Study
- Anukramaṇī
- Source
12 gṛtsamada (āṅgirasaḥ śaunahotraḥ paścād) bhārgavaḥ śaunakaḥ| indraḥ| triṣṭup|
adhva̍ryavo̱ bhara̱tendrā̍ya̱ soma̱māma̍trebhiḥ siñcatā̱ madya̱mandha̍: |
kā̱mī hi vī̱raḥ sada̍masya pī̱tiṃ ju̱hota̱ vṛṣṇe̱ tadide̱ṣa va̍ṣṭi
||1||अध्व॑र्यवो॒ भर॒तेन्द्रा॑य॒ सोम॒माम॑त्रेभिः सिञ्चता॒ मद्य॒मन्ध॑: ।
का॒मी हि वी॒रः सद॑मस्य पी॒तिं जु॒होत॒ वृष्णे॒ तदिदे॒ष व॑ष्टि
adhva̍ryavo̱ yo a̱po va̍vri̱vāṃsa̍ṃ vṛ̱traṃ ja̱ghānā̱śanye̍va vṛ̱kṣam |
tasmā̍ e̱taṃ bha̍rata tadva̱śāya̍m̐ e̱ṣa indro̍ arhati pī̱tima̍sya
||2||अध्व॑र्यवो॒ यो अ॒पो व॑व्रि॒वांसं॑ वृ॒त्रं ज॒घाना॒शन्ये॑व वृ॒क्षम् ।
तस्मा॑ ए॒तं भ॑रत तद्व॒शायँ॑ ए॒ष इन्द्रो॑ अर्हति पी॒तिम॑स्य
adhva̍ryavo̱ yo dṛbhī̍kaṃ ja̱ghāna̱ yo gā u̱dāja̱dapa̱ hi va̱laṃ vaḥ |
tasmā̍ e̱tama̱ntari̍kṣe̱ na vāta̱mindra̱ṃ somai̱rorṇu̍ta̱ jūrna vastrai̍:
||3||अध्व॑र्यवो॒ यो दृभी॑कं ज॒घान॒ यो गा उ॒दाज॒दप॒ हि व॒लं वः ।
तस्मा॑ ए॒तम॒न्तरि॑क्षे॒ न वात॒मिन्द्रं॒ सोमै॒रोर्णु॑त॒ जूर्न वस्त्रै॑:
adhva̍ryavo̱ ya ura̍ṇaṃ ja̱ghāna̱ nava̍ ca̱khvāṃsa̍ṃ nava̱tiṃ ca̍ bā̱hūn |
yo arbu̍da̱mava̍ nī̱cā ba̍bā̱dhe tamindra̱ṃ soma̍sya bhṛ̱the hi̍nota
||4||अध्व॑र्यवो॒ य उर॑णं ज॒घान॒ नव॑ च॒ख्वांसं॑ नव॒तिं च॑ बा॒हून् ।
यो अर्बु॑द॒मव॑ नी॒चा ब॑बा॒धे तमिन्द्रं॒ सोम॑स्य भृ॒थे हि॑नोत
adhva̍ryavo̱ yaḥ svaśna̍ṃ ja̱ghāna̱ yaḥ śuṣṇa̍ma̱śuṣa̱ṃ yo vya̍ṃsam |
yaḥ pipru̱ṃ namu̍ci̱ṃ yo ru̍dhi̱krāṃ tasmā̱ indrā̱yāndha̍so juhota
||5||अध्व॑र्यवो॒ यः स्वश्नं॑ ज॒घान॒ यः शुष्ण॑म॒शुषं॒ यो व्यं॑सम् ।
यः पिप्रुं॒ नमु॑चिं॒ यो रु॑धि॒क्रां तस्मा॒ इन्द्रा॒यान्ध॑सो जुहोत
adhva̍ryavo̱ yaḥ śa̱taṃ śamba̍rasya̱ puro̍ bi̱bhedāśma̍neva pū̱rvīḥ |
yo va̱rcina̍: śa̱tamindra̍: sa̱hasra̍ma̱pāva̍pa̱d bhara̍tā̱ soma̍masmai
||6||अध्व॑र्यवो॒ यः श॒तं शम्ब॑रस्य॒ पुरो॑ बि॒भेदाश्म॑नेव पू॒र्वीः ।
यो व॒र्चिन॑: श॒तमिन्द्र॑: स॒हस्र॑म॒पाव॑प॒द् भर॑ता॒ सोम॑मस्मै
adhva̍ryavo̱ yaḥ śa̱tamā sa̱hasra̱ṃ bhūmyā̍ u̱pasthe'va̍pajjagha̱nvān |
kutsa̍syā̱yora̍tithi̱gvasya̍ vī̱rān nyāvṛ̍ṇa̱g bhara̍tā̱ soma̍masmai
||7||अध्व॑र्यवो॒ यः श॒तमा स॒हस्रं॒ भूम्या॑ उ॒पस्थेऽव॑पज्जघ॒न्वान् ।
कुत्स॑स्या॒योर॑तिथि॒ग्वस्य॑ वी॒रान् न्यावृ॑ण॒ग् भर॑ता॒ सोम॑मस्मै
adhva̍ryavo̱ yanna̍raḥ kā̱mayā̍dhve śru̱ṣṭī vaha̍nto naśathā̱ tadindre̍ |
gabha̍stipūtaṃ bharata śru̱tāyendrā̍ya̱ soma̍ṃ yajyavo juhota
||8||अध्व॑र्यवो॒ यन्न॑रः का॒मया॑ध्वे श्रु॒ष्टी वह॑न्तो नशथा॒ तदिन्द्रे॑ ।
गभ॑स्तिपूतं भरत श्रु॒तायेन्द्रा॑य॒ सोमं॑ यज्यवो जुहोत
adhva̍ryava̱: karta̍nā śru̱ṣṭima̍smai̱ vane̱ nipū̍ta̱ṃ vana̱ unna̍yadhvam |
ju̱ṣā̱ṇo hastya̍ma̱bhi vā̍vaśe va̱ indrā̍ya̱ soma̍ṃ madi̱raṃ ju̍hota
||9||अध्व॑र्यव॒: कर्त॑ना श्रु॒ष्टिम॑स्मै॒ वने॒ निपू॑तं॒ वन॒ उन्न॑यध्वम् ।
जु॒षा॒णो हस्त्य॑म॒भि वा॑वशे व॒ इन्द्रा॑य॒ सोमं॑ मदि॒रं जु॑होत
adhva̍ryava̱: paya̱sodha̱ryathā̱ goḥ some̍bhirīṃ pṛṇatā bho̱jamindra̍m |
vedā̱hama̍sya̱ nibhṛ̍taṃ ma e̱tad ditsa̍nta̱ṃ bhūyo̍ yaja̱taści̍keta
||10||अध्व॑र्यव॒: पय॒सोध॒र्यथा॒ गोः सोमे॑भिरीं पृणता भो॒जमिन्द्र॑म् ।
वेदा॒हम॑स्य॒ निभृ॑तं म ए॒तद् दित्स॑न्तं॒ भूयो॑ यज॒तश्चि॑केत
adhva̍ryavo̱ yo di̱vyasya̱ vasvo̱ yaḥ pārthi̍vasya̱ kṣamya̍sya̱ rājā̍ |
tamūrda̍ra̱ṃ na pṛ̍ṇatā̱ yave̱nendra̱ṃ some̍bhi̱stadapo̍ vo astu
||11||अध्व॑र्यवो॒ यो दि॒व्यस्य॒ वस्वो॒ यः पार्थि॑वस्य॒ क्षम्य॑स्य॒ राजा॑ ।
तमूर्द॑रं॒ न पृ॑णता॒ यवे॒नेन्द्रं॒ सोमे॑भि॒स्तदपो॑ वो अस्तु
a̱smabhya̱ṃ tad va̍so dā̱nāya̱ rādha̱: sama̍rthayasva ba̱hu te̍ vasa̱vya̍m |
indra̱ yacci̱traṃ śra̍va̱syā anu̱ dyūnbṛ̱hadva̍dema vi̱dathe̍ su̱vīrā̍:
||12||अ॒स्मभ्यं॒ तद् व॑सो दा॒नाय॒ राध॒: सम॑र्थयस्व ब॒हु ते॑ वस॒व्य॑म् ।
इन्द्र॒ यच्चि॒त्रं श्र॑व॒स्या अनु॒ द्यून्बृ॒हद्व॑देम वि॒दथे॑ सु॒वीरा॑: