Study
- Anukramaṇī
- Source
6 gṛtsamada (āṅgirasaḥ śaunahotraḥ paścād) bhārgavaḥ śaunakaḥ| ṛtudevatāḥ- 1-4 draviṇodā ṛtavaśca, 5 aśvinau ṛtavaśca, 6 agniḥ ṛtuśca| jagatī|
manda̍sva ho̱trādanu̱ joṣa̱mandha̱so 'dhva̍ryava̱: sa pū̱rṇāṃ va̍ṣṭyā̱sica̍m |
tasmā̍ e̱taṃ bha̍rata tadva̱śo da̱dirho̱trāt soma̍ṃ draviṇoda̱: piba̍ ṛ̱tubhi̍:
||1||मन्द॑स्व हो॒त्रादनु॒ जोष॒मन्ध॒सो ऽध्व॑र्यव॒: स पू॒र्णां व॑ष्ट्या॒सिच॑म् ।
तस्मा॑ ए॒तं भ॑रत तद्व॒शो द॒दिर्हो॒त्रात् सोमं॑ द्रविणोद॒: पिब॑ ऋ॒तुभि॑:
yamu̱ pūrva̱mahu̍ve̱ tami̱daṃ hu̍ve̱ sedu̱ havyo̍ da̱diryo nāma̱ patya̍te |
a̱dhva̱ryubhi̱: prasthi̍taṃ so̱myaṃ madhu̍ po̱trāt soma̍ṃ draviṇoda̱: piba̍ ṛ̱tubhi̍:
||2||यमु॒ पूर्व॒महु॑वे॒ तमि॒दं हु॑वे॒ सेदु॒ हव्यो॑ द॒दिर्यो नाम॒ पत्य॑ते ।
अ॒ध्व॒र्युभि॒: प्रस्थि॑तं सो॒म्यं मधु॑ पो॒त्रात् सोमं॑ द्रविणोद॒: पिब॑ ऋ॒तुभि॑:
medya̍ntu te̱ vahna̍yo̱ yebhi̱rīya̱se 'ri̍ṣaṇyan vīl̤ayasvā vanaspate |
ā̱yūyā̍ dhṛṣṇo abhi̱gūryā̱ tvaṃ ne̱ṣṭrāt soma̍ṃ draviṇoda̱: piba̍ ṛ̱tubhi̍:
||3||मेद्य॑न्तु ते॒ वह्न॑यो॒ येभि॒रीय॒से ऽरि॑षण्यन् वीळयस्वा वनस्पते ।
आ॒यूया॑ धृष्णो अभि॒गूर्या॒ त्वं ने॒ष्ट्रात् सोमं॑ द्रविणोद॒: पिब॑ ऋ॒तुभि॑:
apā̍ddho̱trādu̱ta po̱trāda̍matto̱ta ne̱ṣṭrāda̍juṣata̱ prayo̍ hi̱tam |
tu̱rīya̱ṃ pātra̱mamṛ̍kta̱mama̍rtyaṃ draviṇo̱dāḥ pi̍batu drāviṇoda̱saḥ
||4||अपा॑द्धो॒त्रादु॒त पो॒त्राद॑मत्तो॒त ने॒ष्ट्राद॑जुषत॒ प्रयो॑ हि॒तम् ।
तु॒रीयं॒ पात्र॒ममृ॑क्त॒मम॑र्त्यं द्रविणो॒दाः पि॑बतु द्राविणोद॒सः
a̱rvāñca̍ma̱dya ya̱yya̍ṃ nṛ̱vāha̍ṇa̱ṃ ratha̍ṃ yuñjāthāmi̱ha vā̍ṃ vi̱moca̍nam |
pṛ̱ṅktaṃ ha̱vīṃṣi̱ madhu̱nā hi ka̍ṃ ga̱tamathā̱ soma̍ṃ pibataṃ vājinīvasū
||5||अ॒र्वाञ्च॑म॒द्य य॒य्यं॑ नृ॒वाह॑णं॒ रथं॑ युञ्जाथामि॒ह वां॑ वि॒मोच॑नम् ।
पृ॒ङ्क्तं ह॒वींषि॒ मधु॒ना हि कं॑ ग॒तमथा॒ सोमं॑ पिबतं वाजिनीवसू
joṣya̍gne sa̱midha̱ṃ joṣyāhu̍ti̱ṃ joṣi̱ brahma̱ janya̱ṃ joṣi̍ suṣṭu̱tim |
viśve̍bhi̱rviśvā̍m̐ ṛ̱tunā̍ vaso ma̱ha u̱śan de̱vām̐ u̍śa̱taḥ pā̍yayā ha̱viḥ
||6||जोष्य॑ग्ने स॒मिधं॒ जोष्याहु॑तिं॒ जोषि॒ ब्रह्म॒ जन्यं॒ जोषि॑ सुष्टु॒तिम् ।
विश्वे॑भि॒र्विश्वाँ॑ ऋ॒तुना॑ वसो म॒ह उ॒शन् दे॒वाँ उ॑श॒तः पा॑यया ह॒विः