अध्ययनम्
- अनुक्रमणिका
- मूलम्
८ गृत्समद (आङ्गिरसः शौनहोत्रः पश्चाद्) भार्गवः शौनकः। अश्विनौ। त्रिष्टुप्।
ग्रावा॑णेव॒ तदिदर्थं॑ जरेथे॒ गृध्रे॑व वृ॒क्षं नि॑धि॒मन्त॒मच्छ॑ ।
ब्र॒ह्माणे॑व वि॒दथ॑ उक्थ॒शासा॑ दू॒तेव॒ हव्या॒ जन्या॑ पुरु॒त्रा
॥१॥grāvā̍ṇeva̱ tadidartha̍ṃ jarethe̱ gṛdhre̍va vṛ̱kṣaṃ ni̍dhi̱manta̱maccha̍ |
bra̱hmāṇe̍va vi̱datha̍ uktha̱śāsā̍ dū̱teva̱ havyā̱ janyā̍ puru̱trā
प्रा॒त॒र्यावा॑णा र॒थ्ये॑व वी॒रा ऽजेव॑ य॒मा वर॒मा स॑चेथे ।
मेने॑ इव त॒न्वा॒३ शुम्भ॑माने॒ दम्प॑तीव क्रतु॒विदा॒ जने॑षु
॥२॥prā̱ta̱ryāvā̍ṇā ra̱thye̍va vī̱rā 'jeva̍ ya̱mā vara̱mā sa̍cethe |
mene̍ iva ta̱nvā̱3 śumbha̍māne̱ dampa̍tīva kratu̱vidā̱ jane̍ṣu
शृङ्गे॑व नः प्रथ॒मा ग॑न्तम॒र्वाक् छ॒फावि॑व॒ जर्भु॑राणा॒ तरो॑भिः ।
च॒क्र॒वा॒केव॒ प्रति॒ वस्तो॑रुस्रा॒ ऽर्वाञ्चा॑ यातं र॒थ्ये॑व शक्रा
॥३॥śṛṅge̍va naḥ pratha̱mā ga̍ntama̱rvāk cha̱phāvi̍va̱ jarbhu̍rāṇā̱ taro̍bhiḥ |
ca̱kra̱vā̱keva̱ prati̱ vasto̍rusrā̱ 'rvāñcā̍ yātaṃ ra̱thye̍va śakrā
ना॒वेव॑ नः पारयतं यु॒गेव॒ नभ्ये॑व न उप॒धीव॑ प्र॒धीव॑ ।
श्वाने॑व नो॒ अरि॑षण्या त॒नूनां॒ खृग॑लेव वि॒स्रस॑: पातम॒स्मान्
॥४॥nā̱veva̍ naḥ pārayataṃ yu̱geva̱ nabhye̍va na upa̱dhīva̍ pra̱dhīva̍ |
śvāne̍va no̱ ari̍ṣaṇyā ta̱nūnā̱ṃ khṛga̍leva vi̱srasa̍: pātama̱smān
वाते॑वाजु॒र्या न॒द्ये॑व री॒तिर॒क्षी इ॑व॒ चक्षु॒षा या॑तम॒र्वाक् ।
हस्ता॑विव त॒न्वे॒३ शम्भ॑विष्ठा॒ पादे॑व नो नयतं॒ वस्यो॒ अच्छ॑
॥५॥vāte̍vāju̱ryā na̱dye̍va rī̱tira̱kṣī i̍va̱ cakṣu̱ṣā yā̍tama̱rvāk |
hastā̍viva ta̱nve̱3 śambha̍viṣṭhā̱ pāde̍va no nayata̱ṃ vasyo̱ accha̍
ओष्ठा॑विव॒ मध्वा॒स्ने वद॑न्ता॒ स्तना॑विव पिप्यतं जी॒वसे॑ नः ।
नासे॑व नस्त॒न्वो॑ रक्षि॒तारा॒ कर्णा॑विव सु॒श्रुता॑ भूतम॒स्मे
॥६॥oṣṭhā̍viva̱ madhvā̱sne vada̍ntā̱ stanā̍viva pipyataṃ jī̱vase̍ naḥ |
nāse̍va nasta̱nvo̍ rakṣi̱tārā̱ karṇā̍viva su̱śrutā̍ bhūtama̱sme
हस्ते॑व श॒क्तिम॒भि सं॑द॒दी न॒: क्षामे॑व न॒: सम॑जतं॒ रजां॑सि ।
इ॒मा गिरो॑ अश्विना युष्म॒यन्ती॒: क्ष्णोत्रे॑णेव॒ स्वधि॑तिं॒ सं शि॑शीतम्
॥७॥haste̍va śa̱ktima̱bhi sa̍ṃda̱dī na̱: kṣāme̍va na̱: sama̍jata̱ṃ rajā̍ṃsi |
i̱mā giro̍ aśvinā yuṣma̱yantī̱: kṣṇotre̍ṇeva̱ svadhi̍ti̱ṃ saṃ śi̍śītam
ए॒तानि॑ वामश्विना॒ वर्ध॑नानि॒ ब्रह्म॒ स्तोमं॑ गृत्सम॒दासो॑ अक्रन् ।
तानि॑ नरा जुजुषा॒णोप॑ यातं बृ॒हद् व॑देम वि॒दथे॑ सु॒वीरा॑:
॥८॥e̱tāni̍ vāmaśvinā̱ vardha̍nāni̱ brahma̱ stoma̍ṃ gṛtsama̱dāso̍ akran |
tāni̍ narā jujuṣā̱ṇopa̍ yātaṃ bṛ̱had va̍dema vi̱dathe̍ su̱vīrā̍: