Study
- Anukramaṇī
- Source
9 gṛtsamada (āṅgirasaḥ śaunahotraḥ paścād) bhārgavaḥ śaunakaḥ| indraḥ| jagatī, 9 triṣṭup|
pra va̍: sa̱tāṃ jyeṣṭha̍tamāya suṣṭu̱tima̱gnāvi̍va samidhā̱ne ha̱virbha̍re |
indra̍maju̱ryaṃ ja̱raya̍ntamukṣi̱taṃ sa̱nād yuvā̍na̱mava̍se havāmahe
||1||प्र व॑: स॒तां ज्येष्ठ॑तमाय सुष्टु॒तिम॒ग्नावि॑व समिधा॒ने ह॒विर्भ॑रे ।
इन्द्र॑मजु॒र्यं ज॒रय॑न्तमुक्षि॒तं स॒नाद् युवा॑न॒मव॑से हवामहे
yasmā̱dindrā̍d bṛha̱taḥ kiṃ ca̱nemṛ̱te viśvā̍nyasmi̱n tsaṃbhṛ̱tādhi̍ vī̱ryā̍ |
ja̱ṭhare̱ soma̍ṃ ta̱nvī̱3 saho̱ maho̱ haste̱ vajra̱ṃ bhara̍ti śī̱rṣaṇi̱ kratu̍m
||2||यस्मा॒दिन्द्रा॑द् बृह॒तः किं च॒नेमृ॒ते विश्वा॑न्यस्मि॒न् त्संभृ॒ताधि॑ वी॒र्या॑ ।
ज॒ठरे॒ सोमं॑ त॒न्वी॒३ सहो॒ महो॒ हस्ते॒ वज्रं॒ भर॑ति शी॒र्षणि॒ क्रतु॑म्
na kṣo̱ṇībhyā̍ṃ pari̱bhve̍ ta indri̱yaṃ na sa̍mu̱draiḥ parva̍tairindra te̱ ratha̍: |
na te̱ vajra̱manva̍śnoti̱ kaśca̱na yadā̱śubhi̱: pata̍si̱ yoja̍nā pu̱ru
||3||न क्षो॒णीभ्यां॑ परि॒भ्वे॑ त इन्द्रि॒यं न स॑मु॒द्रैः पर्व॑तैरिन्द्र ते॒ रथ॑: ।
न ते॒ वज्र॒मन्व॑श्नोति॒ कश्च॒न यदा॒शुभि॒: पत॑सि॒ योज॑ना पु॒रु
viśve̱ hya̍smai yaja̱tāya̍ dhṛ̱ṣṇave̱ kratu̱ṃ bhara̍nti vṛṣa̱bhāya̱ saśca̍te |
vṛṣā̍ yajasva ha̱viṣā̍ vi̱duṣṭa̍ra̱: pibe̍ndra̱ soma̍ṃ vṛṣa̱bheṇa̍ bhā̱nunā̍
||4||विश्वे॒ ह्य॑स्मै यज॒ताय॑ धृ॒ष्णवे॒ क्रतुं॒ भर॑न्ति वृष॒भाय॒ सश्च॑ते ।
वृषा॑ यजस्व ह॒विषा॑ वि॒दुष्ट॑र॒: पिबे॑न्द्र॒ सोमं॑ वृष॒भेण॑ भा॒नुना॑
vṛṣṇa̱: kośa̍: pavate̱ madhva̍ ū̱rmirvṛ̍ṣa̱bhānnā̍ya vṛṣa̱bhāya̱ pāta̍ve |
vṛṣa̍ṇādhva̱ryū vṛ̍ṣa̱bhāso̱ adra̍yo̱ vṛṣa̍ṇa̱ṃ soma̍ṃ vṛṣa̱bhāya̍ suṣvati
||5||वृष्ण॒: कोश॑: पवते॒ मध्व॑ ऊ॒र्मिर्वृ॑ष॒भान्ना॑य वृष॒भाय॒ पात॑वे ।
वृष॑णाध्व॒र्यू वृ॑ष॒भासो॒ अद्र॑यो॒ वृष॑णं॒ सोमं॑ वृष॒भाय॑ सुष्वति
vṛṣā̍ te̱ vajra̍ u̱ta te̱ vṛṣā̱ ratho̱ vṛṣa̍ṇā̱ harī̍ vṛṣa̱bhāṇyāyu̍dhā |
vṛṣṇo̱ mada̍sya vṛṣabha̱ tvamī̍śiṣa̱ indra̱ soma̍sya vṛṣa̱bhasya̍ tṛpṇuhi
||6||वृषा॑ ते॒ वज्र॑ उ॒त ते॒ वृषा॒ रथो॒ वृष॑णा॒ हरी॑ वृष॒भाण्यायु॑धा ।
वृष्णो॒ मद॑स्य वृषभ॒ त्वमी॑शिष॒ इन्द्र॒ सोम॑स्य वृष॒भस्य॑ तृप्णुहि
pra te̱ nāva̱ṃ na sama̍ne vaca̱syuva̱ṃ brahma̍ṇā yāmi̱ sava̍neṣu̱ dādhṛ̍ṣiḥ |
ku̱vinno̍ a̱sya vaca̍so ni̱bodhi̍ṣa̱dindra̱mutsa̱ṃ na vasu̍naḥ sicāmahe
||7||प्र ते॒ नावं॒ न सम॑ने वच॒स्युवं॒ ब्रह्म॑णा यामि॒ सव॑नेषु॒ दाधृ॑षिः ।
कु॒विन्नो॑ अ॒स्य वच॑सो नि॒बोधि॑ष॒दिन्द्र॒मुत्सं॒ न वसु॑नः सिचामहे
pu̱rā sa̍mbā̱dhāda̱bhyā va̍vṛtsva no dhe̱nurna va̱tsaṃ yava̍sasya pi̱pyuṣī̍ |
sa̱kṛtsu te̍ suma̱tibhi̍: śatakrato̱ saṃ patnī̍bhi̱rna vṛṣa̍ṇo nasīmahi
||8||पु॒रा स॑म्बा॒धाद॒भ्या व॑वृत्स्व नो धे॒नुर्न व॒त्सं यव॑सस्य पि॒प्युषी॑ ।
स॒कृत्सु ते॑ सुम॒तिभि॑: शतक्रतो॒ सं पत्नी॑भि॒र्न वृष॑णो नसीमहि
nū̱naṃ sā te̱ prati̱ vara̍ṃ jari̱tre du̍hī̱yadi̍ndra̱ dakṣi̍ṇā ma̱ghonī̍ |
śikṣā̍ sto̱tṛbhyo̱ māti̍ dha̱gbhago̍ no bṛ̱had va̍dema vi̱dathe̍ su̱vīrā̍:
||9||नू॒नं सा ते॒ प्रति॒ वरं॑ जरि॒त्रे दु॑ही॒यदि॑न्द्र॒ दक्षि॑णा म॒घोनी॑ ।
शिक्षा॑ स्तो॒तृभ्यो॒ माति॑ ध॒ग्भगो॑ नो बृ॒हद् व॑देम वि॒दथे॑ सु॒वीरा॑: