atha pañcatriṃśo'dhyāyaḥ|
sa̱hasra̍śīrṣā̱ puru̍ṣaḥ sahasrā̱kṣaḥ sa̱hasra̍pāt |
sa bhūmi̍ sa̱rvata̍ spṛ̱tvātya̍tiṣṭhaddaśāṅgu̱lam
||35.1||स॒हस्र॑शीर्षा॒ पुरु॑षः सहस्रा॒क्षः स॒हस्र॑पात् ।
स भूमि॑ स॒र्वत॑ स्पृ॒त्वात्य॑तिष्ठद्दशाङ्गु॒लम्
puru̍ṣa e̱veda sarva̱ṃ yadbhū̱taṃ yacca̍ bhā̱vya̍m |
u̱tāmṛ̍ta̱tvasyeśā̍no̱ yadanne̍nāti̱roha̍ti
||35.2||पुरु॑ष ए॒वेद सर्वं॒ यद्भू॒तं यच्च॑ भा॒व्य॑म् ।
उ॒तामृ॑त॒त्वस्येशा॑नो॒ यदन्ने॑नाति॒रोह॑ति
e̱tāvā̍nasya mahi̱māto̱ jyāyā̍śca̱ pūru̍ṣaḥ |
pādo̍'sya̱ viśvā̍ bhū̱tāni̍ tri̱pāda̍syā̱mṛta̍ṃ di̱vi
||35.3||ए॒तावा॑नस्य महि॒मातो॒ ज्याया॑श्च॒ पूरु॑षः ।
पादो॑ऽस्य॒ विश्वा॑ भू॒तानि॑ त्रि॒पाद॑स्या॒मृतं॑ दि॒वि
tri̱pādū̱rdhva udai̱tpuru̍ṣa̱ḥ pādo̍'sye̱hābha̍va̱tpuna̍ḥ |
tato̱ viṣva̱ṅ vya̍krāmatsāśanānaśa̱ne a̱bhi
||35.4||त्रि॒पादू॒र्ध्व उदै॒त्पुरु॑षः॒ पादो॑ऽस्ये॒हाभ॑व॒त्पुनः॑ ।
ततो॒ विष्व॒ङ् व्य॑क्रामत्साशनानश॒ने अ॒भि
tato vi̱rāl̤a̍jāyata vi̱rājo̱ adhi̱ pūru̍ṣaḥ |
sa jā̱to atya̍ricyata pa̱ścādbhūmi̱matho̍ pu̱raḥ
||35.5||ततो वि॒राळ॑जायत वि॒राजो॒ अधि॒ पूरु॑षः ।
स जा॒तो अत्य॑रिच्यत प॒श्चाद्भूमि॒मथो॑ पु॒रः
tasmā̍dya̱jñātsa̍rva̱huta̱ḥ sambhṛ̍taṃ pṛṣadā̱jyam |
pa̱śūstāśca̍kre vāya̱vyā̍nāra̱ṇyā grā̱myāśca̱ ye
||35.6||तस्मा॑द्य॒ज्ञात्स॑र्व॒हुतः॒ सम्भृ॑तं पृषदा॒ज्यम् ।
प॒शूस्ताश्च॑क्रे वाय॒व्या॑नार॒ण्या ग्रा॒म्याश्च॒ ये
tasmā̍dya̱jñātsa̍rva̱huta̱ ṛca̱ḥ sāmā̍ni jajñire |
chandā̍si jajñire̱ tasmā̱dyaju̱stasmā̍dajāyata
||35.7||तस्मा॑द्य॒ज्ञात्स॑र्व॒हुत॒ ऋचः॒ सामा॑नि जज्ञिरे ।
छन्दा॑सि जज्ञिरे॒ तस्मा॒द्यजु॒स्तस्मा॑दजायत
tasmā̱daśvā̍ ajāyanta̱ ye ke co̍bha̱yāda̍taḥ |
gāvo̍ ha jajñire̱ tasmā̱ttasmā̍jjā̱tā a̍jā̱vaya̍ḥ
||35.8||तस्मा॒दश्वा॑ अजायन्त॒ ये के चो॑भ॒याद॑तः ।
गावो॑ ह जज्ञिरे॒ तस्मा॒त्तस्मा॑ज्जा॒ता अ॑जा॒वयः॑
taṃ ya̱jñaṃ ba̱rhiṣi̱ praukṣa̱npuru̍ṣaṃ jā̱tama̍gra̱taḥ |
tena̍ de̱vā a̍yajanta sā̱dhyā ṛṣa̍yaśca̱ ye
||35.9||तं य॒ज्ञं ब॒र्हिषि॒ प्रौक्ष॒न्पुरु॑षं जा॒तम॑ग्र॒तः ।
तेन॑ दे॒वा अ॑यजन्त सा॒ध्या ऋष॑यश्च॒ ये
yatpuru̍ṣa̱ṃ vyada̍dhuḥ kati̱dhā vya̍kalpayan |
mukha̱ṃ kima̍syāsītkiṃ bā̱hū kimū̱rū pādā̍ ucyete
||35.10||यत्पुरु॑षं॒ व्यद॑धुः कति॒धा व्य॑कल्पयन् ।
मुखं॒ किम॑स्यासीत्किं बा॒हू किमू॒रू पादा॑ उच्येते
brā̱hma̱ṇo̍'sya̱ mukha̍māsīdbā̱hū rā̍ja̱nya̍ḥ kṛ̱taḥ |
ū̱rū tada̍sya̱ yadvai̍śyaḥ pa̱dbhyā śū̱dro a̍jāyata
||35.11||ब्रा॒ह्म॒णो॑ऽस्य॒ मुख॑मासीद्बा॒हू रा॑ज॒न्यः॑ कृ॒तः ।
ऊ॒रू तद॑स्य॒ यद्वै॑श्यः प॒द्भ्या शू॒द्रो अ॑जायत
ca̱ndramā̱ mana̍so jā̱taścakṣo̱ḥ sūryo̍ ajāyata |
śrotrā̍dvā̱yuśca̍ prā̱ṇaśca̱ mukhā̍da̱gnira̍jāyata
||35.12||च॒न्द्रमा॒ मन॑सो जा॒तश्चक्षोः॒ सूर्यो॑ अजायत ।
श्रोत्रा॑द्वा॒युश्च॑ प्रा॒णश्च॒ मुखा॑द॒ग्निर॑जायत
nābhyā̍ āsīda̱ntari̍kṣa śī̱rṣṇo dyau̱ḥ sama̍vartata |
pa̱dbhyāṃ bhūmi̱rdiśa̱ḥ śrotrā̱ttathā̍ lo̱kām̐2 a̍kalpayan
||35.13||नाभ्या॑ आसीद॒न्तरि॑क्ष शी॒र्ष्णो द्यौः॒ सम॑वर्तत ।
प॒द्भ्यां भूमि॒र्दिशः॒ श्रोत्रा॒त्तथा॑ लो॒काँ२ अ॑कल्पयन्
yatpuru̍ṣeṇa ha̱viṣā̍ de̱vā ya̱jñamata̍nvata |
va̱sa̱nto̍'syāsī̱dājya̍ṃ grī̱ṣma i̱dhmaḥ śa̱raddha̱viḥ
||35.14||यत्पुरु॑षेण ह॒विषा॑ दे॒वा य॒ज्ञमत॑न्वत ।
व॒स॒न्तो॑ऽस्यासी॒दाज्यं॑ ग्री॒ष्म इ॒ध्मः श॒रद्ध॒विः
sa̱ptāsyā̍sanpari̱dhaya̱striḥ sa̱pta sa̱midha̍ḥ kṛ̱tāḥ |
de̱vā yadya̱jñaṃ ta̍nvā̱nā aba̍dhna̱npuru̍ṣaṃ pa̱śum
||35.15||स॒प्तास्या॑सन्परि॒धय॒स्त्रिः स॒प्त स॒मिधः॑ कृ॒ताः ।
दे॒वा यद्य॒ज्ञं त॑न्वा॒ना अब॑ध्न॒न्पुरु॑षं प॒शुम्
ya̱jñena̍ ya̱jñama̍yajanta de̱vāstāni̱ dharmā̍ṇi pratha̱mānyā̍san |
te ha̱ nāka̍ṃ mahi̱māna̍ḥ sacanta̱ yatra̱ pūrve̍ sā̱dhyāḥ santi̍ de̱vāḥ
||35.16||य॒ज्ञेन॑ य॒ज्ञम॑यजन्त दे॒वास्तानि॒ धर्मा॑णि प्रथ॒मान्या॑सन् ।
ते ह॒ नाकं॑ महि॒मानः॑ सचन्त॒ यत्र॒ पूर्वे॑ सा॒ध्याः सन्ति॑ दे॒वाः
a̱dbhyaḥ saṃbhṛ̍taḥ pṛthi̱vyai rasā̍cca vi̱śvaka̍rmaṇa̱ḥ sama̍varta̱tāgre̍ |
tasya̱ tvaṣṭā̍ vi̱dadha̍drū̱pame̍ti̱ tanmartya̍sya deva̱tvamā̱jāna̱magre̍
||35.17||अ॒द्भ्यः संभृ॑तः पृथि॒व्यै रसा॑च्च वि॒श्वक॑र्मणः॒ सम॑वर्त॒ताग्रे॑ ।
तस्य॒ त्वष्टा॑ वि॒दध॑द्रू॒पमे॑ति॒ तन्मर्त्य॑स्य देव॒त्वमा॒जान॒मग्रे॑
vedā̱hame̱taṃ puru̍ṣaṃ ma̱hānta̍mādi̱tyava̍rṇa̱ṃ tama̍saḥ pa̱rastā̍t |
tame̱va vi̍di̱tvāti̍ mṛ̱tyume̍ti̱ nānyaḥ panthā̍ vidya̱te'ya̍nāya
||35.18||वेदा॒हमे॒तं पुरु॑षं म॒हान्त॑मादि॒त्यव॑र्णं॒ तम॑सः प॒रस्ता॑त् ।
तमे॒व वि॑दि॒त्वाति॑ मृ॒त्युमे॑ति॒ नान्यः पन्था॑ विद्य॒तेऽय॑नाय
pra̱jāpa̍tiścarati̱ garbhe̍ a̱ntarajā̍yamāno bahu̱dhā vi jā̍yate |
tasya̱ yoni̱ṃ pari̍ paśyanti̱ dhīrā̱stasmi̍nha tasthu̱rbhuva̍nāni̱ viśvā̍
||35.19||प्र॒जाप॑तिश्चरति॒ गर्भे॑ अ॒न्तरजा॑यमानो बहु॒धा वि जा॑यते ।
तस्य॒ योनिं॒ परि॑ पश्यन्ति॒ धीरा॒स्तस्मि॑न्ह तस्थु॒र्भुव॑नानि॒ विश्वा॑
yo de̱vebhya̍ ā̱tapa̍ti̱ yo de̱vānā̍ṃ pu̱rohi̍taḥ |
pūrvo̱ yo de̱vebhyo̍ jā̱to namo̍ ru̱cāya̱ brāhma̍ye
||35.20||यो दे॒वेभ्य॑ आ॒तप॑ति॒ यो दे॒वानां॑ पु॒रोहि॑तः ।
पूर्वो॒ यो दे॒वेभ्यो॑ जा॒तो नमो॑ रु॒चाय॒ ब्राह्म॑ये
ru̱caṃ brā̱hmaṃ ja̱naya̍nto de̱vā agre̱ tada̍bruvan |
yastvai̱vaṃ brā̍hma̱ṇo vi̱dyāttasya̍ de̱vā a̍sa̱nvaśe̍
||35.21||रु॒चं ब्रा॒ह्मं ज॒नय॑न्तो दे॒वा अग्रे॒ तद॑ब्रुवन् ।
यस्त्वै॒वं ब्रा॑ह्म॒णो वि॒द्यात्तस्य॑ दे॒वा अ॑स॒न्वशे॑
śrīśca̍ te la̱kṣmīśca̱ patnyā̍ ahorā̱tre pā̱rśve nakṣa̍trāṇi rū̱pama̱śvinau̱ vyātta̍m |
