atha caturtho'dhyāyaḥ|
edama̍ganma deva̱yaja̍naṃ pṛthi̱vyā yatra̍ de̱vāso̱ aju̍ṣanta̱ viśve̍ |
ṛksā̱mābhyā̍ sa̱ntara̍nto̱ yaju̍rbhī rā̱yaspoṣe̍ṇa̱ sami̱ṣā ma̍dema
||4.1||एदम॑गन्म देव॒यज॑नं पृथि॒व्या यत्र॑ दे॒वासो॒ अजु॑षन्त॒ विश्वे॑ ।
ऋक्सा॒माभ्या॑ स॒न्तर॑न्तो॒ यजु॑र्भी रा॒यस्पोषे॑ण॒ समि॒षा म॑देम
i̱mā āpa̱ḥ śamu̍ me santu de̱vīroṣa̍dhe̱ trāya̍sva svadhi̍te̱ maina̍ hisīḥ |
āpo̍ a̱smānmā̱tara̍ḥ śundhayantu ghṛ̱tena̍ no ghṛta̱pva̍ḥ punantu
||4.2||इ॒मा आपः॒ शमु॑ मे सन्तु दे॒वीरोष॑धे॒ त्राय॑स्व स्वधि॑ते॒ मैन॑ हिसीः ।
आपो॑ अ॒स्मान्मा॒तरः॑ शुन्धयन्तु घृ॒तेन॑ नो घृत॒प्वः॑ पुनन्तु
viśva̱ hi ri̱ praṃ pra̱vaha̍nti de̱vīrudidā̍bhya̱ḥ śuci̱rā pū̱ta e̍mi |
dī̱kṣā̱ta̱paso̍sta̱nūra̍si̱ tāṃ tvā̍ śi̱vā śa̱gmāṃ pari̍dadhe bha̱draṃ varṇa̱ṃ puṣya̍n
||4.3||विश्व॒ हि रि॒ प्रं प्र॒वह॑न्ति दे॒वीरुदिदा॑भ्यः॒ शुचि॒रा पू॒त ए॑मि ।
दी॒क्षा॒त॒पसो॑स्त॒नूर॑सि॒ तां त्वा॑ शि॒वा श॒ग्मां परि॑दधे भ॒द्रं वर्णं॒ पुष्य॑न्
ma̱hīnā̱ṃ payo̍'si varco̱dā a̍si̱ varco̍ me dehi | vṛ̱trasya̍ ka̱nīna̍kāsi cakṣu̱rdā a̍si̱ cakṣu̍rme dehi
||4.4||म॒हीनां॒ पयो॑ऽसि वर्चो॒दा अ॑सि॒ वर्चो॑ मे देहि । वृ॒त्रस्य॑ क॒नीन॑कासि चक्षु॒र्दा अ॑सि॒ चक्षु॑र्मे देहि
ci̱tpati̍rmā punātu vā̱kpati̍rmā punātu de̱vo mā̍ sa̱vi̱tā pu̍nā̱tvacchi̍dreṇa pa̱vitre̍ṇa̱ sūrya̍sya ra̱śmibhi̍ḥ |
tasya̍ te pavitrapate pa̱vitra̍pūtasya̱ yatkā̍maḥ pu̱ne taccha̍keyam
||4.5||चि॒त्पति॑र्मा पुनातु वा॒क्पति॑र्मा पुनातु दे॒वो मा॑ स॒वि॒ता पु॑ना॒त्वच्छि॑द्रेण प॒वित्रे॑ण॒ सूर्य॑स्य र॒श्मिभिः॑ ।
तस्य॑ ते पवित्रपते प॒वित्र॑पूतस्य॒ यत्का॑मः पु॒ने तच्छ॑केयम्
ā vo̍ devāsa īmahe vā̱maṃ pra̍ya̱tya̍dhva̱re | ā vo̍ devāsa ā̱śiṣo̍ ya̱jñiyā̍so havāmahe
||4.6||आ वो॑ देवास ईमहे वा॒मं प्र॑य॒त्य॑ध्व॒रे । आ वो॑ देवास आ॒शिषो॑ य॒ज्ञिया॑सो हवामहे
svāhā̍ ya̱jñaṃ mana̍sa̱ḥ svāho̱rora̱ntari̍kṣāt | svāhā̱ dyāvā̍pṛthi̱vībhyā̱ svāhā̱ vātā̱dāra̍bhe̱
||4.7||स्वाहा॑ य॒ज्ञं मन॑सः॒ स्वाहो॒रोर॒न्तरि॑क्षात् । स्वाहा॒ द्यावा॑पृथि॒वीभ्या॒ स्वाहा॒ वाता॒दार॑भे॒
ākū̍tyai pra̱yuje̱'gnaye̱ svāhā̍ me̱dhāyai̱ mana̍se̱gnaye̱ svāhā̍
dī̱kṣāyai̱ tapa̍se̱'gnaye̱ svāhā̱ sara̍svatyai pū̱ṣṇe̱'gnaye̱ svāhā̱|
āpo̍ devīrbṛhatīrviśvaśambhuvo̱ dyāvā̍pṛthivī̱ urva̍ntarikṣa | bṛha̱spata̍ye ha̱viṣā̍ vidhema̱ svāhā̍
||4.8||आकू॑त्यै प्र॒युजे॒ऽग्नये॒ स्वाहा॑ मे॒धायै॒ मन॑से॒ग्नये॒ स्वाहा॑
दी॒क्षायै॒ तप॑से॒ऽग्नये॒ स्वाहा॒ सर॑स्वत्यै पू॒ष्णे॒ऽग्नये॒ स्वाहा॒।
आपो॑ देवीर्बृहतीर्विश्वशम्भुवो॒ द्यावा॑पृथिवी॒ उर्व॑न्तरिक्ष । बृह॒स्पत॑ये ह॒विषा॑ विधेम॒ स्वाहा॑
viśvo̍ de̱vasya̍ ne̱turmarto̍ vurīta sa̱khyam | viśvo̍ rā̱ya i̍ṣudhyati dyu̱mnaṃ vṛ̍ṇīta pu̱ṣyase̱ svāhā̍
||4.9||विश्वो॑ दे॒वस्य॑ ने॒तुर्मर्तो॑ वुरीत स॒ख्यम् । विश्वो॑ रा॒य इ॑षुध्यति द्यु॒म्नं वृ॑णीत पु॒ष्यसे॒ स्वाहा॑
ṛ̱ksā̱mayo̱ḥ śilpe̍ stha̱ste vā̱māra̍bhe̱ te mā̍ pātam| āsya ya̱jñasyo̱dṛca̍ḥ
||4.10||ऋ॒क्सा॒मयोः॒ शिल्पे॑ स्थ॒स्ते वा॒मार॑भे॒ ते मा॑ पातम्। आस्य य॒ज्ञस्यो॒दृचः॑
śarmā̍si̱ śarma̍ me yaccha̱ nama̍ste astu̱ mā mā̍ hi sīḥ |
ūrga̍syāṅgira̱syūrṇa̍ṃmradā̱ ūrja̱ṃ me yaccha
||4.11||शर्मा॑सि॒ शर्म॑ मे यच्छ॒ नम॑स्ते अस्तु॒ मा मा॑ हि सीः ।
ऊर्ग॑स्याङ्गिर॒स्यूर्णं॑म्रदा॒ ऊर्जं॒ मे यच्छ
soma̍sya nī̱vira̍si̱ viṣṇo̱ḥ śarmā̍si̱ śarma̱ yaja̍mānasya |
indra̍sya̱ yoni̍rasi susa̱syāḥ kṛ̱ṣīskṛ̍dhi
||4.12||सोम॑स्य नी॒विर॑सि॒ विष्णोः॒ शर्मा॑सि॒ शर्म॒ यज॑मानस्य ।
इन्द्र॑स्य॒ योनि॑रसि सुस॒स्याः कृ॒षीस्कृ॑धि
ucchra̍yasva vanaspata ū̱rdhvo mā̍ pā̱hya ha̍saḥ| āsya ya̱jñasyo̱dṛca̍ḥ
||4.13||उच्छ्र॑यस्व वनस्पत ऊ॒र्ध्वो मा॑ पा॒ह्य ह॑सः। आस्य य॒ज्ञस्यो॒दृचः॑
vra̱taṃ kṛ̍ṇuta vra̱taṃ kṛ̍ṇuta vra̱taṃ kṛ̍ṇuta | a̱gnirbrahmā̱gnirya̱jño vana̱spati̍rya̱jñiya̍ḥ
