अध्ययनम्
- अनुक्रमणिका
- मूलम्
८ सोमाहुतिर्भार्गवः। अग्निः। गायत्री।
इ॒मां मे॑ अग्ने स॒मिध॑मि॒मामु॑प॒सदं॑ वनेः । इ॒मा उ॒ षु श्रु॑धी॒ गिर॑:
॥१॥i̱māṃ me̍ agne sa̱midha̍mi̱māmu̍pa̱sada̍ṃ vaneḥ | i̱mā u̱ ṣu śru̍dhī̱ gira̍:
अ॒या ते॑ अग्ने विधे॒मोर्जो॑ नपा॒दश्व॑मिष्टे । ए॒ना सू॒क्तेन॑ सुजात
॥२॥a̱yā te̍ agne vidhe̱morjo̍ napā̱daśva̍miṣṭe | e̱nā sū̱ktena̍ sujāta
तं त्वा॑ गी॒र्भिर्गिर्व॑णसं द्रविण॒स्युं द्र॑विणोदः । स॒प॒र्येम॑ सप॒र्यव॑:
॥३॥taṃ tvā̍ gī̱rbhirgirva̍ṇasaṃ draviṇa̱syuṃ dra̍viṇodaḥ | sa̱pa̱ryema̍ sapa̱ryava̍:
स बो॑धि सू॒रिर्म॒घवा॒ वसु॑पते॒ वसु॑दावन् । यु॒यो॒ध्य१स्मद् द्वेषां॑सि
॥४॥sa bo̍dhi sū̱rirma̱ghavā̱ vasu̍pate̱ vasu̍dāvan | yu̱yo̱dhya1smad dveṣā̍ṃsi
स नो॑ वृ॒ष्टिं दि॒वस्परि॒ स नो॒ वाज॑मन॒र्वाण॑म् । स न॑: सह॒स्रिणी॒रिष॑:
॥५॥sa no̍ vṛ̱ṣṭiṃ di̱vaspari̱ sa no̱ vāja̍mana̱rvāṇa̍m | sa na̍: saha̱sriṇī̱riṣa̍:
ईळा॑नायाव॒स्यवे॒ यवि॑ष्ठ दूत नो गि॒रा । यजि॑ष्ठ होत॒रा ग॑हि
॥६॥īl̤ā̍nāyāva̱syave̱ yavi̍ṣṭha dūta no gi̱rā | yaji̍ṣṭha hota̱rā ga̍hi
अ॒न्तर्ह्य॑ग्न॒ ईय॑से वि॒द्वान् जन्मो॒भया॑ कवे । दू॒तो जन्ये॑व॒ मित्र्य॑:
॥७॥a̱ntarhya̍gna̱ īya̍se vi̱dvān janmo̱bhayā̍ kave | dū̱to janye̍va̱ mitrya̍:
स वि॒द्वाँ आ च॑ पिप्रयो॒ यक्षि॑ चिकित्व आनु॒षक् । आ चा॒स्मिन् त्स॑त्सि ब॒र्हिषि॑
॥८॥sa vi̱dvām̐ ā ca̍ piprayo̱ yakṣi̍ cikitva ānu̱ṣak | ā cā̱smin tsa̍tsi ba̱rhiṣi̍