i̱ṣṇanni̍ṣāṇā̱muṃ ma̍ iṣāṇa sarvalo̱kaṃ ma̍ iṣāṇa
||35.22||श्रीश्च॑ ते ल॒क्ष्मीश्च॒ पत्न्या॑ अहोरा॒त्रे पा॒र्श्वे नक्ष॑त्राणि रू॒पम॒श्विनौ॒ व्यात्त॑म् ।
इ॒ष्णन्नि॑षाणा॒मुं म॑ इषाण सर्वलो॒कं म॑ इषाण
tade̱vāgnistadā̍di̱tyastadvā̱yustadu̍ ca̱ndramā̍ḥ |
tade̱va śu̱kraṃ tad brahma̱ tadāpa̱ḥ tatpra̱jāpa̍tiḥ
||35.23||तदे॒वाग्निस्तदा॑दि॒त्यस्तद्वा॒युस्तदु॑ च॒न्द्रमाः॑ ।
तदे॒व शु॒क्रं तद् ब्रह्म॒ तदापः॒ तत्प्र॒जाप॑तिः
sarve̍ nime̱ṣā ja̍jñire vi̱dyuta̱ḥ puru̍ṣā̱dadhi̍ |
nai̍namū̱rdhvaṃ na ti̱ryañca̱ṃ na madhye̱ pari̍ jagrabhat
||35.24||सर्वे॑ निमे॒षा ज॑ज्ञिरे वि॒द्युतः॒ पुरु॑षा॒दधि॑ ।
नै॑नमू॒र्ध्वं न ति॒र्यञ्चं॒ न मध्ये॒ परि॑ जग्रभत्
na tasya̍ prati̱mā a̍sti̱ yasya̱ nāma̍ ma̱hadyaśa̍ḥ |
hi̱ra̱ṇya̱ga̱rbha itye̱ṣaḥ
||35.25||न तस्य॑ प्रति॒मा अ॑स्ति॒ यस्य॒ नाम॑ म॒हद्यशः॑ ।
हि॒र॒ण्य॒ग॒र्भ इत्ये॒षः
e̱ṣo ha̍ de̱vaḥ pra̱diśo'nu̱ sarvā̱ḥ pūrvo̍ ha jā̱taḥ sa̍ u̱ garbhe̍ a̱ntaḥ |
sa e̱va jā̱taḥ sa ja̍ni̱ṣyamā̍ṇaḥ pra̱tyaṅ janā̍stiṣṭhati sa̱rvato̍mukhaḥ | yasmā̱nna jā̱ta ityeṣaḥ
||35.26||ए॒षो ह॑ दे॒वः प्र॒दिशोऽनु॒ सर्वाः॒ पूर्वो॑ ह जा॒तः स॑ उ॒ गर्भे॑ अ॒न्तः ।
स ए॒व जा॒तः स ज॑नि॒ष्यमा॑णः प्र॒त्यङ् जना॑स्तिष्ठति स॒र्वतो॑मुखः । यस्मा॒न्न जा॒त इत्येषः
ve̱nastatpa̍śya̱nnihi̍ta̱ṃ guhā̱ sadyatra̱ viśva̱ṃ bhava̱tyeka̍nīl̤am |
tasmi̍nni̱da saṃ ca̱ vi cai̍ti̱ sarva̱ sa ota̱ḥ prota̍śca vi̱bhūḥ pra̱jāsu̍
||35.27||वे॒नस्तत्प॑श्य॒न्निहि॑तं॒ गुहा॒ सद्यत्र॒ विश्वं॒ भव॒त्येक॑नीळम् ।
तस्मि॑न्नि॒द सं च॒ वि चै॑ति॒ सर्व॒ स ओतः॒ प्रोत॑श्च वि॒भूः प्र॒जासु॑
pra tadvo̍ceda̱mṛta̱ṃ nu vi̱dvānga̍ndha̱rvo dhāma̱ vibhṛ̍ta̱ṃ guhā̱ sat |
trīṇi̍ pa̱dāni̱ nihi̍tā̱ guhā̍sya̱ yastāni̱ veda̱ sa pi̱tuḥ pi̱tāsa̍t
||35.28||प्र तद्वो॑चेद॒मृतं॒ नु वि॒द्वान्ग॑न्ध॒र्वो धाम॒ विभृ॑तं॒ गुहा॒ सत् ।
त्रीणि॑ प॒दानि॒ निहि॑ता॒ गुहा॑स्य॒ यस्तानि॒ वेद॒ स पि॒तुः पि॒तास॑त्
sa no̱ bandhu̍rjani̱tā sa vi̍dhā̱tā dhāmā̍ni veda̱ bhuva̍nāni̱ viśvā̍ |
yatra̍ de̱vā a̱mṛta̍mānaśā̱nāstṛ̱tīye̱ dhāma̍nna̱dhyara̍yanta
||35.29||स नो॒ बन्धु॑र्जनि॒ता स वि॑धा॒ता धामा॑नि वेद॒ भुव॑नानि॒ विश्वा॑ ।
यत्र॑ दे॒वा अ॒मृत॑मानशा॒नास्तृ॒तीये॒ धाम॑न्न॒ध्यर॑यन्त
pa̱rītya̍ bhū̱tāni̍ pa̱rītya̍ lo̱kānpa̱rītya̱ sarvā̍ḥ pra̱diśo̱ diśa̍śca |
u̱pa̱sthāya̍ prathama̱jāmṛ̱tasyā̱tmanā̱tmāna̍ma̱bhi saṃ vi̍veśa
||35.30||प॒रीत्य॑ भू॒तानि॑ प॒रीत्य॑ लो॒कान्प॒रीत्य॒ सर्वाः॑ प्र॒दिशो॒ दिश॑श्च ।
उ॒प॒स्थाय॑ प्रथम॒जामृ॒तस्या॒त्मना॒त्मान॑म॒भि सं वि॑वेश
pari̱ dyāvā̍pṛthi̱vī sa̱dya i̱tvā pari̍ lo̱kānpari̱ diśa̱ḥ pari̱ sva̍ḥ |
ṛ̱tasya̱ tantu̱ṃ vita̍taṃ vi̱cṛtya̱ tada̍paśya̱ttada̍bhava̱ttadā̍sīt
||35.31||परि॒ द्यावा॑पृथि॒वी स॒द्य इ॒त्वा परि॑ लो॒कान्परि॒ दिशः॒ परि॒ स्वः॑ ।
ऋ॒तस्य॒ तन्तुं॒ वित॑तं वि॒चृत्य॒ तद॑पश्य॒त्तद॑भव॒त्तदा॑सीत्
sada̍sa̱spati̱madbhu̍taṃ pri̱yamindra̍sya̱ kāmya̍m | sa̱niṃ me̱dhāma̍yāsi̱ṣa̱ svāhā̍
||35.32||सद॑स॒स्पति॒मद्भु॑तं प्रि॒यमिन्द्र॑स्य॒ काम्य॑म् । स॒निं मे॒धाम॑यासि॒ष॒ स्वाहा॑
yāṃ me̱dhāṃ de̍vaga̱ṇāḥ pi̱tara̍śco̱pāsa̍te | tayā̱ māma̱dya me̱dhayāgne̍ me̱dhāvi̍naṃ kuru̱ svāhā̍
||35.33||यां मे॒धां दे॑वग॒णाः पि॒तर॑श्चो॒पास॑ते । तया॒ माम॒द्य मे॒धयाग्ने॑ मे॒धावि॑नं कुरु॒ स्वाहा॑
i̱daṃ me̱ brahma̍ ca kṣa̱traṃ co̱bhe śriya̍maśnutām |
mayi̍ de̱vā da̍dhatu̱ śriya̱mutta̍mā̱ṃ tasyai̍ te̱ svāhā̍
||35.34||इ॒दं मे॒ ब्रह्म॑ च क्ष॒त्रं चो॒भे श्रिय॑मश्नुताम् ।
मयि॑ दे॒वा द॑धतु॒ श्रिय॒मुत्त॑मां॒ तस्यै॑ ते॒ स्वाहा॑
ape̱to ya̍ntu pa̱ṇayo'su̍mnā devapī̱yava̍ḥ | a̱sya lo̱kaḥ su̱tāva̍taḥ