||4.14||व्र॒तं कृ॑णुत व्र॒तं कृ॑णुत व्र॒तं कृ॑णुत । अ॒ग्निर्ब्रह्मा॒ग्निर्य॒ज्ञो वन॒स्पति॑र्य॒ज्ञियः॑
daivī̱ṃ dhiya̍ṃ manāmahe sumṛl̤ī̱kāma̱bhiṣṭa̍ye | va̱rco̱dām̐ vi̱śvadhā̍yasa sutī̱rthā no̍ asa̱dvaśe̍
||4.15||दैवीं॒ धियं॑ मनामहे सुमृळी॒काम॒भिष्ट॑ये । व॒र्चो॒दाँ वि॒श्वधा॑यस सुती॒र्था नो॑ अस॒द्वशे॑
ye de̱vā mano̍jātā mano̱yujo̱ dakṣa̍kratavaḥ| te no̍'vantu̱ te na̍ḥ pāntu̱ tebhya̱ḥ svāhā̍
||4.16||ये दे॒वा मनो॑जाता मनो॒युजो॒ दक्ष॑क्रतवः। ते नो॑ऽवन्तु॒ ते नः॑ पान्तु॒ तेभ्यः॒ स्वाहा॑
śvā̱trāḥ pī̱tā bha̍vata yū̱yamā̍po a̱smāka̍ma̱ntaru̱dare̍ su̱śevā̍ḥ |
tā a̱smabhya̍maya̱kṣmā a̍namī̱vā anā̍gasa̱ḥ svada̍ntu de̱vīra̱mṛtā̍ ṛtā̱vṛdha̍ḥ
||4.17||श्वा॒त्राः पी॒ता भ॑वत यू॒यमा॑पो अ॒स्माक॑म॒न्तरु॒दरे॑ सु॒शेवाः॑ ।
ता अ॒स्मभ्य॑मय॒क्ष्मा अ॑नमी॒वा अना॑गसः॒ स्वद॑न्तु दे॒वीर॒मृता॑ ऋता॒वृधः॑
i̱yaṃ te̍ ya̱jñiyā̍ ta̱nūra̱po mu̍ñcāmi̱ na pra̱jām |
a̍ho̱muca̱ḥ svāhā̍kṛtāḥ pṛthi̱vīmāvi̍śata pṛthi̱vyā saṃbha̍va
||4.18||इ॒यं ते॑ य॒ज्ञिया॑ त॒नूर॒पो मु॑ञ्चामि॒ न प्र॒जाम् ।
अ॑हो॒मुचः॒ स्वाहा॑कृताः पृथि॒वीमावि॑शत पृथि॒व्या संभ॑व
agne̱ tva su jā̍gṛhi va̱ya su ma̍ndiṣīmahi | rakṣā̍ ṇo̱ apra̍yucchan pra̱budhe̍ na̱ḥ puna̍skṛdhi
||4.19||अग्ने॒ त्व सु जा॑गृहि व॒य सु म॑न्दिषीमहि । रक्षा॑ णो॒ अप्र॑युच्छन् प्र॒बुधे॑ नः॒ पुन॑स्कृधि
puna̱rmana̱ḥ puna̱rāyu̍rma̱ āgā̱t puna̱ścakṣu̱ḥ puna̱ḥ śrotra̍ṃ ma̱ āgāt | puna̍ḥ prā̱ṇaḥ puna̍rā̱tmā ma̱ āgā̍t vai̱śvā̱na̱ro ada̍bdhastanū̱pā a̱gnirmā̍ pātu duri̱tāda̍va̱dyāt
||4.20||पुन॒र्मनः॒ पुन॒रायु॑र्म॒ आगा॒त् पुन॒श्चक्षुः॒ पुनः॒ श्रोत्रं॑ म॒ आगात् । पुनः॑ प्रा॒णः पुन॑रा॒त्मा म॒ आगा॑त् वै॒श्वा॒न॒रो अद॑ब्धस्तनू॒पा अ॒ग्निर्मा॑ पातु दुरि॒ताद॑व॒द्यात्
tvama̍gne vrata̱pā a̍si de̱va ā martye̱ṣvā | tvaṃ ya̱jñeṣvīḍya̍ḥ
||4.21||त्वम॑ग्ने व्रत॒पा अ॑सि दे॒व आ मर्त्ये॒ष्वा । त्वं य॒ज्ञेष्वीड्यः॑
