atha triṃśo'dhyāyaḥ |
hotā̍ yakṣatsa̱midhendra̍mi̱l̤aspa̱de nābhā̍ pṛthi̱vyā adhi̍ |
di̱vo varṣma̱ntsami̍dhyata̱ oji̍ṣṭhaścarṣaṇī̱sahā̱ṃ vetvājya̍sya̱ hota̱ryaja̍
||30.1||होता॑ यक्षत्स॒मिधेन्द्र॑मि॒ळस्प॒दे नाभा॑ पृथि॒व्या अधि॑ ।
दि॒वो वर्ष्म॒न्त्समि॑ध्यत॒ ओजि॑ष्ठश्चर्षणी॒सहां॒ वेत्वाज्य॑स्य॒ होत॒र्यज॑
hotā̍ yakṣa̱ttanū̱napā̍tamū̱tibhi̱rjetā̍ra̱mapa̍rājitam |
indra̍ṃ de̱va sva̱rvida̍ṃ pa̱thibhi̱rmadhu̍mattamai̱rnarā̱śase̍na̱ teja̍sā̱ vetvājya̍sya̱ hota̱ryaja̍
||30.2||होता॑ यक्ष॒त्तनू॒नपा॑तमू॒तिभि॒र्जेता॑र॒मप॑राजितम् ।
इन्द्रं॑ दे॒व स्व॒र्विदं॑ प॒थिभि॒र्मधु॑मत्तमै॒र्नरा॒शसे॑न॒ तेज॑सा॒ वेत्वाज्य॑स्य॒ होत॒र्यज॑
hotā̍ yakṣa̱dil̤ā̍bhi̱rindra̍mīl̤i̱tamā̱juhvā̍na̱mama̍rtyam |
de̱vo devai̱ḥ savī̍ryo̱ vajra̍hastaḥ puraṃda̱ro vetvājya̍sya̱ hota̱ryaja̍
||30.3||होता॑ यक्ष॒दिळा॑भि॒रिन्द्र॑मीळि॒तमा॒जुह्वा॑न॒मम॑र्त्यम् ।
दे॒वो देवैः॒ सवी॑र्यो॒ वज्र॑हस्तः पुरंद॒रो वेत्वाज्य॑स्य॒ होत॒र्यज॑
hotā̱ yakṣa̍dba̱rhiṣīndra̍ṃ niṣadva̱raṃ vṛ̍ṣa̱bhaṃ naryā̍pasam |
vasu̍bhī rudrairā̍di̱tyaiḥ su̱yugbhi̍rba̱rhirāsa̍da̱dvetvājya̍sya̱ hota̱ryaja̍
||30.4||होता॒ यक्ष॑द्ब॒र्हिषीन्द्रं॑ निषद्व॒रं वृ॑ष॒भं नर्या॑पसम् ।
वसु॑भी रुद्रैरा॑दि॒त्यैः सु॒युग्भि॑र्ब॒र्हिरास॑द॒द्वेत्वाज्य॑स्य॒ होत॒र्यज॑
hotā̍ yakṣa̱dojo̱ na vī̱rya̱ saho̱ dvāra̱ indra̍mavardhayan |
su̱prā̱ya̱ṇā a̱sminya̱jñe vi śra̍yantāmṛtā̱vṛdho̱ dvāra̱ indrā̍ya mī̱l̤ahuṣe̱ vyantvājya̍sya̱ hota̱ryaja̍
||30.5||होता॑ यक्ष॒दोजो॒ न वी॒र्य॒ सहो॒ द्वार॒ इन्द्र॑मवर्धयन् ।
सु॒प्रा॒य॒णा अ॒स्मिन्य॒ज्ञे वि श्र॑यन्तामृता॒वृधो॒ द्वार॒ इन्द्रा॑य मी॒ळहुषे॒ व्यन्त्वाज्य॑स्य॒ होत॒र्यज॑
hotā̍ yakṣadu̱ṣe indra̍sya dhe̱nū su̱dughe̍ mā̱tarā̍ ma̱hī |
sa̱vā̱tarau̱ na teja̍sā va̱tsamindra̍mavardhatāṃ vī̱tāmājya̍sya̱ hota̱ryaja̍
||30.6||होता॑ यक्षदु॒षे इन्द्र॑स्य धे॒नू सु॒दुघे॑ मा॒तरा॑ म॒ही ।
स॒वा॒तरौ॒ न तेज॑सा व॒त्समिन्द्र॑मवर्धतां वी॒तामाज्य॑स्य॒ होत॒र्यज॑
hotā̍ yakṣa̱ddaivyā̱ hotā̍rā bhi̱ṣajā̱ sakhā̍yā ha̱viṣendra̍ṃ bhiṣajyataḥ |
ka̱vī devau̱ prace̍tasā̱ indrā̍ya dhatta indri̱yaṃ vī̱tāmājya̍sya̱ hota̱ryaja̍
||30.7||होता॑ यक्ष॒द्दैव्या॒ होता॑रा भि॒षजा॒ सखा॑या ह॒विषेन्द्रं॑ भिषज्यतः ।
क॒वी देवौ॒ प्रचे॑तसा॒ इन्द्रा॑य धत्त इन्द्रि॒यं वी॒तामाज्य॑स्य॒ होत॒र्यज॑
hotā̍ yakṣatti̱sro de̱vīrna bhe̍ṣa̱jaṃ traya̍stri̱dhāta̍vo̱'pasa̱ il̤ā̱ sara̍svatī̱ bhāra̍tī ma̱hīḥ |
indra̍patnīrha̱viṣma̍tī̱rvyantvājya̍sya̱ hota̱ryaja̍
||30.8||होता॑ यक्षत्ति॒स्रो दे॒वीर्न भे॑ष॒जं त्रय॑स्त्रि॒धात॑वो॒ऽपस॒ इळा॒ सर॑स्वती॒ भार॑ती म॒हीः ।
इन्द्र॑पत्नीर्ह॒विष्म॑ती॒र्व्यन्त्वाज्य॑स्य॒ होत॒र्यज॑
hotā̍ yakṣa̱ttvaṣṭā̍ra̱mindra̍ṃ de̱vaṃ bhi̱ṣaja̍ su̱yaja̍ṃ ghṛta̱śriya̍m |
pu̱ru̱rūpa̍ su̱reta̍saṃ ma̱ghona̱mindrā̍ya̱ tvaṣṭā̱ dadha̍dindri̱yāṇi̱ vetvājya̍sya̱ hota̱ryaja̍
||30.9||होता॑ यक्ष॒त्त्वष्टा॑र॒मिन्द्रं॑ दे॒वं भि॒षज॑ सु॒यजं॑ घृत॒श्रिय॑म् ।
पु॒रु॒रूप॑ सु॒रेत॑सं म॒घोन॒मिन्द्रा॑य॒ त्वष्टा॒ दध॑दिन्द्रि॒याणि॒ वेत्वाज्य॑स्य॒ होत॒र्यज॑
hotā̍ yakṣa̱dvana̱spati̍ śami̱tāra̍ śa̱takra̍tuṃ dhi̱yo jo̱ṣṭāra̍mindri̱yam |
madhvā̍ sama̱ñjanpa̱thibhi̍ḥ su̱gebhi̱ḥ svadā̍ti ya̱jñaṃ madhu̍nā ghṛ̱tena̱ vetvājya̍sya̱ hota̱ryaja̍
||30.10||होता॑ यक्ष॒द्वन॒स्पति॑ शमि॒तार॑ श॒तक्र॑तुं धि॒यो जो॒ष्टार॑मिन्द्रि॒यम् ।
मध्वा॑ सम॒ञ्जन्प॒थिभिः॑ सु॒गेभिः॒ स्वदा॑ति य॒ज्ञं मधु॑ना घृ॒तेन॒ वेत्वाज्य॑स्य॒ होत॒र्यज॑
hotā̍ yakṣa̱dindra̱ svāhājya̍sya̱ svāhā̱ meda̍sa̱ḥ svāhā̍ sto̱kānā̱ svāhā̱ svāhā̍kṛtīnā̱ svāhā̍ ha̱vyasū̍ktīnām |
svāhā̍ de̱vā ā̍jya̱pā ju̍ṣā̱ṇā indra̱ ājya̍sya̱ vyantu̱ hota̱ryaja̍
||30.11||होता॑ यक्ष॒दिन्द्र॒ स्वाहाज्य॑स्य॒ स्वाहा॒ मेद॑सः॒ स्वाहा॑ स्तो॒काना॒ स्वाहा॒ स्वाहा॑कृतीना॒ स्वाहा॑ ह॒व्यसू॑क्तीनाम् ।
स्वाहा॑ दे॒वा आ॑ज्य॒पा जु॑षा॒णा इन्द्र॒ आज्य॑स्य॒ व्यन्तु॒ होत॒र्यज॑
de̱vaṃ ba̱rhirindra̍ sude̱vaṃ de̱vairvī̱rava̍tstī̱rṇaṃ vedyā̍mavardhayat |
vasto̍rvṛ̱taṃ prāktorbhṛ̱ta rā̱yā ba̱rhiṣma̱to'tya̍gādvasu̱vane̍ vasu̱dheya̍sya vetu̱ yaja̍
||30.12||दे॒वं ब॒र्हिरिन्द्र॑ सुदे॒वं दे॒वैर्वी॒रव॑त्स्ती॒र्णं वेद्या॑मवर्धयत् ।
वस्तो॑र्वृ॒तं प्राक्तोर्भृ॒त रा॒या ब॒र्हिष्म॒तोऽत्य॑गाद्वसु॒वने॑ वसु॒धेय॑स्य वेतु॒ यज॑
de̱vīrdvāra̱ indra̍ saṃghā̱te vī̱ḍvīryāma̍nnavardhayan | ā va̱tsena̱ taru̍ṇena kumā̱reṇa̍ ca mīva̱tāpārvā̍ṇa
re̱ṇuka̍kāṭaṃ nudantām̐ vasu̱vane̍ vasu̱dheya̍sya vyantu̱ yaja̍
||30.13||दे॒वीर्द्वार॒ इन्द्र॑ संघा॒ते वी॒ड्वीर्याम॑न्नवर्धयन् । आ व॒त्सेन॒ तरु॑णेन कुमा॒रेण॑ च मीव॒तापार्वा॑ण
रे॒णुक॑काटं नुदन्ताँ वसु॒वने॑ वसु॒धेय॑स्य व्यन्तु॒ यज॑
de̱vī u̱ṣāsā̱naktendra̍ṃ ya̱jñe pra̍ya̱tya̍hvetām |
daivī̱rviśa̱ḥ prāyā̍siṣṭā̱ suprī̍te̱ sudhi̍te vasu̱vane̍ vasu̱dheya̍sya vītā̱ṃ yaja̍
||30.14||दे॒वी उ॒षासा॒नक्तेन्द्रं॑ य॒ज्ञे प्र॑य॒त्य॑ह्वेताम् ।
दैवी॒र्विशः॒ प्राया॑सिष्टा॒ सुप्री॑ते॒ सुधि॑ते वसु॒वने॑ वसु॒धेय॑स्य वीतां॒ यज॑
de̱vī joṣṭrī̱ vasu̍dhitī de̱vamindra̍mavardhatām | ayā̍vya̱nyāghā dveṣā̱syānyā va̍kṣa̱dvasu̱ vāryā̍ṇi̱
yaja̍mānāya śikṣi̱te va̍su̱vane̍ vasu̱dheya̍sya vītā̱ṃ yaja̍
||30.15||दे॒वी जोष्ट्री॒ वसु॑धिती दे॒वमिन्द्र॑मवर्धताम् । अया॑व्य॒न्याघा द्वेषा॒स्यान्या व॑क्ष॒द्वसु॒ वार्या॑णि॒
यज॑मानाय शिक्षि॒ते व॑सु॒वने॑ वसु॒धेय॑स्य वीतां॒ यज॑
de̱vī ū̱rjāhu̍tī̱ dughe̱ paya̱sendra̍mavardhatām |
iṣa̱mūrja̍ma̱nyā va̍kṣa̱tsagdhi̱ sapī̍tima̱nyā nave̍na̱ pūrva̱ṃ daya̍māne purā̱ṇena̱ nava̱madhā̍tā̱mūrja̍mū̱rjāhu̍tī
ū̱rjaya̍māne̱ vasu̱ vāryā̍ṇi̱ yaja̍mānāya śikṣi̱te va̍su̱vane̍ vasu̱dheya̍sya vītā̱ṃ yaja̍
||30.16||दे॒वी ऊ॒र्जाहु॑ती॒ दुघे॒ पय॒सेन्द्र॑मवर्धताम् ।
इष॒मूर्ज॑म॒न्या व॑क्ष॒त्सग्धि॒ सपी॑तिम॒न्या नवे॑न॒ पूर्वं॒ दय॑माने पुरा॒णेन॒ नव॒मधा॑ता॒मूर्ज॑मू॒र्जाहु॑ती
ऊ॒र्जय॑माने॒ वसु॒ वार्या॑णि॒ यज॑मानाय शिक्षि॒ते व॑सु॒वने॑ वसु॒धेय॑स्य वीतां॒ यज॑
de̱vā de̍vyā̱ hotā̍rā de̱vamindra̍mavardhatām |
ha̱tāgha̍śasā̱ ābhā̍rṣṭā̱ṃ vasu̱ vāryā̍ṇi̱ yaja̍mānāya śikṣi̱tau va̍su̱vane̍ vasu̱dheya̍sya vītā̱ṃ yaja̍
||30.17||दे॒वा दे॑व्या॒ होता॑रा दे॒वमिन्द्र॑मवर्धताम् ।
ह॒ताघ॑शसा॒ आभा॑र्ष्टां॒ वसु॒ वार्या॑णि॒ यज॑मानाय शिक्षि॒तौ व॑सु॒वने॑ वसु॒धेय॑स्य वीतां॒ यज॑
de̱vīsti̱srasti̱sro de̱vīḥ pati̱mindra̍mavardhayan |
aspṛ̍kṣa̱dbhāra̍tī̱ diva̍ rudrairya̱jña sara̍sva̱tīl̤ā̱ vasu̍matī
gṛ̱hānva̍su̱vane̍ vasu̱dheya̍sya vyantu̱ yaja̍
||30.18||दे॒वीस्ति॒स्रस्ति॒स्रो दे॒वीः पति॒मिन्द्र॑मवर्धयन् ।
अस्पृ॑क्ष॒द्भार॑ती॒ दिव॑ रुद्रैर्य॒ज्ञ सर॑स्व॒तीळा॒ वसु॑मती
गृ॒हान्व॑सु॒वने॑ वसु॒धेय॑स्य व्यन्तु॒ यज॑
de̱va indro̱ narā̱śasa̍strivarū̱thastri̍bandhu̱ro de̱vamindra̍mavardhayat |