||35.35||अपे॒तो य॑न्तु प॒णयोऽसु॑म्ना देवपी॒यवः॑ । अ॒स्य लो॒कः सु॒ताव॑तः
dyubhi̱raho̍bhira̱ktubhi̱rvya̍ktaṃ ya̱mo da̍dātvava̱sāna̍masmai |
sa̱vi̱tā te̱ śarī̍rebhyaḥ pṛthi̱vyām̐ lo̱kami̍cchatu | tasmai̍ yujyantāmu̱sriyā̍ḥ
||35.36||द्युभि॒रहो॑भिर॒क्तुभि॒र्व्य॑क्तं य॒मो द॑दात्वव॒सान॑मस्मै ।
स॒वि॒ता ते॒ शरी॑रेभ्यः पृथि॒व्याँ लो॒कमि॑च्छतु । तस्मै॑ युज्यन्तामु॒स्रियाः॑
vā̱yuḥ pu̍nātu savi̱tā pu̍nātva̱gnerbhrāja̍sā̱ sūrya̍sya̱ varca̍sā | vi mu̍cyantāmu̱sriyā̍ḥ
||35.37||वा॒युः पु॑नातु सवि॒ता पु॑नात्व॒ग्नेर्भ्राज॑सा॒ सूर्य॑स्य॒ वर्च॑सा । वि मु॑च्यन्तामु॒स्रियाः॑
a̱śva̱tthe vo̍ ni̱ṣada̍naṃ pa̱rṇe vo̍ vasa̱tiṣkṛ̱tā | go̱bhāja̱ itkilā̍satha̱ yatsa̱nava̍tha̱ pūru̍ṣam
||35.38||अ॒श्व॒त्थे वो॑ नि॒षद॑नं प॒र्णे वो॑ वस॒तिष्कृ॒ता । गो॒भाज॒ इत्किला॑सथ॒ यत्स॒नव॑थ॒ पूरु॑षम्
sa̱vi̱tā te̱ śarī̍rāṇi mā̱turu̱pastha̱ ā va̍patu | tasmai̍ pṛthivi̱ śaṃ bha̍va |
pra̱jāpa̍tau tvā de̱vatā̍yā̱mupo̍dake lo̱ke ni da̍dhāmya̱sau
||35.39||स॒वि॒ता ते॒ शरी॑राणि मा॒तुरु॒पस्थ॒ आ व॑पतु । तस्मै॑ पृथिवि॒ शं भ॑व ।
प्र॒जाप॑तौ त्वा दे॒वता॑या॒मुपो॑दके लो॒के नि द॑धाम्य॒सौ
para̍ṃ mṛtyo̱ anu̱ pare̍hi̱ panthā̱m̐ yaste̍ a̱nya ita̍ro deva̱yānā̍t |
cakṣu̍ṣmate śṛṇva̱te te̍ bravīmi̱ mā na̍ḥ pra̱jā rī̍riṣo̱ mota vī̱rān
||35.40||परं॑ मृत्यो॒ अनु॒ परे॑हि॒ पन्थाँ॒ यस्ते॑ अ॒न्य इत॑रो देव॒याना॑त् ।
चक्षु॑ष्मते शृण्व॒ते ते॑ ब्रवीमि॒ मा नः॑ प्र॒जा री॑रिषो॒ मोत वी॒रान्
śaṃ vāta̱ḥ śa hi te̱ ghṛṇi̱ḥ śaṃ te̍ bhava̱ntviṣṭa̍kāḥ |
śaṃ te̍ bhavantva̱gnaya̱ḥ pārthi̍vāso̱ mā tvā̱bhi śū̍śucan
||35.41||शं वातः॒ श हि ते॒ घृणिः॒ शं ते॑ भव॒न्त्विष्ट॑काः ।
शं ते॑ भवन्त्व॒ग्नयः॒ पार्थि॑वासो॒ मा त्वा॒भि शू॑शुचन्
kalpa̍ntāṃ te̱ diśa̱stubhya̱māpa̍ḥ śi̱vata̍mā̱stubhya̍ṃ bhavantu̱ sindha̍vaḥ |