rāsveya̍tso̱mā bhūyo̍ bhara | de̱vo na̍ḥ savi̱tā vaso̍rdā̱tā vasva̍dāt
||4.22||रास्वेय॑त्सो॒मा भूयो॑ भर । दे॒वो नः॑ सवि॒ता वसो॑र्दा॒ता वस्व॑दात्
e̱ṣā te̍ śukra ta̱nūre̱tadvarca̱stayā̱ sambha̍va̱ bhrāja̍ṃ gaccha | jūra̍si dhṛ̱tā mana̍sā̱ juṣṭā̱ viṣṇa̍ve
||4.23||ए॒षा ते॑ शुक्र त॒नूरे॒तद्वर्च॒स्तया॒ सम्भ॑व॒ भ्राजं॑ गच्छ । जूर॑सि धृ॒ता मन॑सा॒ जुष्टा॒ विष्ण॑वे
tasyā̍ste sa̱tyasa̍vasaḥ prasa̱ve ta̱nūya̱ntrama̍śīya̱ svāhā̍ |
ca̱ndrama̍si śu̱krama̍sya̱mṛta̍masi vaiśvade̱vama̍si
||4.24||तस्या॑स्ते स॒त्यस॑वसः प्रस॒वे त॒नूय॒न्त्रम॑शीय॒ स्वाहा॑ ।
च॒न्द्रम॑सि शु॒क्रम॑स्य॒मृत॑मसि वैश्वदे॒वम॑सि
cida̍si ma̱nāsi̱ dhīra̍si̱ dakṣi̍ṇāsi kṣa̱triyā̍si ya̱jñiyā̱syadi̍tirasyubhayataḥśī̱rṣṇī |
sā na̱ḥ suprā̍cī̱ supra̍tīcī bhava
||4.25||चिद॑सि म॒नासि॒ धीर॑सि॒ दक्षि॑णासि क्ष॒त्रिया॑सि य॒ज्ञिया॒स्यदि॑तिरस्युभयतःशी॒र्ष्णी ।
सा नः॒ सुप्रा॑ची॒ सुप्र॑तीची भव
mi̱trastvā̍ pa̱di ba̍dhnītāṃ pū̱ṣādhva̍naspā̱tvindrā̱yādhya̍kṣāya |
anu̍ tvā mā̱tā ma̍nyatā̱manu̍ pi̱tānu̱ bhrātā̱ saga̱rbhyo'nu̱ sakhā̱ sayū̍thyaḥ
||4.26||मि॒त्रस्त्वा॑ प॒दि ब॑ध्नीतां पू॒षाध्व॑नस्पा॒त्विन्द्रा॒याध्य॑क्षाय ।
अनु॑ त्वा मा॒ता म॑न्यता॒मनु॑ पि॒तानु॒ भ्राता॒ सग॒र्भ्योऽनु॒ सखा॒ सयू॑थ्यः
sā de̍vi de̱vamacche̱hīndrā̍ya̱ soma̍m| ru̱drastvā va̍rtayatu sva̱sti soma̍sakhā̱ puna̱rehi̍
||4.27||सा दे॑वि दे॒वमच्छे॒हीन्द्रा॑य॒ सोम॑म्। रु॒द्रस्त्वा व॑र्तयतु स्व॒स्ति सोम॑सखा॒ पुन॒रेहि॑
vasvya̱syadi̍tirasyādi̱tyāsi̍ ru̱drāsi̍ ca̱ndrāsi̍ | bṛha̱spati̍ṣṭvā su̱mne ra̍mṇātu ru̱dro vasu̍bhi̱rāca̍ke
||4.28||वस्व्य॒स्यदि॑तिरस्यादि॒त्यासि॑ रु॒द्रासि॑ च॒न्द्रासि॑ । बृह॒स्पति॑ष्ट्वा सु॒म्ने र॑म्णातु रु॒द्रो वसु॑भि॒राच॑के
adi̍tyāstvā mū̱rdhannāji̍gharmi deva̱yaja̍ne pṛthi̱vyāḥ| il̤ā̍yāspa̱dama̍si ghṛ̱tava̱t svāhā̍
||4.29||अदि॑त्यास्त्वा मू॒र्धन्नाजि॑घर्मि देव॒यज॑ने पृथि॒व्याः। इळा॑यास्प॒दम॑सि घृ॒तव॒त् स्वाहा॑
