaviṣṭya
||3.3||तं त्वा॑ स॒मिद्भि॑रङ्गिरो घृ॒तेन॑ वर्धयामसि । बृ॒हछो॑चा यविष्ट्य
upa̍ tvāgne ha̱viṣma̍tīrghṛ̱tācī̍ryantu haryata | ju̱ṣasva̍ sa̱midho̱ mama̍
||3.4||उप॑ त्वाग्ने ह॒विष्म॑तीर्घृ॒ताची॑र्यन्तु हर्यत । जु॒षस्व॑ स॒मिधो॒ मम॑
bhūrbhuva̱ḥ sva̱rdyauri̍va bhū̱mnā bhūmi̍riva vari̱mṇā |
tasyā̍ste pṛthivi devayajani pṛ̱ṣṭhe̱gnima̍nnā̱dama̱nnādyā̱yāda̍dhe
||3.5||भूर्भुवः॒ स्व॒र्द्यौरि॑व भू॒म्ना भूमि॑रिव वरि॒म्णा ।
तस्या॑स्ते पृथिवि देवयजनि पृ॒ष्ठे॒ग्निम॑न्ना॒दम॒न्नाद्या॒याद॑धे
āyaṃ gauḥ pṛśni̍rakramī̱dasa̍dan mā̱tara̍ṃ pu̱raḥ | pi̱tara̍ṃ ca pra̱yantsva̍ḥ
||3.6||आयं गौः पृश्नि॑रक्रमी॒दस॑दन् मा॒तरं॑ पु॒रः । पि॒तरं॑ च प्र॒यन्त्स्वः॑
a̱ntaśca̍rati roca̱nāsya prā̱ṇāda̍pāna̱tī | vya̍khyan mahi̱ṣo diva̍m
||3.7||अ॒न्तश्च॑रति रोच॒नास्य प्रा॒णाद॑पान॒ती । व्य॑ख्यन् महि॒षो दिव॑म्
tri̱ śaddhāma̱ virā̍jati̱ vāk pa̍ta̱ṅgāya̍ dhīyate | prati̱ vasto̱raha̱ dyubhi̍ḥ
||3.8||त्रि॒ शद्धाम॒ विरा॑जति॒ वाक् प॑त॒ङ्गाय॑ धीयते । प्रति॒ वस्तो॒रह॒ द्युभिः॑
a̱gnirjyo̍tiṣaṃ tvā vāyu̱matī̍ṃ prā̱ṇava̍tīm| sva̱rgyā̍sva̱rgāyopa̍dadhāmi̱ bhāsva̍tīm|
a̱gnirjyoti̱rjyoti̍ra̱gniḥ svāhā̍
||3.9||अ॒ग्निर्ज्यो॑तिषं त्वा वायु॒मतीं॑ प्रा॒णव॑तीम्। स्व॒र्ग्या॑स्व॒र्गायोप॑दधामि॒ भास्व॑तीम्।
अ॒ग्निर्ज्योति॒र्ज्योति॑र॒ग्निः स्वाहा॑
sūrya̍ jyotiṣaṃ tvā vāyu̱matī̍ṃ prā̱ṇava̍tīm| sva̱rgyā̍sva̱rgāyopa̍dadhāmi̱ bhāsva̍tīm|
sūryo̱ jyoti̱rjyoti̱ḥ sūrya̱ḥ svāhā̍
||3.10||सूर्य॑ ज्योतिषं त्वा वायु॒मतीं॑ प्रा॒णव॑तीम्। स्व॒र्ग्या॑स्व॒र्गायोप॑दधामि॒ भास्व॑तीम्।
सूर्यो॒ ज्योति॒र्ज्योतिः॒ सूर्यः॒ स्वाहा॑
sa̱jūrde̱vena̍ savi̱trā sa̱jū rātryendra̍vatyā | ju̱ṣā̱ṇo a̱gnirve̍tu̱ svāhā̍
||3.11||स॒जूर्दे॒वेन॑ सवि॒त्रा स॒जू रात्र्येन्द्र॑वत्या । जु॒षा॒णो अ॒ग्निर्वे॑तु॒ स्वाहा॑
sa̱jūrde̱vena̍ savi̱trā sa̱jūru̱ṣasendra̍vatyā | ju̱ṣā̱ṇaḥ sūryo̍ vetu̱ svāhā̍
||3.12||स॒जूर्दे॒वेन॑ सवि॒त्रा स॒जूरु॒षसेन्द्र॑वत्या । जु॒षा॒णः सूर्यो॑ वेतु॒ स्वाहा॑
i̱ha puṣṭi̱ṃ puṣṭi̍patirdadhātvi̱ha pra̱jā ra̍mayatu pra̱jāpa̍tiḥ| a̱gnaye̍ gṛ̱hapa̍taye rayi̱mate̱ puṣṭi̍pataye̱ svāhā̍|
a̱gnaye̍'nnā̱dāyānna̍pataye̱ svāhā̍
||3.13||इ॒ह पुष्टिं॒ पुष्टि॑पतिर्दधात्वि॒ह प्र॒जा र॑मयतु प्र॒जाप॑तिः। अ॒ग्नये॑ गृ॒हप॑तये रयि॒मते॒ पुष्टि॑पतये॒ स्वाहा॑।
अ॒ग्नये॑ऽन्ना॒दायान्न॑पतये॒ स्वाहा॑
a̱na̱mi̱traṃ me̍ adha̱rāga̍nami̱tramuda̍kkṛdhi | indrā̍nami̱traṃ pa̱ścānme̍nami̱traṃ pu̱raskṛ̍dhi
||3.14||अ॒न॒मि॒त्रं मे॑ अध॒राग॑नमि॒त्रमुद॑क्कृधि । इन्द्रा॑नमि॒त्रं प॒श्चान्मे॑नमि॒त्रं पु॒रस्कृ॑धि
indra̍ḥ pa̱ścādindra̍ḥ pu̱rastā̱dindro̍ a̱smām̐3 a̱bhipā̍tu vi̱śvata̍ḥ|
indro̱ jighā̍satā̱ṃ manā̍si viṣū̱cīnā̱ vya̍syatāt
||3.15||इन्द्रः॑ प॒श्चादिन्द्रः॑ पु॒रस्ता॒दिन्द्रो॑ अ॒स्माँ३ अ॒भिपा॑तु वि॒श्वतः॑।
इन्द्रो॒ जिघा॑सतां॒ मना॑सि विषू॒चीना॒ व्य॑स्यतात्
sa̱mida̍si̱ sami̍ddho me agne dīdihi | sa̱me̱ddhā te̍ agne dīdyāsam
||3.16||स॒मिद॑सि॒ समि॑द्धो मे अग्ने दीदिहि । स॒मे॒द्धा ते॑ अग्ने दीद्यासम्
u̱pa̱pra̱yanto̍ adhva̱raṃ mantra̍ṃ vocemā̱gnaye̍ | ā̱re a̱sme ca̍ śṛṇva̱te
||3.17||उ॒प॒प्र॒यन्तो॑ अध्व॒रं मन्त्रं॑ वोचेमा॒ग्नये॑ । आ॒रे अ॒स्मे च॑ शृण्व॒ते
a̱gnirmū̱rdhā di̱vaḥ ka̱kutpati̍ḥ pṛthi̱vyā a̱yam | a̱pā retā̍si jinvati
||3.18||अ॒ग्निर्मू॒र्धा दि॒वः क॒कुत्पतिः॑ पृथि॒व्या अ॒यम् । अ॒पा रेता॑सि जिन्वति
u̱bhā vā̍mindrāgnī āhu̱vadhyā̍ u̱bhā rādha̍saḥ sa̱ha mā̍da̱yadhyai̍ |
u̱bhā dā̱tārā̍ i̱ṣā ra̍yī̱ṇāmu̱bhā vāja̍sya sā̱taye̍ huve vām
||3.19||उ॒भा वा॑मिन्द्राग्नी आहु॒वध्या॑ उ॒भा राध॑सः स॒ह मा॑द॒यध्यै॑ ।
उ॒भा दा॒तारा॑ इ॒षा र॑यी॒णामु॒भा वाज॑स्य सा॒तये॑ हुवे वाम्
a̱yaṃ te̱ yoni̍rṛ̱tviyo̱ yato̍ jā̱to aro̍cathāḥ |
taṃ jā̱nanna̍gna̱ āro̱hāthā̍ no vardhayā ra̱yim
||3.20||अ॒यं ते॒ योनि॑रृ॒त्वियो॒ यतो॑ जा॒तो अरो॑चथाः ।
तं जा॒नन्न॑ग्न॒ आरो॒हाथा॑ नो वर्धया र॒यिम्
a̱yami̱ha pra̍tha̱mo dhā̍yi dhā̱tṛbhi̱rhotā̱ yaji̍ṣṭho adhva̱reṣvīḍya̍ḥ |
yamapna̍vāno̱ bhṛga̍vo viruru̱curvane̍ṣu ci̱traṃ vi̱bhvaṃ vi̱śevi̍śe
||3.21||अ॒यमि॒ह प्र॑थ॒मो धा॑यि धा॒तृभि॒र्होता॒ यजि॑ष्ठो अध्व॒रेष्वीड्यः॑ ।
यमप्न॑वानो॒ भृग॑वो विरुरु॒चुर्वने॑षु चि॒त्रं वि॒भ्वं वि॒शेवि॑शे
a̱sya pra̱tnāmanu̱ dyuta̍ śu̱kraṃ du̍duhre̱ ahra̍yaḥ | paya̍ḥ sahasra̱sāmṛṣi̍m
||3.22||अ॒स्य प्र॒त्नामनु॒ द्युत॑ शु॒क्रं दु॑दुह्रे॒ अह्र॑यः । पयः॑ सहस्र॒सामृषि॑म्
ta̱nū̱pā a̍gne'si ta̱nva̍ṃ me pāhyāyu̱rdā a̍gne̱'syāyu̍rme dehi | va̱rco̱dā a̍gne'si̱ varco̍ me dehi
||3.23||त॒नू॒पा अ॑ग्नेऽसि त॒न्वं॑ मे पाह्यायु॒र्दा अ॑ग्ने॒ऽस्यायु॑र्मे देहि । व॒र्चो॒दा अ॑ग्नेऽसि॒ वर्चो॑ मे देहि
agne̱ yanme̍ ta̱nvā̍ ū̱naṃ tanma̱ āpṛ̍ṇa | indhā̍nāstvā śa̱ta himā̍ dyu̱manta̱ sami̍dhīmahi
||3.24||अग्ने॒ यन्मे॑ त॒न्वा॑ ऊ॒नं तन्म॒ आपृ॑ण । इन्धा॑नास्त्वा श॒त हिमा॑ द्यु॒मन्त॒ समि॑धीमहि
vaya̍svanto vaya̱skṛta̱ saha̍svantaḥ saha̱skṛta̍m | agne̍ sapatna̱dambha̍na̱mada̍bdhāso̱ adā̍bhyam
||3.25||वय॑स्वन्तो वय॒स्कृत॒ सह॑स्वन्तः सह॒स्कृत॑म् । अग्ने॑ सपत्न॒दम्भ॑न॒मद॑ब्धासो॒ अदा॑भ्यम्
citrā̍vaso sva̱sti te̍ pā̱rama̍śīya | saṃ tvama̍gne̱ sūrya̍sya̱ varca̍sāgathā̱ḥ samṛṣī̍ṇā stu̱tena̍
||3.26||चित्रा॑वसो स्व॒स्ति ते॑ पा॒रम॑शीय । सं त्वम॑ग्ने॒ सूर्य॑स्य॒ वर्च॑सागथाः॒ समृषी॑णा स्तु॒तेन॑
saṃ pri̱yeṇa̱ dhāmnā̱ sama̱hamāyu̍ṣā̱ saṃ varca̍sā̱ saṃ pra̱jayā̱ sa rā̱yaspoṣe̍ṇa gmiṣīya |
andha̱ sthāndho̍ vo bhakṣīya̱ maha̍ stha̱ maho̍ vo bhakṣīya
||3.27||सं प्रि॒येण॒ धाम्ना॒ सम॒हमायु॑षा॒ सं वर्च॑सा॒ सं प्र॒जया॒ स रा॒यस्पोषे॑ण ग्मिषीय ।
अन्ध॒ स्थान्धो॑ वो भक्षीय॒ मह॑ स्थ॒ महो॑ वो भक्षीय
ūrja̱ sthorja̍ṃ vo bhakṣīya rā̱yaspoṣa̍ stha rā̱yaspoṣa̍ṃ vo bhakṣīya |
reva̍tī̱ rama̍dhvama̱smin yonā̍ a̱smin goṣṭhe̱'smin kṣaye̱'smim̐llo̱ke̱
||3.28||ऊर्ज॒ स्थोर्जं॑ वो भक्षीय रा॒यस्पोष॑ स्थ रा॒यस्पोषं॑ वो भक्षीय ।
रेव॑ती॒ रम॑ध्वम॒स्मिन् योना॑ अ॒स्मिन् गोष्ठे॒ऽस्मिन् क्षये॒ऽस्मिँल्लो॒के॒
i̱haiva ste̱to māpa̍gāta | sa̱ hi̱tāsi̍ viśvarū̱pyū̱rjā māvi̍śa gaupa̱tyena̍
||3.29||इ॒हैव स्ते॒तो माप॑गात । स॒ हि॒तासि॑ विश्वरू॒प्यू॒र्जा मावि॑श गौप॒त्येन॑
upa̍ tvāgne di̱vedi̍ve̱ doṣā̍vastardhi̱yā va̱yam | namo̱ bhara̍nta̱ ema̍si
||3.30||उप॑ त्वाग्ने दि॒वेदि॑वे॒ दोषा॑वस्तर्धि॒या व॒यम् । नमो॒ भर॑न्त॒ एम॑सि
rāja̍ntamadhva̱rāṇā̍ṃ go̱pāmṛ̱tasya̱ dīdi̍vim | vardha̍māna̱ sve dame̍
||3.31||राज॑न्तमध्व॒राणां॑ गो॒पामृ॒तस्य॒ दीदि॑विम् । वर्ध॑मान॒ स्वे दमे॑
sa na̍ḥ pi̱teva̍ sū̱nave'gne̍ sūpāya̱no bha̍va | saca̍svā naḥ sva̱staye̍
||3.32||स नः॑ पि॒तेव॑ सू॒नवेऽग्ने॑ सूपाय॒नो भ॑व । सच॑स्वा नः स्व॒स्तये॑
agne̱ tvaṃ no̱ anta̍ma u̱ta trā̱tā śi̱vo bha̍vā varū̱thya̍ḥ | vasu̍ra̱gnirvasu̍śravā̱ acchā̍ nakṣi dyu̱matta̍ma ra̱yiṃ dā̍ḥ
||3.33||अग्ने॒ त्वं नो॒ अन्त॑म उ॒त त्रा॒ता शि॒वो भ॑वा वरू॒थ्यः॑ । वसु॑र॒ग्निर्वसु॑श्रवा॒ अच्छा॑ नक्षि द्यु॒मत्त॑म र॒यिं दाः॑
taṃ tvā̍ śociṣṭha dīdivaḥ su̱mnāya̍ nū̱namī̍mahe̱ sakhi̍bhyaḥ |
sa no̍ bodhi śru̱dhī hava̍muru̱ṣyā ṇo̍ aghāya̱taḥ sama̍smāt
||3.34||तं त्वा॑ शोचिष्ठ दीदिवः सु॒म्नाय॑ नू॒नमी॑महे॒ सखि॑भ्यः ।
स नो॑ बोधि श्रु॒धी हव॑मुरु॒ष्या णो॑ अघाय॒तः सम॑स्मात्
il̤a̱ ehyadi̍ta̱ ehi̍ kāmyā̱ ehi̍ | mayi̍ vaḥ kāma̱dhara̍ṇaṃ bhūyāt
||3.35||इळ॒ एह्यदि॑त॒ एहि॑ काम्या॒ एहि॑ । मयि॑ वः काम॒धर॑णं भूयात्
so̱māna̱ svara̍ṇaṃ kṛṇu̱hi bra̍hmaṇaspate | ka̱kṣīva̍nta̱ṃ ya au̍śi̱jaḥ
||3.36||सो॒मान॒ स्वर॑णं कृणु॒हि ब्र॑ह्मणस्पते । क॒क्षीव॑न्तं॒ य औ॑शि॒जः
yo re̱vānyo a̍mīva̱hā va̍su̱vit pu̍ṣṭi̱vardha̍naḥ | sa na̍ḥ siṣaktu̱ yastu̱raḥ
||3.37||यो रे॒वान्यो अ॑मीव॒हा व॑सु॒वित् पु॑ष्टि॒वर्ध॑नः । स नः॑ सिषक्तु॒ यस्तु॒रः
mā na̱ḥ śa so̱ ara̍ruṣo dhū̱rtiḥ praṇa̱ṅmartya̍sya | rakṣā̍ ṇo brahmaṇaspate
||3.38||मा नः॒ श सो॒ अर॑रुषो धू॒र्तिः प्रण॒ङ्मर्त्य॑स्य । रक्षा॑ णो ब्रह्मणस्पते
mahi̍ trī̱ṇāmavo̍'stu dyu̱kṣaṃ mi̱trasyā̍rya̱mṇaḥ | du̱rā̱dharṣa̱ṃ varu̍ṇasya
||3.39||महि॑ त्री॒णामवो॑ऽस्तु द्यु॒क्षं मि॒त्रस्या॑र्य॒म्णः । दु॒रा॒धर्षं॒ वरु॑णस्य
na̱hi teṣā̍ma̱mā ca̱na nādhva̍su vāra̱ṇeṣu̍ | īśe̍ ri̱pura̱ghaśa̍ saḥ
||3.40||न॒हि तेषा॑म॒मा च॒न नाध्व॑सु वार॒णेषु॑ । ईशे॑ रि॒पुर॒घश॑ सः
te hi pu̱trāso̱ adi̍te̱ḥ pra jī̱vase̱ martyā̍ya | jyoti̱ryaccha̱ntyaja̍sram
||3.41||ते हि पु॒त्रासो॒ अदि॑तेः॒ प्र जी॒वसे॒ मर्त्या॑य । ज्योति॒र्यच्छ॒न्त्यज॑स्रम्
ka̱dā ca̱na sta̱rīra̍si̱ nendra̍ saścasi dā̱śuṣe̍ |
u̱popennu ma̍ghava̱n bhūya̱ innu te̱ dāna̍ṃ de̱vasya̍ pṛcyate
||3.42||क॒दा च॒न स्त॒रीर॑सि॒ नेन्द्र॑ सश्चसि दा॒शुषे॑ ।
उ॒पोपेन्नु म॑घव॒न् भूय॒ इन्नु ते॒ दानं॑ दे॒वस्य॑ पृच्यते
tat sa̍vi̱turvare̍ṇya̱ṃ bhargo̍ de̱vasya̍ dhīmahi | dhiyo̱ yo na̍ḥ praco̱dayā̍t
||3.43||तत् स॑वि॒तुर्वरे॑ण्यं॒ भर्गो॑ दे॒वस्य॑ धीमहि । धियो॒ यो नः॑ प्रचो॒दया॑त्
pari̍ te dū̱l̤abho̱ ratho̱'smām̐3 a̍śnotu vi̱śvata̍ḥ | yena̱ rakṣa̍si dā̱śuṣa̍ḥ ||
sami̍ddho mā̱sama̍rdhaya pra̱jayā̍ ca̱ dhane̍na ca
||3.44||परि॑ ते दू॒ळभो॒ रथो॒ऽस्माँ३ अ॑श्नोतु वि॒श्वतः॑ । येन॒ रक्ष॑सि दा॒शुषः॑ ।।
समि॑द्धो मा॒सम॑र्धय प्र॒जया॑ च॒ धने॑न च
bhūrbhuva̱ḥ sva̍ḥ supra̱jāḥ pra̱jayā̍ bhūyāsam | su̱vīro̍ vī̱raiḥ su̱poṣa̱ḥ poṣai̍ḥ
||3.45||भूर्भुवः॒ स्वः॑ सुप्र॒जाः प्र॒जया॑ भूयासम् । सु॒वीरो॑ वी॒रैः सु॒पोषः॒ पोषैः॑
narya̍ pra̱jāṃ me̍ pāhi̱ śasya̍ pa̱śūn me̍ pāhi | āga̍nma vi̱śvave̍dasama̱smabhya̍ṃ vasu̱vitta̍mam
||3.46||नर्य॑ प्र॒जां मे॑ पाहि॒ शस्य॑ प॒शून् मे॑ पाहि । आग॑न्म वि॒श्ववे॑दसम॒स्मभ्यं॑ वसु॒वित्त॑मम्
agne̍ samrāl̤a̱bhi dyu̱mnama̱bhi saha̱ āya̍cchasva | a̱yama̱gnirgṛ̱hapa̍ti̱rgārha̍patyaḥ pra̱jāvānvasu̱vitta̍ma
||3.47||अग्ने॑ सम्राळ॒भि द्यु॒म्नम॒भि सह॒ आय॑च्छस्व । अ॒यम॒ग्निर्गृ॒हप॑ति॒र्गार्ह॑पत्यः प्र॒जावान्वसु॒वित्त॑म
agne̍ gṛhapate̱'bhi dyu̱mnama̱bhi saha̱ āya̍cchasva | gṛhā̱ mā bi̍bhīta̱ mā ve̍padhva̱mūrja̱ṃ bibhra̍ta̱ ema̍si
||3.48||अग्ने॑ गृहपते॒ऽभि द्यु॒म्नम॒भि सह॒ आय॑च्छस्व । गृहा॒ मा बि॑भीत॒ मा वे॑पध्व॒मूर्जं॒ बिभ्र॑त॒ एम॑सि
ūrja̱ṃ bibhra̍dvaḥ su̱manā̍ḥ sume̱dhā gṛ̱hānaimi̱ mana̍sā̱ moda̍mānaḥ | yeṣā̍ma̱dhyeti̍ pra̱vasa̱nyeṣu̍ saumana̱so ba̱huḥ
||3.49||ऊर्जं॒ बिभ्र॑द्वः सु॒मनाः॑ सुमे॒धा गृ॒हानैमि॒ मन॑सा॒ मोद॑मानः । येषा॑म॒ध्येति॑ प्र॒वस॒न्येषु॑ सौमन॒सो ब॒हुः
