athāṣṭādaśo'dhyāyaḥ |
aśma̱nnūrja̱ṃ parva̍te śiśriyā̱ṇāma̱dbhya oṣa̍dhībhyo̱ vana̱spati̍bhyo̱ adhi̱ saṃbhṛ̍ta̱ṃ paya̍ḥ |
tāṃ na̱ iṣa̱mūrja̍ṃ dhatta marutaḥ sararā̱ṇā aśma̍ste̱ kṣunmayi̍ ta̱ ūryaṃ va dvi̱ṣmastaṃ te̱ śugṛ̍cchatu
||18.1||अश्म॒न्नूर्जं॒ पर्व॑ते शिश्रिया॒णाम॒द्भ्य ओष॑धीभ्यो॒ वन॒स्पति॑भ्यो॒ अधि॒ संभृ॑तं॒ पयः॑ ।
तां न॒ इष॒मूर्जं॑ धत्त मरुतः सररा॒णा अश्म॑स्ते॒ क्षुन्मयि॑ त॒ ऊर्यं व द्वि॒ष्मस्तं ते॒ शुगृ॑च्छतु
i̱mā me̍ agna̱ iṣṭa̍kā dhe̱nava̍ḥ sa̱ntvekā̍ ca̱ daśa̍ ca̱ daśa̍ ca śa̱taṃ ca̍ śa̱taṃ ca̍ |
sa̱hasra̍ṃ ca sa̱hasra̍ṃ cā̱yuta̍ṃ cā̱yuta̍ṃ ca ni̱yuta̍ṃ ca ni̱yuta̍ṃ ca
||18.2||इ॒मा मे॑ अग्न॒ इष्ट॑का धे॒नवः॑ स॒न्त्वेका॑ च॒ दश॑ च॒ दश॑ च श॒तं च॑ श॒तं च॑ ।
स॒हस्रं॑ च स॒हस्रं॑ चा॒युतं॑ चा॒युतं॑ च नि॒युतं॑ च नि॒युतं॑ च
arbu̍daṃ ca̱ nya̍rbudaṃ samu̱draśca̱ madhya̱ṃ cānta̍śca parā̱rdhaśca̍ |
e̱tā me̍ agna̱ iṣṭa̍kā dhe̱nava̍ḥ santva̱mutrā̱muṣmi̍m̐llo̱ke
||18.3||अर्बु॑दं च॒ न्य॑र्बुदं समु॒द्रश्च॒ मध्यं॒ चान्त॑श्च परा॒र्धश्च॑ ।
ए॒ता मे॑ अग्न॒ इष्ट॑का धे॒नवः॑ सन्त्व॒मुत्रा॒मुष्मिँ॑ल्लो॒के
ṛ̱tava̍ stha ṛtā̱vṛdha̍ ṛtu̱ṣṭhā stha̍ ṛtā̱vṛdha̍ḥ |
ghṛ̱ta̱ścyuto̍ madhu̱ścyuto̍ vi̱rājo̱ nāma̍ kāma̱dughā̱ akṣī̍yamāṇāḥ
||18.4||ऋ॒तव॑ स्थ ऋता॒वृध॑ ऋतु॒ष्ठा स्थ॑ ऋता॒वृधः॑ ।
घृ॒त॒श्च्युतो॑ मधु॒श्च्युतो॑ वि॒राजो॒ नाम॑ काम॒दुघा॒ अक्षी॑यमाणाः
sa̱mu̱drasya̱ tvāva̍ka̱yāgne̱ pari̍vyayāmasi | pā̱va̱ko a̱smabhya̍ śi̱vo bha̍va
||18.5||स॒मु॒द्रस्य॒ त्वाव॑क॒याग्ने॒ परि॑व्ययामसि । पा॒व॒को अ॒स्मभ्य॑ शि॒वो भ॑व
hi̱masya̍ tvā ja̱rāyu̱ṇāgne̱ pari̍vyayāmasi | pā̱va̱ko a̱smabhya̍ śi̱vo bha̍va
||18.6||हि॒मस्य॑ त्वा ज॒रायु॒णाग्ने॒ परि॑व्ययामसि । पा॒व॒को अ॒स्मभ्य॑ शि॒वो भ॑व
upa̱ jmannupa̍ veta̱se'va̍tara na̱dīṣvā |
agne̍ pi̱ttama̱pāma̍si̱ maṇḍū̍ki̱ tābhi̱rāga̍hi̱ semaṃ no̍ ya̱jñaṃ pā̍va̱kava̍rṇa śivaṃ kṛ̍dhi
||18.7||उप॒ ज्मन्नुप॑ वेत॒सेऽव॑तर न॒दीष्वा ।
अग्ने॑ पि॒त्तम॒पाम॑सि॒ मण्डू॑कि॒ ताभि॒राग॑हि॒ सेमं नो॑ य॒ज्ञं पा॑व॒कव॑र्ण शिवं कृ॑धि
a̱pāmi̱daṃ nyaya̍na samu̱drasya̍ ni̱veśa̍nam |
a̱nyāste̍ a̱smatta̍pantu he̱taya̍ḥ pāva̱ko a̱smabhya̍ śi̱vo bha̍va
||18.8||अ॒पामि॒दं न्यय॑न समु॒द्रस्य॑ नि॒वेश॑नम् ।
अ॒न्यास्ते॑ अ॒स्मत्त॑पन्तु हे॒तयः॑ पाव॒को अ॒स्मभ्य॑ शि॒वो भ॑व
agne̍ pāvaka ro̱ciṣā̍ ma̱ndrayā̍ deva ji̱hvayā̍ | ā de̱vānva̍kṣi̱ yakṣi̍ ca
||18.9||अग्ने॑ पावक रो॒चिषा॑ म॒न्द्रया॑ देव जि॒ह्वया॑ । आ दे॒वान्व॑क्षि॒ यक्षि॑ च
sa na̍ḥ pāvaka dīdi̱vo'gne̍ de̱vām̐3 i̱hā va̍ha | upa̍ ya̱jña ha̱viśca̍ naḥ
||18.10||स नः॑ पावक दीदि॒वोऽग्ने॑ दे॒वाँ३ इ॒हा व॑ह । उप॑ य॒ज्ञ ह॒विश्च॑ नः
pā̱va̱kayā̱ yaści̱taya̍ntyā kṛ̱pā kṣāma̍n ruru̱ca u̱ṣaso̱ na bhā̱nunā̍ |
tūrva̱nna yāma̱nneta̍śasya̱ nū raṇa̱ ā yo ghṛ̱ṇe na ta̍tṛṣā̱ṇo a̱jara̍ḥ
||18.11||पा॒व॒कया॒ यश्चि॒तय॑न्त्या कृ॒पा क्षाम॑न् रुरु॒च उ॒षसो॒ न भा॒नुना॑ ।
तूर्व॒न्न याम॒न्नेत॑शस्य॒ नू रण॒ आ यो घृ॒णे न त॑तृषा॒णो अ॒जरः॑
nama̍ste̱ hara̍se śo̱ciṣe̱ nama̍ste astva̱rciṣe̍ |
a̱nyāste̍ a̱smatta̍pantu he̱taya̍ḥ pāva̱ko a̱smabhya̍ śi̱vo bha̍va |
nṛ̱ṣade̱ vel̤a̍psu̱ṣade̱ veḍ ba̍rhi̱ṣade̱ veḍ | va̍na̱sade̱ veṭ sva̱rvide̱ veṭ
||18.12||नम॑स्ते॒ हर॑से शो॒चिषे॒ नम॑स्ते अस्त्व॒र्चिषे॑ ।
अ॒न्यास्ते॑ अ॒स्मत्त॑पन्तु हे॒तयः॑ पाव॒को अ॒स्मभ्य॑ शि॒वो भ॑व ।
नृ॒षदे॒ वेळ॑प्सु॒षदे॒ वेड् ब॑र्हि॒षदे॒ वेड् । व॑न॒सदे॒ वेट् स्व॒र्विदे॒ वेट्
ye de̱vā de̱vānā̍ṃ ya̱jñiyā̍ ya̱jñiyā̍nā saṃvatsa̱rīṇa̱mupa̍ bhā̱gamāsa̍te |
a̱hu̱tādo̍ ha̱viṣo̍ ya̱jñe a̱smintsva̱yaṃ pi̍bantu̱ madhu̍no ghṛ̱tasya̍
||18.13||ये दे॒वा दे॒वानां॑ य॒ज्ञिया॑ य॒ज्ञिया॑ना संवत्स॒रीण॒मुप॑ भा॒गमास॑ते ।
अ॒हु॒तादो॑ ह॒विषो॑ य॒ज्ञे अ॒स्मिन्त्स्व॒यं पि॑बन्तु॒ मधु॑नो घृ॒तस्य॑
ye de̱vā de̱veṣvadhi̍ deva̱tvamāya̱nye brahma̍ṇaḥ purae̱tāro̍ a̱sya |
yebhyo̍ na ṛ̱te pava̍te̱ dhāma̱ kiñca̱na na te di̱vo na pṛ̍thi̱vyā adhi̱ snuṣu̍|| 14|| 14
prā̱ṇa̱dā a̍pāna̱dā vyā̍na̱dā va̍rco̱dā va̍rivo̱dāḥ |
a̱nyāste̍ a̱smatta̍pantu he̱taya̍ḥ pāva̱ko a̱smabhya̍ śi̱vo bha̍va
||18.14||ये दे॒वा दे॒वेष्वधि॑ देव॒त्वमाय॒न्ये ब्रह्म॑णः पुरए॒तारो॑ अ॒स्य ।
येभ्यो॑ न ऋ॒ते पव॑ते॒ धाम॒ किञ्च॒न न ते दि॒वो न पृ॑थि॒व्या अधि॒ स्नुषु॑॥ १४॥ १४
प्रा॒ण॒दा अ॑पान॒दा व्या॑न॒दा व॑र्चो॒दा व॑रिवो॒दाः ।
अ॒न्यास्ते॑ अ॒स्मत्त॑पन्तु हे॒तयः॑ पाव॒को अ॒स्मभ्य॑ शि॒वो भ॑व
a̱gnisti̱gmena̍ śo̱ciṣā̱ yāsa̱dviśva̱ṃ nya̱triṇa̍m | a̱gnirno̍ vanate ra̱yim
||18.15||अ॒ग्निस्ति॒ग्मेन॑ शो॒चिषा॒ यास॒द्विश्वं॒ न्य॒त्रिण॑म् । अ॒ग्निर्नो॑ वनते र॒यिम्
ya i̱mā viśvā̱ bhuva̍nāni̱ juhva̱dṛṣi̱rhotā̱ nyasī̍datpi̱tā na̍ḥ |
sa ā̱śiṣā̱ dravi̍ṇami̱cchamā̍naḥ prathama̱cchadava̍rā̱m̐3 āvi̍veśa (2) 17
kisvi̍dāsīdadhi̱ṣṭhāna̍mā̱rambha̍ṇaṃ kata̱matsvi̍tka̱thāsī̍t |
yato̱ bhūmi̍ṃ ja̱naya̍nvi̱śvaka̍rmā̱ vi dyāmaurṇo̍nmahi̱nā vi̱śvaca̍kṣāḥ
||18.16||य इ॒मा विश्वा॒ भुव॑नानि॒ जुह्व॒दृषि॒र्होता॒ न्यसी॑दत्पि॒ता नः॑ ।
स आ॒शिषा॒ द्रवि॑णमि॒च्छमा॑नः प्रथम॒च्छदव॑राँ॒३ आवि॑वेश (२) १७
किस्वि॑दासीदधि॒ष्ठान॑मा॒रम्भ॑णं कत॒मत्स्वि॑त्क॒थासी॑त् ।
यतो॒ भूमिं॑ ज॒नय॑न्वि॒श्वक॑र्मा॒ वि द्यामौर्णो॑न्महि॒ना वि॒श्वच॑क्षाः
vi̱śvata̍ścakṣuru̱ta vi̱śvato̍mukho vi̱śvato̍bāhuru̱ta vi̱śvata̍spāt |
saṃ bā̱hubhyā̱ṃ dhama̍ti̱ saṃ pata̍trai̱rdyāvā̱bhūmī̍ ja̱naya̍nde̱va eka̍ḥ
||18.17||वि॒श्वत॑श्चक्षुरु॒त वि॒श्वतो॑मुखो वि॒श्वतो॑बाहुरु॒त वि॒श्वत॑स्पात् ।
सं बा॒हुभ्यां॒ धम॑ति॒ सं पत॑त्रै॒र्द्यावा॒भूमी॑ ज॒नय॑न्दे॒व एकः॑
ki svi̱dvana̱ṃ ka u̱ sa vṛ̱kṣa ā̍sa̱ yato̱ dyāvā̍pṛthi̱vī ni̍ṣṭata̱kṣuḥ |
manī̍ṣiṇo̱ mana̍sā pṛ̱cchatedu̱ tadyada̱dhyati̍ṣṭha̱dbhuva̍nāni dhā̱raya̍n
||18.18||कि स्वि॒द्वनं॒ क उ॒ स वृ॒क्ष आ॑स॒ यतो॒ द्यावा॑पृथि॒वी नि॑ष्टत॒क्षुः ।
मनी॑षिणो॒ मन॑सा पृ॒च्छतेदु॒ तद्यद॒ध्यति॑ष्ठ॒द्भुव॑नानि धा॒रय॑न्
yā te̱ dhāmā̍ni para̱māṇi̱ yāva̱mā yā ma̍dhya̱mā vi̍śvakarmannu̱temā |
śikṣā̱ sakhi̍bhyo ha̱viṣi̍ svadhāvaḥ sva̱yaṃ ya̍jasva ta̱nva̍ḥ vṛdhā̱naḥ
||18.19||या ते॒ धामा॑नि पर॒माणि॒ याव॒मा या म॑ध्य॒मा वि॑श्वकर्मन्नु॒तेमा ।
शिक्षा॒ सखि॑भ्यो ह॒विषि॑ स्वधावः स्व॒यं य॑जस्व त॒न्वः॑ वृधा॒नः
vā̱caspati̍ṃ vi̱śvaka̍rmāṇamū̱taye̍ mano̱juva̱ṃ vāje̍ a̱dyā hu̍vema |
sa no̱ viśvā̍ni̱ hava̍nāni joṣadvi̱śvaśa̍mbhū̱rava̍se sā̱dhuka̍rmā
||18.20||वा॒चस्पतिं॑ वि॒श्वक॑र्माणमू॒तये॑ मनो॒जुवं॒ वाजे॑ अ॒द्या हु॑वेम ।
स नो॒ विश्वा॑नि॒ हव॑नानि जोषद्वि॒श्वश॑म्भू॒रव॑से सा॒धुक॑र्मा
viśva̍karman ha̱viṣā̍ vāvṛdhā̱naḥ sva̱yaṃ ya̍jasva pṛthi̱vīmu̱ta dyām |
muhya̍ntva̱nye a̱bhita̍ḥ sa̱patnā̍ i̱hāsmāka̍ṃ ma̱ghavā̍ sū̱rira̍stu
||18.21||विश्व॑कर्मन् ह॒विषा॑ वावृधा॒नः स्व॒यं य॑जस्व पृथि॒वीमु॒त द्याम् ।
मुह्य॑न्त्व॒न्ये अ॒भितः॑ स॒पत्ना॑ इ॒हास्माकं॑ म॒घवा॑ सू॒रिर॑स्तु
viśva̍karman ha̱viṣā̱ vardha̍nena trā̱tāra̱mindra̍makṛṇorava̱dhyam |
tasmai̱ viśa̱ḥ sama̍namanta pū̱rvīra̱yamu̱gro vi̱havyo̱ yathāsa̍t
||18.22||विश्व॑कर्मन् ह॒विषा॒ वर्ध॑नेन त्रा॒तार॒मिन्द्र॑मकृणोरव॒ध्यम् ।
तस्मै॒ विशः॒ सम॑नमन्त पू॒र्वीर॒यमु॒ग्रो वि॒हव्यो॒ यथास॑त्
cakṣu̍ṣaḥ pi̱tā mana̍sā̱ hi dhīro̍ ghṛ̱tame̍ne ajana̱nnamna̍māne |
ya̱dedantā̱ ada̍dṛhanta̱ pūrva̱ ādiddyāvā̍pṛthi̱vī a̍prathetām
||18.23||चक्षु॑षः पि॒ता मन॑सा॒ हि धीरो॑ घृ॒तमे॑ने अजन॒न्नम्न॑माने ।
य॒देदन्ता॒ अद॑दृहन्त॒ पूर्व॒ आदिद्द्यावा॑पृथि॒वी अ॑प्रथेताम्
vi̱śvaka̍rmā̱ vima̍nā̱ ādvihā̍yā dhā̱tā vi̍dhā̱tā pa̍ra̱mota sa̱ṃdṛk |
teṣā̍mi̱ṣṭāni̱ sami̱ṣā ma̍danti̱ yatrā̍ sapta ṛ̱ṣīnpa̱ra eka̍mā̱huḥ
||18.24||वि॒श्वक॑र्मा॒ विम॑ना॒ आद्विहा॑या धा॒ता वि॑धा॒ता प॑र॒मोत सं॒दृक् ।
तेषा॑मि॒ष्टानि॒ समि॒षा म॑दन्ति॒ यत्रा॑ सप्त ऋ॒षीन्प॒र एक॑मा॒हुः
yo na̍ḥ pi̱tā ja̍ni̱tā yo vi̍dhā̱tā dhāmā̍ni̱ veda̱ bhuva̍nāni̱ viśvā̍ |
yo de̱vānā̍ṃ nāma̱dhā eka̍ e̱va ta sa̍ṃpra̱śnaṃ bhuva̍nā yantya̱nyā
||18.25||यो नः॑ पि॒ता ज॑नि॒ता यो वि॑धा॒ता धामा॑नि॒ वेद॒ भुव॑नानि॒ विश्वा॑ ।
यो दे॒वानां॑ नाम॒धा एक॑ ए॒व त सं॑प्र॒श्नं भुव॑ना यन्त्य॒न्या
ta āya̍janta̱ dravi̍ṇa̱ sama̍smā̱ ṛṣa̍ya̱ḥ pūrve̍ jari̱tāro̱ na bhū̱nā |
a̱sūrte̱ sūrte̱ raja̍si niṣa̱tte ye bhū̱tāni̍ sa̱makṛ̍ṇvanni̱māni̍
||18.26||त आय॑जन्त॒ द्रवि॑ण॒ सम॑स्मा॒ ऋष॑यः॒ पूर्वे॑ जरि॒तारो॒ न भू॒ना ।
अ॒सूर्ते॒ सूर्ते॒ रज॑सि निष॒त्ते ये भू॒तानि॑ स॒मकृ॑ण्वन्नि॒मानि॑
pa̱ro di̱vā pa̱ra e̱nā pṛ̍thi̱vyā pa̱ro de̱vebhi̱rasu̍rai̱ryadasti̍ |
kasvi̱d garbha̍ṃ pratha̱maṃ da̍dhra̱ āpo̱ yatra̍ de̱vāḥ sa̱mapa̍śyanta̱ pūrve̍
||18.27||प॒रो दि॒वा प॒र ए॒ना पृ॑थि॒व्या प॒रो दे॒वेभि॒रसु॑रै॒र्यदस्ति॑ ।
कस्वि॒द् गर्भं॑ प्रथ॒मं द॑ध्र॒ आपो॒ यत्र॑ दे॒वाः स॒मप॑श्यन्त॒ पूर्वे॑
tamidgarbha̍ṃ pratha̱maṃ da̍dhra̱ āpo̱ yatra̍ de̱vāḥ sa̱maga̍cchanta̱ viśve̍ |
a̱jasya̱ nābhā̱ adhyeka̱marpi̍ta̱ṃ yasmi̱n viśvā̍ni̱ bhuva̍nāni ta̱sthuḥ
||18.28||तमिद्गर्भं॑ प्रथ॒मं द॑ध्र॒ आपो॒ यत्र॑ दे॒वाः स॒मग॑च्छन्त॒ विश्वे॑ ।
अ॒जस्य॒ नाभा॒ अध्येक॒मर्पि॑तं॒ यस्मि॒न् विश्वा॑नि॒ भुव॑नानि त॒स्थुः
na taṃ vi̍dātha̱ ya i̱mā ja̱jānā̱nyadyu̱ṣmāka̱manta̍raṃ babhūva |
nī̱hā̱reṇa̱ prāvṛ̍tā̱ jalpyā̍ cāsu̱tṛpa̍ uktha̱śāsa̍ścaranti
||18.29||न तं वि॑दाथ॒ य इ॒मा ज॒जाना॒न्यद्यु॒ष्माक॒मन्त॑रं बभूव ।
नी॒हा॒रेण॒ प्रावृ॑ता॒ जल्प्या॑ चासु॒तृप॑ उक्थ॒शास॑श्चरन्ति