śa̱tena̍ śitipṛ̱ṣṭhānā̱māhi̍taḥ sa̱hasre̍ṇa̱ pra va̍rtate mi̱trāvaru̱ṇeda̍sya ho̱tramarha̍to̱ bṛha̱spati̍
sto̱trama̱śvinādhva̍ryavaṃ vasu̱vane̍ vasu̱dheya̍sya vetu̱ yaja̍
||30.19||दे॒व इन्द्रो॒ नरा॒शस॑स्त्रिवरू॒थस्त्रि॑बन्धु॒रो दे॒वमिन्द्र॑मवर्धयत् ।
श॒तेन॑ शितिपृ॒ष्ठाना॒माहि॑तः स॒हस्रे॑ण॒ प्र व॑र्तते मि॒त्रावरु॒णेद॑स्य हो॒त्रमर्ह॑तो॒ बृह॒स्पति॑
स्तो॒त्रम॒श्विनाध्व॑र्यवं वसु॒वने॑ वसु॒धेय॑स्य वेतु॒ यज॑
de̱vo devai̱rvana̱spati̱rhira̍ṇyaparṇo̱ madhu̍śākhaḥ supippa̱lo de̱vamindra̍mavardhayat |
diva̱magre̍ṇāspṛkṣa̱dāntari̍kṣaṃ pṛthi̱vīma̍dṛhīdvasu̱vane̍ vasu̱dheya̍sya vetu̱ yaja̍
||30.20||दे॒वो देवै॒र्वन॒स्पति॒र्हिर॑ण्यपर्णो॒ मधु॑शाखः सुपिप्प॒लो दे॒वमिन्द्र॑मवर्धयत् ।
दिव॒मग्रे॑णास्पृक्ष॒दान्तरि॑क्षं पृथि॒वीम॑दृहीद्वसु॒वने॑ वसु॒धेय॑स्य वेतु॒ यज॑
de̱vaṃ ba̱rhirvāri̍tīnāṃ de̱vamindra̍mavardhayat |
svā̱sa̱sthamindre̱ṇāsa̍nnama̱nyā ba̱rhīṣya̱bhya̍bhūdvasu̱vane̍ vasu̱dheya̍sya vetu̱ yaja̍
||30.21||दे॒वं ब॒र्हिर्वारि॑तीनां दे॒वमिन्द्र॑मवर्धयत् ।
स्वा॒स॒स्थमिन्द्रे॒णास॑न्नम॒न्या ब॒र्हीष्य॒भ्य॑भूद्वसु॒वने॑ वसु॒धेय॑स्य वेतु॒ यज॑
de̱vo a̱gniḥ svi̍ṣṭa̱kṛdde̱vamindra̍mavardhayat |
svi̍ṣṭaṃ ku̱rvan tsvi̍ṣṭa̱kṛtsvi̍ṣṭama̱dya ka̍rotu no vasu̱vane̍ vasu̱dheya̍sya vetu̱ yaja̍
||30.22||दे॒वो अ॒ग्निः स्वि॑ष्ट॒कृद्दे॒वमिन्द्र॑मवर्धयत् ।
स्वि॑ष्टं कु॒र्वन् त्स्वि॑ष्ट॒कृत्स्वि॑ष्टम॒द्य क॑रोतु नो वसु॒वने॑ वसु॒धेय॑स्य वेतु॒ यज॑
a̱gnima̱dya hotā̍ramavṛṇītā̱yaṃ yaja̍māna̱ḥ paca̱npaktī̱ḥ paca̍npuro̱l̤āśa̍ṃ ba̱dhnannindrā̍ya̱ cchāga̍m |
sū̱pa̱sthā a̱dya de̱vo vana̱spati̍rabhava̱dindrā̍ya̱ cchāge̍na |
agha̱ttaṃ me̍da̱staḥ prati̍ paca̱tāgra̍bhī̱davī̍vṛdhatpuro̱l̤āśe̍na |tvāma̱dya ṛ̍ṣe
||30.23||अ॒ग्निम॒द्य होता॑रमवृणीता॒यं यज॑मानः॒ पच॒न्पक्तीः॒ पच॑न्पुरो॒ळाशं॑ ब॒ध्नन्निन्द्रा॑य॒ च्छाग॑म् ।
सू॒प॒स्था अ॒द्य दे॒वो वन॒स्पति॑रभव॒दिन्द्रा॑य॒ च्छागे॑न ।
अघ॒त्तं मे॑द॒स्तः प्रति॑ पच॒ताग्र॑भी॒दवी॑वृधत्पुरो॒ळाशे॑न ।त्वाम॒द्य ऋ॑षे
hotā̍ yakṣatsamidhā̱naṃ ma̱hadyaśa̱ḥ susa̍middha̱ṃ vare̍ṇyama̱gnimindra̍ṃ vayo̱dhasa̍m |
gā̱ya̱trīṃ chanda̍ indri̱yaṃ tryavi̱ṃ gāṃ vayo̱ dadha̱dvetvājya̍sya̱ hota̱ryaja̍
||30.24||होता॑ यक्षत्समिधा॒नं म॒हद्यशः॒ सुस॑मिद्धं॒ वरे॑ण्यम॒ग्निमिन्द्रं॑ वयो॒धस॑म् ।
गा॒य॒त्रीं छन्द॑ इन्द्रि॒यं त्र्यविं॒ गां वयो॒ दध॒द्वेत्वाज्य॑स्य॒ होत॒र्यज॑
hotā̍ yakṣa̱ttanū̱napā̍tamu̱dbhida̱ṃ yaṃ garbha̱madi̍tirda̱dhe śuci̱mindra̍ṃ vayo̱dhasa̍m |
u̱ṣṇiha̱ṃ chanda̍ indri̱yaṃ di̍tya̱vāha̱ṃ gāṃ vayo̱ dadha̱dvetvājya̍sya̱ hota̱ryaja̍
||30.25||होता॑ यक्ष॒त्तनू॒नपा॑तमु॒द्भिदं॒ यं गर्भ॒मदि॑तिर्द॒धे शुचि॒मिन्द्रं॑ वयो॒धस॑म् ।
उ॒ष्णिहं॒ छन्द॑ इन्द्रि॒यं दि॑त्य॒वाहं॒ गां वयो॒ दध॒द्वेत्वाज्य॑स्य॒ होत॒र्यज॑
hotā̍ yakṣadī̱l̤enya̍mīl̤i̱taṃ vṛ̍tra̱hanta̍ma̱mil̤ā̍bhi̱rīḍya̱ saha̱ḥ soma̱mindra̍ṃ vayo̱dhasa̍m |
a̱nu̱ṣṭubha̱ṃ chanda̍ indri̱yaṃ pañcā̍vi̱ṃ gāṃ vayo̱ dadha̱dvetvājya̍sya̱ hota̱ryaja̍
||30.26||होता॑ यक्षदी॒ळेन्य॑मीळि॒तं वृ॑त्र॒हन्त॑म॒मिळा॑भि॒रीड्य॒ सहः॒ सोम॒मिन्द्रं॑ वयो॒धस॑म् ।
अ॒नु॒ष्टुभं॒ छन्द॑ इन्द्रि॒यं पञ्चा॑विं॒ गां वयो॒ दध॒द्वेत्वाज्य॑स्य॒ होत॒र्यज॑
hotā̍ yakṣatsuba̱rhiṣa̍ṃ pūṣa̱ṇvanta̱mama̍rtya̱ sīda̍ntaṃ ba̱rhiṣi̍ pri̱ye̱'mṛtendra̍ṃ vayo̱dhasa̍m |
bṛ̱ha̱tīṃ chanda̍ indri̱yaṃ tri̍va̱tsaṃ gāṃ va̍yo̱ dadha̱dvetvājya̍sya̱ hota̱ryaja̍
||30.27||होता॑ यक्षत्सुब॒र्हिषं॑ पूष॒ण्वन्त॒मम॑र्त्य॒ सीद॑न्तं ब॒र्हिषि॑ प्रि॒ये॒ऽमृतेन्द्रं॑ वयो॒धस॑म् ।
बृ॒ह॒तीं छन्द॑ इन्द्रि॒यं त्रि॑व॒त्सं गां व॑यो॒ दध॒द्वेत्वाज्य॑स्य॒ होत॒र्यज॑
hotā̍ yakṣa̱dvyaca̍svatīḥ suprāya̱ṇā ṛ̍tā̱vṛdho̱ dvāro̍ de̱vīrhi̍ra̱ṇyayī̍rbra̱hmāṇa̱mindra̍ṃ vayo̱dhasa̍m |
pa̱ṅktiṃ chanda̍ i̱hendri̱yaṃ tu̍rya̱vāha̱ṃ gāṃ vayo̱ dadha̱dvyantvājya̍sya̱ hota̱ryaja̍
||30.28||होता॑ यक्ष॒द्व्यच॑स्वतीः सुप्राय॒णा ऋ॑ता॒वृधो॒ द्वारो॑ दे॒वीर्हि॑र॒ण्ययी॑र्ब्र॒ह्माण॒मिन्द्रं॑ वयो॒धस॑म् ।
प॒ङ्क्तिं छन्द॑ इ॒हेन्द्रि॒यं तु॑र्य॒वाहं॒ गां वयो॒ दध॒द्व्यन्त्वाज्य॑स्य॒ होत॒र्यज॑
hotā̍ yakṣatsu̱peśa̍sā suśi̱lpe bṛ̍ha̱tī u̱bhe nakto̱ṣāsā̱ na da̍rśa̱te viśva̱mindra̍ṃ vayo̱dhasa̍m |
tri̱ṣṭubha̱ṃ chanda̍ i̱hendri̱yaṃ pa̍ṣṭha̱vāha̱ṃ gāṃ vayo̱ dadha̍dvī̱tāmājya̍sya̱ hota̱ryaja̍
||30.29||होता॑ यक्षत्सु॒पेश॑सा सुशि॒ल्पे बृ॑ह॒ती उ॒भे नक्तो॒षासा॒ न द॑र्श॒ते विश्व॒मिन्द्रं॑ वयो॒धस॑म् ।
त्रि॒ष्टुभं॒ छन्द॑ इ॒हेन्द्रि॒यं प॑ष्ठ॒वाहं॒ गां वयो॒ दध॑द्वी॒तामाज्य॑स्य॒ होत॒र्यज॑