gṛ̱hānupa̍hvayāmahe̱ te no̍ jānantu jāna̱taḥ | upa̍hūtā i̱ha gāva̱ upa̍hūtā ajā̱vaya̍ḥ
||3.50||गृ॒हानुप॑ह्वयामहे॒ ते नो॑ जानन्तु जान॒तः । उप॑हूता इ॒ह गाव॒ उप॑हूता अजा॒वयः॑
atho̱ anna̍sya kī̱lāla̱ upa̍hūto gṛ̱heṣu̍ naḥ | kṣemā̍ya va̱ḥ śāntyai̱ prapa̍dye |
śi̱va śa̱gma śa̱ṃyoḥ śa̱ṃyoḥ
||3.51||अथो॒ अन्न॑स्य की॒लाल॒ उप॑हूतो गृ॒हेषु॑ नः । क्षेमा॑य वः॒ शान्त्यै॒ प्रप॑द्ये ।
शि॒व श॒ग्म शं॒योः शं॒योः
pra̱ghā̱sino̍ havāmahe ma̱ruta̍śca ri̱śāda̍saḥ | ka̱ra̱mbheṇa̍ sa̱joṣa̍saḥ
||3.52||प्र॒घा॒सिनो॑ हवामहे म॒रुत॑श्च रि॒शाद॑सः । क॒र॒म्भेण॑ स॒जोष॑सः
yad grāme̱ yadara̍ṇye̱ yatsa̱bhāyā̱ṃ yadi̍ndri̱ye | yadena̍ścakṛ̱mā va̱yami̱daṃ tadava̍yajāmahe̱ svāhā̍
||3.53||यद् ग्रामे॒ यदर॑ण्ये॒ यत्स॒भायां॒ यदि॑न्द्रि॒ये । यदेन॑श्चकृ॒मा व॒यमि॒दं तदव॑यजामहे॒ स्वाहा॑
mo ṣū ṇa̍ i̱ndrātra̍ pṛ̱tsu devai̱rasti̱ hi ṣmā̍ te śuṣminnava̱yāḥ |
ma̱haści̱dyasya̍ mī̱l̤ahuṣo̍ ya̱vyā ha̱viṣma̍to ma̱ruto̱ vanda̍te̱ gīḥ
||3.54||मो षू ण॑ इ॒न्द्रात्र॑ पृ॒त्सु देवै॒रस्ति॒ हि ष्मा॑ ते शुष्मिन्नव॒याः ।
म॒हश्चि॒द्यस्य॑ मी॒ळहुषो॑ य॒व्या ह॒विष्म॑तो म॒रुतो॒ वन्द॑ते॒ गीः
akra̱n karma̍ karma̱kṛta̍ḥ sa̱ha vā̱cā ma̍yo̱bhuvā̍ | de̱vebhya̱ḥ karma̍ kṛ̱tvāsta̱ṃ preta̍ sacābhuvaḥ
||3.55||अक्र॒न् कर्म॑ कर्म॒कृतः॑ स॒ह वा॒चा म॑यो॒भुवा॑ । दे॒वेभ्यः॒ कर्म॑ कृ॒त्वास्तं॒ प्रेत॑ सचाभुवः
ava̍bhṛtha nicumpuṇa nice̱rura̍si nicumpuṇaḥ |
ava̍ de̱vairde̱vakṛ̍ta̱meno̍'yāsiṣa̱mava̱ martyai̱rmartya̍kṛtaṃ puru̱rāvṇo̍ deva ri̱ṣaspā̍hi
||3.56||अव॑भृथ निचुम्पुण निचे॒रुर॑सि निचुम्पुणः ।
अव॑ दे॒वैर्दे॒वकृ॑त॒मेनो॑ऽयासिष॒मव॒ मर्त्यै॒र्मर्त्य॑कृतं पुरु॒राव्णो॑ देव रि॒षस्पा॑हि
pū̱rṇā da̍rvi̱ parā̍ pata̱ supū̍rṇā̱ puna̱rā pa̍ta | va̱sneva̱ vikrī̍ṇāvahā̱ iṣa̱mūrja śatakrato
||3.57||पू॒र्णा द॑र्वि॒ परा॑ पत॒ सुपू॑र्णा॒ पुन॒रा प॑त । व॒स्नेव॒ विक्री॑णावहा॒ इष॒मूर्ज शतक्रतो
de̱hi me̱ dadā̍mi te̱ ni me̍ dhehi̱ ni te̍ dadhau | ni̱hāra̍ṃ niha̍rāmi te ni̱hāra̱ṃ niha̍rāsi me̱ svāhā̍
||3.58||दे॒हि मे॒ ददा॑मि ते॒ नि मे॑ धेहि॒ नि ते॑ दधौ । नि॒हारं॑ निह॑रामि ते नि॒हारं॒ निह॑रासि मे॒ स्वाहा॑
akṣa̱nnamī̍madanta̱hyava̍ pri̱yā a̍dhūṣata |
asto̍ṣata̱ svabhā̍navo̱ viprā̱ navi̍ṣṭhayā ma̱tī yojā̱ nvi̍ndra te̱ harī̍
||3.59||अक्ष॒न्नमी॑मदन्त॒ह्यव॑ प्रि॒या अ॑धूषत ।
अस्तो॑षत॒ स्वभा॑नवो॒ विप्रा॒ नवि॑ष्ठया म॒ती योजा॒ न्वि॑न्द्र ते॒ हरी॑
su̱sa̱ṃdṛśa̍ṃ tvā va̱yaṃ magha̍van vandiṣī̱mahi̍ | pra nū̱naṃ pū̱rṇava̍ndhura stu̱to yā̍si̱ vaśā̱m̐3 anu̱ yojā̱ nvi̍ndra te̱ harī̍
||3.60||सु॒सं॒दृशं॑ त्वा व॒यं मघ॑वन् वन्दिषी॒महि॑ । प्र नू॒नं पू॒र्णव॑न्धुर स्तु॒तो या॑सि॒ वशाँ॒३ अनु॒ योजा॒ न्वि॑न्द्र ते॒ हरी॑
mano̱ nvāhu̍vāmahe nārāśa̱sena̱ stome̍na | pi̱tṝ̱ṇāṃ ca̱ manma̍bhiḥ
||3.61||मनो॒ न्वाहु॑वामहे नाराश॒सेन॒ स्तोमे॑न । पि॒तॄ॒णां च॒ मन्म॑भिः
ā na̍ etu̱ mana̱ḥ puna̱ḥ kratve̱ dakṣā̍ya jī̱vase̍ | jyok ca̱ sūrya̍ṃ dṛ̱śe
||3.62||आ न॑ एतु॒ मनः॒ पुनः॒ क्रत्वे॒ दक्षा॑य जी॒वसे॑ । ज्योक् च॒ सूर्यं॑ दृ॒शे
puna̍rnaḥ pitaro̱ mano̱ dadā̍tu daivyo̱ jana̍ḥ | jī̱vaṃ vrāta̍ sacemahi
||3.63||पुन॑र्नः पितरो॒ मनो॒ ददा॑तु दैव्यो॒ जनः॑ । जी॒वं व्रात॑ सचेमहि
va̱yam̐ so̍ma vra̱te tava̱ mana̍sta̱nūṣu̱ bibhra̍taḥ | pra̱jāva̍ntaḥ sacemahi
||3.64||व॒यँ सो॑म व्र॒ते तव॒ मन॑स्त॒नूषु॒ बिभ्र॑तः । प्र॒जाव॑न्तः सचेमहि
e̱ṣa te̍ rudra bhā̱gaḥ sa̱ha svasrāmbi̍kayā̱ taṃ ju̍ṣasva̱ svāhā̍ | e̱ṣa te̍ rudra bhā̱ga ā̱khuste̍ pa̱śuḥ
||3.65||ए॒ष ते॑ रुद्र भा॒गः स॒ह स्वस्राम्बि॑कया॒ तं जु॑षस्व॒ स्वाहा॑ । ए॒ष ते॑ रुद्र भा॒ग आ॒खुस्ते॑ प॒शुः
ava̍ ru̱drama̍dīma̱hyava̍ de̱vaṃ trya̍mbakam |
yathā̍ no̱ vasya̍sa̱skara̱dyathā̍ na̱ḥ śreya̍sa̱skara̱dyadyathā̍ no vyavasā̱yayā̍t
||3.66||अव॑ रु॒द्रम॑दीम॒ह्यव॑ दे॒वं त्र्य॑म्बकम् ।
यथा॑ नो॒ वस्य॑स॒स्कर॒द्यथा॑ नः॒ श्रेय॑स॒स्कर॒द्यद्यथा॑ नो व्यवसा॒यया॑त्
bhe̱ṣa̱jama̍si bheṣa̱jaṃ gave'śvā̍ya̱ puru̍ṣāya bheṣa̱jam | su̱gaṃ me̱ṣāya̍ me̱ṣyai
||3.67||भे॒ष॒जम॑सि भेष॒जं गवेऽश्वा॑य॒ पुरु॑षाय भेष॒जम् । सु॒गं मे॒षाय॑ मे॒ष्यै