vi̱śvaka̍rmā̱ hyaja̍niṣṭa de̱va ādidga̍ndha̱rvo a̍bhavad dvi̱tīya̍ḥ |
tṛ̱tīya̍ḥ pi̱tā ja̍ni̱tauṣa̍dhīnāma̱pāṃ garbha̱ṃ vya̍dadhātpuru̱trā
||18.30||वि॒श्वक॑र्मा॒ ह्यज॑निष्ट दे॒व आदिद्ग॑न्ध॒र्वो अ॑भवद् द्वि॒तीयः॑ ।
तृ॒तीयः॑ पि॒ता ज॑नि॒तौष॑धीनाम॒पां गर्भं॒ व्य॑दधात्पुरु॒त्रा
ā̱śuḥ śiśā̍no vṛṣa̱bho na bhī̱mo gha̍nāgha̱naḥ kṣobha̍ṇaścarṣaṇī̱nām |
sa̱ṃkranda̍no'nimi̱ṣa e̍kavī̱raḥ śa̱ta senā̍ ajayatsā̱kamindra̍ḥ
||18.31||आ॒शुः शिशा॑नो वृष॒भो न भी॒मो घ॑नाघ॒नः क्षोभ॑णश्चर्षणी॒नाम् ।
सं॒क्रन्द॑नोऽनिमि॒ष ए॑कवी॒रः श॒त सेना॑ अजयत्सा॒कमिन्द्रः॑
sa̱ṃkranda̍nenānimi̱ṣeṇa̍ ji̱ṣṇunā̍ yutkā̱reṇa̍ duścyava̱nena̍ dhṛ̱ṣṇunā̍ |
tadindre̍ṇa jayata̱ tatsa̍hadhva̱ṃ yudho̍ nara̱ iṣu̍hastena̱ vṛṣṇā̍
||18.32||सं॒क्रन्द॑नेनानिमि॒षेण॑ जि॒ष्णुना॑ युत्का॒रेण॑ दुश्च्यव॒नेन॑ धृ॒ष्णुना॑ ।
तदिन्द्रे॑ण जयत॒ तत्स॑हध्वं॒ युधो॑ नर॒ इषु॑हस्तेन॒ वृष्णा॑
sa iṣu̍hastai̱ḥ sa ni̍ṣa̱ṅgibhi̍rva̱śī sasra̍ṣṭā̱ sa yudha̱ indro̍ ga̱ṇena̍ |
sa̱sṛ̱ṣṭa̱jitso̍ma̱pā bā̍huśa̱rdhyu̱gradha̍nvā̱ prati̍hitābhi̱rastā̍
||18.33||स इषु॑हस्तैः॒ स नि॑ष॒ङ्गिभि॑र्व॒शी सस्र॑ष्टा॒ स युध॒ इन्द्रो॑ ग॒णेन॑ ।
स॒सृ॒ष्ट॒जित्सो॑म॒पा बा॑हुश॒र्ध्यु॒ग्रध॑न्वा॒ प्रति॑हिताभि॒रस्ता॑
bṛha̍spate̱ pari̍dīyā̱ rathe̍na rakṣo̱hāmitrā̍m̐3 apa̱bādha̍mānaḥ |
pra̱bha̱ñjantsenā̍ḥ pramṛ̱ṇo yu̱dhā jaya̍nna̱smāka̍medhyavi̱tā rathā̍nām
||18.34||बृह॑स्पते॒ परि॑दीया॒ रथे॑न रक्षो॒हामित्राँ॑३ अप॒बाध॑मानः ।
प्र॒भ॒ञ्जन्त्सेनाः॑ प्रमृ॒णो यु॒धा जय॑न्न॒स्माक॑मेध्यवि॒ता रथा॑नाम्
ba̱la̱vi̱jñā̱ya sthavi̍ra̱ḥ pravī̍ra̱ḥ saha̍svān vā̱jī saha̍māna u̱graḥ |
a̱bhivī̍ro a̱bhisa̍tvā saho̱jā jai̍tramindra̱ ratha̱māti̍ṣṭha go̱vit
||18.35||ब॒ल॒वि॒ज्ञा॒य स्थवि॑रः॒ प्रवी॑रः॒ सह॑स्वान् वा॒जी सह॑मान उ॒ग्रः ।
अ॒भिवी॑रो अ॒भिस॑त्वा सहो॒जा जै॑त्रमिन्द्र॒ रथ॒माति॑ष्ठ गो॒वित्
go̱tra̱bhida̍ṃ go̱vida̱ṃ vajra̍bāhu̱ṃ jaya̍nta̱majma̍ pramṛ̱ṇanta̱moja̍sā |
i̱ma sa̍jātā̱ anu̍ vīrayadhva̱mindra̍ sakhāyo̱ anu̱ sam̐ra̍bhadhvam
||18.36||गो॒त्र॒भिदं॑ गो॒विदं॒ वज्र॑बाहुं॒ जय॑न्त॒मज्म॑ प्रमृ॒णन्त॒मोज॑सा ।
इ॒म स॑जाता॒ अनु॑ वीरयध्व॒मिन्द्र॑ सखायो॒ अनु॒ सँर॑भध्वम्
a̱bhi go̱trāṇi̱ saha̍sā̱ gāha̍māno'da̱yo vī̱raḥ śa̱tama̍nyu̱rindra̍ḥ |
du̱ścya̱va̱naḥ pṛ̍tanā̱ṣāl̤a̍yu̱dhyo̱'smāka̱ senā̍ avatu̱ pra yu̱tsu
||18.37||अ॒भि गो॒त्राणि॒ सह॑सा॒ गाह॑मानोऽद॒यो वी॒रः श॒तम॑न्यु॒रिन्द्रः॑ ।
दु॒श्च्य॒व॒नः पृ॑तना॒षाळ॑यु॒ध्यो॒ऽस्माक॒ सेना॑ अवतु॒ प्र यु॒त्सु
indra̍ āsāṃ ne̱tā bṛha̱spati̱rdakṣi̍ṇā ya̱jñaḥ pu̱ra e̍tu̱ soma̍ḥ |
de̱va̱se̱nānā̍mabhibhañjatī̱nāṃ jaya̍ntīnāṃ ma̱ruto̍ ya̱ntvagra̍m
||18.38||इन्द्र॑ आसां ने॒ता बृह॒स्पति॒र्दक्षि॑णा य॒ज्ञः पु॒र ए॑तु॒ सोमः॑ ।
दे॒व॒से॒नाना॑मभिभञ्जती॒नां जय॑न्तीनां म॒रुतो॑ य॒न्त्वग्र॑म्
indra̍sya̱ vṛṣṇo̱ varu̍ṇasya̱ rājña̍ ādi̱tyānā̍ṃ ma̱rutā̱ śardha̍ u̱gram |
ma̱hāma̍nasāṃ bhuvanacya̱vānā̱ṃ ghoṣo̍ de̱vānā̱ṃ jaya̍tā̱muda̍sthāt
||18.39||इन्द्र॑स्य॒ वृष्णो॒ वरु॑णस्य॒ राज्ञ॑ आदि॒त्यानां॑ म॒रुता॒ शर्ध॑ उ॒ग्रम् ।
म॒हाम॑नसां भुवनच्य॒वानां॒ घोषो॑ दे॒वानां॒ जय॑ता॒मुद॑स्थात्
uddha̍rṣaya maghava̱nnāyu̍dhā̱nyutsatva̍nāṃ māma̱kānā̱ṃ manā̍si |
udvṛ̍trahan vā̱jinā̱ṃ vāji̍nā̱nyudrathā̍nā̱ṃ jaya̍tāṃ yantu̱ ghoṣā̍ḥ
||18.40||उद्ध॑र्षय मघव॒न्नायु॑धा॒न्युत्सत्व॑नां माम॒कानां॒ मना॑सि ।
उद्वृ॑त्रहन् वा॒जिनां॒ वाजि॑ना॒न्युद्रथा॑नां॒ जय॑तां यन्तु॒ घोषाः॑
a̱smāka̱mindra̱ḥ samṛ̍teṣu dhva̱jeṣva̱smāka̱ṃ yā iṣa̍va̱stā ja̍yantu |
a̱smāka̍ṃ vī̱rā utta̍re bhavantva̱smām̐3 u̍ devā avatā̱ have̍ṣu
||18.41||अ॒स्माक॒मिन्द्रः॒ समृ॑तेषु ध्व॒जेष्व॒स्माकं॒ या इष॑व॒स्ता ज॑यन्तु ।
अ॒स्माकं॑ वी॒रा उत्त॑रे भवन्त्व॒स्माँ३ उ॑ देवा अवता॒ हवे॑षु
a̱mīṣā̍ṃ ci̱ttaṃ pra̍tilo̱bhaya̍ntī gṛhā̱ṇāṅgā̍nyapve̱ pare̍hi |
a̱bhi prehi̱ nirda̍ha hṛ̱tsu śokai̍ra̱ndhenā̱mitrā̱stama̍sā sacantām
||18.42||अ॒मीषां॑ चि॒त्तं प्र॑तिलो॒भय॑न्ती गृहा॒णाङ्गा॑न्यप्वे॒ परे॑हि ।
अ॒भि प्रेहि॒ निर्द॑ह हृ॒त्सु शोकै॑र॒न्धेना॒मित्रा॒स्तम॑सा सचन्ताम्
ava̍sṛṣṭā̱ parā̍ pata̱ śara̍vye̱ brahma̍saśite | gacchā̱mitrā̱nprapa̍dyasva̱ māmīṣā̱ṃ kañca̱nocchi̍ṣaḥ
||18.43||अव॑सृष्टा॒ परा॑ पत॒ शर॑व्ये॒ ब्रह्म॑सशिते । गच्छा॒मित्रा॒न्प्रप॑द्यस्व॒ मामीषां॒ कञ्च॒नोच्छि॑षः
pretā̱ jaya̍tā nara̱ indro̍ va̱ḥ śarma̍ yacchatu | u̱grā va̍ḥ santu bā̱havo̍'nādhṛ̱ṣyā yathāsa̍tha
||18.44||प्रेता॒ जय॑ता नर॒ इन्द्रो॑ वः॒ शर्म॑ यच्छतु । उ॒ग्रा वः॑ सन्तु बा॒हवो॑ऽनाधृ॒ष्या यथास॑थ
asau̱ yā senā̍ maruta̱ḥ pare̍ṣāmabhyaiti̍ na̱ oja̍sā̱ spardha̍mānā |
tāṃ gū̍hata̱ tama̱sāpa̍vratena̱ yathā̱mī a̱nyo a̱nyaṃ na jā̱nan
||18.45||असौ॒ या सेना॑ मरुतः॒ परे॑षामभ्यैति॑ न॒ ओज॑सा॒ स्पर्ध॑माना ।
तां गू॑हत॒ तम॒साप॑व्रतेन॒ यथा॒मी अ॒न्यो अ॒न्यं न जा॒नन्
yatra̍ bā̱ṇāḥ sa̱mpata̍nti kumā̱rā vi̍śi̱khā i̍va |
tatra̱ indro̱ bṛha̱spati̱radi̍ti̱ḥ śarma̍ yacchatu vi̱śvāhā̱ śarma̍ yacchatu
||18.46||यत्र॑ बा॒णाः स॒म्पत॑न्ति कुमा॒रा वि॑शि॒खा इ॑व ।
तत्र॒ इन्द्रो॒ बृह॒स्पति॒रदि॑तिः॒ शर्म॑ यच्छतु वि॒श्वाहा॒ शर्म॑ यच्छतु
marmā̍ṇi te̱ varma̍ṇā chādayāmi̱ soma̍stvā̱ rājā̱mṛte̱nānu̍vastām |
u̱rorvarī̍yo̱ varu̍ṇaste kṛṇotu̱ jaya̍nta̱ṃ tvānu̍ de̱vā ma̍dantu
||18.47||मर्मा॑णि ते॒ वर्म॑णा छादयामि॒ सोम॑स्त्वा॒ राजा॒मृते॒नानु॑वस्ताम् ।
उ॒रोर्वरी॑यो॒ वरु॑णस्ते कृणोतु॒ जय॑न्तं॒ त्वानु॑ दे॒वा म॑दन्तु
ude̍namutta̱rāṃ na̱yāgne̍ ghṛtenāhuta | rā̱yaspoṣe̍ṇa̱ sasṛ̍ja pra̱jayā̍ ca ba̱huṃ kṛ̍dhi
||18.48||उदे॑नमुत्त॒रां न॒याग्ने॑ घृतेनाहुत । रा॒यस्पोषे॑ण॒ ससृ॑ज प्र॒जया॑ च ब॒हुं कृ॑धि
indre̱maṃ pra̍ta̱rāṃ na̍ya sajā̱tānā̍masadva̱śī | same̍na̱ṃ varca̍sā sṛja de̱vānā̍ṃ bhāga̱dā a̍sat
||18.49||इन्द्रे॒मं प्र॑त॒रां न॑य सजा॒ताना॑मसद्व॒शी । समे॑नं॒ वर्च॑सा सृज दे॒वानां॑ भाग॒दा अ॑सत्
yasya̍ ku̱rmo gṛ̱he ha̱vistama̍gne vardhayā̱ tvam | tasmai̍ de̱vā adhi̍bravanna̱yaṃ ca̱ brahma̍ṇa̱spati̍ḥ
||18.50||यस्य॑ कु॒र्मो गृ॒हे ह॒विस्तम॑ग्ने वर्धया॒ त्वम् । तस्मै॑ दे॒वा अधि॑ब्रवन्न॒यं च॒ ब्रह्म॑ण॒स्पतिः॑
udu̍ tvā̱ viśve̍ de̱vā agne̱ bhara̍ntu̱ citti̍bhiḥ | sa no̍ bhava śi̱vastva su̱pratī̍ko vi̱bhāva̍suḥ
||18.51||उदु॑ त्वा॒ विश्वे॑ दे॒वा अग्ने॒ भर॑न्तु॒ चित्ति॑भिः । स नो॑ भव शि॒वस्त्व सु॒प्रती॑को वि॒भाव॑सुः
pañca̱ diśo̱ daivī̍rya̱jñama̍vantu de̱vīrapāma̍ti̱ṃ durma̱tiṃ bādha̍mānāḥ |
rā̱yaspoṣe̍ ya̱jñapa̍timā̱bhaja̍ntī rā̱yaspoṣe̱ adhi̍ ya̱jño a̍sthāt
||18.52||पञ्च॒ दिशो॒ दैवी॑र्य॒ज्ञम॑वन्तु दे॒वीरपाम॑तिं॒ दुर्म॒तिं बाध॑मानाः ।
रा॒यस्पोषे॑ य॒ज्ञप॑तिमा॒भज॑न्ती रा॒यस्पोषे॒ अधि॑ य॒ज्ञो अ॑स्थात्
sami̍ddhe a̱gnā adhi̍ māmahā̱na u̱kthapa̍tra̱ īḍyo̍ gṛbhī̱taḥ |
ta̱ptaṃ gha̱rmaṃ pa̍ri̱gṛhyā̍yajanto̱rjā yadya̱jñamaya̍janta de̱vāḥ
||18.53||समि॑द्धे अ॒ग्ना अधि॑ मामहा॒न उ॒क्थप॑त्र॒ ईड्यो॑ गृभी॒तः ।
त॒प्तं घ॒र्मं प॑रि॒गृह्या॑यजन्तो॒र्जा यद्य॒ज्ञमय॑जन्त दे॒वाः
daivyā̍ya dha̱rtre joṣṭre̍ deva̱śrīḥ śrīma̍nāḥ śa̱tapa̍yāḥ |
pa̱ri̱gṛhya̍ de̱vā ya̱jñamā̍yan de̱vā de̱vebhyo̍ adhva̱ryanto̍ asthuḥ
||18.54||दैव्या॑य ध॒र्त्रे जोष्ट्रे॑ देव॒श्रीः श्रीम॑नाः श॒तप॑याः ।
प॒रि॒गृह्य॑ दे॒वा य॒ज्ञमा॑यन् दे॒वा दे॒वेभ्यो॑ अध्व॒र्यन्तो॑ अस्थुः
vī̱ta ha̱viḥ śa̍mi̱ta śa̍mi̱tā ya̱jadhyai̍ tu̱rīyo̍ ya̱jño yatra̍ ha̱vyameti̍ |
tato̍ vā̱kā ā̱śiṣo̍ no juṣantām
||18.55||वी॒त ह॒विः श॑मि॒त श॑मि॒ता य॒जध्यै॑ तु॒रीयो॑ य॒ज्ञो यत्र॑ ह॒व्यमेति॑ ।
ततो॑ वा॒का आ॒शिषो॑ नो जुषन्ताम्
sūrya̍raśmi̱rhari̍keśaḥ pu̱rastā̍tsavi̱tā jyoti̱ruda̍yā̱m̐3 aja̍sram |
tasya̍ pū̱ṣā pra̍sa̱ve yā̍ti vi̱dvāntsa̱ṃpaśya̱nviśvā̱ bhuva̍nāni go̱pāḥ
||18.56||सूर्य॑रश्मि॒र्हरि॑केशः पु॒रस्ता॑त्सवि॒ता ज्योति॒रुद॑याँ॒३ अज॑स्रम् ।
तस्य॑ पू॒षा प्र॑स॒वे या॑ति वि॒द्वान्त्सं॒पश्य॒न्विश्वा॒ भुव॑नानि गो॒पाः
vi̱māna̍ e̱ṣa di̱vo madhya̍ āsta āpapri̱vānroda̍sī a̱ntari̍kṣam |
sa vi̱śvācī̍ra̱bhica̍ṣṭe ghṛ̱tācī̍ranta̱rā pūrva̱mapa̍raṃ ca ke̱tum
||18.57||वि॒मान॑ ए॒ष दि॒वो मध्य॑ आस्त आपप्रि॒वान्रोद॑सी अ॒न्तरि॑क्षम् ।
स वि॒श्वाची॑र॒भिच॑ष्टे घृ॒ताची॑रन्त॒रा पूर्व॒मप॑रं च के॒तुम्
u̱kṣā sa̍mu̱dro a̍ru̱ṇaḥ su̍pa̱rṇaḥ pūrva̍sya̱ yoni̍ṃ pi̱turāvi̍veśa |
madhye̍ di̱vo nihi̍ta̱ḥ pṛśni̱raśmā̱ vica̍krame̱ raja̍saspā̱tyantau̍
||18.58||उ॒क्षा स॑मु॒द्रो अ॑रु॒णः सु॑प॒र्णः पूर्व॑स्य॒ योनिं॑ पि॒तुरावि॑वेश ।
मध्ये॑ दि॒वो निहि॑तः॒ पृश्नि॒रश्मा॒ विच॑क्रमे॒ रज॑सस्पा॒त्यन्तौ॑
indra̱ṃ viśvā̍ avīvṛdhantsamu̱dravya̍casa̱ṃ gira̍ḥ | ra̱thīta̍ma ra̱thīnā̱ṃ vājā̍nā̱ satpa̍ti̱ṃ pati̍m
||18.59||इन्द्रं॒ विश्वा॑ अवीवृधन्त्समु॒द्रव्य॑चसं॒ गिरः॑ । र॒थीत॑म र॒थीनां॒ वाजा॑ना॒ सत्प॑तिं॒ पति॑म्
de̱va̱hūrya̱jña ā ca̍ vakṣatsumna̱hūrya̱jña ā ca̍ vakṣat | yakṣa̍da̱gnirde̱vo de̱vām̐3 ā ca̍ vakṣat
||18.60||दे॒व॒हूर्य॒ज्ञ आ च॑ वक्षत्सुम्न॒हूर्य॒ज्ञ आ च॑ वक्षत् । यक्ष॑द॒ग्निर्दे॒वो दे॒वाँ३ आ च॑ वक्षत्
vaja̍sya mā prasa̱va u̍dgrā̱bheṇoda̍grabhīt | adhā̍ sa̱patnā̱nindro̍ me nigrā̱bheṇādha̍rām̐3 a̱kaḥ
||18.61||वज॑स्य मा प्रस॒व उ॑द्ग्रा॒भेणोद॑ग्रभीत् । अधा॑ स॒पत्ना॒निन्द्रो॑ मे निग्रा॒भेणाध॑राँ३ अ॒कः
u̱dgrā̱bhaṃ ca̍ nigrā̱bhaṃ ca̱ brahma̍ de̱vā a̍vīvṛdhan |
adhā̍ sa̱patnā̍nindrā̱gnī me̍ viṣū̱cīnā̱nvya̍syatām
||18.62||उ॒द्ग्रा॒भं च॑ निग्रा॒भं च॒ ब्रह्म॑ दे॒वा अ॑वीवृधन् ।
अधा॑ स॒पत्ना॑निन्द्रा॒ग्नी मे॑ विषू॒चीना॒न्व्य॑स्यताम्
krama̍dhvama̱gninā̱ nāka̱mukhya̱ haste̍ṣu̱ bibhra̍taḥ | di̱vaspṛ̱ṣṭha sva̍rga̱tvā mi̱śrā de̱vebhi̍rādhvam
||18.63||क्रम॑ध्वम॒ग्निना॒ नाक॒मुख्य॒ हस्ते॑षु॒ बिभ्र॑तः । दि॒वस्पृ॒ष्ठ स्व॑र्ग॒त्वा मि॒श्रा दे॒वेभि॑राध्वम्
prācī̱manu̍ pra̱diśa̱ṃ prehi̍ vi̱dvāna̱gnera̍gne pu̱ro a̍gnirbhave̱ha |
viśvā̱ āśā̱ dīdyā̍no̱ vibhā̱hyūrja̍ṃ no dhehi dvi̱pade̱ catu̍ṣpade
||18.64||प्राची॒मनु॑ प्र॒दिशं॒ प्रेहि॑ वि॒द्वान॒ग्नेर॑ग्ने पु॒रो अ॑ग्निर्भवे॒ह ।
विश्वा॒ आशा॒ दीद्या॑नो॒ विभा॒ह्यूर्जं॑ नो धेहि द्वि॒पदे॒ चतु॑ष्पदे
pṛ̱thi̱vyā a̱hamuda̱ntari̍kṣa̱māru̍hama̱ntari̍kṣā̱ddiva̱māru̍ham |
di̱vo nāka̍sya pṛ̱ṣṭhāt sva̱rjyoti̍ragāma̱ham
||18.65||पृ॒थि॒व्या अ॒हमुद॒न्तरि॑क्ष॒मारु॑हम॒न्तरि॑क्षा॒द्दिव॒मारु॑हम् ।
दि॒वो नाक॑स्य पृ॒ष्ठात् स्व॒र्ज्योति॑रगाम॒हम्
sva̱ryanto̱ nāpe̍kṣanta̱ ā dyā ro̍hanti̱ roda̍sī |
ya̱jñaṃ ye vi̱śvato̍dhāra suvi̍dvāso viteni̱re
||18.66||स्व॒र्यन्तो॒ नापे॑क्षन्त॒ आ द्या रो॑हन्ति॒ रोद॑सी ।
य॒ज्ञं ये वि॒श्वतो॑धार सुवि॑द्वासो वितेनि॒रे
agne̱ prehi̍ pratha̱mo de̍vaya̱tāṃ cakṣu̍rde̱vānā̍mu̱ta martyā̍nām |
iya̍kṣamāṇā̱ bhṛgu̍bhiḥ sa̱joṣā̱ḥ sva̍ryantu̱ yaja̍mānāḥ sva̱sti
||18.67||अग्ने॒ प्रेहि॑ प्रथ॒मो दे॑वय॒तां चक्षु॑र्दे॒वाना॑मु॒त मर्त्या॑नाम् ।
इय॑क्षमाणा॒ भृगु॑भिः स॒जोषाः॒ स्व॑र्यन्तु॒ यज॑मानाः स्व॒स्ति
nakto̱ṣāsā̱ sama̍nasā̱ virū̍pe dhā̱paye̍te̱ śiśu̱meka̍ samī̱cī |
dyāvā̱kṣāmā̍ ru̱kmo a̱ntarvibhā̍ti de̱vā a̱gniṃ dhā̍rayan draviṇo̱dāḥ
||18.68||नक्तो॒षासा॒ सम॑नसा॒ विरू॑पे धा॒पये॑ते॒ शिशु॒मेक॑ समी॒ची ।
द्यावा॒क्षामा॑ रु॒क्मो अ॒न्तर्विभा॑ति दे॒वा अ॒ग्निं धा॑रयन् द्रविणो॒दाः
agne̍ sahasrākṣa śatamūrdhañcha̱taṃ te̍ prā̱ṇāḥ sa̱hasra̍ṃ vyā̱nāḥ |
tva sā̍ha̱srasya̍ rā̱ya ī̍śiṣe̱ tasmai̍ te vidhema̱ vājā̍ya̱ svāhā̍
||18.69||अग्ने॑ सहस्राक्ष शतमूर्धञ्छ॒तं ते॑ प्रा॒णाः स॒हस्रं॑ व्या॒नाः ।
त्व सा॑ह॒स्रस्य॑ रा॒य ई॑शिषे॒ तस्मै॑ ते विधेम॒ वाजा॑य॒ स्वाहा॑
su̱pa̱rṇo̍'si ga̱rutmā̍n pṛ̱ṣṭhe pṛ̍thi̱vyāḥ sī̍da |
bhā̱sāntari̍kṣa̱māpṛ̍ṇa̱ jyoti̍ṣā̱ diva̱mutta̍bhāna̱ teja̍sā̱ diśa̱ uddṛ̍ha
||18.70||सु॒प॒र्णो॑ऽसि ग॒रुत्मा॑न् पृ॒ष्ठे पृ॑थि॒व्याः सी॑द ।
भा॒सान्तरि॑क्ष॒मापृ॑ण॒ ज्योति॑षा॒ दिव॒मुत्त॑भान॒ तेज॑सा॒ दिश॒ उद्दृ॑ह
ā̱juhvā̍naḥ su̱pratī̍kaḥ pu̱rastā̱dagne̱ svaṃ yoni̱māsī̍da sādhu̱yā |
a̱smintsa̱dhasthe̱ adhyutta̍rasmi̱nviśve̍ devā̱ yaja̍mānaśca sīdata
||18.71||आ॒जुह्वा॑नः सु॒प्रती॑कः पु॒रस्ता॒दग्ने॒ स्वं योनि॒मासी॑द साधु॒या ।
अ॒स्मिन्त्स॒धस्थे॒ अध्युत्त॑रस्मि॒न्विश्वे॑ देवा॒ यज॑मानश्च सीदत
tā sa̍vi̱turvare̍ṇyasya ci̱trāmāhaṃ vṛ̍ṇe suma̱tiṃ vi̱śvaja̍nyām |
yāma̍sya̱ kaṇvo̱ adu̍ha̱tprapī̍nā sa̱hasra̍dhārā̱ṃ paya̍sā ma̱hīṃ gām
||18.72||ता स॑वि॒तुर्वरे॑ण्यस्य चि॒त्रामाहं वृ॑णे सुम॒तिं वि॒श्वज॑न्याम् ।
याम॑स्य॒ कण्वो॒ अदु॑ह॒त्प्रपी॑ना स॒हस्र॑धारां॒ पय॑सा म॒हीं गाम्
vi̱dhema̍ te para̱me janma̍nnagne vi̱dhema̱ stomai̱rava̍re sa̱dhasthe̍ |
yasmā̱dyone̍ru̱dāri̍thā̱ yaje̱ taṃ pra tve ha̱vīṣi̍ juhure̱ sami̍ddhe
||18.73||वि॒धेम॑ ते पर॒मे जन्म॑न्नग्ने वि॒धेम॒ स्तोमै॒रव॑रे स॒धस्थे॑ ।
यस्मा॒द्योने॑रु॒दारि॑था॒ यजे॒ तं प्र त्वे ह॒वीषि॑ जुहुरे॒ समि॑द्धे
preddho̍ agne dīdihi pu̱ro no'ja̍srayā sū̱rmyā̍ yaviṣṭha | tvā śaśva̍nta̱ upa̍yanti̱ vājā̍ḥ
||18.74||प्रेद्धो॑ अग्ने दीदिहि पु॒रो नोऽज॑स्रया सू॒र्म्या॑ यविष्ठ । त्वा शश्व॑न्त॒ उप॑यन्ति॒ वाजाः॑
agne̱ tama̱dyāśva̱ṃ na stomai̱ḥ kratu̱ṃ na bha̱dra hṛ̍di̱spṛśa̍m | ṛ̱dhyāmā̍ ta̱ ohai̍ḥ
||18.75||अग्ने॒ तम॒द्याश्वं॒ न स्तोमैः॒ क्रतुं॒ न भ॒द्र हृ॑दि॒स्पृश॑म् । ऋ॒ध्यामा॑ त॒ ओहैः॑
citti̍ṃ juhomi̱ mana̍sā ghṛ̱tena̱ yathā̍ de̱vā i̱hāgama̍nvī̱tiho̍trā ṛtā̱vṛdha̍ḥ |
patye̱ viśva̍sya̱ bhūma̍no ju̱homi̍ vi̱śvaka̍rmaṇe vi̱śvāhādā̍bhya ha̱vi
||18.76||चित्तिं॑ जुहोमि॒ मन॑सा घृ॒तेन॒ यथा॑ दे॒वा इ॒हागम॑न्वी॒तिहो॑त्रा ऋता॒वृधः॑ ।
पत्ये॒ विश्व॑स्य॒ भूम॑नो जु॒होमि॑ वि॒श्वक॑र्मणे वि॒श्वाहादा॑भ्य ह॒वि
sa̱pta te̍ agne sa̱midha̍ḥ sa̱pta ji̱hvāḥ sa̱pta ṛṣa̍yaḥ sa̱pta dhāma̍ pri̱yāṇi̍ |
sa̱pta hotrā̍ḥ sapta̱dhā tvā̍ yajanti sa̱pta yonī̱rāpṛ̍ṇasva ghṛ̱tena̱ svāhā̍
||18.77||स॒प्त ते॑ अग्ने स॒मिधः॑ स॒प्त जि॒ह्वाः स॒प्त ऋष॑यः स॒प्त धाम॑ प्रि॒याणि॑ ।
स॒प्त होत्राः॑ सप्त॒धा त्वा॑ यजन्ति स॒प्त योनी॒रापृ॑णस्व घृ॒तेन॒ स्वाहा॑
śu̱krajyo̍tiśca ci̱trajyo̍tiśca sa̱tyajyo̍tiśca̱ jyoti̍ṣmāśca | śu̱kraśca̍ ṛta̱pāścātya̍hāḥ
||18.78||शु॒क्रज्यो॑तिश्च चि॒त्रज्यो॑तिश्च स॒त्यज्यो॑तिश्च॒ ज्योति॑ष्माश्च । शु॒क्रश्च॑ ऋत॒पाश्चात्य॑हाः
ī̱dṛṅ cā̍nya̱dṛṅ ca̍ sa̱dṛṅ ca̱ prati̍sadṛṅ ca | mi̱taśca̱ saṃmi̍taśca̱ sabha̍rāḥ
||18.79||ई॒दृङ् चा॑न्य॒दृङ् च॑ स॒दृङ् च॒ प्रति॑सदृङ् च । मि॒तश्च॒ संमि॑तश्च॒ सभ॑राः
ṛ̱ta̱jicca̍ satya̱jicca̍ sena̱jicca̍ su̱ṣeṇa̍śca | anti̍mitraśca dū̱re a̍mitraśca ga̱ṇaḥ
||18.80||ऋ॒त॒जिच्च॑ सत्य॒जिच्च॑ सेन॒जिच्च॑ सु॒षेण॑श्च । अन्ति॑मित्रश्च दू॒रे अ॑मित्रश्च ग॒णः
ṛ̱taśca̍ sa̱tyaśca̍ dhru̱vaśca̍ dha̱ruṇa̍śca | dha̱rtā ca̍ vidha̱rtā ca̍ vidhāra̱yaḥ
||18.81||ऋ॒तश्च॑ स॒त्यश्च॑ ध्रु॒वश्च॑ ध॒रुण॑श्च । ध॒र्ता च॑ विध॒र्ता च॑ विधार॒यः
ī̱dṛkṣā̍sa etā̱dṛkṣā̍sa ū̱ ṣu ṇa̍ḥ sa̱dṛkṣā̍sa̱ḥ prati̍sadṛkṣāsa̱ eta̍na |
mi̱tāsa̍śca̱ saṃmi̍tāso no a̱dya sabha̍raso maruto ya̱jñe a̱smin
||18.82||ई॒दृक्षा॑स एता॒दृक्षा॑स ऊ॒ षु णः॑ स॒दृक्षा॑सः॒ प्रति॑सदृक्षास॒ एत॑न ।
मि॒तास॑श्च॒ संमि॑तासो नो अ॒द्य सभ॑रसो मरुतो य॒ज्ञे अ॒स्मिन्
svata̍vāśca praghā̱sī ca̍ sāntapa̱naśca̍ gṛhame̱dhī ca̍ | krī̱l̤ī ca̍ śā̱kī co̍jje̱ṣī
||18.83||स्वत॑वाश्च प्रघा॒सी च॑ सान्तप॒नश्च॑ गृहमे॒धी च॑ । क्री॒ळी च॑ शा॒की चो॑ज्जे॒षी
indraṃ daivī̱rviśo̍ ma̱ruto'nu̍vartmāno'bhava̱nyathendraṃ daivī̱rviśo̍ ma̱ruto'nu̍vartmā̱no'bha̍van |
e̱vami̱maṃ yaja̍mānaṃ daivīśca̱ viśo̍ mānu̱ṣīścānu̍vartmāno bhavantu
||18.84||इन्द्रं दैवी॒र्विशो॑ म॒रुतोऽनु॑वर्त्मानोऽभव॒न्यथेन्द्रं दैवी॒र्विशो॑ म॒रुतोऽनु॑वर्त्मा॒नोऽभ॑वन् ।
ए॒वमि॒मं यज॑मानं दैवीश्च॒ विशो॑ मानु॒षीश्चानु॑वर्त्मानो भवन्तु