hotā̍ yakṣa̱tprace̍tasā de̱vānā̍mutta̱maṃ yaśo̱ hotā̍rā̱ daivyā̍ ka̱vī sa̱yujendra̍ṃ vayo̱dhasa̍m |
jaga̍tī̱ṃ chanda̍ indri̱yama̍na̱ḍvāha̱ṃ gāṃ vayo̱ dadha̍dvī̱tāmājya̍sya̱ hota̱ryaja̍
||30.30||होता॑ यक्ष॒त्प्रचे॑तसा दे॒वाना॑मुत्त॒मं यशो॒ होता॑रा॒ दैव्या॑ क॒वी स॒युजेन्द्रं॑ वयो॒धस॑म् ।
जग॑तीं॒ छन्द॑ इन्द्रि॒यम॑न॒ड्वाहं॒ गां वयो॒ दध॑द्वी॒तामाज्य॑स्य॒ होत॒र्यज॑
hotā̍ yakṣa̱tpeśa̍svatīsti̱sro de̱vīrhi̍ra̱ṇyayī̱rbhāra̍tīrbṛha̱tīrma̱hīḥ pati̱mindra̍ṃ vayo̱dhasa̍m |
vi̱rāja̱ṃ chanda̍ i̱hendri̱yaṃ dhe̱nuṃ gāṃ na vayo̱ dadha̱dvyantvājya̍sya̱ hota̱ryaja̍
||30.31||होता॑ यक्ष॒त्पेश॑स्वतीस्ति॒स्रो दे॒वीर्हि॑र॒ण्ययी॒र्भार॑तीर्बृह॒तीर्म॒हीः पति॒मिन्द्रं॑ वयो॒धस॑म् ।
वि॒राजं॒ छन्द॑ इ॒हेन्द्रि॒यं धे॒नुं गां न वयो॒ दध॒द्व्यन्त्वाज्य॑स्य॒ होत॒र्यज॑
hotā̍ yakṣatsu̱reta̍sa̱ṃ tvaṣṭā̍raṃ puṣṭi̱vardha̍na rū̱pāṇi̱ bibhra̍ta̱ṃ pṛtha̱k puṣṭi̱mindra̍ṃ vayo̱dhasa̍m |
dvi̱pada̱ṃ chanda̍ indri̱yamu̱kṣāṇa̱ṃ gāṃ na vayo̱ dadha̱dvetvājya̍sya̱ hota̱ryaja̍
||30.32||होता॑ यक्षत्सु॒रेत॑सं॒ त्वष्टा॑रं पुष्टि॒वर्ध॑न रू॒पाणि॒ बिभ्र॑तं॒ पृथ॒क् पुष्टि॒मिन्द्रं॑ वयो॒धस॑म् ।
द्वि॒पदं॒ छन्द॑ इन्द्रि॒यमु॒क्षाणं॒ गां न वयो॒ दध॒द्वेत्वाज्य॑स्य॒ होत॒र्यज॑
hotā̍ yakṣa̱dvana̱spati̍ śami̱tāra̍ śa̱takra̍tu̱
hira̍ṇyaparṇamu̱kthina̍ raśa̱nāṃ bibhra̍taṃ va̱śiṃ bhaga̱mindra̍ṃ vayo̱dhasa̍m |
ka̱kubha̱ṃ chanda̍ i̱hendri̱yaṃ va̱śāṃ ve̱hata̱ṃ gāṃ vayo̱ dadha̱dvetvājya̍sya̱ hota̱ryaja̍
||30.33||होता॑ यक्ष॒द्वन॒स्पति॑ शमि॒तार॑ श॒तक्र॑तु॒
हिर॑ण्यपर्णमु॒क्थिन॑ रश॒नां बिभ्र॑तं व॒शिं भग॒मिन्द्रं॑ वयो॒धस॑म् ।
क॒कुभं॒ छन्द॑ इ॒हेन्द्रि॒यं व॒शां वे॒हतं॒ गां वयो॒ दध॒द्वेत्वाज्य॑स्य॒ होत॒र्यज॑
hotā̍ yakṣa̱tsvāhā̍kṛtīra̱gniṃ gṛ̱hapa̍ti̱ṃ pṛtha̱gvaru̍ṇaṃ bheṣa̱jaṃ ka̱viṃ kṣa̱tramindra̍ṃ vayo̱dhasa̍m |
ati̍cchandasa̱ṃ chanda̍ indri̱yaṃ bṛ̱hadṛ̍ṣa̱bhaṃ gāṃ vayo̱ dadha̱dvyantvājya̍sya̱ hota̱ryaja̍
||30.34||होता॑ यक्ष॒त्स्वाहा॑कृतीर॒ग्निं गृ॒हप॑तिं॒ पृथ॒ग्वरु॑णं भेष॒जं क॒विं क्ष॒त्रमिन्द्रं॑ वयो॒धस॑म् ।
अति॑च्छन्दसं॒ छन्द॑ इन्द्रि॒यं बृ॒हदृ॑ष॒भं गां वयो॒ दध॒द्व्यन्त्वाज्य॑स्य॒ होत॒र्यज॑
de̱vaṃ ba̱rhirva̍yo̱dhasa̍ṃ de̱vamindra̍mavardhayat |
