Study
- Anukramaṇī
- Source
6 gṛtsamada (āṅgirasaḥ śaunahotraḥ paścād) bhārgavaḥ śaunakaḥ| agniḥ| triṣṭup|
ni hotā̍ hotṛ̱ṣada̍ne̱ vidā̍nastve̱ṣo dī̍di̱vām̐ a̍sadat su̱dakṣa̍: |
ada̍bdhavratapramati̱rvasi̍ṣṭhaḥ sahasrambha̱raḥ śuci̍jihvo a̱gniḥ
||1||नि होता॑ होतृ॒षद॑ने॒ विदा॑नस्त्वे॒षो दी॑दि॒वाँ अ॑सदत् सु॒दक्ष॑: ।
अद॑ब्धव्रतप्रमति॒र्वसि॑ष्ठः सहस्रम्भ॒रः शुचि॑जिह्वो अ॒ग्निः
tvaṃ dū̱tastvamu̍ naḥ para̱spāstvaṃ vasya̱ ā vṛ̍ṣabha praṇe̱tā |
agne̍ to̱kasya̍ na̱stane̍ ta̱nūnā̱mapra̍yuccha̱n dīdya̍d bodhi go̱pāḥ
||2||त्वं दू॒तस्त्वमु॑ नः पर॒स्पास्त्वं वस्य॒ आ वृ॑षभ प्रणे॒ता ।
अग्ने॑ तो॒कस्य॑ न॒स्तने॑ त॒नूना॒मप्र॑युच्छ॒न् दीद्य॑द् बोधि गो॒पाः
vi̱dhema̍ te para̱me janma̍nnagne vi̱dhema̱ stomai̱rava̍re sa̱dhasthe̍ |
yasmā̱d yone̍ru̱dāri̍thā̱ yaje̱ taṃ pra tve ha̱vīṃṣi̍ juhure̱ sami̍ddhe
||3||वि॒धेम॑ ते पर॒मे जन्म॑न्नग्ने वि॒धेम॒ स्तोमै॒रव॑रे स॒धस्थे॑ ।
यस्मा॒द् योने॑रु॒दारि॑था॒ यजे॒ तं प्र त्वे ह॒वींषि॑ जुहुरे॒ समि॑द्धे
agne̱ yaja̍sva ha̱viṣā̱ yajī̍yāñchru̱ṣṭī de̱ṣṇama̱bhi gṛ̍ṇīhi̱ rādha̍: |
tvaṃ hyasi̍ rayi̱patī̍ rayī̱ṇāṃ tvaṃ śu̱krasya̱ vaca̍so ma̱notā̍
||4||अग्ने॒ यज॑स्व ह॒विषा॒ यजी॑याञ्छ्रु॒ष्टी दे॒ष्णम॒भि गृ॑णीहि॒ राध॑: ।
त्वं ह्यसि॑ रयि॒पती॑ रयी॒णां त्वं शु॒क्रस्य॒ वच॑सो म॒नोता॑
u̱bhaya̍ṃ te̱ na kṣī̍yate vasa̱vya̍ṃ di̱vedi̍ve̱ jāya̍mānasya dasma |
kṛ̱dhi kṣu̱manta̍ṃ jari̱tāra̍magne kṛ̱dhi pati̍ṃ svapa̱tyasya̍ rā̱yaḥ
||5||उ॒भयं॑ ते॒ न क्षी॑यते वस॒व्यं॑ दि॒वेदि॑वे॒ जाय॑मानस्य दस्म ।
कृ॒धि क्षु॒मन्तं॑ जरि॒तार॑मग्ने कृ॒धि पतिं॑ स्वप॒त्यस्य॑ रा॒यः
sainānī̍kena suvi̱datro̍ a̱sme yaṣṭā̍ de̱vām̐ āya̍jiṣṭhaḥ sva̱sti |
ada̍bdho go̱pā u̱ta na̍: para̱spā agne̍ dyu̱madu̱ta re̱vad di̍dīhi
||6||सैनानी॑केन सुवि॒दत्रो॑ अ॒स्मे यष्टा॑ दे॒वाँ आय॑जिष्ठः स्व॒स्ति ।
अद॑ब्धो गो॒पा उ॒त न॑: पर॒स्पा अग्ने॑ द्यु॒मदु॒त रे॒वद् दि॑दीहि