trya̍mbakaṃ yajāmahe suga̱ndhiṃ pu̍ṣṭi̱vardha̍nam | u̱rvā̱ru̱kami̍va̱ bandha̍nānmṛ̱tyormu̍kṣīya̱ māmṛtā̍t
||3.68||त्र्य॑म्बकं यजामहे सुग॒न्धिं पु॑ष्टि॒वर्ध॑नम् । उ॒र्वा॒रु॒कमि॑व॒ बन्ध॑नान्मृ॒त्योर्मु॑क्षीय॒ मामृता॑त्
trya̍mbakaṃ yajāmahe suga̱ndhiṃ pa̍ti̱veda̍nam | u̱rvā̱ru̱kami̍va̱ bandha̍nādi̱to mu̍kṣīya̱ māmuta̍ḥ
||3.69||त्र्य॑म्बकं यजामहे सुग॒न्धिं प॑ति॒वेद॑नम् । उ॒र्वा॒रु॒कमि॑व॒ बन्ध॑नादि॒तो मु॑क्षीय॒ मामुतः॑
e̱tena̍ rudrāva̱sena̍ pa̱ro mūja̍va̱to'tī̍hi |
ava̍tatadhanvā̱ pinā̍kāvasa̱ḥ kṛtti̍vāsā̱ ahi̍sannaḥ śi̱vaḥ śānto'tī̍hi
||3.70||ए॒तेन॑ रुद्राव॒सेन॑ प॒रो मूज॑व॒तोऽती॑हि ।
अव॑ततधन्वा॒ पिना॑कावसः॒ कृत्ति॑वासा॒ अहि॑सन्नः शि॒वः शान्तोऽती॑हि
vā̱jinā̱ṃ vājo̍'vatu bha̱kṣo asmān reta̍ḥ si̱ktama̱mṛta̱ṃ balā̍ya|
viśve̍ de̱vā a̱bhi yat sa̍ṃbabhū̱vustanmā̍ dhinotu pra̱jayā̱ dhane̍na
||3.71||वा॒जिनां॒ वाजो॑ऽवतु भ॒क्षो अस्मान् रेतः॑ सि॒क्तम॒मृतं॒ बला॑य।
विश्वे॑ दे॒वा अ॒भि यत् सं॑बभू॒वुस्तन्मा॑ धिनोतु प्र॒जया॒ धने॑न
vā̱jya̱haṃ vājina̱syo̍pahūta̱ upa̍hūtasya bhakṣayāmi| vāje̍ vā̱jī bhūyāsam
||3.72||वा॒ज्य॒हं वाजिन॒स्यो॑पहूत॒ उप॑हूतस्य भक्षयामि। वाजे॑ वा॒जी भूयासम्
sa̱vi̱trā prasū̍tā̱ daivya̱ āpa̍ u̍dantu te ta̱nūm| dī̱rghā̱yu̱tvāya̱ varcase
||3.73||स॒वि॒त्रा प्रसू॑ता॒ दैव्य॒ आप॑ उ॑दन्तु ते त॒नूम्। दी॒र्घा॒यु॒त्वाय॒ वर्चसे
ka̱śyapa̍sya tryāyu̱ṣaṃ ja̱mada̍gnestryāyu̱ṣam | yadde̱vānā̍ṃ tryāyu̱ṣaṃ tanme̍ astu tryāyu̱ṣam
||3.74||क॒श्यप॑स्य त्र्यायु॒षं ज॒मद॑ग्नेस्त्र्यायु॒षम् । यद्दे॒वानां॑ त्र्यायु॒षं तन्मे॑ अस्तु त्र्यायु॒षम्
yena̍ dhā̱tā bṛha̱spate̱rindra̍sya̱ cāyu̱ṣe'va̍pat|tena̍ te vapāmi̱ brahma̍ṇā jī̱vāta̍ve̱ jīva̍nāya
||3.75||येन॑ धा॒ता बृह॒स्पते॒रिन्द्र॑स्य॒ चायु॒षेऽव॑पत्।तेन॑ ते वपामि॒ ब्रह्म॑णा जी॒वात॑वे॒ जीव॑नाय
dī̱rghā̱yu̱tvāya̱ balā̍ya̱ varca̍se| su̱pra̱jā̱stvāya̍ cāsā̱ atho̍ jīva śa̱rada̍ḥ śatam
||3.76||दी॒र्घा॒यु॒त्वाय॒ बला॑य॒ वर्च॑से। सु॒प्र॒जा॒स्त्वाय॑ चासा॒ अथो॑ जीव श॒रदः॑ शतम्