gā̱ya̱tryā chanda̍sendri̱yaṃ cakṣu̱rindre̱ vayo̱ dadha̍dvasu̱vane̍ vasu̱dheya̍sya vetu̱ yaja̍
||30.35||दे॒वं ब॒र्हिर्व॑यो॒धसं॑ दे॒वमिन्द्र॑मवर्धयत् ।
गा॒य॒त्र्या छन्द॑सेन्द्रि॒यं चक्षु॒रिन्द्रे॒ वयो॒ दध॑द्वसु॒वने॑ वसु॒धेय॑स्य वेतु॒ यज॑
de̱vīrdvāro̍ vayo̱dhasa̱ śuci̱mindra̍mavardhayan |
u̱ṣṇihā̱ chanda̍sendri̱yaṃ prā̱ṇamindre̱ vayo̱ dadha̍dvasu̱vane̍ vasu̱dheya̍sya vyantu̱ yaja̍
||30.36||दे॒वीर्द्वारो॑ वयो॒धस॒ शुचि॒मिन्द्र॑मवर्धयन् ।
उ॒ष्णिहा॒ छन्द॑सेन्द्रि॒यं प्रा॒णमिन्द्रे॒ वयो॒ दध॑द्वसु॒वने॑ वसु॒धेय॑स्य व्यन्तु॒ यज॑
de̱vī u̱ṣāsā̱naktā̍ de̱vamindra̍ṃ vayo̱dhasa̍ṃ de̱vī de̱vama̍vardhatām |
a̱nu̱ṣṭubhā̱ chanda̍sendri̱yaṃ bala̱mindre̱ vayo̱ dadha̍dvasu̱vane̍ vasu̱dheya̍sya vītā̱ṃ yaja̍
||30.37||दे॒वी उ॒षासा॒नक्ता॑ दे॒वमिन्द्रं॑ वयो॒धसं॑ दे॒वी दे॒वम॑वर्धताम् ।
अ॒नु॒ष्टुभा॒ छन्द॑सेन्द्रि॒यं बल॒मिन्द्रे॒ वयो॒ दध॑द्वसु॒वने॑ वसु॒धेय॑स्य वीतां॒ यज॑
de̱vī joṣṭrī̱ vasu̍dhitī de̱vamindra̍ṃ vayo̱dhasa̍ṃ de̱vī de̱vama̍vardhatām |
bṛ̱ha̱tyā chanda̍sendri̱ya śrotra̱mindre̱ vayo̱ dadha̍dvasu̱vane̍ vasu̱dheya̍sya vītā̱ṃ yaja̍
||30.38||दे॒वी जोष्ट्री॒ वसु॑धिती दे॒वमिन्द्रं॑ वयो॒धसं॑ दे॒वी दे॒वम॑वर्धताम् ।
बृ॒ह॒त्या छन्द॑सेन्द्रि॒य श्रोत्र॒मिन्द्रे॒ वयो॒ दध॑द्वसु॒वने॑ वसु॒धेय॑स्य वीतां॒ यज॑
de̱vī ū̱rjāhu̍tī̱ dughe̍ su̱dughe̱ paya̱sendra̍ṃ vayo̱dhasa̍ṃ de̱vī de̱vama̍vardhatām |
pa̱ṅktyā chanda̍sendri̱ya śu̱kramindre̱ vayo̱ dadha̍dvasu̱vane̍ vasu̱dheya̍sya vītā̱ṃ yaja̍
||30.39||दे॒वी ऊ॒र्जाहु॑ती॒ दुघे॑ सु॒दुघे॒ पय॒सेन्द्रं॑ वयो॒धसं॑ दे॒वी दे॒वम॑वर्धताम् ।
प॒ङ्क्त्या छन्द॑सेन्द्रि॒य शु॒क्रमिन्द्रे॒ वयो॒ दध॑द्वसु॒वने॑ वसु॒धेय॑स्य वीतां॒ यज॑
de̱vā daivyā̱ hotā̍rā de̱vamindra̍ṃ vayo̱dhasa̍ṃ de̱vau de̱vama̍vardhatām |
tri̱ṣṭubhā̱ chanda̍sendri̱yaṃ tviṣi̱mindre̱ vayo̱ dadha̍dvasu̱vane̍ vasu̱dheya̍sya vītā̱ṃ yaja̍
||30.40||दे॒वा दैव्या॒ होता॑रा दे॒वमिन्द्रं॑ वयो॒धसं॑ दे॒वौ दे॒वम॑वर्धताम् ।
त्रि॒ष्टुभा॒ छन्द॑सेन्द्रि॒यं त्विषि॒मिन्द्रे॒ वयो॒ दध॑द्वसु॒वने॑ वसु॒धेय॑स्य वीतां॒ यज॑
de̱vīsti̱srasti̱sro de̱vīrva̍yo̱dhasa̱ṃ pati̱mindra̍mavardhayan |
jaga̍tyā̱ chanda̍sendri̱ya śūṣa̱mindre̱ vayo̱ dadha̍dvasu̱vane̍ vasu̱dheya̍sya vyantu̱ yaja̍