a̱sme ra̍masvā̱sme te̱ bandhu̍ḥ | tve rāyo̍ a̱sme rāya̍ḥ
||4.30||अ॒स्मे र॑मस्वा॒स्मे ते॒ बन्धुः॑ । त्वे रायो॑ अ॒स्मे रायः॑
mā va̱ya rā̱yaspoṣe̍ṇa̱ viyau̍ṣma̱ toto̱ rāya̍ḥ | sama̍khye de̱vyā dhi̱yā saṃ dakṣi̍ṇayo̱ruca̍kṣasā |
mā ma̱ āyu̱ḥ pramo̍ṣī̱rmo a̱haṃ tava̍ vī̱rānvi̍deya̱ tava̍ devi sa̱ṃdṛśi̍
||4.31||मा व॒य रा॒यस्पोषे॑ण॒ वियौ॑ष्म॒ तोतो॒ रायः॑ । सम॑ख्ये दे॒व्या धि॒या सं दक्षि॑णयो॒रुच॑क्षसा ।
मा म॒ आयुः॒ प्रमो॑षी॒र्मो अ॒हं तव॑ वी॒रान्वि॑देय॒ तव॑ देवि सं॒दृशि॑
e̱ṣa te̍ gāya̱tro bhā̱ga iti̍ me̱ somā̍ya brūtāde̱ṣa te̱ traiṣṭu̍bho bhā̱ga iti̍ me̱ somā̍ya brūtāt| e̱ṣa te̱ jāga̍to bhā̱ga iti̍ me̱ somā̍ya brūtācchandomā̱nānā̱ sāmrā̍jyaṃ ga̱cchatā̱diti̍ me̱ somā̍ya brūtāt
||4.32||ए॒ष ते॑ गाय॒त्रो भा॒ग इति॑ मे॒ सोमा॑य ब्रूतादे॒ष ते॒ त्रैष्टु॑भो भा॒ग इति॑ मे॒ सोमा॑य ब्रूतात्। ए॒ष ते॒ जाग॑तो भा॒ग इति॑ मे॒ सोमा॑य ब्रूताच्छन्दोमा॒नाना॒ साम्रा॑ज्यं ग॒च्छता॒दिति॑ मे॒ सोमा॑य ब्रूतात्
ā̍smā̱ko̍'si śu̱kraste̱ grahya̍ḥ | vi̱cita̍stvā̱ vici̍nvantu
||4.33||आ॑स्मा॒को॑ऽसि शु॒क्रस्ते॒ ग्रह्यः॑ । वि॒चित॑स्त्वा॒ विचि॑न्वन्तु
a̱bhi tyaṃ de̱va sa̍vi̱tāra̍mo̱ṇyo̍ḥ ka̱vikra̍tu̱marcā̍mi sa̱tyasa̍va ratna̱dhāma̱bhi pri̱yaṃ ma̱tiṃ ka̱vim |
ū̱rdhvā yasyā̱mati̱rbhā adi̍dyuta̱tsavī̍mani̱ hira̍ṇyapāṇiramimīta su̱kratu̍ḥ kṛ̱pā sva̍ḥ
||4.34||अ॒भि त्यं दे॒व स॑वि॒तार॑मो॒ण्योः॑ क॒विक्र॑तु॒मर्चा॑मि स॒त्यस॑व रत्न॒धाम॒भि प्रि॒यं म॒तिं क॒विम् ।
ऊ॒र्ध्वा यस्या॒मति॒र्भा अदि॑द्युत॒त्सवी॑मनि॒ हिर॑ण्यपाणिरमिमीत सु॒क्रतुः॑ कृ॒पा स्वः॑
pra̱jābhya̍stvā pra̱jāstvā̍nu̱prāṇa̍ntu| pra̱jāstvama̍nu̱prāṇi̍hi
||4.35||प्र॒जाभ्य॑स्त्वा प्र॒जास्त्वा॑नु॒प्राण॑न्तु। प्र॒जास्त्वम॑नु॒प्राणि॑हि
ca̱ndraṃ tvā ca̱ndreṇa̍ krīṇāmi śu̱kraṃ śu̱kreṇā̱mṛta̍ma̱mṛte̍na | sa̱gme te̱ gora̱sme te̍ ca̱ndrāṇi̍