a̱ntari̍kṣa śi̱vaṃ tubhya̱ṃ kalpa̍ntāṃ te̱ diśa̱ḥ sarvā̍ḥ
||35.42||कल्प॑न्तां ते॒ दिश॒स्तुभ्य॒मापः॑ शि॒वत॑मा॒स्तुभ्यं॑ भवन्तु॒ सिन्ध॑वः ।
अ॒न्तरि॑क्ष शि॒वं तुभ्यं॒ कल्प॑न्तां ते॒ दिशः॒ सर्वाः॑
aśma̍nvatī rīyate̱ sa ra̍bhadhva̱mutti̍ṣṭhata̱ pra ta̍ratā̱ sakhā̍yaḥ |
atra̍ jahī̱mo'śi̍vā̱ ye asa̍ñchi̱vānva̱yamutta̍remā̱bhi vājā̍n
||35.43||अश्म॑न्वती रीयते॒ स र॑भध्व॒मुत्ति॑ष्ठत॒ प्र त॑रता॒ सखा॑यः ।
अत्र॑ जही॒मोऽशि॑वा॒ ये अस॑ञ्छि॒वान्व॒यमुत्त॑रेमा॒भि वाजा॑न्
apā̱ghamapa̱ kilvi̍ṣa̱mapa̍ kṛ̱tyāmapo̱ rapa̍ḥ |
apā̍mārga̱ tvama̱smadapa̍ du̱ḥṣvapnya̍ suva
||35.44||अपा॒घमप॒ किल्वि॑ष॒मप॑ कृ॒त्यामपो॒ रपः॑ ।
अपा॑मार्ग॒ त्वम॒स्मदप॑ दुः॒ष्वप्न्य॑ सुव
su̱mi̱tri̱yā na̱ āpa̱ oṣa̍dhayaḥ santu durmitri̱yāstasmai̍ santu̱ |
yo̱'smāndve̍ṣṭi̱ yaṃ ca̍ va̱yaṃ dvi̱ṣmaḥ
||35.45||सु॒मि॒त्रि॒या न॒ आप॒ ओष॑धयः सन्तु दुर्मित्रि॒यास्तस्मै॑ सन्तु॒ ।
यो॒ऽस्मान्द्वे॑ष्टि॒ यं च॑ व॒यं द्वि॒ष्मः
a̱na̱ḍvāha̍ma̱nvāra̍bhāmahe sva̱staye̍ |
sa na̱ indra̍ iva de̱vebhyo̱ vahni̍ḥ sa̱ṃtara̍ṇo bhava
||35.46||अ॒न॒ड्वाह॑म॒न्वार॑भामहे स्व॒स्तये॑ ।
स न॒ इन्द्र॑ इव दे॒वेभ्यो॒ वह्निः॑ सं॒तर॑णो भव
udva̱yaṃ tama̍sa̱spari̱ sva̱ḥ paśya̍nta̱ utta̍ram |
de̱vaṃ de̍va̱trā sūrya̱maga̍nma̱ jyoti̍rutta̱mam
||35.47||उद्व॒यं तम॑स॒स्परि॒ स्वः॒ पश्य॑न्त॒ उत्त॑रम् ।
दे॒वं दे॑व॒त्रा सूर्य॒मग॑न्म॒ ज्योति॑रुत्त॒मम्
agna̱ āyū̍ṣi pavasa̱ ā su̱vorja̱miṣa̍ṃ ca naḥ |
ā̱re bā̍dhasva du̱cchunā̍m
||35.48||अग्न॒ आयू॑षि पवस॒ आ सु॒वोर्ज॒मिषं॑ च नः ।
आ॒रे बा॑धस्व दु॒च्छुना॑म्
āyu̍ṣmānagne ha̱viṣā̍ vṛdhā̱no ghṛ̱tapra̍tīko ghṛ̱tayo̍niredhi |
ghṛ̱taṃ pī̱tvā madhu̱ cāru̱ gavya̍ṃ pi̱teva̍ pu̱trama̱bhi ra̍kṣatādi̱māntsvāhā̍