||30.41||दे॒वीस्ति॒स्रस्ति॒स्रो दे॒वीर्व॑यो॒धसं॒ पति॒मिन्द्र॑मवर्धयन् ।
जग॑त्या॒ छन्द॑सेन्द्रि॒य शूष॒मिन्द्रे॒ वयो॒ दध॑द्वसु॒वने॑ वसु॒धेय॑स्य व्यन्तु॒ यज॑
de̱vo narā̱śaso̍ de̱vamindra̍ṃ vayo̱dhasa̍ṃ de̱vo de̱vama̍vardhayat |
vi̱rājā̱ chanda̍sendri̱ya ru̱pamindre̱ vayo̱ dadha̍dvasu̱vane̍ vasu̱dheya̍sya vetu̱ yaja̍
||30.42||दे॒वो नरा॒शसो॑ दे॒वमिन्द्रं॑ वयो॒धसं॑ दे॒वो दे॒वम॑वर्धयत् ।
वि॒राजा॒ छन्द॑सेन्द्रि॒य रु॒पमिन्द्रे॒ वयो॒ दध॑द्वसु॒वने॑ वसु॒धेय॑स्य वेतु॒ यज॑
de̱vo vana̱spati̍rde̱vamindra̍ṃ vayo̱dhasa̍ṃ de̱vo de̱vama̍vardhayat |
dvi̱padā̱ chanda̍sendri̱yaṃ bhaga̱mindre̱ vayo̱ dadha̍dvasu̱vane̍ vasu̱dheya̍sya vetu̱ yaja̍
||30.43||दे॒वो वन॒स्पति॑र्दे॒वमिन्द्रं॑ वयो॒धसं॑ दे॒वो दे॒वम॑वर्धयत् ।
द्वि॒पदा॒ छन्द॑सेन्द्रि॒यं भग॒मिन्द्रे॒ वयो॒ दध॑द्वसु॒वने॑ वसु॒धेय॑स्य वेतु॒ यज॑
de̱vaṃ ba̱rhirvāri̍tīnāṃ de̱vamindra̍ṃ vayo̱dhasa̍ṃ de̱vaṃ de̱vama̍vardhayat |
ka̱kubhā̱ chanda̍sendri̱yaṃ yaśa̱ indre̱ vayo̱ dadha̍dvasu̱vane̍ vasu̱dheya̍sya vetu̱ yaja̍
||30.44||दे॒वं ब॒र्हिर्वारि॑तीनां दे॒वमिन्द्रं॑ वयो॒धसं॑ दे॒वं दे॒वम॑वर्धयत् ।
क॒कुभा॒ छन्द॑सेन्द्रि॒यं यश॒ इन्द्रे॒ वयो॒ दध॑द्वसु॒वने॑ वसु॒धेय॑स्य वेतु॒ यज॑
de̱vo a̱gniḥ svi̍ṣṭa̱kṛdde̱vamindra̍ṃ vayo̱dhasa̍ṃ de̱vo de̱vama̍vardhayat |
ati̍cchandasā̱ chanda̍sendri̱yaṃ kṣa̱tramindre̱ vayo̱ dadha̍dvasu̱vane̍ vasu̱dheya̍sya vetu̱ yaja̍
||30.45||दे॒वो अ॒ग्निः स्वि॑ष्ट॒कृद्दे॒वमिन्द्रं॑ वयो॒धसं॑ दे॒वो दे॒वम॑वर्धयत् ।
अति॑च्छन्दसा॒ छन्द॑सेन्द्रि॒यं क्ष॒त्रमिन्द्रे॒ वयो॒ दध॑द्वसु॒वने॑ वसु॒धेय॑स्य वेतु॒ यज॑
a̱gnima̱dya hotā̍ramavṛṇītā̱yaṃ yaja̍māna̱ḥ paca̱npaktī̱ḥ paca̍npuro̱l̤āśa̍ṃ ba̱dhnannindrā̍ya vayo̱dhase̱ chāga̍m |
sū̱pa̱sthā a̱dya de̱vo vana̱spati̍rabhava̱dindrā̍ya vayo̱dhase̱ chāge̍na |
agha̱ttaṃ me̍da̱staḥ prati̍paca̱tāgra̍bhī̱davī̍vṛdhatpuro̱l̤āśe̍na | tvāma̱dya ṛ̍ṣe
||30.46||अ॒ग्निम॒द्य होता॑रमवृणीता॒यं यज॑मानः॒ पच॒न्पक्तीः॒ पच॑न्पुरो॒ळाशं॑ ब॒ध्नन्निन्द्रा॑य वयो॒धसे॒ छाग॑म् ।
सू॒प॒स्था अ॒द्य दे॒वो वन॒स्पति॑रभव॒दिन्द्रा॑य वयो॒धसे॒ छागे॑न ।
अघ॒त्तं मे॑द॒स्तः प्रति॑पच॒ताग्र॑भी॒दवी॑वृधत्पुरो॒ळाशे॑न । त्वाम॒द्य ऋ॑षे