||4.36||च॒न्द्रं त्वा च॒न्द्रेण॑ क्रीणामि शु॒क्रं शु॒क्रेणा॒मृत॑म॒मृते॑न । स॒ग्मे ते॒ गोर॒स्मे ते॑ च॒न्द्राणि॑
tapa̍sasta̱nūra̍si pra̱jāpa̍te̱rvarṇa̍ḥ | para̱meṇa̍ pa̱śunā̍ krīyase sahasrapo̱ṣaṃ pu̍ṣeyam
||4.37||तप॑सस्त॒नूर॑सि प्र॒जाप॑ते॒र्वर्णः॑ । पर॒मेण॑ प॒शुना॑ क्रीयसे सहस्रपो॒षं पु॑षेयम्
mi̱tro na̱ ehi̱ sumi̍tradha̱ indra̍syo̱rumāvi̍śa̱ dakṣi̍ṇam | u̱śannu̱śanta̍ syo̱naḥ syo̱nam
||4.38||मि॒त्रो न॒ एहि॒ सुमि॑त्रध॒ इन्द्र॑स्यो॒रुमावि॑श॒ दक्षि॑णम् । उ॒शन्नु॒शन्त॑ स्यो॒नः स्यो॒नम्
svāna̱ bhrājāṅghā̍re̱ hasta̱ suha̍sta̱ kṛśā̍no | e̱te va̍ḥ soma̱kraya̍ṇā̱stānra̍kṣadhva̱ṃ mā vo̍ dabhan
||4.39||स्वान॒ भ्राजाङ्घा॑रे॒ हस्त॒ सुह॑स्त॒ कृशा॑नो । ए॒ते वः॑ सोम॒क्रय॑णा॒स्तान्र॑क्षध्वं॒ मा वो॑ दभन्
pari̍ māgne̱ duśca̍ritādbādha̱svā mā̱ suca̍rite bhaja | udāyu̍ṣā svā̱yuṣoda̍sthāma̱mṛtā̱m̐2 anu̍
||4.40||परि॑ माग्ने॒ दुश्च॑रिताद्बाध॒स्वा मा॒ सुच॑रिते भज । उदायु॑षा स्वा॒युषोद॑स्थाम॒मृताँ॒२ अनु॑
prati̱ panthā̍mapadmahi svasti̱gāma̍ne̱hasa̍m | yena̱ viśvā̱ḥ pari̱ dviṣo̍ vṛ̱ṇakti̍ vi̱ndate̱ vasu̍
||4.41||प्रति॒ पन्था॑मपद्महि स्वस्ति॒गाम॑ने॒हस॑म् । येन॒ विश्वाः॒ परि॒ द्विषो॑ वृ॒णक्ति॑ वि॒न्दते॒ वसु॑
adi̍tyā̱stvaga̱syadi̍tyai̱ sada̱ āsī̍da | asta̍bhnā̱ddyāmṛ̍ṣa̱bho a̱ntari̍kṣa̱mami̍mīta vari̱māṇa̍ṃ pṛthi̱vyāḥ |
āsī̍da̱dviśvā̱ bhuva̍nāni sa̱mrāḍviśvettāni̱ varu̍ṇasya vra̱tāni̍
||4.42||अदि॑त्या॒स्त्वग॒स्यदि॑त्यै॒ सद॒ आसी॑द । अस्त॑भ्ना॒द्द्यामृ॑ष॒भो अ॒न्तरि॑क्ष॒ममि॑मीत वरि॒माणं॑ पृथि॒व्याः ।
आसी॑द॒द्विश्वा॒ भुव॑नानि स॒म्राड्विश्वेत्तानि॒ वरु॑णस्य व्र॒तानि॑
vane̍ṣu̱ vya̱ntari̍kṣaṃ tatāna̱ vāja̱marva̍tsu̱ paya̍ u̱sriyā̍su |
hṛ̱tsu kratu̱ṃ varu̍ṇo vi̱kṣva̱gniṃ di̱vi sūrya̍madadhā̱t soma̱madrau̍
||4.43||वने॑षु॒ व्य॒न्तरि॑क्षं ततान॒ वाज॒मर्व॑त्सु॒ पय॑ उ॒स्रिया॑सु ।
हृ॒त्सु क्रतुं॒ वरु॑णो वि॒क्ष्व॒ग्निं दि॒वि सूर्य॑मदधा॒त् सोम॒मद्रौ॑
sūrya̍sya̱ cakṣu̱rāro̍hā̱gnera̱kṣṇaḥ ka̱nīna̍kam | yatraita̍śebhi̱rīya̍se̱ bhrāja̍māno vipa̱ścitā̍
||4.44||सूर्य॑स्य॒ चक्षु॒रारो॑हा॒ग्नेर॒क्ष्णः क॒नीन॑कम् । यत्रैत॑शेभि॒रीय॑से॒ भ्राज॑मानो विप॒श्चिता॑
usrā̱ eta̍ṃ dhūrvāhau yu̱jyethā̍mana̱śrū avī̍rahaṇau brahma̱coda̍nau |
sva̱sti yaja̍mānasya gṛ̱hān ga̍cchatam
||4.45||उस्रा॒ एतं॑ धूर्वाहौ यु॒ज्येथा॑मन॒श्रू अवी॑रहणौ ब्रह्म॒चोद॑नौ ।
स्व॒स्ति यज॑मानस्य गृ॒हान् ग॑च्छतम्
bha̱dro me̍'si̱ pracya̍vasva bhuvaspate̱ viśvā̍nya̱bhi dhāmā̍ni |
mā tvā̍ paripa̱riṇo̍ vida̱n mā tvā̍ paripa̱nthino̍ vida̱n mā tvā̱ vṛkā̍ aghā̱yavo̍ vidan |
śye̱no bhū̱tvā parā̍pata̱ yaja̍mānasya gṛ̱hān ga̍ccha̱ tannau̍ saskṛ̱tam
||4.46||भ॒द्रो मे॑ऽसि॒ प्रच्य॑वस्व भुवस्पते॒ विश्वा॑न्य॒भि धामा॑नि ।
मा त्वा॑ परिप॒रिणो॑ विद॒न् मा त्वा॑ परिप॒न्थिनो॑ विद॒न् मा त्वा॒ वृका॑ अघा॒यवो॑ विदन् ।
श्ये॒नो भू॒त्वा परा॑पत॒ यज॑मानस्य गृ॒हान् ग॑च्छ॒ तन्नौ॑ सस्कृ॒तम्
namo̍ mi̱trasya̱ varu̍ṇasya̱ cakṣa̍se ma̱ho de̱vāya̱ tadṛ̱ta sa̍paryata |
dū̱re̱dṛśe̍ de̱vajā̍tāya ke̱tave̍ di̱vaspu̱trāya̱ sūryā̍ya śasata
||4.47||नमो॑ मि॒त्रस्य॒ वरु॑णस्य॒ चक्ष॑से म॒हो दे॒वाय॒ तदृ॒त स॑पर्यत ।
दू॒रे॒दृशे॑ दे॒वजा॑ताय के॒तवे॑ दि॒वस्पु॒त्राय॒ सूर्या॑य शसत
varu̍ṇasyo̱ttambha̍namasi̱ varu̍ṇasya skambha̱sarja̍nī sthaḥ |
varu̍ṇasya ṛta̱sada̍nyasi̱ varu̍ṇasya ṛta̱sada̍namasi varu̍ṇasya ṛta̱sada̍na̱māsī̍da
||4.48||वरु॑णस्यो॒त्तम्भ॑नमसि॒ वरु॑णस्य स्कम्भ॒सर्ज॑नी स्थः ।
वरु॑णस्य ऋत॒सद॑न्यसि॒ वरु॑णस्य ऋत॒सद॑नमसि वरु॑णस्य ऋत॒सद॑न॒मासी॑द
yā te̱ dhāmā̍ni ha̱viṣā̱ yaja̍nti̱ tā te̱ viśvā̍ pari̱bhūra̍stu ya̱jñam |
ga̱ya̱sphāna̍ḥ pra̱tara̍ṇaḥ su̱vīro'vī̍rahā̱ praca̍rā soma̱ duryā̍n
||4.49||या ते॒ धामा॑नि ह॒विषा॒ यज॑न्ति॒ ता ते॒ विश्वा॑ परि॒भूर॑स्तु य॒ज्ञम् ।
ग॒य॒स्फानः॑ प्र॒तर॑णः सु॒वीरोऽवी॑रहा॒ प्रच॑रा सोम॒ दुर्या॑न्