||35.49||आयु॑ष्मानग्ने ह॒विषा॑ वृधा॒नो घृ॒तप्र॑तीको घृ॒तयो॑निरेधि ।
घृ॒तं पी॒त्वा मधु॒ चारु॒ गव्यं॑ पि॒तेव॑ पु॒त्रम॒भि र॑क्षतादि॒मान्त्स्वाहा॑
i̱maṃ jī̱vebhya̍ḥ pari̱dhiṃ da̍dhāmi maiṣā̱ṃ nu gā̱dapa̍ro̱ artha̍me̱tam |
śa̱taṃ jī̍vantu śa̱rada̍ḥ purū̱cīra̱ntarmṛ̱tyuṃ da̍dhatā̱ṃ parva̍tena
||35.50||इ॒मं जी॒वेभ्यः॑ परि॒धिं द॑धामि मैषां॒ नु गा॒दप॑रो॒ अर्थ॑मे॒तम् ।
श॒तं जी॑वन्तु श॒रदः॑ पुरू॒चीर॒न्तर्मृ॒त्युं द॑धतां॒ पर्व॑तेन
parī̱me gāma̍neṣata̱ parya̱gnima̍hṛṣata | de̱veṣva̍krata̱ śrava̱ḥ ka i̱mām̐2 ā da̍dharṣati
||35.51||परी॒मे गाम॑नेषत॒ पर्य॒ग्निम॑हृषत । दे॒वेष्व॑क्रत॒ श्रवः॒ क इ॒माँ२ आ द॑धर्षति
kra̱vyāda̍ma̱gniṃ pra hi̍ṇomi dū̱raṃ ya̍ma̱rājya̍ṃ gacchatu ripravā̱haḥ |
i̱haivāyamita̍ro jā̱tave̍dā de̱vebhyo̍ ha̱vyaṃ va̍hatu prajā̱nan
||35.52||क्र॒व्याद॑म॒ग्निं प्र हि॑णोमि दू॒रं य॑म॒राज्यं॑ गच्छतु रिप्रवा॒हः ।
इ॒हैवायमित॑रो जा॒तवे॑दा दे॒वेभ्यो॑ ह॒व्यं व॑हतु प्रजा॒नन्
vaha̍ va̱pāṃ jā̍tavedaḥ pi̱tṛbhyo̱ yatrai̍nā̱nvettha̱ nihi̍tānparā̱ke |
meda̍saḥ ku̱lyā upa̱ tāntsra̍vantu sa̱tyā e̍ṣāmā̱śiṣa̍ḥ santu̱ kāmā̱ḥ svāhā̍
||35.53||वह॑ व॒पां जा॑तवेदः पि॒तृभ्यो॒ यत्रै॑ना॒न्वेत्थ॒ निहि॑तान्परा॒के ।
मेद॑सः कु॒ल्या उप॒ तान्त्स्र॑वन्तु स॒त्या ए॑षामा॒शिषः॑ सन्तु॒ कामाः॒ स्वाहा॑
syo̱nā pṛ̍thivi no bhavānṛkṣa̱rā ni̱veśa̍nī |
yacchā̍ na̱ḥ śarma̍ sa̱prathā̍ḥ | apa̍ na̱ḥ śośu̍cada̱dham
||35.54||स्यो॒ना पृ॑थिवि नो भवानृक्ष॒रा नि॒वेश॑नी ।
यच्छा॑ नः॒ शर्म॑ स॒प्रथाः॑ । अप॑ नः॒ शोशु॑चद॒धम्
a̱smāttvamadhi̍ jā̱to̍'si̱ tvada̱yaṃ jā̍yatā̱ṃ puna̍ḥ | a̱sau sva̱rgāya̍ lo̱kāya̱ svāhā̍ |
apa̍ na̱ḥ śośu̍cada̱gham
||35.55||अ॒स्मात्त्वमधि॑ जा॒तो॑ऽसि॒ त्वद॒यं जा॑यतां॒ पुनः॑ । अ॒सौ स्व॒र्गाय॑ लो॒काय॒ स्वाहा॑ ।
अप॑ नः॒ शोशु॑चद॒घम्